གསང་ཆེན་དཔལ་ལྡན་སྨད་རྒྱུད་གྲྭ་ཚང་གི་དཔེ་མཛོད་ཁང་བསྐྱར་གསོ་གནང་སྟེ་རྟེན་འབྲེལ་གྱིས་དབུ་འབྱེད་ཀྱི་མཛད་སྒོ་སྟབས་བདེ་ཞིག་ཚོགས་ཤིང་ཐོག་ཁའི་དཔེ་ཀློག་ཁང་གི་ལས་གཞི་སོགས་ལས་གཞི་ཁག་གཅིག་མུ་མཐུད་དེ་འགྲོ་བཞིན་འདུག །
དཔལ་ལྡན་སྨད་རྒྱུད་གྲྭ་ཚང་གི་དཔེ་མཛོད་ཁང་འདི་དད་གཏོང་ཡངས་པའི་ཕྱི་ནང་སྦྱིན་བདག་རྣམས་ཀྱི་རོགས་རམ་བཀའ་དྲིན་ལ་བརྟེན་ནས་འོག་ཐོག་ཡོངས་སུ་ལེགས་གྲུབ་ཀྱིས་སྒོ་དབྱེ་རྟེན་འབྲེལ་མཛད་སྒོ་སྟབས་བདེ་ཞིག་སྤེལ་བ་དང་། ད་དུང་སྟེང་ཐོག་དཔེ་ཀློག་ཁང་གི་ལས་གཞི་སྦྱིན་བདག་ཁག་གི་ཐུགས་འདུན་བཞིན་འཆར་འགོད་ཞུ་བཞིན་ཡོད།
རྒྱུད་སྨད་དཔེ་མཛོད་ཁང་། སྔོན་ཆད་གྲྭ་ཚང་དུ་དཔེ་མཛོད་དམ་དཔེ་ཆ་གཡར་ས་ལྟ་བུར་འདུ་ཁང་རྙིང་པའི་ཟུར་དུ་འཆད་ཉན་སོགས་ཀྱི་ཆེད་དུ་ཉེ་བར་མཁོ་བའི་གླེགས་བམ་རྣམས་བསྡུ་སྒྲིག་གིས་བདག་གཉེར་གནང་སྟེ་ཆོས་ཐོག་ལ་ཕེབས་པའི་དགེ་བཤེས་སོགས་ལ་གཡར་གནང་གི་ཡོད་ལ། རྗེས་སུ་འདུ་ཁང་གསར་བའི་གཡས་ཀྱི་རྒྱབ་ཁང་དུ་རྒྱུད་འགྲེལ་སོགས་ཀྱི་གླེགས་བམ་རྣམས་བདག་གཉེར་དང་དགེ་བཤེས་སོགས་ལ་གཡར་བ་སོགས་གནང་གི་ཡོད་པ་ལས། སྐབས་ཤིག་ལ་གཞན་གྱི་སྐུལ་སློང་ལས་འདུ་ཁང་རྙིང་པ་དཔེ་མཛོད་ཁང་བྱས་ཏེ་གླེགས་བམ་མང་པོ་སྒྲིག་གཤོམ་གནང་སྟེ་ད་ལྟའི་བར་དུ་གནས་པ་དང་། ཡིན་ན་ཡང་འཆད་ཉན་ལ་མཁོ་བའི་གླེགས་བམ་མང་པོ་གོང་དུ་བརྗོད་པ་ལྟར་འདུ་ཁང་གསར་པའི་རྒྱབ་ཁང་དུ་སྒྲིག་གཤོམ་གནང་སྟེ། ཆོས་ཐོག་གི་འཆད་ཉན་སོགས་ཀྱི་སྐབས་སུ་དགེ་བཤེས་སོགས་ལ་གཡར་གནང་གི་ཡོད། མཁན་པོའི་འཆད་ཉན་ལ་མཁོ་བའི་གླེགས་བམ་གཙོ་བྱས་པའི་གྲྭ་ཚང་གི་ཆོས་སྤྱོད་ཀྱི་དཔེ་ཆ་བཅུ་ཕྲག་ལྷག་ཡོད་པ་རྣམས་སྔོན་ཆད་ཤིང་པར་འཕྲུལ་པར་ཐོག་པར་བཤུས་བཏབ་པ་སོགས་ཡིན་པ་ལ། རྗེས་སུ་ཞུས་དག་སོགས་ཚད་ལྡན་གནང་སྟེ་དེང་གི་འཕྲུལ་པར་ཐོག་དཔེ་རིང་དུ་པར་སྐྲུན་དང་། ཟུར་དུ་དེང་གི་དེབ་གཟུགས་སུའང་པར་སྐྲུན་གང་མང་གནང་ཡོད། ལྷག་པར་དུ་ལོ་བཅུ་ཕྲག་གཉིས་ལྷག་ལ་རྒྱུད་གྲྭ་སྔགས་རམས་པ་རྒན་ཆོས་འཕེལ་གྱིས་རྩོམ་སྒྲིག་སོགས་ཀྱི་ཕྱག་ལས་རོགས་དན་གནང་བ་ལས། གྲྭ་ཚང་རང་གི་ཐུན་མོང་མ་ཡིན་པའི་ཡིག་ཆ་རྒྱུད་ཀྱི་ཊིཀྐཱ་དང་དམ་ཆོས་འགྲེལ་པ་བཞི་སྦྲགས། དེ་མིན་གྲྭ་ཚང་འདི་ཉིད་ཀྱི་སྒྲིག་ཡིག་ཆེན་མོ་སོགས་པར་སྐྲུན་གནང་ཞིང། གཞན་ཡང་གྲྭ་ཚང་སློབ་གཉེར་ཁང་གི་སློབ་དེབ་ཁག་དང། དེ་མིན་བོད་ཕྱི་ནང་ཀུན་ལ་སྨན་པའི་མདོ་སྔགས་ཀྱི་ཕྱག་དཔེ་འབོར་ཆེན་པར་དུ་བསྐྲུན་དང་སྐྲུན་བཞིན་པའོ། །དེང་ཡང་དགེ་རྒན་ཁོང་གིས་རོགས་དན་ལས་སྔགས་ཕྱོགས་ཀྱི་གླེགས་བམ་བཅུ་ཕྲག་དྲུག་ལྷག་རྩོམ་སྒྲིག་གནང་སྟེ་པར་སྐྲུན་གྱི་ཆེད་པར་སྐྲུན་ཁང་དུ་སྐྱེལ་ཡོད་པ་ལས། བཅུ་ཕྲག་གཅིག་ལྷག་པར་སྐྲུན་གནང་སྟེ་དཔེ་མཛོད་དུ་འབྱོར་ཡོད་པ་དང་། འཆད་ཉན་ལ་སྟབས་བདེའི་ཆེད་མཁན་པོའི་འཆད་ཉན་གྱི་གཞུང་ཆེན་པོ་ཏི་ལྔ་ལྷག་ས་བཅད་མཉམ་སྦྱར་གྱིས་རྩོམ་སྒྲིག་དང་པར་སྐྲུན་གྲ་སྒྲིག་གནང་མུས་དང་། གཞན་གྲྭ་ཚང་གི་ཆོ་ག་ཕྱག་ལེན་ནམ་གཏོར་དཔེ་སོགས་དང་། དཀྱིལ་འཁོར་སོགས་ཀྱི་པར་རིས་སོགས་རྩོམ་སྒྲིག་གིས་པར་སྐྲུན་ལ་གྲ་སྒྲིག་བྱེད་བཞིན་པའོ། །
༢༠༢༣ ལོར་བླ་མ་དབུ་མཛད་དགེ་བཤེས་ངག་དབང་སངས་རྒྱས་ཀྱི་སྐབས་སུ་ཁོང་གིས་དཔེ་མཛོད་ཀྱི་དགོས་མཁོ་དང་གལ་ཆེའི་རང་བཞིན་སོགས་བཀའ་སློབ་ལམ་སྟོན་གནང་བ་དང་། གྲྭ་ཚང་གི་ཕྱག་མཛོད་རྣམས་དང་བཀའ་བགྲོས་ཀྱིས། གྲྭ་ཚང་གི་དངུལ་གཉེར་གྱི་ཁོངས་ནས་རྒན་བློ་བཟང་ཡེ་ཤེས་དང་། རྒན་བཟོད་པ་གཉིས་དཔེ་མཛོད་འགན་འཛིན་དུ་བསྐོ་བཞག་གནང་ཞིང་། འདུ་ཁང་རྙིང་པ་བསྐྱར་གསོ་གནང་སྟེ་དཔེ་མཛོད་ཁང་དུ་གཏན་འབེབས་དང་། དཔེ་མཛོད་ཁང་གི་སྦུག་ཁང་དུ་སྔོན་ཆད་ནས་གསང་བདེ་འཇིགས་གསུམ་གྱི་དཀྱིལ་འཁོར་བློས་བསླངས་བཞུགས་ཡོད་པ་རང་བཞག་ཐོག །འོག་ཁང་དཔེ་ཀློག་ཁང་། བླུ་ཡོན་ཁང་། ཡིག་ཚང་། རྩོམ་སྒྲིག་ཁང་སོགས་གསར་སྐྲུན་གནང་ཡོད་པ་དང་། སྔོན་ཡོད་ཀྱི་དཔེ་ཆའི་སྟེང་དཔེ་ཆ་མང་པོ་གསར་བསྒྲིགས་སོགས་གནང་སྟེ། ད་ལོའི་སྤྱི་ཟླ་ ༥ ཚེས་ ༢༡ ལ་དཔེ་མཛོད་ཁང་དབུ་འབྱེད་སྟབས་བདེ་ཞིག་གནང་སྟེ། ད་ལྟ་སྟེང་ཐོག་གི་དཔེ་ཀློག་ཁང་དང་། སྒྲ་འཇུག་ཁང་གི་ལས་གཞི་མུ་མཐུད་དེ་འགྲོ་བཞིན་པ་དང་། གྲྭ་ཚང་གི་འདོན་ཆོ་ག་ཕྱག་ལེན་གཙོ་བྱས་པའི་དྲྭ་རྒྱའི་ལས་གཞི་ཞིག་ཀྱང་འགྲོ་མུས་སུ་ཡོད་དོ། །
