མཆོད་རྟེན་རྣམ་པ་བརྒྱད་ནི།
སྤྱིར་བཅོམ་ལྡན་འདས་ཀྱི་མཛད་པ་ལས་བརྩམས་པའི་མཆོད་རྟེན་མང་པོ་ཞིག་བཞེངས་པར་སྟོན་པའི་རྣམ་ཐར་ཁག་ལས་འབྱུང་ནའང་མཛད་པ་གཙོ་ཆེ་བའི་དབང་དུ་བྱས་པའི་མཛད་པ་ཆེན་པོ་བརྒྱད་དང་། དེ་བསྟན་པའི་གནས་ཆེན་བརྒྱད་རྗེས་དྲན་གྱི་ཆེད་དུ་ཡོངས་གྲགས་སུ་བོད་དུ་བཞེངས་པའི་བདེ་བར་གཤེགས་པའི་མཆོད་རྟེན་རྣམ་པ་བརྒྱད་ནི། བྱང་ཆུབ་མཆོད་རྟེན་དང་། པད་སྤུངས་མཆོད་རྟེན། སྒོ་མང་མཆོད་རྟེན། ཆོ་འཕྲུལ་མཆོད་རྟེན། ལྷ་བབས་མཆོད་རྟེན། དབྱེན་ཟླུམ་མཆོད་རྟེན། རྣམ་རྒྱལ་མཆོད་རྟེན། མྱང་འདས་མཆོད་རྟེན་དང་བརྒྱད་ཡིན་ཞིང་།
ཇི་སྐད་དུ། བསོད་ནམས་བརྒྱ་ཡི་མཚན་དང་ལྡན་པས་ན། །ལྷར་བཅས་འཇིག་རྟེན་ནང་ན་བསོད་ནམས་གཏེར། །མཐོང་དང་ཐོས་དང་གཞེས་པ་མཛད་པས་ཀྱང༌། །འཇིག་རྟེན་ཀུན་ལ་ཕན་པར་མཛད་པ་ལགས། །ཞེས་གསུངས་པ་ལྟར་དང་།
གསལ་རྒྱལ་ལ་ཚིགས་སུ་བཅད་པའི་མདོ་ལས་ཀྱང་། བཅོམ་ལྡན་འདས་ཀྱི་མཆོད་རྟེན་རྣམས་དང་ནི། །སྐུ་གཟུགས་རྣམས་ལ་རྡུལ་ཕྲན་ཅི་ཡོད་པ། །དེ་ཡི་གྲངས་སྙེད་དེ་བྱེད་མི་རྣམས་ཀྱིས། །ལྷ་ཡུལ་ས་སྟེང་ངེས་པར་རྒྱལ་སྲིད་འཐོབ། །གཟུགས་དང་གཟུགས་མེད་ཁམས་ཀྱི་ཏིང་ངེ་འཛིན། །ཕུན་སུམ་ཚོགས་པའི་ས་མཆོག་ཀུན་མྱོང་ནས། །མཐའ་མར་སྐྱེ་དང་རྒ་ལ་སོགས་པ་ཡི། །སྡུག་བསྔལ་མེད་པའི་སངས་རྒྱས་གོ་འཕང་ཐོབ། །ཅེས་གསུངས་སོ། །
པདྨ་སྤུངས་པའི་མཆོད་རྟེན་ནི་རྒྱལ་བུ་དོན་གྲུབ་ལུམ་བི་ནིའི་ཚལ་དུ་སྐུ་བལྟམས་མ་ཐག་ཕྱོགས་བཞིར་གོམ་པ་བདུན་བདུན་བོར་བའི་སར་མེ་ཏོག་པད་མ་རེ་བྱུང་བ། དེའི་རྗེས་དྲན་གྱི་ཆེད་དུ་ཡབ་རྒྱལ་པོ་ཟས་གཙང་སོགས་ཀྱིས་ལུམ་བིའི་ཚལ་དུ་བཞེངས་པ། དབྱིབས་ཟླུམ་པོ་པདྨའི་རྣམ་པ་ཅན་ནམ་པདྨ་འདབ་མ་ཅན་གྱི་བང་རིམ་བཞིའམ་བདུན་བརྒྱད་དུའང་བཤད་པའོ། །
བྱང་ཆུབ་མཆོད་རྟེན་ནི་ས་ག་ཟླ་བའི་ཚེས་བཅོ་ལྔའི་ཉིན་མོར་སྟོན་པ་བཅོམ་ལྡན་འདས་ཉིད་ཡུལ་དབུས་ཀྱི་གནས་མཆོག་རྡོ་རྗེ་གདན་གྱི་བྱང་ཆུབ་ཀྱི་ཤིང་གི་དྲུང་དུ་མངོན་པར་རྫོགས་པར་སངས་རྒྱས་པའི་ཚེ་ན། དེའི་རྗེས་དྲན་གྱི་ཆེད་དུ་རྒྱལ་པོ་གཟུགས་ཅན་སྙིང་པོ་སོགས་ཀྱིས་བཞེངས་པ། མཆོད་རྟེན་གྱི་དབྱིབས་ནི་གྲུ་བཞི་པ་དང་བང་རིམ་བཞི་ལྡན་དང་བཅས་པའོ། །
བཀྲ་ཤིས་སྒོ་མང་མཆོད་རྟེན་ནི་སྟོན་པ་བཅོམ་ལྡན་འདས་ཀྱིས་ཡུལ་ཝཱ་རཱ་ཎ་སིར་འཁོར་ལྔ་སྡེ་བཟང་པོ་ལ་བཀའ་དང་པོ་བདེན་པ་བཞིའི་ཆོས་འཁོར་བསྐོར་བའི་ཚེ་ན། དེའི་རྗེས་དྲན་གྱི་ཆེད་དུ་ཚངས་བྱིན་སོགས་ཀྱིས་བཞེངས་པ་དབྱིབས་གྲུ་བཞི་བང་རིམ་བཞི་ཅན་གློ་འབུར་དང་བཅས་པ་རབ་སྒོ་བརྒྱ་རྩ་བརྒྱད། འབྲིང་ལ་ང་དྲུག་ཐ་མ་བཅུ་དྲུག་པར་ཡོངས་གྲགས་སུ་བཞེད་ཅིང་། ཕྱོགས་རེར་སྒོ་བཞི་རེ་བྱེད་པ་བདེན་བཞི། བརྒྱད་རེ་བྱེད་པ་རྣམ་ཐར་བརྒྱད། བཅུ་གཉིས་སུ་བྱེད་པ་རྟེན་འབྲེལ་བཅུ་གཉིས། བཅུ་དྲུག་ཏུ་བྱེད་པ་སྟོང་ཉིད་བཅུ་དྲུག་མཚོན་པའོ། །
ཆོ་འཕྲུལ་མཆོད་རྟེན་ནི་སྟོན་པ་བཅོམ་ལྡན་འདས་ཀྱིས་མཉན་ཡོད་དུ་མུ་སྟེགས་ཀྱི་སྟོན་པ་དྲུག་སྟེ་རྫོགས་བྱེད་དང༌། ཕྱུགས་ལྷས་ཀྱི་བུ། ཡང་དག་རྒྱལ་བ་ཅན། མི་ཕམ་སྐྲའི་ལ་བ་ཅན། ཀཱ་ཏ་ཡ་ནའི་བུ་ནོག་ཅན། གཅེར་བུ་བ་གཉེན་གྱི་བུ་བཅས་རྫུ་འཕྲུལ་གྱིས་ཕམ་པར་བྱས་པའི་ཚེ་ན། དེའི་རྗེས་དྲན་གྱི་ཆེད་དུ་མཉན་ཡོད་ཛེ་ཏའི་ཚལ་དུ་རྒྱལ་བོ་ཤར་པ་དང་ལི་ཙ་བྱི་སོགས་ཀྱིས་བཞེངས་པ། དབྱིབས་གྲུ་བཞི་པ་བང་རིམ་བཞི་དང་ལྡན་པ། ཕྱོགས་བཞིར་གློ་འབུར་དང་བཅས་པའོ། །
ལྷ་བབས་མཆོད་རྟེན་ནི་སྟོན་པ་བཅོམ་ལྡན་འདས་ལྷ་གནས་སུམ་ཅུ་རྩ་གསུམ་དུ་གཤེགས་ཏེ་དབྱར་གནས་མཛད་ཅིང་ཡུམ་སྒྱུ་འཕྲུལ་ལྷ་མཛེས་སོགས་བདེན་པ་ལ་བཀོད་ཏེ་སྔ་དྲོ་དགག་དབྱེ་མཛད། ཕྱི་དྲོ་ནམ་མཁའ་ལས་བབས་ནས་འཛམ་བུ་གླིང་དུ་ཕེབས་པའི་ཚེ། དེའི་རྗེས་དྲན་གྱི་ཆེད་དུ། ཡངས་པ་ཅན་གསལ་ལྡན་དུ་རྒྱལ་པོ་གསལ་རྒྱལ་སོགས་ཀྱིས་བཞེངས་པ། བང་རིམ་བཞིའི་ངོས་རེར་གློ་འབུར་དང་བཅས་པ། གློ་འབུར་གྱི་དབུས་ན་ཐེམ་སྐམ་ཡོད་པའོ། །
དབྱེན་ཟླུམ་མཆོད་རྟེན་ནི་སྟོན་པ་བཅོམ་ལྡན་འདས་ཀྱིས་འོད་མའི་ཚལ་དུ་ལྷས་བྱིན་གྱིས་རང་ལ་འཁོར་གྱི་གནང་བར་ཞུས་པ་ལ་སངས་རྒྱས་མ་འཐད་པས། ཁོ་ཁྲོས་ཏེ་རང་གིས་འཁོར་བསྡུས་ཞིང་རང་ཉིད་སྟོན་པ་ལྟར་བཞུགས་ཤིང་། སྟོན་པའི་འཁོར་དགེ་སློང་རྣམས་ལ་དབྱེན་བྱས་ཏེ་ཕྱོགས་གཉིས་སུ་བྱེ་བ་ལ་ཤཱ་རིའི་བུ་དང་མོའུ་འགལ་གྱི་བུས་བསྡུམས་པའི་ཚེ་རྒྱལ་བྱེད་སོགས་མ་ག་དྷ་པ་རྣམས་ཀྱིས་བཞེངས་པ། བང་རིམ་བཞིའི་ཟུར་བཞི་མཉམ་པར་བཅད་པ་ལྟ་བུའོ། །
རྣམ་རྒྱལ་མཆོད་རྟེན་ནི་ལུང་ཕྲན་ཚེགས་ལས། བཅོམ་ལྡན་འདས་ཀྱིས་སྲོག་གི་འདུ་བྱེད་དག་བྱིན་གྱིས་བརླབས་ནས། ཚེའི་འདུ་བྱེད་དག་བཏང་ངོ༌། །ཞེས་གསུངས་ལ། དགོས་པ་ནི། སྐུ་ཚེ་ལ་མངའ་བརྙེས་པ་ཉིད་དུ་བསྟན་པའི་ཕྱིར་དང༌། གང་ཡང་རྫུ་འཕྲུལ་གྱི་རྐང་པ་བཞི་བོ་དེ་ལྟར་བསྒོམས་པ་དག་གིས་འདོད་ན་བསྐལ་པའམ་བསྐལ་པ་ལས་ལྷག་པར་བཞུགས་པར་བྱའོ། །ཞེས་དམ་བཅས་པ་དེ་ཡང་བསྒྲུབ་པའི་ཕྱིར་ཡངས་པ་ཅན་དུ་ཟླ་བ་གསུམ་དུ་སྲོག་གི་འདུ་བྱེད་བྱིན་གྱིས་བརླབས་ཏེ་བཞུགས་དང་། དེའི་རྗེས་དྲན་གྱི་ཆེད་དུ་ཡངས་པའི་གྲོང་ཁྱེར་བ་རྣམས་ཀྱིས་བཞེངས་པ། དབྱིབས་ཟླུམ་པོ་བང་རིམ་གསུམ་དང་ལྡན་པའོ། །
མྱང་འདས་མཆོད་རྟེན་ནི་སྐུ་དངོས་ཀྱི་གདུལ་བྱའི་སྐལ་པ་རྫོགས་ཏེ་རྩྭ་མཆོག་གི་གྲོང་དུ་གཟིམས་ཁྲིའི་མཐའ་ཅན་དུ་གྱུར་པའམ་སྐུ་མྱ་ངན་ལས་འདས་པའི་ཚེ་ན། དེའི་རྗེས་དྲན་གྱི་ཆེད་དུ་རྒྱལ་པོ་མ་སྐྱེས་དགྲས་བཞེངས་པ། བུམ་པ་བང་རིམ་དང་བཅས་དྲིལ་མདོང་གི་དབྱིབས་ཡོད་པ། བཅོམ་ལྡན་འདས་ཀྱིས་བཀའ་སྩལ་བ། མཁས་པ་གང་ཞིག་རབ་ཏུ་སེམས་དང་བས། །སངས་རྒྱས་མཆོད་རྟེན་དག་ལ་གོམ་འདོར་ན། །འཛམ་བུ་ཆུ་བོའི་གསེར་གྱི་སྲང་ཚད་ནི། །སྟོང་ཕྲག་བརྒྱ་ཡང་དེ་དང་མཉམ་པ་མིན། །ཞེས་སོ། །