༥ - དུང་དཀར་གཡས་འཁྱིལ།

བྱང་ཆུབ་སེམས་དཔའ་གཞན་དོན་དུ་སྐྱེ་བ་ལྔ་པ་བཞེས་པའི་དུང་དཀར་གཡས་འཁྱིལ་བུས་པའི་སྒྲ་སུས་ཐོས་ཀྱང་ངན་འགྲོར་མི་སྐྱེ་བའི་ཕན་ཡོན་དང༌། སྟོན་པ་ལ་ཆོས་འཁོར་བསྐོར་བར་བསྐུལ་བའི་རྟེན་དུའང་དུང་དཀར་བྱུང་བ་དང༌། སངས་རྒྱས་ཀྱི་ཚེམས་ཕྲེང་བཞི་བཅུའི་མཚན་མ་གསལ་ཞིང༌། ཚེམས་བར་ནས་དམ་པའི་ཆོས་དང༌། གསུང་དབྱངས་ཕྱོགས་བཅུར་སྒྲོག་པ། སྐྱེ་རྒུ་རྣམས་ལ་མཆོག་གི་དངོས་གྲུབ་ཐོབ་པར་བྱེད་པ་དང་། དམ་པའི་ཆོས་ཀྱི་སྒྲ་དབྱངས་ཕྱོགས་བཅུར་ཁྱབ་པའི་ཚངས་པའི་གསུང་དབྱངས་དང་། གདུལ་བྱའི་ཁམས་དབང་མོས་པ་དང་འཚམས་པའི་ཟབ་རྒྱས་ཆོས་ཀྱི་སྒྲ་དབྱངས་སྙན་པར་སྒྲོག་པས། འགྲོ་བ་རྣམས་མ་རིག་པའི་རྨོངས་གཉིད་ལས་སློང་ཞིང༌། རང་གཞན་གྱི་ཕན་བདེ་སྒྲུབ་པའི་བྱ་བར་བསྐུལ་བའི་རྟེན་འབྲེལ་ཡང་མཚོན་ནོ། །