༄༅། །འཁོན་གདུང་བསྟན་པའི་སྲོག་ཤིང་ཆེན་པོ་དཔལ་ས་སྐྱ་༧གོང་མ་ཁྲི་ཆེན་རྡོ་རྗེ་འཆང་ཆེན་པོ་མཆོག་ཞལ་སྔ་ནས་བསྟན་པ་དང་འགྲོ་བའི་དཔལ་མགོན་ཆེན་པོར་གཟུགས་སྐུ་མཚན་དཔེའི་ལང་ཚོ་བོད་གངས་ཅན་གྱི་ལྗོངས་སུ་མངོན་པར་བཞད་དེ།
བགྲང་བྱ་ ༨༠ འཁོར་བ་དང་སྐུའི་གྱ་སྟོན་གྱི་སརྒ་ཕུན་ཚོགས་སྡེ་བཞིའི་དཔལ་ཡོན་ཡོངས་སུ་རྫོགས་པའི་བརྗིད་ཉམས་མཛེས་སྡུག་ཕུན་སུམ་ཚོགས་པའི་མཛད་སྒོ་ཆེན་མོའི་དགའ་སྟོན་རྟེན་འབྲེལ་ལ་འདི་ག་དཔལ་ལྡན་སྨད་རྒྱུད་གྲྭ་ཚང་གི་སྐྱབས་རྗེ་མཁན་བླ་རྣམ་གཉིས་ཀྱིས་དབུས་ལས་སྣེ་འདུས་མང་ཡོངས་ནས། དགའ་དད་སྤྲོ་བའི་ཡིད་ཀྱི་འོ་མཚོ་གྱེན་དུ་འཕྱུར་ཞིང་ལག་ཟུང་པདྨོ་སྙིང་ཀར་ཟུམ་སྟེ་གུས་འཚམས་དང་བཀྲ་ཤིས་བདེ་ལེགས་ཀྱི་དར་དཀར་བརྐྱངས་ཤིང་དགེ་མཚན་འབུམ་གྱིས་བསུ་བའི་མེ་ཏོག་བསིལ་མ་འཐོར་ཏེ་རྟེན་འབྲེལ་ཟབ་མོ་ཞུ། སླད་ནས་ཀྱང་ཁྲི་ཆེན་ ༧ གོང་མ་མཆོག་ ༧ རྒྱལ་བསྟན་ཉག་ཕྲ་ལ་འགྲོ་བ་ཉམ་ཐག་པའི་དུས་འདིར་རླབས་ཆེན་ཐུགས་བསྐྱེད་དམ་བཅའ་རྡོ་རྗེ་ཕ་ལམ་ལྟར་བརྟན་ཅིང་། གང་སྐུ་རིང་འཚོའི་ཐུགས་འདུན་གངྒའི་ཆུ་རྒྱུན་ལྟར་གཏོང་གནང་མཛད་དེ་བསྟན་འགྲོའི་མགོན་སྐྱབས་དམ་པར་སྐུ་ཚེ་ཞབས་ཟུང་མི་ཤིགས་རྡོ་རྗེའི་ཁམས་ལྟར་བརྟན་བརྗིད་ཆགས་ཤིང་། གསང་གསུམ་རྨད་བྱུང་མཛད་འཕྲིན་ནི་མཁའ་དབྱིངས་ཉི་ཟླ་ཟུང་གི་འོད་ཀྱི་སྣང་བས་ས་ཆེན་འཛིན་མའི་ཁྱོན་ཡོངས་སུ་གསལ་བ་ལྟར་ཁྱབ་བརྡར་ཡོང་བའི་གསོལ་འདེབས་སྨོན་ལམ་རྒྱུན་མི་ཆད་དུ་ཞུ་རྒྱུ་ལགས་སོ། ། དཔལ་ལྡན་སྨད་རྒྱུད་གྲྭ་ཚང་འདུས་སྤྱིའི་ལས་ཁང་ནས་བོད་རྒྱལ་ལོ་ ༢༡༥༡ ཟླ་ ༠༨ ཚེས་ ༠༡ སྤྱི་ལོ་ ༢༠༢༤ སྤྱི་ཟླ་ ༡༠ ཚེས་ ༠༣ དགེ་བར་ཕུལ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༠།༠༣།ལ།
