གྲོགས་པོ།  འབྱུང་འགྱུར་མ་འོངས་པའི་མདུན་ལན་ནི། འཕོ་འགྱུར་དང་། གནས་ཚུལ་གང་འདྲ་ཞིག་ཏུ་སླེབས་མིན་གྱི་གདེང་ཚོད་། ས་བརྟན་བཤད་སུས་ཀྱང་སྨྲ་དཀའ་ལ་རྟོགས་ཀྱང་མི་ཐུབ།

གྲོགས་པོ། འོན་ཀྱང་དེའི་ཕྱོགས་སུ་གོམ་པ་རྒྱག་དགོས་པ་ནི་དངོས་པོའི་གཤིས་ལུགས་ཡིན་ལ། སེལ་ཐབས་མེད་པའི་རང་བཞིན་དང་། འདོད་དོན་གྲུབ་ཐབས་མེད་པའི་ཕྲ་ལམ་ཞིག་ཀྱང་ཡིན་མི་སྲིད། 

གྲོགས་པོ། རྒྱུ་མཚན་དེ་ནས་ཉམས་མྱོང་གིས་སྤྲད་པའི་བྱ་སྤྱོད་ལ་འཇུག་བཞིན་བློ་གྲོས་ཀྱི་རྣམ་དཔྱོད་སྤྱད་ནས། དཀའ་ཚེགས་སེལ་ཐབས་ཀྱི་སྒྲོན་མེ་འབར་བཞིན་ཞག་ནས་ཟླ་བ་དང་། ཟླ་བ་ནས་ལོ་ཕྱོགས་སུ་བསྙེགས་ཀྱང་དཀའ་སྡུག་གི་འཚོར་བར་ལྷུང་སྲིད།

གྲོགས་པོ། མདུན་ལམ་ནི་བར་ཆད་དང་བགེགས་ཆག་མེད་པའི་ཆུ་ཀློང་དང་གཙང་ཆུ་རིང་པོ་ལྟར་གཡོ་མེད་དང་། གཏན་དུ་འགྱུར་པའི་ཀློང་བཞིན་མིན་ལ་རྣམ་པ་འཕོ་མེད་རྡོ་རྗེའི་བྲག་ལྟ་བུ་ཞིག་ཀྱང་ཡིན།

གྲོགས་པོ། རང་ཅག་དེའི་ཕྱོགས་སུ་བསྐྱོད་པ་ནི་ཉི་འོད་ནས་ཕུར་བའི་འུག་པ་ཞིག་དང་ལྷག་པ་ནང་གི་མར་མེ་བཞིན་ཡིན་ཞིང་། བདེ་སྐྱིད་ཀྱི་འབྲས་བུ་ཞིག་ཀྱང་བསྐྲུན་ཐུབ་པའི་རང་ཚོད་དང་། ཡིད་ཆེས་ཅི་ཡང་མེད་པའི་འཁོར་རྒྱང་ཞིག་ཀྱང་དེ་ནས་ཡིན།

གྲོགས་པོ། སང་ཉིན་ཡང་འབྱུང་རྒྱུ་ཡི་མདུན་ལམ་ཡིན་དེ་ལས་རིང་མི་ལོ་དང་ཟླ་བ་ནི་ལྟ་ཅི་སྨྲོས། དངོས་ནས་མ་འོངས་མདུན་ལམ་འོད་མདངས་ཅི་ཡང་མ་ཕོག་པའི་ནག་ཁུང་ཞིག་འདྲ་ལ། ལུང་མི་ཕྲན་ལམ་ཞིག་ཀྱང་ཆེས་ཤིན་ཏུ་འདྲ།

གྲོགས་པ། མདུན་ལམ་ཞེས་པ་དེ་འབྱུང་རྒྱུ་ཡི་བྱ་སྤྱོད་ཙམ་གྱི་དུས་ཕྲན་ཞིག་ཡིན་ཏེ་འདི་ནི་གསར་གྱི་ཐེག་པ་ཞིག་དང་འདྲ་བ་ནི་ཁོ་བོའི་སེམས།

གྲོགས་པོ། འབྱུང་རྒྱུ་ཡི་བར་སྐབས་ཆུང་ཆུང་དེ་ནས་སྐྱོ་ལྷོང་ལྷོང་གི་མིག་ཆུ་ཞིག་སྐྱེ་སྲིད་ཅིང་། སྐྱོ་ལྷང་ལྷང་གི་འཚོར་བ་ཞིག་སྐྱེ་སྲིད་ལ། སྐྱོ་ལྷོང་ལྷོང་གི་དབྱུག་རིང་ཞིག་ཀྱང་གཏང་དགོས་སྲིད།

གྲོགས་པོ། འབྱུང་རྒྱུ་ཡི་དུས་ཕྲེང་དེ་ནས་བསྒྲུབ་རྒྱུ་ཡི་བདེ་ཕེབས་ཡོངས་ནི་རང་ཅག་གི་གོམ་ཚུལ་དེ་ལ་བརྟེན་ཡོད་ཀྱི་སེམས་ཀྱི་སྣང་བ་ཞིག་ལའང་བརྟེན་ཡོད།

གྲོགས་པོ། ད་ཆ་མྱ་ངམ་ཐང་ལ་སླེབས་པའི་བྱེའུ་ཕྲུག་བཞིན་སྐྱབས་མེད་མགོན་མེད་དུ་ལུས་སོང་ལ་རོགས་མེད་པའི་འཁོར་རྐྱང་གི་འཚོ་བ་ཞིག་ཀྱང་བསྐྱོད་དགོས་བྱུང།

གྲོགས་པོ། འོན་ཀྱང་བསིལ་ཟིལ་ཟིལ་གྱི་མཚན་མོ་ཞིག་ནས་ལྟ་དུས། ཟླ་བ་ནི་ཤིན་ཏུ་དཀར། ཟླ་འོད་ཀྱིས་འབྱུང་རྒྱུ་ཡི་མདུན་ལམ་དེ་ནས་བདེ་སྐྱིད་ཀྱི་ས་བོན་ཞིག་དང་། མདུན་ལམ་གསར་པའི་སྒྲོན་མེ་ཞིག་ཀྱང་བསྐྲུན་ཐུབ་ན་སྙམ་པའི་དྲན་པ་ཞིག་སྐྱེས།

ཨ་མ་ལགས། ངས་ཁྱེད་དྲན་བྱུང། དངོས་གནས་ཁྱེད་དྲན་བྱུང་དྲན་སྡུག་གི་མིག་ཆུ་ལྷན་དུ་འདི་ལྟར་ཞིག་ལྟ་ན་འདོད།

ཨ་མའི་བྱམས་བརྩེ་ཡིད་ལ་འཁོར་བའི་གཏམ།

ཨ་མ་ལགས། ངས་ཁྱེ་དྲན་ནས། ད་ནངས་དང་ད་ལོ་དགོས་མིན་པར་གཏན་དུ་དྲན་གིན།

ཨ་མ་ལགས། ཁྱེད་ཀྱི་ཁོ་བོ་ལ་མདུན་ལམ་གསར་པའི་འོད་སྣང་ཞིག་སྐྲུན་སོང་ལ། ད་དུང་སེམས་གཏིང་གི་བསླབ་བྱ་ཡང་གནང་བྱུང།

ཨ་ལ་ལགས། ངས་ཁྱེད་ཀྱིས་གནང་བའི་བཀའ་སློབ་བསླབ་བྱ་སོགས་དྲན་པ་དང་། ལྷན་དུ་ཁྱེད་ཀྱི་གཟུགས་དབྱིབས་ཡིད་ལ་འཆར་སྐབས་མིག་མཐའ་མཆི་མས་ཁེངས་ནས་མིག་ཆུ་དོག་པ་ཆད་དུ་མེད་པར་རྣ་རྩེ་ནས་ལྷུང་སོང་།

ཨ་མ་ལགས། དགོང་གའི་ཉལ་བའི་དུས་ལ་ཡང་ཁྱེད་དྲན་བྱུང་། མཚན་མོར་རྨི་ལམ་དུ་ཡང་ཁྱེད་ཉིད་བཏང་བྱུང། ཞོགས་པ་ལངས་པའི་དུས་ལ་ཡང་ཁྱེད་ནི་ཡང་ཡང་དྲན་གིན།

ཨ་མ་ལགས། ཁུ་སིམ་སིམ་མཚན་མོ་ཞིག་ནས་ངས་ཟླ་འོད་ཀྱི་འོག་ནས་ཨ་མ་ཁྱེད་དྲན་པའི་སྙིང་གཏམ་གྱི་ཡིག་འབྲུ་ཆུང་ཙམ་ཞིག་བྲིས་པ་ཡིན།

ཨ་མ་ལགས། ཁོ་བོ་ཁྱེད་དང་བྲལ་ནས་ད་བར་སེམས་གཏིང་ནས་བསྐྱུར་དཀའ་བའི་བའི་དྲན་པ་ནི་ཨ་མ་ཁྱེད་དྲན་པ་དེ་ཡིན།

ཨ་མ་ལགས། བདག་གི་སེམས་གཏིང་ནས་བརྗེད་རྒྱུ་མེད་པའི་རྡོག་རྡོག་ནི་ཁྱེད་ཉིད་ཡིན།

ཨ་མ་ལགས། ཁྱེད་ནི་ང་ཡི་ཡོད་ཚད་ནས་ཡོད་ཚད་ཡིན་པས་ཁྱེད་སྐུ་ཚེ་བརྟན་གྱུར་ཅིག།།

ཟླ་བ་ཁྱེད་ཀྱིས་ཨེ་མཐོང་། ཕ་ཡུལ་གྱི་མཛེས་ཤིང་ཡིད་དུ་འོང་བའི་རྩ་་ཐང་དང་སྤང་ལྗོངས།

ཟླ་བ་ཁྱེད་ཀྱིས་ཨེ་མཐོང་། ཕ་ཡུལ་གྱི་དཀར་ཞིང་གསལ་བའི་གངས་རི་དང་ཁ་བ།

ཟླ་བ་ཁྱེད་ཀྱིས་ཨེ་མཐོང་། ད་དུང་། ཕ་ཡུལ་གྱི་རྩི་ཤིང་དང་ནགས་ཚལ།

ཟླ་བ་ཁྱེད་ཀྱིས་ཨེ་མཐོང་། ཕ་ཡུལ་གྱི་གཏེར་ཁ་དང་རྩ་ཆེན་གྱི་ཆོས་ལུགས་དང་རིག་གཞུང་།

ཟླ་བ་ཁྱེད་སེམས་སྐྱོ་སོང་། དེ་དག་རྒྱ་གཞུང་གིས་རྩ་མེད་དང་རང་དབང་མེད་པ་བཟོ་བ་དེ་ལ།

ཟླ་བ་ཁྱེད་སེམས་སྐྱོ་སོང་། རྒྱ་གཞུང་གི་དེ་དག་བཙོག་པ་དང་ནག་ལྷོག་གེ་བཟོ་བ་དེ་ལ།

ཟླ་བ་ཁྱེད་ཀྱིས་ཨེ་མཐོང་། ཕ་ཡུལ་གྱི་གསེར་དང་། དངུལ། ཟླ་བ་ཁྱེད་སེམས་སྐྱོ་སོང་། རྒྱ་གཞུང་གི་རང་ཡུལ་ཕྱོགས་ནས་དེ་དག་འཁྱེར་བ་དེ་ལ།

བསྟོད་ཚིག་རྒྱལ་བའི་རྗེས་དྲན།

སྐུ་ནི་མཚར་བས་ཉིན་འབྱེད་དབང་པོ་བཞིན།།
གསུང་གི་བདུད་རྩིས་འགྲོ་ཀུན་ཚིམ་པར་མཛད།།
ཐུགས་རྗེའི་དྲོད་ཀྱིས་འགྲོ་ཀུན་བུ་བཞིན་སྐྱོང།།
ཕྱག་ན་པདྨོའི་མཛད་འཕྲིན་འོད་ཀྱིས་ཁྱབ།།

ཐུགས་རྗེའི་རྟ་བདུན་དབང་པོ་མཁའ་དབྱིངས་མཛེས།།
གཞན་ཕན་མཛད་འཕྲིན་སྐར་ཚོགས་འཁྱུག་སེ་འཁྱུག།།
མཁྱེན་པའི་ཆུ་གཏེར་འདུལ་བྱའི་གསོས་སུ་བསྐྱིལ།།

ལྡན་མ་ཡེ་ཤེས་དོན་ལྡན། ཕར་ཕྱིན་ལོ་རིམ་གསུམ་པ།