༨ - འཁོར་ལོ།

ལྷ་ཚངས་པས་སངས་རྒྱས་ལ་ཕུལ་ཞིང༌། དེ་བཞིན་གཤེགས་པའི་ཞབས་ཕྱག་གི་མཐིལ་དུའང་འཁོར་ལོའི་མཚན་མ་གསལ་བ་དང་། སྲིད་པའི་དྲ་བ་ཉོན་མོངས་རྩད་ནས་གཅོད་ཅིང༌། ཕ་རོལ་གྱི་རྒོལ་བ་ཟིལ་གྱིས་གནོན་པ། གསེར་གྱི་འཁོར་ལོ་རྩིབས་སྟོང་དང་ལྡན་པ། གཞན་སྟོབས་རྣམས་འཕྲོག་ཅིང་། རང་གི་དཔལ་དང༌ལོངས་སྤྱོད་སྙན་གྲགས་སོགས་བསྐྱེད་པ་མཚོན་པ་དང༌། རྒྱལ་བའི་ལུང་རྟོགས་ཀྱི་དམ་ཆོས་འཁོར་ལོ་འཇིག་རྟེན་གྱི་ཁམས་ཐམས་ཅད་དུ་རྒྱུན་མི་ཆད་པར་འཁོར་ཞིང༌། ཐེག་གསུམ་གདུལ་བྱས་མཚོན་སྐྱེ་རྒུ་རྣམས་རྣམ་གྲོལ་དགེ་བའི་དཔལ་ཡོན་ལ་སྦྱོར་བ་སྟེ་གདུལ་བྱ་རྣམས་ཡོངས་སུ་སྨིན་པར་བྱེད་པ། དེ་ཡང་བརྗོད་བྱ་འཁོར་ལོ་གསུམ་དང༌། རྗོད་བྱེད་སྡེ་སྣོད་གསུམ་ཐེག་གསུམ་གདུལ་བྱའི་རྒྱུད་ལ་འཕོ་བར་བྱེད་པའི་རྟེན་འབྲེལ་མཚོན་པའོ། །