ངོས་འདིར་རིས་སུ་མ་ཆད་པའི་འཕགས་བོད་ཀྱི་སྐྱེས་ཆེན་རྣམས་ཀྱིས་གནང་བའི་ཞལ་གདམས་རྣམས་ལས་ཉུང་ངུ་རེ་བཏུས་ཏེ་བཀོད་ཡོད།
| དགེ་བཤེས་ཤ་ར་བའི་ཞལ་ནས། ངས་ནི་ཁྱོད་ལ་གཏོང་བའི་ཕན་ཡོན་མི་བརྗོད་ཀྱི་འཛིན་པའི་ཉེས་དམིགས་རྗོད་པ་ཡིན། |
| དགེ་བཤེས་མཆད་ཀ་བའི་ཞལ་ནས། བླ་མ་བསྟེན་བདོ་ཙ་ན་སྤངས་དོགས་ཡོད། |
| དགེ་བཤེས་མཆད་ཀ་བའི་ཞལ་ནས། ལོ་དྲུག་ཅུ་ལ་ལྟོ་རྒྱབ་དང་གཉིད་དང་ན་ཚས་བཅད་པའི་ཤོལ་ན་ཆོས་སུ་འགྲོ་བ་ལོ་ལྔ་ལས་མེད། |
| དགེ་བཤེས་མཆད་ཀ་བའི་ཞལ་ནས། དཀའ་ཐུབ་ཀྱི་རི་སུལ་དུ་དྲང་སྲོང་གི་སྤྱོད་ཚུལ་གྱིས་གནས་པ་ཞིག་བྱུང་ན། ད་གཟོད་པས་བུ་གསོས་བྱ་བ་ཡིན། |
| དགེ་བཤེས་ཀ་མ་པའི་ཞལ་ནས། ད་ལྟ་འཆི་བས་འཇིགས་པ་ཞིག་དགོས། འཆི་ཁར་མི་འཚེར་བ་ཞིག་དགོས་པ་ལ་འོ་སྐོལ་དེ་ལས་ལྡོག་ནས་ད་ལྟ་མི་འཇིགས། འཆི་ཁར་བྲང་ལ་སེན་མོ་འདེབས། |
| དགེ་བཤེས་ཀ་མ་པའི་ཞལ་ནས། བསམས་པས་མ་བྱུང་ཟེར་ཏེ་ཁྱོད་ཀྱིས་ནམ་བསམས་ཉིན་མོ་ནི་ཡེང་ཡེང་བྱེད། མཚན་མོ་གཉིད་ལོག་གིན་འདུག་ན་བརྫུན་མ་ཟེར། |
| དགེ་བཤེས་ཀ་མ་པའི་ཞལ་ནས། རྒས་པ་ཁད་ཀྱིས་ཁད་ཀྱིས་འོང་བས་དྲག །དུས་གཅིག་ལ་འོང་ན་བསྲན་ཐབས་མེད། |
| དགེ་བཤེས་ཀ་མ་པའི་ཞལ་ནས། ཆོས་བྱེད་ན་ཤེས་ཅི་དགོས་བྱས་ན་རང་ཉིད་ཉམས་ནས་འགྲོ་བ་འདི་ངེད་ཐོས་ཆུང་ལ་འབྱུང་ཉེ། ནན་ཏུར་བྱས་ན་ཤེས་ཅི་དགོས་ཟེར་ཉེན་ཆེ། ཆོས་ནན་ཏུར་བྱེད་ན་ཤེས་དགོས་ཏེ་ཚེ་ཐུང་འདི་ལ་མི་རྫོགས་པས་དལ་འབྱོར་གྱི་ཨང་ཀ་མ་འཁྲུགས་པར་བྱས་ལ་ཐོས་པ་རྒྱུན་མི་འཆད་དུ་བྱ་སྙམ་དུ་བསམ། སྒོམ་པ་པོ་ལ་མི་དགོས་བཤད་པ་པོ་ལ་དགོས་སྙམ་སྟེ། འཆད་པ་པོ་ལ་སྡིག་ཏུ་འགྲོ་བས་ཉེན་ཆེ། སྒོམ་པ་པོ་ཁོ་ན་ལ་དགོས། |
| དགེ་བཤེས་ཀ་མ་པའི་ཞལ་ནས། ཆུ་ཁར་བྱོན་ཞིང་མི་རྟག་པ་བསྒོམ་པ་ལ་ཆུ་ཕྲི་ལི་ལི་འགྲོ་བ་འདིར་བལྟས་ན་བདེ། མར་མེ་སྲོད་ལ་མི་འཛད་པ་འོང་པ་འདྲ། ཐོ་རེངས་དུས་སུ་ཟད་ནས་འགྲོ། ཟད་རྗེས་མི་མངོན། ད་འདིར་ལྟོས་ལ་སྒོམས། གསུངས། |
| དགེ་བཤེས་གངས་པའི་ཞལ་ནས། གཉེན་པོར་མ་སོང་བའི་ཚིག་ཤེས་པ་མང་ཡང་། དེས་ཕལ་ཆེར་མར་འགྲོའི་གྲོགས་བྱེད། ཆོས་ཐོས་ཤིང་ཞི་ཞིང་དུལ་བ་ཉོན་མོངས་པའི་གཉེན་པོར་འགྲོ། གསུངས། |
| དགེ་བཤེས་ཀ་མ་པའི་ཞལ་ནས། མར་མེའི་ལྕེ་ལ་ལག་མཐིལ་གཏད་ནས་ཞག་གཅིག་སྡོད་ན་སྟོང་གསུམ་གྱི་འབྱོར་བ་སྦྱིན་ཟེར་ཡང་དེ་སུས་ཚུགས། གསུངས། བརྗོད་བྱ་འདི་དོན་གཞན་ན་མ་མཆིས་པས། །རྗོད་བྱེད་འདི་ཡང་དེ་འདྲར་མཁྱེན་པར་མཛོད། །ཚིག་མགོ་འབྲོམ་སྟོན་རྒྱལ་བའི་བཀའ། །ཚིག་རྔ་འགྲོ་མགོན་འཕགས་པའི་གསུང་། །འདི་ལ་ཡི་དམ་བྱས་གྱུར་ན། །བཀའ་གདམས་བྱིན་རླབས་སྙིང་ལ་འཇུག ། |
| དགེ་བཤེས་དོལ་པའི་ཞལ་ནས། ཞར་ལ་ཚོགས་གསོག་སྒྲིབ་པ་སྦྱོང་། ལྷ་དང་བླ་མ་ལ་གསོལ་བ་འདེབས་ཤིང་རུས་ཤིང་དང་བཅས་ནས་ནན་ཏན་གྱིས་བསམས་ན། ལོ་བརྒྱར་ཡང་མི་སྐྱེ་སྙམ་པ་ཞིག་ཀྱང་འདུས་བྱས་སོ་ན་མི་སྡོད་པས་ཅི་ཞིག་ལྟར་ལ་སྐྱེ་བ་ཡིན། |
| དགེ་བཤེས་ཕུ་ཆུང་བའི་ཞལ་ནས། ང་ནི་རྒས་ཁར་མཛངས་བླུན་ལ་ཁ་ལྷན་སོང་། |
| དགེ་བཤེས་ཕུ་ཆུང་བའི་ཞལ་ནས། ང་ནི་ཉོན་མོངས་ཀྱིས་ལྗར་གྱིས་མནན་ཡང་མ་མཐོང་འོག་ནས་སོ་ཚིགས་བྱེད། |
| དགེ་བཤེས་སྤྱན་སྔ་པའི་ཞལ་ནས། འཆི་བའི་སྡུག་བསྔལ་ཐུ་སྟེ་ཡུན་ཐུང་། རྒས་པ་འདི་ཀ་ཐུ། |
| དགེ་བཤེས་སྤྱན་སྔ་པའི་ཞལ་ནས། ཇོ་བོ་སྟོན་པ་ཐོག་མ་མེད་པ་ནས་ཅི་འདྲའི་ལུས་ཤིག་བླངས་ལ། ད་རེས་བཞིན་དུ་ཐེག་ཆེན་གྱི་ཆོས་བྱེད་མ་མྱོང་བས་འབུང་དགོས། |
| དགེ་བཤེས་སྤྱན་སྔ་པའི་ཞལ་ནས། བྱང་ཆུབ་ཀྱི་སེམས་མེད་ན། ཧེ་བཛྲ་སྒོམ་པ་ཡང་དམྱལ་བར་འགྲོ། ཡི་དྭགས་སུ་ཡང་འགྲོ། དུད་འགྲོར་ཡང་འགྲོ། གསུངས། ཀ་མ་པས། ཕན་བྱེད་ཅིང་གནོད་པ་སྤོང་བ་ཤེས་རབ་ཡིན། གསུངས། |
| དགེ་བཤེས་གསང་ཕུ་བའི་ཞལ་ནས། འཁོར་བ་འདིར་གན་བུབ་མང་བོ་ཞིག་བྱེད་དགོས་པ་འདི་ཉམས་ལ་རེ་མ་བབས། |
