དཀོན་མཆོག་གསུམ་ལ་སྐྱབས་སུ་འགྲོ། །སེམས་ཅན་ཐམས་ཅད་བདག་གིས་དགྲོལ། །བྱང་ཆུབ་གནས་ལ་འགོད་པར་བགྱི། །བྱང་ཆུབ་སེམས་ནི་ཡང་དག་བསྐྱེད། །སྐྱབས་འགྲོ་ལན་གསུམ་བྱ། ཨོཾ་བཛྲ་སཏྭ་ས་མ་ཡ། མ་ནུ་པ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོཥྱོ་མེ་བྷ་ཝ། སུ་པོཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲཱི་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ། བཛྲ་མཱ་མེ་མུཉྩ། བཛྲི་བྷ་ཝ། མ་ཧཱ་ས་མ་ཡ་སཏྭ་ཨཱཿ ཧཱུཾ་ཕཊ། ཡི་གེ་བརྒྱ་བའོ། །
དོན་ནི། རྒྱུ་རྡོ་རྗེ་རྩེ་མོར། ཨོཾ་ནི་ཅི་ཞིག་ཡིན་པར་བཤད། །མཆོག་དང་ནོར་སྟེར་དཔལ་དང་གཡང་། །སྐལ་བཟང་རྣམ་པ་དང་ལྡན་ཞིང་། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། ཅེས་པ་ལྟར་ཨོཾ་ནི་བཀྲ་ཤིས་པ་སོགས་ཀྱི་ཆེད་དང་། ནོར་བུ་འཛིན་པའི་སྙིང་པོ་དང་སྐུ་རྡོ་རྗེའི་ས་བོན་ཡིན་ཞིང་། སྐུ་གསུང་ཐུགས་གསུམ་དབྱེར་མི་ཕྱེད་པའང་མཚོན་པ་དང་། བཛྲ་སཏྭ་ནི་རྡོ་རྗེ་སེམས་དཔའ། ས་མ་ཡ་ནི་དམ་ཚིག །མ་ནུ་པ་ལ་ཡ་ནི་རྗེས་སུ་སྐྱོངས། བཛྲ་སཏྭ་ཏྭེ་ནོ་པ་ཏིཥྛ་ནི་རྡོ་རྗེ་སེམས་པ་ཉིད་ཉེ་བར་བཞུགས་ཤིག །དྲྀ་ཌྷོ་ནི་བརྟན་པ། མེ་ནི་བདག །བྷ་བ་ནི་དངོས་པོའམ་རང་བཞིན་དུ་མཛོད་ཅེས་པ་སྟེ། བདག་ལ་བརྟན་པའི་དངོས་པར་མཛོད། སུ་ཏོ་ཥྱོ་མེ་བྷ་བ་ནི་བདག་ལ་ཤིན་ཏུ་དགྱེས་པའི་དངོས་པོར་མཛོད། སུ་པོ་ཥྱོ་མེ་བྷ་བ་ནི་བདག་ལ་ཤིན་ཏུ་རྒྱས་པའི་དངོས་པོར་མཛོད། ཨ་ནུ་རཀྟོ་མེ་བྷ་བ་ནི་བདག་ལ་རྗེས་སུ་ཆགས་པའི་དངོས་པོར་མཛོད། སརྦ་སིདྡྷི་མྨེ་པྲ་ཡཙྪ་ནི་དངོས་གྲུབ་ཐམས་ཅད་བདག་ལ་རབ་ཏུ་སྩོལ་ཅིག །སརྦ་ཀརྨ་སུ་ཙ་མེ་ནི་བདག་ལ་ལས་ཐམས་ཅད་སྩལ་དུ་གསོལ། ཙིཏྟཾ་ཤྲཱི་ཡཾ་ཀུ་རུ་ནི་སེམས་ཀྱི་དཔལ་དུ་མཛོད་ཅིག །ཧཱུཾ་ནི་ཐུགས་རྡོ་རྗེ་ས་བོན། ཧཧཧཧ་ཧོ་ནི་ཡེ་ཤེས་ལྔ་མཚོན་པ། བྷ་ག་ཝཱན་སརྦ་ཏ་ཐཱ་ག་ཏ་ནི་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི། བཛྲ་ནི་རྡོ་རྗེ། མཱ་མེ་ནི་བདག །མུཉྩ་ནི་མ་འདོར་ཞིག །བཛྲི་བྷ་བ་ནི་རྡོ་རྗེ་ཅན་གྱི་རང་བཞིན། མ་ཧཱ་ནི་ཆེན་པོ། ས་མ་ཡ་ནི་དམ་ཚིག །སཏྭ་ནི་སེམས་དཔའ་སྟེ། དམ་ཚིག་སེམས་པ་ཆེན་པོ། ཨཱཿ ནི་གསུང་རྡོ་རྗེ་ས་བོན་ཆོས་ཐམས་ཅད་སྐྱེ་བ་མེད་པ་དང་། ཧཱུཾ་གིས་བདེ་བ་ཆེན་པོའི་ཡེ་ཤེས་མཚོན་པ། ཕཊ་ཀྱིས་གདུག་པ་ཅན་དང་སྡུག་བསྔལ་སོགས་མི་མཐུན་ཕྱོགས་འཇོམས་ཤིག །བདེ་སྟོང་དབྱེར་མི་ཕྱེད་པའི་ཡེ་ཤེས་འགུགས་པར་བྱེད་ཅིང་ངན་འགྲོའི་འགྲོ་བ་གནས་ལས་འཕོ་བར་བྱེད་པའོ། །