༄༅། །ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གི་མ་ཡུམ་ལེགས་སྐྱིད་བཟང་མོ་དམ་པ་དེ་ཉིད་འདས་གྲོངས་སུ་གྱུར་ཏེ་ཞག་ཞེ་དགུ་འཁོར་བའི་དུས་ཚིགས་ལ། གྲྭ་ཚང་ནས་མོན་ཡུལ་དུ་ཆེད་ཕེབས་ཀྱི་གྲྭ་ཚང་གི་ཕྱག་མཛོད་དང་།
བླ་མ་བྱང་འདྲེན་གཙོས་དགེ་འདུན་པ་ཁག་ཅིག་དང་། མོན་ཡུལ་རྒྱུད་སྨད་འགྲོ་ཕན་བྱམས་བརྩེ་གླིང་གི་མཁན་རིན་པོ་ཆེ་དབུ་བཞུགས་ཀྱིས་མཚོན་འབྲེལ་ཡོད་རྣམས་ནས་དགེ་ཚོགས་རྒྱ་ཆེར་བསྒྲུབས་པ་དང་འབྲེལ། འདི་ག་དཔལ་ལྡན་སྨད་རྒྱུད་གྲྭ་ཚང་འདུས་མང་ནས་ཀྱང་གདུང་སེམས་མཉམ་བསྐྱེད་ཞུ་བ་དང་། མ་ཡུམ་འདས་མོ་དམ་པ་གང་དེའི་ཚེ་འཁོར་ཐོག་མེད་ནས་བྱས་བསགས་སྡིག་ལྟུང་མ་ལུས་པ་བྱང་ཞིང་དག་སྟེ་ཟུང་འཇུག་རྡོ་རྗེ་འཆང་གི་གོ་འཕང་ལ་མྱུར་དུ་རེག་པའི་བསྔོ་སྨོན་རྒྱ་ཆེར་ཞུ། བློན་ཆེན་པདྨ་མཁའ་འགྲོ་མཆོག་དང་གང་གི་ཡབ་ཆེན་འདས་པོ་དམ་པ་ཡབ་སྲས་ཟུང་ནས་འཕགས་ཡུལ་དབུས་སའི་གཞུང་དང་མི་མང་གི་ཞབས་འདེགས་བླ་ན་མེད་པ་ཞུ་བ་ལ་རྗེས་སུ་ཡིད་རང་དང་བསྔགས་བརྗོད་ཞུ་རྒྱུ་ཡིན་ལ། བྱེ་བྲག་འབྲེལ་ཡོད་འདི་ག་གྲྭ་ཚང་ལའང་རིང་མོ་ཉིད་ནས་ཆོས་ཡོན་གྱི་འབྲེལ་ལམ་དམ་ཟབ་མཛད་པ་མ་ཟད་སྤྱི་ཡོངས་ཀྱི་གཟིགས་པ་ཆེན་པོ་མཛད་བཞིན་པ་ལའང་ཐུགས་རྗེ་བཀྲིན་བླ་མེད་དུ་ཆེ་ཞུ་རྒྱུ་བཅས། དཔལ་ལྡན་སྨད་རྒྱུད་གྲྭ་ཚང་འདུས་སྤྱིའི་ལས་ཁང་ནས་སྤྱི་ལོ་ ༢༠༢༤ ཟླ་བ་ ༠༨ ཚེས་ ༡༣ ཉིན། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༠༨།༡༣།ལ།
