༄༅། །འཇམ་མགོན་༧རྒྱལ་བའི་གདུང་འཚོབ་ཆེན་པོ་ཉེ་བའི་རིགས་བདག་མཚུངས་མེད་བྱང་རྩེ་ཆོས་རྗེ་སྒོ་སོག་མཆོག་སྤྲུལ་རིན་པོ་ཆེ་རྗེ་བཙུན་ངག་དབང་གསུང་རབ་བསྟན་འཛིན་དགེ་ལེགས་རྒྱ་མཚོ་དཔལ་བཟང་པོ་མཆོག །ལྷ་བླའི་བཀའ་ལུང་ལྟར།
བོད་ལི་ཐང་མོ་ལ་དགེ་ལུང་གྲོང་དུ་ཡབ་བདེ་སྐྱིད་དོན་གྲུབ་དང་། ཡུམ་ནོར་འཛིན་སྒྲོལ་མ་གཉིས་ཀྱི་སྲས་སུ་སྤྱི་ལོ་ ༡༩༤༨ དང་བོད་ས་བྱི་ཟླ་བ་ ༦ ཚེས་ ༤ སྟེ་དྲུག་པའི་ཚེས་བཞིའི་དུས་བཟང་ཉིད་དུ་ངོ་མཚར་བའི་ལྟས་དང་བཅས། ལྟ་བས་ཆོག་མི་ཤེས་པའི་སྐུ་མཆོག་མཚན་དཔེའི་མེ་ཏོག་གསར་དུ་བཞད་དེ་དགུང་གྲངས་ ༧༧ ལ་བཞེངས་པའི་སྐུའི་འཁྲུངས་སྐར་གྱི་དགའ་སྟོན་རྟེན་འབྲེལ་ལ། འདི་ག་དཔལ་ལྡན་སྨད་རྒྱུད་གྲྭ་ཚང་མཁན་བླ་འདུས་མང་ཡོངས་ནས་དགའ་དད་སྤྲོ་བའི་ཡིད་ཀྱི་འོ་མཚོ་འཕྱུར་ཏེ་གུས་འཚམས་དང་བཀྲ་ཤིས་བདེ་ལེགས་ཞུ། ༧རྒྱལ་བསྟན་ཉག་ཕྲ་ལ་འགྲོ་བ་ཉམ་ཐག་པའི་དུས་འདིར་མཚུངས་མེད་ཆོས་ཀྱི་རྗེ་མཆོག་ཐུགས་བསྐྱེད་རྡོ་རྗེའི་བྲག་རི་ལྟར་བརྟན་ཅིང་ཐུགས་ཀྱི་འཕེན་པ་གངྒའི་ཆུ་རྒྱུན་ལྟར་རིང་དུ་བཏང་སྟེ། འགྲོ་བའི་སྡུག་ཀུན་ནད་བརྒྱ་གཞིལ་བའི་སྨན་མཆོག་གཅིག་པུ་ཐུབ་བསྟན་རིན་པོ་ཆེ་དང་། བདག་ཅག་གདུལ་བྱའི་སླད་དུ་སྐུ་ཚེ་ཞབས་པད་ཚེ་མཐའ་ཡས་པའི་ངོ་བོར་བརྟན་བརྗིད་ཆགས་ཤིང་། གསང་གསུམ་རྨད་དུ་བྱུང་བའི་མཛད་པ་འཕྲིན་ལས་རྣམས་གང་གི་ཐུགས་བཞེད་ཇི་བཞིན་འགྲུབ་པའི་སླད། འདི་ནས་མཆོག་གསུམ་རྒྱལ་བ་རྒྱ་མཚོར་གདུང་ཤུགས་དྲག་པོས་གསོལ་འདེབས་སྨོན་ལམ་རྒྱ་ཆེར་ཞུ་ཆོག་པ་བཅས། དཔལ་ལྡན་སྨད་རྒྱུད་གྲྭ་ཚང་འདུས་སྤྱིའི་ལས་ཁང་ནས་བོད་རྒྱལ་ལོ་ ༢༡༥༡ དྲུག་པའི་ཚེས་བཞིའི་དུས་བཟང་དགེ་བར་ཕྱག་བཅས་ཕུལ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༠༦།༠༤།ལ།
