འཛམ་གླིང་ཞི་བདེའི་གཏེར་མཛོད་ཆེན་པོ་རུ།།
མངའ་གསོལ་འཕགས་མཆོག་སྤྱན་རས་གཟིགས་དབང་ཁྱེད།།
ཆེ་རྒུ་དབྱིག་གི་དབུས་ན་ནོར་བུ་བཞིན།།
ཀུན་གྱི་གཙུག་གི་རྒྱན་དུ་བཀུར་འདིར་མཚར།།

སྐུ་ནི་མཚན་དཔེའི་དཔལ་གྱིས་རབ་ཏུ་བརྗིད།།
གསུང་ནི་བདག་ཅག་རྨོངས་པའི་མུན་པ་སེལ།།
ཐུགས་ནི་བྱམས་བརྩེའི་འགྲོ་ཀུན་བུ་བཞིན་སྐྱོང།།
འཇིག་རྟེན་མིག་གཅིག་༸གོང་ས་ཆེན་པོར་འདུད།།

དད་གསུམ་མེ་ཏོག་འཛུམ་དཀར་ཁྱོད་ལ་ངོམས།།
ཀུན་ཁྱབ་ཁྱབ་བརྡལ་ཀུན་ཏུ་དགོངས་ཀློང་དུ།།
ཡུལ་ཁམས་དྲུག་གི་སྐྱབས་གནས་བྱང་ཆུབ་ཁྱོད།།
སེམས་ཅན་ཐུགས་བསྐྱེད་རྡོ་རྗེའི་དམ་བཅའ་ལས།།
སྤྲུལ་པའི་ཞི་བདེ་འཛམ་གླིང་ཡོངས་ལ་ཁྱབ།།
མཚན་དཔེའི་པདྨ་མདོ་སྨད་ཡུལ་ནས་བཞད།།
བསྟན་པའི་ཤཀྱཱ་ལུགས་ཀྱི་བདག་པོ་བཟུང།།
འགྲོ་དྲུག་ཡུལ་ལ་ཕན་བདེའི་དགའ་སྟོན་བགྲང་།།
གསུངས་པའི་ངག་སྒྲ་གླིང་བཞིའི་མཐའ་ལ་ཁྱབ།།
སངས་རྒྱས་དབུས་ནས་ལྷ་ཡི་གསུངས་པ་དང།།
གཟའ་སྐར་ཁྲོད་ནས་ཉིན་བྱེད་གཞོན་ནུ་བཞིན།།
སྐྱེས་ཆེན་བྱེ་བའི་གྲལ་ནས་མངོན་འཕགས་པ།།
ཉིན་མཚན་བསྐལ་པ་རྒྱ་མཚོར་བརྟན་པར་བཞུགས།།
རྡོ་རྗེ་བརྗིད་པའི་ངག་གི་བཟི་བྱིན་རྒྱས།།
ངག་གི་དབང་བསྐུར་མདོ་སྔགས་རྟག་ཏུ་གསུངས།།
བདེ་སྟོང་དབྱེར་མེད་ཐུགས་ཀྱི་ཏིང་འཛིན་གསལ།།
གསང་གསུམ་མཛད་པ་མཐར་ཕྱིན་བཀྲ་ཤིས་ཤོག །

འཛིན་གྲྭ་ཕར་ཕྱིན་ལོ་རིམ་གསུམ་པ། སྟག་ཚང་རིན་ཆེན་བཟང་པོ།