༄༅། །འདི་ག་དཔལ་ལྡན་སྨད་རྒྱུད་གྲྭ་ཚང་མདོ་སྔགས་བཤད་སྒྲུབ་སློབ་གཉེར་ཁང་ཆེན་མོ་ནས་སློབ་མཐར་སོན་པའི་དགེ་བཤེས་སྔགས་རམས་པ། དགེ་བསྟན་འཛིན་ཟིལ་གནོན་ལགས་ནི་ཆུང་གཞོན་ནུའི་དུས་ནས་སྨད་རྒྱུད་གྲྭ་ཚང་དུ་ཆོས་ཞུགས་ཀྱིས་
སྨད་རྒྱུད་སློབ་གཉེར་ཁང་དུ་ལོ་རིམ་དང་པོ་བསྡུས་ཆུང་འཛིན་གྲྭ་ནས་ལོ་རིམ་བཅོ་ལྔ་པ་སྔགས་རམས་འཛིན་གྲྭ་བར་འཛིན་གྲྭ་ཁག་གུས་རྟག་སྦྱོར་བས་ཚུལ་བཞིན་འགྲིམས་ཏེ། ཐུན་མོང་བའི་རིག་གནས་ཕྱི་ནང་གི་སྐད་ཡིག་དང་ཚན་རིག་སོགས་སྦྱངས་པའི་སྟེང། ནང་དོན་རིག་པའི་མདོ་སྔགས་ཀྱི་གཞུང་ཆེན་སློབ་མཐར་སོན་པའི་དགེ་བཤེས་སྔགས་རམས་པའི་ཕྱག་ཁྱེར་ཐོབ་རྗེས། སྦེང་ལོར་ཏཱ་ལའི་བླ་མ་མཐོ་སློབ་ཏུ་སློབ་དགེའི་ཕྱག་ལས་གནང་བའི་ཞོར་དུ། གང་ཉིད་སྐད་གཉིས་སྨྲ་ཞིང་གནའ་དེང་ཤེས་ཡོན་འདབ་གཤོག་གཉིས་ལྡན་པ་ཞིག་ཡིན་སྟབས། ཕྱི་ནང་ཤེས་ཡོན་བསྟི་གནས་སྡེ་ཁག་དུ་མར་གསུང་བསྒྱུར་དང། གཏམ་བཤད། སློབ་ཁྲིད་སོགས་མང་དུ་བྱས། ད་ལྟའི་ཆར་དཔལ་ལྡན་དགའ་ལྡན་ཕོ་བྲང་གི་བཀའ་འབྲེལ་ལྟར། ནང་པའི་རྒྱལ་ཁབ་ཤྲི་ལངྒ་ལ་ཕྱོགས་བསྐྱོད་ཀྱིས་ཁུལ་དེའི་དོན་གཉེར་ཅན་དུ་མའི་ངོར་བོད་ཀྱི་ཆོས་རིག་གི་ལེགས་བཤད་ཀྱི་སྐྱེས་བཟང་རྒྱ་ཆེར་སྤེལ་བཞིན་བཅས་ཡིན། དེས་ན་སྨད་རྒྱུད་གྲྭ་ཚང་ནས་ཐོན་ཅིང། གྲུབ་འབྲས་གཡུར་དུ་ཟ་བའི་ཚུལ་འདིར་གྲྭ་ཚང་ནས་བསྔགས་བརྗོད་ཀྱི་མེ་ཏོག་འཐོར་ཞིང། འཚམས་འདྲིའི་བཀྲིས་བདེ་ལེགས་བརྗོད་རྒྱུ་དང་འབྲེལ། འབྱུང་འགྱུར་ཡང་བོད་བརྒྱུད་ནང་བསྟན་རིག་གཞུང་དང་བཅས་བའི་བྱ་བ་རྒྱ་ཆེར་རྔོ་ཐོགས་པར་བསྒྲུབ་ཐུབ་པའི་སྨོན་འདུན་བཅས། དཔལ་ལྡན་སྨད་རྒྱུད་གྲྭ་ཚང་འདུས་སྤྱིའི་ལས་ཁང་ནས། ༢༠༢༥།༡།༣༡།ལ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༠༡།༣༡།ལ།
