དགའ་ལྡན་ཁྲི་ཐོག་གོ་བདུན་པ་ཡོངས་འཛིན་གླིང་སྤྲུལ་ཐུབ་བསྟན་ལུང་རྟོགས་རྣམ་རྒྱལ་འཕྲིན་ལས་ནི། སྤྱི་ལོ་ ༡༩༠༣ ལོར་ཡུལ་དཀར་བོག་ཏུ་ཡབ་ཀུན་དགའ་ཚེ་རིང་དང༌། ཡུམ་བསོད་ནམས་བདེ་སྐྱིད་གཉིས་ཀྱི་སྲས་སུ་སྐུ་འཁྲུངས། ཤར་ཆོས་གླིང་སྤྲུལ་སྐུའི་ཡང་སྲིད་དུ་ངོས་འཛིན་གནང་། ༡༩༡༢ ལོར་འབྲས་བློ་གླིང་གྲྭ་ཚང་དུ་ཆོས་ཞུགས་ཀྱིས་གཞུང་ཆེན་མོར་གསན་བསམ་གནང་། ༡༩༡༣ ལོར་རབ་ཏུ་བྱུང༌བ་དང་། ༡༩༢༢ ལོར་༧གོང་ས་བཅུ་གསུམ་པ་ལས་བསྙེན་པར་རྫོགས། ༡༩༢༤ ལོར་གཞུང་ཆེན་ལྔའི་དམ་བཅའ་བཞག་སྟེ། ལྷ་རམས་ཨང་གཉིས་པའི་མཚན་གནས་བཞེས། དེ་ནས་རྒྱུད་སྟོད་གྲྭ་ཚང་དུ་ཕེབས་ཏེ། ཆོས་ཐོག་རིམ་འགྲིམས་ཀྱིས་གསང་སྔགས་ལ་གསན་བསམ་གནང་། ༡༩༢༥ ལོར་སྔགས་ཀྱི་རྩོད་རྒྱུགས་སྐབས་ཨང་རིམ་དང་པོའི་མཚན་རྟགས་བཞེས། མེ་སྟག་ལ་རྒྱུད་གྲྭའི་དགེ་བསྐོས་མཛད། ༡༩༣༦ ལ་རྒྱུད་སྟོད་བླ་མ་དབུ་མཛད་དང༌། ༡༩༣༨ ལོར་སྟོད་རྒྱུད་མཁན་པོར་ཕེབས། ༡༩༤༡ ལོར་༧རྒྱལ་བའི་ཡོངས་འཛིན་སྐུ་གཞོན་དང༌། ༡༩༥༣ ལོར་ཡོངས་འཛིན་སྐུ་བགྲེས་ཀྱི་མཚན་གནས་བཞེས། ༡༩༤༩ ལོར་ཤར་པ་ཆོས་རྗེའི་ཁྲིར་ཕེབས། ༡༩༥༤ ལོར་༧གོང་ས་སྐྱབས་མགོན་བཅུ་བཞི་པ་ཆེན་པོར་བསྙེན་རྫོགས་ཀྱི་སྡོམ་པ་ཕུལ། ༡༩༥༩ ལོར་རྒྱ་གར་དུ་ཕེབས། ཨ་སམ་ཁུལ་སྦག་ས་ཆོས་སྒར་སོགས་སུ་མདོ་སྔགས་ཀྱི་ཟབ་ཆོས་མང་དུ་གནང༌། ༡༩༦༥ ལོར་དགའ་ལྡན་གསེར་ཁྲིར་མངའ་གསོལ་མཛད། ཕྱིའི་ཡུལ་གྲུ་སོགས་སུ་སྐལ་ལྡན་མང་པོར་ཟབ་ཆོས་གང་མང་གནང་། ༡༩༧༢ ལོར་རྒྱ་གར་ལྷོ་ཕྱོགས་མོན་གྷོར་ཕེབས་ཏེ་དགའ་ལྡན་བླ་སྤྱིར་སྔར་སྲོལ་བཞིན་དགའ་ལྡན་ཁྲི་པའི་མཛད་སྒོ་གནང༌། ༡༩༨༣ ལོའི་ཟླ་ ༡༢ ཚེས་ ༢༥ ཉིན་གྱི་ཆུ་ཚོད་བཅུ་གཅིག་པ་ལ་དགོངས་པ་ཆོས་དབྱིངས་སུ་ཐིམ་ཚུལ་བསྟན། གསུང་སྐྱེས་སློབ་མ་ལ༧གོང་ས་རྒྱལ་དབང་བཅུ་བཞི་པ་ཆེན་པོ་སོགས་སྐྱེས་ཆེན་མང་དུ་བྱོན།

རྒྱལ་བའི་ཡོངས་འཛིན་ཁྲི་བྱང་བློ་བཟང་ཡེ་ཤེས་བསྟན་འཛིན་རྒྱ་མཚོ་མཆོག་ནི། སྤྱི་ལོ་ ༡༩༠༡ ལོར་ཚལ་གུང་ཐང་དུ་ཡབ་ཚེ་རིང་དོན་གྲུབ་དང་། ཡུམ་ཚེ་རིང་སྒྲོལ་མ་གཉིས་ཀྱི་སྲས་སུ་སྐུ་འཁྲུངས། དགུང་ལོ་ཆུང་ངུའི་དུས་ནས་ཁྲི་བྱང་རིན་པོ་ཆེའི་ཡང་སྲིད་དུ་ངོས་འཛིན་མཛད་ཅིང་ཁྲི་འདོན་གནང་། དེ་ནས་དབུས་སུ་ཕེབས་ཏེ་དགའ་ལྡན་ཤར་རྩེ་གྲྭ་ཚང་དུ་ཆོས་ཞུགས་མཛད་དེ་གཞུང་ཆེན་བཀའ་པོད་ལྔ་དང་ཐ་སྙད་རིག་གནས་ལའང་གསན་བཞེས་མཛད། ཞོར་དུ་མདོ་སྔགས་ཀྱི་ཟབ་ཆོས་ཀྱང་མང་དུ་གསན། དགུང་ལོ་ཉེར་གཅིག་པར་ལྷ་ལྡན་སྨོན་ལམ་ཆེན་མོའི་གྲྭ་སྐོར་མཛད་ཅིང་ལྷ་རམས་པའི་དམ་བཅའ་གནང་བ་དང་། དགུང་ལོ་སོ་བཞི་པར་རྒྱལ་བ་ཐུབ་བསྟན་རྒྱ་མཚོའི་གསེར་སྡོང་གསར་བཞེངས་ཀྱི་ཕྱག་ལས་གནང་། དགུང་ལོ་ཞེ་བཞི་པར་ ༧ གོང་ས་༧རྒྱལ་བ་བཅུ་བཞི་པ་ཆེན་པོའི་མཚན་ཞབས་མཛད། དགུང་ལོ་ང་གཅིག་པར་༧རྒྱལ་བའི་ཡོངས་འཛིན་གྱི་ཐུགས་འགན་བཞེས། ༡༩༥༩ ལོར་འཕགས་ཡུལ་དུ་ཕེབས། ༡༩༦༡ ལོར་རྡོ་རྗེ་གདན་དུ་ཆོ་འཕྲུལ་སྨོན་ལམ་འཕར་མ་ཚུགས་སྐབས་གདན་ས་གསུམ་སོགས་ཀྱི་དགེ་འདུན་སྟོང་ཕྲག་བརྒལ་བའི་ཚོགས་མགོན་དུ་ཕེབས་ཏེ་གསུང་ཆོས་དང་བསྔོ་སྨོན་སོགས་ཀྱང་གནང་། གཞན་ཕྱི་ནང་ཡུལ་གྲུ་རྣམས་སུ་སྐལ་ལྡན་མང་པོར་དབང་བཀའ་ཆོས་སོགས་ཟབ་ཆོས་མང་དུ་གནང་བ་དང་། ༡༩༨༢ ལོ་སྟེ་དགུང་ལོ་གྱ་གཉིས་པར་དགོངས་པ་ཆོས་དབྱིངས་སུ་གཤེགས། ཁྲི་བྱང་རིན་པོ་ཆེ་སྐུ་ཕྲེང་གསུམ་པ་དང་། གསུང་རྩོམ་ལ། གྲུབ་ཆེན་དྲིལ་བུ་པའི་ལུགས་ཀྱི་འཁོར་ལོ་སྡོམ་པའི་ལུས་དཀྱིལ་གྱི་བསྐྱེད་རིམ་ཟིན་བྲིས་སོགས་དང་། རྒྱལ་སྲས་རྒྱ་མཚོའི་འཇུག་ངོགས་ལས་རྗེས་གནང་གི་སྐོར། ཁྲིད་ཀྱི་སྐོར། བེའུ་བུམ་གྱི་སྐོར། དབང་གི་སྐོར། ལུང་གི་སྐོར། ས་སྐྱའི་གསེར་ཆོས་བཅུ་གསུམ་གྱི་བེའུ་བུམ་སྐོར་སོགས་པོད་གྲངས་ཁ་ཤས་བཞུགས་པ་ལགས་སོ། །