༄༅། །དཔལ་ལྡན་སྨད་རྒྱུད་པའི་བྱང་འདྲེན་རྒན་པ་ཏྲེ་ཧོར་སྔགས་རམས་པ་བློ་བཟང་ཆོས་གྲགས་མཆོག་འདས་པའི་ལོ་ངོ་ ༡༧ རིང་རིམ་བཞིན་བྱང་འདྲེན་རྒན་གཞོན་གནང་སྟེ། ཉེ་ཆར་༧གོང་ས་༧སྐྱབས་མགོན་ཆེན་པོར་དགོངས་འཁྲོལ་ཞུས་སྩལ་གྱིས།
ཕྱག་སྲོལ་ལྟར་བྱང་འདྲེན་གཞོན་པ་ཚ་བ་སྔགས་རམས་པ་ཤེས་རབ་སེངྒ་མཆོག་རྒན་པར་འཕོ་འཐུས་ཀྱི་བཀའ་འཁྲོལ་ཀྱང་སྤྱི་སྩལ་ཟིན་པར་བརྟེན། བྱང་འདྲེན་གསར་པ་བསྐོ་བཞག་སླད་སྐྱབས་རྗེ་མཁན་བླ་རྣམ་གཉིས་དབུ་བཞུགས་ཀྱིས་སྔགས་རམས་པ་རྣམ་པས་སྔོན་འགྲོའི་འོས་གཞི་ཚད་ལྡན་བཟོས་གནང་གིས། མང་གཙོའི་ལམ་སྲོལ་ཇི་བཞིན་སྨད་རྒྱུད་འདུས་མང་ནས་དངོས་གཞི་འོས་འཕེན་གནང་འབྲས། འོས་མི་གསུམ་དཔལ་ལྡན་དགའ་ལྡན་ཕོ་བྲང་བརྒྱུད་སྤྱི་ནོར་༧གོང་ས་༧སྐྱབས་མགོན་ཆེན་པོར་འབུལ་ལམ་ཞུས་དོན་ལྟར། ༧རྒྱལ་དབང་མཆོག་གིས་ཐུགས་དམ་རྡོ་རྗེའི་གུར་ཁང་ནས་བརྟག་ཞིབ་ལེགས་མཛད་ཀྱིས་ཕྱིར་ཕེབས་སུ། འོས་དང་པོ་ཚ་བ་སྔགས་རམས་པ་བསྟན་འཛིན་ཚེ་རིང་ལགས་སུ་བྱང་འདྲེན་གསར་པར་བསྐོ་བཞག་གི་བཀའ་ཡིག་རིན་པོ་ཆེ་སྤྱི་བོ་བདེ་ཆེན་འཁོར་ལོའི་རྒྱན་དུ་ ༢༠༢༤ ཟླ་བ་ ༡༡ ཚེས་ ༡༩ འཁོད་པ་སྤྱི་ཕེབས་བཀྲིན་ཆེ་བ་བཞིན་གཟའ་སྐར་འཕྲོད་སྦྱོར་དགེ་བའི་ཉིན་དོ་བདག་ལ་བཀའ་ཡིག་རིན་པོ་ཆེ་བརྒྱུད་སྤྲོད་གནང་ཞིང། བྱང་འདྲེན་གསར་བཞེངས་སྔགས་རམས་པ་བསྟན་འཛིན་ཚེ་རིང་མཆོག་ལ་འཚམས་འདྲིའི་བཀྲིས་བདེ་ལེགས་དང། གྲྭ་ཚང་རིན་པོ་ཆེའི་རྒྱ་ཆེ་ལ་རྣམ་གྲངས་མང་བའི་ཆོ་ག་ཕྱག་ལེན་གྱིས་མཚོན་པས་༧རྒྱལ་བསྟན་སྲི་ཞུའི་ཞབས་འདེགས་ལེགས་པར་མཐར་སོན་ཡོང་བའི་སྨོན་འདུན་བཅས། སྨད་རྒྱུད་གྲྭ་ཚང་སྨད་རྒྱུད་འདུས་སྤྱིའི་ལས་ཁུངས་ནས། སྤྱི་ལོ་ ༢༠༢༤ ལོའི་ཟླ་ ༡༢ ཚེས་ ༢༢ ལ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༢།༢༢།ལ།
