༄༅། །གསང་ཆེན་དཔལ་ལྡན་སྨད་རྒྱུད་པའི་སྐྱབས་གནས་མཁན་བླ་འདུས་པ་རྒྱ་མཚོ་ཡོངས་ཀྱི་སྙན་དྲུང་དུ། ཀུན་གྱིས་མཁྱེན་ཆུབ་ལྟར་བོད་གངས་ཅན་ལྗོངས་ཀྱི་སྟོད་དིར་རི་དང་གཞིས་ཀ་རྩེ་སོགས་ས་ཁུལ་ཁག་ལ་ས་འགུལ་འཇིགས་པའི་ཁྲོད་དུ།
སྤུན་ཟླ་མང་པོའི་ཚེ་སྲོག་ཤོར་བ་དང་ཤུལ་ལུས་ནང་མི་རྣམས་མྱ་ངན་དཀའ་སྡུག་གནས་སུ་ལྷུང་བའི་ཡ་ང་ཡིད་སྐྱོ་བའི་གནས་སྟངས་འདི་ལ་གདུང་སེམས་མཉམ་སྐྱེད་དང་མཆོག་གསུམ་རྒྱལ་བ་རྒྱ་མཚོའི་ཞིང་དུ་བསྔོ་སྨོན་སྐུ་རིམ་དུ། སྐྱབས་རྗེ་མཁན་བླ་རྣམ་གཉིས་དབུ་བཞུགས་ཐོག་སྐྱབས་གནས་འདུས་པ་རྒྱ་མཚོ་ཡོངས་ནས་འདས་གསོན་ཡོངས་ཀྱི་ཆེད་དུ་ཞལ་འདོན་བདེ་གསང་འཇིགས་གསུམ་སྨོན་ལམ་གཙོས། སྨོན་ལམ་སྣ་ལྔ་གསུངས་ཏེ་འདས་གསོན་ཡོངས་ཀྱི་མི་འདོད་པའི་ཉེར་འཚེ་རིགས་རང་སར་ཞི་སྟེ་འཕགས་མཆོག་ཕྱག་ན་པདྨོས་སྐྱེ་བ་ནས་ཚེ་རབས་ཐམས་ཅད་དུ་རྗེས་སུ་འཛིན་པའི་སྨོན་འདུན་ཤུགས་དྲག་བཅས། དཔལ་ལྡན་རྒྱུད་སྨད་འདུས་སྤྱི་ལས་ཁུངས་ནས། སྤྱི་ལོོ་ ༢༠༢༥ ཟླ་ ༠༡ ཚེས་ ༠༨ ཉིན། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༠༡།༠༨།ལ།
