རྒྱུད་ཀྱི་རྒྱལ་པོ་དཔལ་གསང་བ་འདུས་པའི་བྱུང་རིམ།
༄༅། །སྟོན་པ་ཐུབ་པའི་དབང་པོས་རིན་པོ་ཆེ་ལྟ་བུའི་གང་ཟག་སོགས་གདུལ་བྱ་རིགས་ཅན་དབང་རྣོན་རྣམས་རྗེས་སུ་གཟུང་བའི་ཕྱིར་འབྲས་བུ་གསང་སྔགས་རྡོ་རྗེ་ཐེག་པའི་རྒྱུད་ནམ་མཁའི་སྐར་ཚོགས་ལྟར་བསྩལ་ཡོད་པ་དེ་དག་གི་ཁྲོད་ནས། རྒྱུད་ཀྱི་རྒྱལ་པོ་དཔལ་གསང་བ་འདུས་པའི་བྱུང་བ་མདོར་བསྡུས་ཤིག་སྐབས་འདིར་གླེང་བར་བྱ་བའི་ཆོས་སོ།།
དེ་ཡང་ཨུ་རྒྱན་ཡུལ་གྱི་རྒྱལ་པོ་ཆེན་པོ་ཨིནྡྲ་བྷུ་ཏི་ཞེས་པ་རིན་པོ་ཆེ་ལྟ་བུའི་གང་ཟག་གི་མཚན་ཉིད་ཡོངས་སུ་རྫོགས་པ་ཞིག་ཡོད་པ་དེས། དགྲ་བཅོམ་པ་མང་པོ་ནམ་མཁར་འཕུར་པ་སོགས་རྫུ་འཕྲུལ་ལ་མངའ་བརྙེས་པ་མཐོང་ཞིང་བརྟགས་པ་ན། དེ་ནི་སངས་རྒྱས་ཀྱི་འཁོར་ཉན་ཐོས་རྣམས་ཡིན་པར་ཤེས་ནས་དེ་ལྟ་བུའི་འཁོར་དང་བཅས་པའི་སངས་རྒྱས་བཅོམ་ལྡན་འདས་ངའི་ཨུ་རྒྱན་གྱི་ཡུལ་དུ་ལན་གཅིག་ཙམ་ཞིག་བྱོན་པས་ཀྱང་ཕན་པ་དང་ལེགས་པ་ཤ་སྟག་འབྱུང་ངེས་ལགས་སོ་སྙམ་དུ་དགོངས་པ་ན། སངས་རྒྱས་བཅོམ་ལྡན་འདས་ཀྱིས་རྒྱལ་པོ་གདུལ་བའི་དུས་ལ་བབས་པ་གཟིགས་ནས་ཨུ་རྒྱན་ཡུལ་དུ་བྱོན་ནོ། །དེ་ནས་རྒྱལ་པོས་བདག་ལ་འདོད་ཡོན་ལ་ཆགས་པ་སྤང་མི་དགོས་པའི་འཚང་རྒྱ་བའི་ཐབས་ཤིག་བསྩལ་དུ་གསོལ་ཞེས་ཞུས་པར། བཅོམ་ལྡན་འདས་ཀྱིས་དགོས་པའི་དབང་གིས་དགེ་སློང་ཆགས་བྲལ་གྱི་སྐུ་ལས་སྡང་སྟེ་འཁོར་ལོ་བསྒྱུར་བའི་རྒྱལ་པོའི་རྣམ་པར་སྤྲུལ་ནས་དཔལ་གསང་པ་འདུས་པའི་ཟབ་མོའི་ཆོས་ཀྱི་འཁོར་ལོ་རྒྱ་ཆེར་སྐོར་བར་མཛད་དོ།།
དེ་ནས་རིམ་བཞིན་འདུས་པའི་རྟེན་དང་བརྟེན་པའི་དཀྱིལ་འཁོར་གྱི་རྣམ་གཞག་དང་། རྒྱུད་ཀྱི་དགོངས་དོན་བཀྲལ་བའི་ཚུལ་སོགས་ལས་འཕགས་ཡུལ་དུ་རྒྱུད་འདིའི་མན་ངག་གི་ལུགས་བཅུ་ཕྲག་གཉིས་ལྷག་ཙམ་བྱུང་བར་མཁས་གྲུབ་རྣམས་ཀྱིས་བཞེད་ཀྱང་། རང་ཅག་བོད་ཀྱི་ཡུལ་དུ་འདུས་པ་འཕགས་ལུགས་ཏེ་དཔལ་མགོན་འཕགས་པ་ཀླུ་སྒྲུབ་ནས་བརྒྱུད་པ་མི་བསྐྱོད་རྡོ་རྗེ་ལྷ་སོ་གཉིས་ཅན་མ་དང་། སློབ་དཔོན་སངས་རྒྱས་ཡེ་ཤེས་ཞབས་ནས་བརྒྱུད་པ་འཇམ་རྡོར་ལྷ་བཅུ་དགུ་མ་སྟེ་ཡོངས་གྲགས་སུ་ཡེ་ཤེས་ཞབས་ལུགས་ཞེས་པ་འདི་དག་བྱུང་ངོ།།
འདུས་པ་འཕགས་ལུགས་ལའང་བོད་ཀྱིས་མཁས་གྲུབ་རྣམས་ཀྱིས་མར་འགོས་ཀྱི་ལུགས་ཞེས་གཉིས་སུ་གྱེས་ཏེ། ༸རྗེ་བདག་ཉིད་ཆེན་པོས་དང་པོ་ནི་གདམས་ངག་གི་ཁྱད་འཕགས་དང་། ཕྱི་མ་ནི་བཤད་སྲོལ་གྱིས་ཁྱད་པར་འཕགས་པའོ་ཞེས་གསུངས་སོ། །དེ་ཡང་མར་ལུགས་ནི་འཕགས་པ་ཀླུ་སྒྲུབ་ནས་ཉིད་ཀྱི་ཐུགས་སྲས་ཚན་མ་ཏིཾ་ཀི་དང་། དེ་ནས་ཏི་ལོ་པ། ནཱ་རོ་པ། མར་པ་སོགས་སུ་བརྒྱུད་པ་ལ་བྱས་ཤིང་། འགོས་ལུགས་ནི་དཔལ་མགོན་འཕགས་པ་ཀླུ་སྒྲུབ་ནས་དཔལ་ལྡན་ཟླ་བ་གྲགས་པ། སློབ་པའི་རྡོ་རྗེ། ནག་པོ་སྤྱོད་པ། སྤྲིན་གྱི་ཤུགས་ཅན་སོགས་ནས་རིམ་བཞིན་འགོས་ལ་བརྒྱུད་པར་བཤད་དོ། །དེ་ནས་མར་འགོས་གཉིས་ཀྱི་རྒྱུད་པ་གཉིས་གཅིག་ཏུ་འདྲེས་པའི་གདམས་ངག་དེ་ཡབ་རྗེ་ཆོས་ཀྱི་རྒྱལ་པོ་ཙོང་ཁ་པ་ཆེན་པོས་རྗེ་རེད་མདའ་བ་ལས་བསན་ཏེ་སྲས་ཀྱི་ཐུ་བོ་༸རྗེ་བཙུན་ཤེས་རབ་སྙན་ཚོམས།གསེང་གེ་སོགས་དཔལ་གསང་བ་འདུས་པའི་ལྷ་སྔགས་ཏིང་འཛིན་གྱི་གྲུབ་པ་བརྙེས་པའི་རྣལ་འབྱོར་པ་ཆེན་པོ་གནམ་ནས་ས་བཀབ་པ་ལྟར་བུ་བྱུང་བ་ནི་ཁ་བའི་ཡུལ་ཆེན་པོར་རླུང་ལྟར་གྲགས་སོ།།
རྒྱུད་འདིའི་ལྷ་སྒྲུབ་པའི་ཚུལ་ལ་ཡང་མང་དུ་ཡོད་པ་ལས་གཙོ་བོར་བསྐྱེད་རིམ་གྱི་རྣལ་འབྱོར་བཞི་དང་རྫོགས་རིམ་གྱི་རིམ་པ་ལྔ་ཏེ་མདོར་ན་བསྐྱེད་རྫོགས་ཀྱི་རིམ་པ་གཉིས་སུ་འདུས་ཞིང་། འོད་གསལ་དང་སྒྱུ་ལུས་སྒྲུབ་པའི་མན་ངག་ཁྱད་འཕགས་ཅན་ཡང་འདི་ཉིད་ལ་བྱ་སྟེ། བརྟེན་དཀྱིལ་འཁོར་ཐམས་ཅད་ཀྱི་རྩ་བ་དང་། རྟེན་པ་ལྷ་ཐམས་ཅད་ཀྱི་འབྱུང་ཁུངས། རྒྱུད་ཐམས་ཅད་ཀྱི་གཞུང་ཤིང་། མན་ངག་ཀུན་ཀྱི་སྙིང་པོ་ཡིན་ཕྱིར། རྒྱུད་ཀྱི་རྒྱལ་པོ་ཞེས་བསྒྲུབ་བྱའི་ལྷ་དང་སྒྲུབ་བྱེད་ཀྱི་རྣལ་འབྱོར་སོགས་གང་གི་སྒོ་ནས་ཀྱང་རྒྱུད་ཐམས་ཅད་ཀྱི་རྩེ་མོར་སོན་པའོ། །དེས་ན་རྒྱུད་འདིའི་སྔགས་ཙམ་བཏོན་པའམ་ལྷའི་སྐུ་གཟུགས་མཇལ་བ་ཙམ་གྱིས་ཐབས་གཞན་གྱིས་བསྒྲུན་དུ་མེད་པའི་བསོད་ནམས་རླབས་པོ་ཆེ་བྱུང་བའི་ཚུལ་ཡང་དཔལ་ལྡན་ཟླ་བའི་སྒྲོན་གསལ་སོགས་རྒྱུད་ཀྱི་དགོངས་འགྲེལ་དག་ལས་ཤེས་པར་བྱའོ།།
འདུས་པའི་རྒྱུད་འདི་ལ་རྩ་བའི་རྒྱུད་དང་། རྒྱུད་ཕྱི་མ། བཤད་རྒྱུད་རྡོ་རྗེ་འཕྲེང་བ། ཡེ་ཤེས་རྡོ་རྗེ་ཀུན་ལས་བཏུས་པ། དགོངས་པ་ལུང་སྟོན། ལྷ་མོ་བཞི་ཞུས། མཉམ་ཉིད་རྣམ་པར་རྒྱལ་བ། རྡོ་རྗེ་སྙིང་པོ་རྒྱན་གྱི་རྒྱུད། ཐམས་ཅད་གསང་བ་སོགས་མང་དུ་ཡོད་ཅིང་། དེ་དག་ལ་ཐོས་བསམ་སྒོམ་གསུམ་གྱི་བྱ་བ་ཡ་མ་བྲལ་བ་ཞིག་བྱ་འདོད་ན་རྒྱུད་ཀྱི་བཤད་གྲྭ་ཆེན་མོ་རྣམས་སུ་ཞུགས་ཏེ་རིམ་གྱིས་འབད་དགོས་པ་ནི་སྔོན་བྱོན་མཁས་གྲུབ་རྣམས་ཀྱི་རྣམ་ཐར་ལས་ཤེས་པར་ནུས་སོ།།
༸རྗེ་ཙོང་ཁ་པ་ཆེན་པོས་དགོས་པ་ཆེན་པོ་གསུམ་ལ་གཟིགས་ནས་འཇིག་རྟེན་འདིར་བྱོན་པ་སྟེ་དམ་ཆོས་འདུལ་བའི་ཉམས་བཞེས་དང་། དབུ་མའི་ལྟ་བ། གསང་བདེ་འཇིགས་གསུམ་གྱི་མན་ངག་གི་སྙིང་པོ་གསལ་བར་མཛད་པ་སོགས་ལས། ཕྱི་མའི་དགོངས་དོན་ཡོངས་སུ་རྫོགས་པའི་ཕྱིར་དཔལ་གསང་བ་འདུས་པའི་བསྟན་པ་ལ་ཆེད་དུ་དམིགས་ཏེ་སྲས་ཀྱི་ཐུ་བོ་༸རྗེ་བཙུན་ཤེས་རབ་སེངྒེ་སོགས་ལ་རྡོ་རྗེའི་ཆོས་འདི་བུམ་པ་གང་བྱོའི་ཚུལ་དུ་གཏད་པར་མཛད་དོ།།
དགེ་བཤེས་སྔགས་རམས་པ་ཡེ་ཤེས་དབང་འཛིན།
