ངོས་འདིར་རིས་སུ་མ་ཆད་པའི་འཕགས་བོད་ཀྱི་སྐྱེས་ཆེན་རྣམས་ཀྱིས་གནང་བའི་ཞལ་གདམས་རྣམས་ལས་ཉུང་ངུ་རེ་བཏུས་ཏེ་བཀོད་ཡོད།
| རྗེ་བདག་ཉིད་ཆེན་པོའི་ཞལ་ནས། དེ་ལྟར་བྱས་ན་རྒྱལ་བའི་ཐུགས་རྗེ་ཞུགས་ནས་ཡོན་ཏན་གོང་ནས་གོང་དུ་འཕེལ་བར་འགྱུར་བས། དལ་འབྱོར་གྱི་རྟེན་ལ་སྙིང་བོ་ལོན་པ་ཡིན་གྱི། སྐྱབས་འགྲོ་ཡིད་འཁུལ་ནུས་པ་རེ་ཡང་མེད་པར། ཐོས་བསམ་སྒོམ་པ་ལ་འབད་པ་སྐད་བྱེད་པ་ནི་འབྲས་བུ་ཤིན་ཏུ་ཆུང་ངོ་། ། |
| རྒྱལ་ཚབ་ཐམས་ཅད་མཁྱེན་པའི་ཞལ་ནས། ཐོས་སྒོམ་བྱས་ནས་ཡུན་རིང་ལོ་ལོན་ཀྱང་། །རྐྱེན་དང་འཕྲད་ཚེ་དུག་གསུམ་འཕེལ་བ་ནི། །སེམས་འདི་མ་ཐུལ་བ་ཡི་སྐྱོན་ཡིན་པས། །ཆོས་ཀུན་རྩ་བ་སེམས་ངོ་འཕྲོད་པར་གྱིས། ། |
| གྲུབ་པའི་དབང་ཕྱུག་ཆེན་པོ་བློ་བཟང་དོན་འགྲུབ་ཀྱི་ཞལ་ནས། སངས་རྒྱས་བསྟན་པའི་ཉི་མ་ནུབ་རིའི་རྩེར་ཕྱོགས་པས། །ཆོས་གཟུགས་ཕལ་ཆེར་ཆོས་དང་རྒྱབ་འགལ་དུ་སོང་ནས། །ལག་ལེན་ཅི་བྱས་ཚེ་འདིའི་ཕྱིད་ཐབས་སུ་འདུག་པ། །བསྟན་པའི་གཟུགས་བརྙན་ཙམ་གྱི་སྣང་ཚུལ་འདི་སྐྱོ་བ། །ཆེས་ཆེར་སྙིགས་མ་ལྔ་བདོའི་དུས་ཚོད་དུ་སོང་བས། །གང་དུ་བལྟས་ཀྱང་གཡོ་སྒྱུ་ཟོལ་ཟོག་གི་སྦྱོར་བ། །ལོ་དང་ཟླ་བ་རེར་ཡང་ཇེ་མཐུ་རུ་འདུག་པ། །ཚེ་ལོ་བཅུ་བར་ཉེ་བའི་སྣང་ཚུལ་འདི་སྐྱོ་བ། ། |
| རྒྱལ་མཆོག་བདུན་པ་བསྐལ་བཟང་རྒྱ་མཚོའི་ཞལ་ནས། དེང་དུས་ཀྱི་མིས་ཆོས་བརྒྱད་ཀྱི་ཕྱོགས་བཟུང་ནས་ཐོས་པ་བྱེད་མཁན་ལའང་རྙེད་བཀུར་དང་གྲགས་ལ་འདོད་པ་ཨེ་ཡིན། ཆོས་ཉན་ནས་སུ་ལ་བཤད་རྒྱུ་ཡིན་ཟེར་མཁན་ཡོད། དེ་དག་གིས་རང་རྒྱུད་འདུལ་བའི་ཐབས་སུ་ཉན་པ་མ་གོ་བས། དེའི་ཁར་ཉན་ན་ཆོས་ལ་དོན་གཉེར་གྱི་འདུན་པ་ཇེ་ཞན་དུ་སོང་སྟེ་ཆོས་ཐུན་གཅིག་ཆད་པ་ལ་དོང་ཙེ་ཁ་ཤས་བོར་བའི་སྣང་བ་ཡང་མེད་པས་མི་རིགས་གསུངས། |
| རྒྱལ་མཆོག་བདུན་པ་བསྐལ་བཟང་རྒྱ་མཚོའི་ཞལ་ནས། མྱ་ངན་ལས་མི་འདའ་བར་གསོལ་བ་འདེབས་པ་སློབ་མས་བརྟན་བཞུགས་ཕུལ་ན་བཟང་མོད་ཀྱང་ཅི་གསུངས་བཀའ་བཞིན་སྒྲུབ་པ་གཙོ་བོ་ཡིན་ཞེས། སློབ་མ་ངན་པས་སྒོ་གསུམ་གྱི་སྤྱོད་ཚུལ་ལ་མངོན་ལྐོག་བྱས་པའི་གཟུགས་བརྙན་བླ་མའི་ཐུགས་ཀྱི་མེ་ལོང་དུ་ཤར་ཏེ་ཐུགས་དཀྲུགས་པ་དེ་འདྲ་མ་ཡིན་པར། བླ་མའི་བཀའ་སྤྱི་བོར་བླངས་ནས་གསུང་བཞིན་བསྒྲུབས་ན་བླ་མ་ལ་གཞན་དོན་མ་གཏོགས་ཐུགས་ལ་དགོངས་རྒྱུ་མི་སྲིད་པས་དགྱེས་བཞིན་བརྟན་པར་བཞུགས་ནས་བུ་སློབ་རྣམས་ཀྱི་བགེགས་དང་བར་ཆད་ཞི་ཕྱིར་སྲུང་འཁོར་བསྒོམ་པ། མཁའ་འགྲོ་ཆོས་སྲུང་ལ་འཕྲིན་ལས་བཅོལ་བ། ཚེ་རིང་བ། ཤེས་རབ་འཕེལ་བ། ལམ་བཟང་སྒྲུབ་པའི་འཚོ་ཆས་ཀྱིས་མི་འཕོངས་པ་སོགས་གནས་སྐབས་དང་། མཐར་ཐུག་གཏན་བདེའི་ལེགས་ཚོགས་འགྲུབ་པའི་ཐབས་ཚུལ་བདག་གིར་བཞེས་པ་ཡིན་ནོ། ། |
| རྒྱལ་མཆོག་བདུན་པ་བསྐལ་བཟང་རྒྱ་མཚོའི་ཞལ་ནས། རྟེན་འདི་འཕྲལ་ཕུགས་གང་ལ་ལྟོས་ན་དོན་ཆེ་མོད། ལུས་འདི་འདྲ་ཡང་ཡང་ཐོབ་ཡོང་བས་དེ་དང་དེའི་སྐབས་སུ་ཆོས་སྒྲུབ་ན་ཆོག་གམ་ཕྱིས་ནས་འདི་འདྲའི་རྟེན་བཟང་པོ་ཐོབ་པར་དཀའ། སྤྱིར་བདེ་འགྲོ་ཙམ་ཐོབ་པ་ལ་དགེ་རྩ་རྣམ་དག་སྣ་རེ་བྱེད་དགོས་ཤིང་། ཁྱད་པར་དལ་འབྱོར་ཚང་བའི་རྟེན་འདིའི་སྟེང་ནས་བསམ་བློ་བཏང་ན། སྔ་མ་གར་སྐྱེས་རང་གི་ལུས་ལ་ལྟོས་ན་ཤེས་པས། སྦྱིན་པ་ཨེ་བཏང་ལོངས་སྤྱོད་ལ་ལྟོས། ཚུལ་ཁྲིམས་ཨེ་བསྲུངས་རྟེན་ལ་ལྟོས། བཟོད་པ་ཨེ་བསྒོམས་ཁ་དོག་ལ་ལྟོས་ན་ཤེས། ཕྱི་མ་གར་འགྲོ་རང་གི་སེམས་ལ་འདྲི་དགོས་ན། སྦྱིན་པ་སོགས་གཏོང་འདོད་ཨེ་ཡོད་སྨོན་ལམ་ཡང་རྣམ་དག་ཅིག་འདེབས་འདོད་ཨེ་འཆིས་སྙམ་དུ་དལ་འབྱོར་གྱི་རྒྱུ་གསུམ་ལ་འབད་ན་ལོང་བས་གླང་མཇུག་ཟིན་པ་བཞིན་དེ་ལས་དོན་ཆེན་པོ་འགྲུབ་རྒྱུ་མེད། |
| རྒྱལ་མཆོག་བདུན་པ་བསྐལ་བཟང་རྒྱ་མཚོའི་ཞལ་ནས། ཟང་ཟིང་གི་སྦྱིན་པ་རྒྱ་ཆེན་པོ་བཏང་བ་ལས། ཆོས་ཀྱི་སྦྱིན་པ་ཚིགས་བཅད་གཅིག་བརྗོད་པ་ཕན་ཡོན་ཆེ་བ་དང་། ཟང་ཟིང་གི་མཆོད་པ་ལས། སྒྲུབ་པའི་མཆོད་པ་དཔེ་ཆ་འཛིན་སྐྱོར། གཞུང་གི་གོ་དོན་འཚོལ་བ། ཐོས་དོན་ཉམས་སུ་བླངས་ཏེ་རྩོད་པ་བྱེད་པ་སོགས་ཕན་ཡོན་ཆེ། |
| རྒྱལ་མཆོག་བདུན་པ་བསྐལ་བཟང་རྒྱ་མཚོའི་ཞལ་ནས། རིགས་ཕུན་སུམ་ཚོགས་པའི་རྒྱུ་ནི། དེང་དུས་བླ་མ་དང་མཁན་སློབ་དགེ་རྒན་སོགས་ལ་དེ་དང་དེར་མི་འཛིན་པ་བསྟན་པ་ཉམས་པའི་རྟགས་ཡིན་པས་ང་རྒྱལ་སྤངས་ཤིང་། དེ་དག་ལ་སྔོན་དུ་ལྡང་བ་དང་། གུས་ཕྱག་བྱེད་པ། གཞན་ཡང་རྒན་པས་གཞོན་པ་ལ་བརྩེ་སེམས་ཀྱིས་བསླབ་བྱ། གཞོན་པས་རྒན་པ་ལ་གུས་པའི་སྒོ་ནས་ཞེ་ས་དང་། ཞབས་འདེགས་ལ་བརྩོན་པ་ལྷུར་ལེན་པ་ཡིན། |
| རྒྱལ་མཆོག་བདུན་པ་བསྐལ་བཟང་རྒྱ་མཚོའི་ཞལ་ནས། ལུས་སེམས་སྟོབས་དང་ལྡན་པའི་རྒྱུ་ནི། དེང་དུས་རླུང་རྟ་བསྐྱེད་པ་ཞེས་པ་བོན་ལུགས་ཀྱི་དར་ལྕོག་འཛུགས་པ་དར་ཡང་། དེ་བཞིན་གཤེགས་པའི་གསང་བའི་མདོ་ལས། ལུས་སྟོབས་རྒྱས་པར་འདོད་པས་སངས་རྒྱས་ཀྱི་རིང་བསྲེལ་བཞུགས་པའི་མཆོད་རྟེན་ལ་ཐལ་བས་བྱུགས་རིས་བགྱིས་པར་བྱའོ་གསུངས་པ་ལྟར། མཆོད་རྟེན་། དགེ་འདུན་གྱི་གཙུག་ལག་ཁང་སོགས་ལ་ས་དཀར་དམར་སོགས་གསོལ་བ་དང་། དེ་དག་གི་སྒོ་ཡོལ་དར་གྱིས་ཤམ་བུ་སོགས་ཕུལ་ན། རིའི་རྩེ་མོར་རས་བཙུགས་པ་ལས་ཁྱད་དུ་འཕགས་པར་གསུངས། |
