༄༅། །མཁས་བཙུན་བཟང་པོའི་ཡོན་ཏན་གྱི་གཏེར་ཆེན་པོར་གྱུར་པ་རྗེ་བཙུན་བློ་བཟང་རྡོ་རྗེ་དཔལ་བཟང་པོ་མཆོག་ཞལ་སྔ་ནས། བོད་རབ་གནས་ཤིང་ཕོ་འབྲུག་ལོའི་ཟླ་བ་ ༡༡ པའི་གྲལ་ཚེས་ ༢༦ གཟའ་སྐར་འཕྲོད་སྦྱོར་རབ་ཏུ་དགེ་བའི་ཉིན་བཟང་པོར།
༸རྗེའི་གདན་ས་ཆེན་མོ་དགའ་ལྡན་རྣམ་པར་རྒྱལ་བའི་གླིིང་ཚོགས་ཆེན་དུ། ཡབ་༸རྗེ་རྒྱལ་བ་གཉིས་པ་ཁམས་གསུམ་ཆོས་ཀྱི་རྒྱལ་པོ་ཤར་༸རྒྱལ་བ་ཙོང་ཁ་ཆེན་པོའི་གདུང་འཚོབ་ ༡༠༥ པའི་མི་འཇིགས་གདོང་ལྔས་བཏེག་པའི་གསེར་ཀྱི་ཁྲི་འཕང་མཐོན་པོར་མངའ་གསོལ་བའི་ཆེས་བླ་ན་མཐོ་བའི་དགའ་སྟོན་རྟེན་འབྲེལ་ལ། འདི་ག་དཔལ་ལྡན་སྨད་རྒྱུད་པའི་ལས་ཀྱི་སྣེ་མོ་ཆེད་བཅར་དང་འབྲེལ། མཚུངས་མེད་ཆོས་ཀྱི་རྗེ་མཁན་བླ་རྣམ་གཉིས་ཀྱིས་དབུས་དཔལ་ལྡན་སྨད་རྒྱུད་གྲྭ་འདུས་མང་ནས། དགའ་དད་སྤྲོ་བའི་ཡིད་ཀྱི་འོ་མཚོ་གྱེན་དུ་འཕྱུར་ཞིང་ལག་ཟུང་པདྨོ་སྤྱི་བོ་བདེ་ཆེན་འཁོར་ལོའི་རྒྱན་དུ་བཀོད་དེ་གུས་ཕྱག་དང་འབྲེལ་ནས་འཚམས་འདྲིའི་བཀྲིས་བདེ་ལེགས་ཀྱི་མེ་ཏོག་བསིལ་མ་ཕང་ཕུང་དུ་འཐོར་བ་དང་ཆབས་ཅིག ། ཁྲི་ཆེན་རྡོ་རྗེ་འཆང་མཆོག་གི་སྐུའི་གསང་གསུམ་ལ་འགལ་རྐྱེན་གྱིས་ནམ་ཡང་མི་འཚེ་བར། ༸རྒྱལ་བསྟན་ཉག་ཕྲ་ལ་འགྲོ་བ་ཉམ་ཐག་པའི་དུས་འདིར་ལྷག་པར་དགོངས་ནས་སྐུ་ཚེ་ཞབས་པད་མི་ཤིགས་རྡོ་རྗེའི་ཁམས་ལྟར་བརྟན་ཅིང་། རྨད་བྱུང་མཛད་བཟང་ཉི་ཟླའི་སྣང་བ་འཛིན་མའི་ཁྱོན་ཡོངས་ལ་གསལ་ལེར་རིང་དུ་ཁྱབ་པའི་སྨོན་འདུན་ཡང་ཤུགས་དྲག་ཞུ་རྒྱུུ་བཅས། དཔལ་ལྡན་སྨད་རྒྱུད་གྲྭ་ཚང་འདུས་སྤྱིའིི་ལས་ཁང་ནས་ཕྱི་ལོ་ ༢༠༢༤ ཟླ་བ་ ༡༡ ཚེས་ ༢༦ དགེ་བར་ཕུལ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༡།༢༦།ལ།
