ངོས་འདིར་རིས་སུ་མ་ཆད་པའི་འཕགས་བོད་ཀྱི་སྐྱེས་ཆེན་རྣམས་ཀྱིས་གནང་བའི་ཞལ་གདམས་རྣམས་ལས་ཉུང་ངུ་རེ་བཏུས་ཏེ་བཀོད་ཡོད།
| ཞང་སྟོན་བསྟན་པ་རྒྱ་མཚོའི་ཞལ་ནས། རྒྱལ་སྲས་དོན་ཡོད་ཆོས་ཀྱི་རྒྱ་མཚོའི་ཞལ་ནས། ཕྱི་གོས་དར་གང་ལེགས་ཀྱིས་ཆང་བཞིན་དུ་བསྙལ། ནང་བཟའ་བཏུང་སྣ་ཚོགས་ཀྱིས་ཕག་བཞིན་དུ་གསོས། ཁ་ངོམས་གྲོད་པ་འགྲངས་པའི་སྟབས་ཡག་དུས་སློབ་གཉེར་བྱས། ཉེས་དུས་འཇོག་པ་དབྱར་ཤི་དགུན་ལངས་ཀྱི་རྩྭའི་འབུ་བཞིན་བྱས་ན་ཐ་མལ་བ་ལ་སློབ་གཉེར་ཡག་པོ་ཡོང་བའི་དཔེ་མི་འདུག །མིག་མར་བལྟས་མ་བྱས་པར་དཀའ་སྤྱད་དང་དུ་བླངས། བྱང་སེམས་རྟག་ཏུ་ངུ། ནོར་བཟང་། མི་ལ་རས་པ་ཚོ་ལ་མིག་ཡར་བལྟས་བྱས་ཏེ་ཡོན་ཏན་མ་བྱུང་ནའང་བྱེད་ལུགས་འགྱོད་མེད་བསྟན་པའི་མིག་རྐྱེན་ལ་ཕན་པར་བྱས་པ་ཡིན་གསུངས། |
| རྗེ་ཤེས་རབ་རྒྱ་མཚོའི་ཞལ་ནས། མཚན་ཉིད་ཀྱི་རྩོད་པ་འདི་མིང་བརྡས་བཞག་ཙམ་རྟོགས་པ་ལ་ཕན་ཆེ་བ་བསྡུས་གྲའི་ཁ་དོག་དཀར་དམར་དུ་རྟ་དཀར་པོ་རྟ་དཀར་པོ་ཡིན་ཀྱང་དཀར་པོ་མིན་ཞེས་པ་ལྟ་བུ་དང་། ཡོད་རྟོགས་མེད་རྟོགས་ཀྱིས་ཚད་གྲུབ་དང་། ཡིན་ལོག་མིན་ལོག་གིས་ཕན་ཚུན་སྤང་འགལ་སྒྲུབ་པ་སོགས་བསྡུས་ཚན་ཉེར་ལྔ་པོ་ཐམས་ཅད་མང་ཞེས་གུང་ཐང་འཇམ་དཔལ་དབྱངས་ཀྱིས་གསུངས། ཆོས་ཀྱི་ཟབ་གནད་བཀའ་པོད་ལྔའི་ནང་ན་ཡོད་པས་དེ་ལ་ཐོས་བསམ་གཙོ་བོར་མ་བྱས་ན་གནད་མི་རྟོགས་པས་མཁས་པ་དང་ཉམས་ལེན་དབུ་ཕར་གྱི་སྟེང་ནས་བྱེད་དགོས། དེའི་གཞིར་རྣམ་འབྲེལ་དང་། དེ་ལ་བསྡུས་གྲ་གལ་ཆེ་བས་དེ་བཞག་ནས་མཛོད་འདུལ་གཙོ་བོར་བྱེད་པ་ལ་མི་འགབ་གསུངས། |
| རྗེ་ཤེས་རབ་རྒྱ་མཚོའི་ཞལ་ནས། སངས་རྒྱས་ཀྱིས་གདུལ་བྱའི་དོན་ཁོ་ན་ཐུགས་ལ་དགོངས་ནས་དེ་ལྟར་མཛད་ཀྱང་རང་ཅག་ལ་ཞི་འགྱུར་གྱི་བྱ་བ་སྣ་གཅིག་ཀྱང་མེད་པས། ཞི་འགྱུར་མིན་མཛད་ཁྱོད་ལ་མེད། །ཞི་འགྱུར་ཡིན་མཛད་ང་ལ་མེད། །བྱས་ན་ཆོག ད་རེས་སྟེས་དབང་གིས་མུན་ཁྲོད་དུ་གློག་འགྱུ་བ་ལྟར་བཀའ་པོད་ལྔ་དང་། བདེ་གསང་འཇིགས་གསུམ་གྱི་ཆོས་སྒྲ་རྣ་བའི་ལམ་དུ་ལྷང་ལྷང་སྙན་པར་སྒྲོགས། དེ་ལ་འཆད་རྩོད་རྩོམ་གསུམ་དང་། ཐོས་བསམ་སྒོམ་སྒྲུབ་གང་འདོད་བྱར་ཡོད་པ་དང་ལན་ཅིག་མཇལ་བའི་དུས་འདིར་བྱ་བ་ཐམས་ཅད་ཆོས་སུ་སོང་ན་རབ། མ་མཐའ་འང་ཞི་འགྱུར་ཡིན་མཛད་ཁ་ཤས་རེ་དགོས། དགེ་བའི་བཤེས་གཉེན། མཚན་ལྡན་གྱི་གྲོགས། ཐར་པའི་གོ་འཕང་གང་ཡང་རྩིས་སུ་མི་བྱེད། མ་མཐའ་ཕྱི་མའི་ངན་འགྲོ་ཁེགས་པ་ཙམ་ཡང་དོན་དུ་མི་གཉེར་བར་སྡིག་པའི་བྱ་བ་དང་། ནོམ་རྫས་འབའ་ཞིག་གི་ཆེད་དུ་མི་ཚེ་སྟོང་ཟད་བྱེད་པ་ཅི་འདྲ་འདུག སངས་རྒྱས་ཀྱིས་རང་རེའི་ཕྱིར་དུ་དེ་ཙམ་ཐུགས་འདང་གནང་བ་ང་ཚོས་བརྗེད་ལུགས་མེད་པས་བག་ཡོད་མཛད་དུ་གསོལ་གསུངས། |
| རྗེ་ཤེས་རབ་རྒྱ་མཚོའི་ཞལ་ནས། དེང་སང་ཁྱད་མཚར་བ་ཞིག་ལ་དགེ་སློང་སྒྲུབ་རྒྱུ་ཁག་པོ་ལྟ་བུར་མངོན་ཞིང་། གསང་སྔགས་ཉམས་ལེན་བྱེད་པ་སུ་ཡིན་ནའང་བྱེད་ཐུབ་པ་ལྟ་བུ་འདི་དག་ནི་ཐབས་སྡུག་རེད། ཕལ་ཆེར་དགེ་སློང་སྒྲུབ་ཐུབ། སྔགས་ཀྱི་ཉམས་ལེན་བྱེད་ཐུབ་མཁན་ཧ་ཅང་ཉུང་ཉུང་ཡིན། དགེ་སློང་གི་སྡོམ་པ་སྲུང་ཐུབ་མཁན་ལས་བྱང་ཆུབ་སེམས་དཔའི་སྡོམ་པ་ལེན་མཁན་དེ་བས་ཉུང་། དེའི་ནང་ནས་ཀྱང་སྔགས་ཀྱི་ཉམས་ལེན་བྱེད་མཁན་དེ་བས་ཉུང་། དེང་སང་སྔགས་པ་བྱེད་རྒྱུ་སླ་བོ་དང་། གྲྭ་བ་བྱེད་རྒྱུར་ཁག་པོ་བལྟ་ཡི་འདུག་པ་འདི་དག་ནི་ཕྱི་ནང་བསློགས་འདུག ། |
