༧ - རྒྱལ་མཚན།

ལྷ་རྫས་ལས་གྲུབ་པའི་དར་ཚོན་སྣ་ལྔ་ལྷབ་ལྷུབ་དུ་གཡོ་ཞིང༌། དགོས་འདོད་ཀུན་ཏུ་འབྱུང་བའི་ནོར་བུ་རིན་པོ་ཆེ་ཏོག་གིས་མཛེས་པར་ཀུན་ནས་བརྒྱན་པ། རྒྱལ་བའི་མཚན་མ་སྟེ། ཁྱུང་དང་སེང་གེ་འདུས་པ་ལས་ཕྲུ་གུ་སེང་གེ་ཁྱུང་གི་གཤོག་པ་ཅན་དང་། དུང་དང་ཆུ་སྲིན་འདུས་པ་ལས་ཕྲུ་གུ་ཆུ་སྲིན་དུང་གི་མཇུག་མ་ཅན། ཉ་དང་སྲམ་འདུས་པ་ལས་ཕྲུ་གུ་ཉ་སྤུ་ཅན་ནམ་སྲམ་གྱི་སྡེར་མོ་ཅན་ཏེ་མི་མཐུན་དྲུག་སྦྱོར་གྱི་རྟགས་དང་ལྡན་པའམ་སྲོག་ཆགས་དེ་གསུམ་གྱི་རི་མོ་སོགས་དང་ལྡན་ལ། བདུད་བཞི་ལ་སོགས་པ་མི་མཐུན་པའི་ཕྱོགས་ཐམས་ཅད་ལས་ཀུན་ནས་རྒྱལ་ཏེ་ཐུགས་རྒྱུད་ལ་སྟོབས་རྣམས་དང་། སྐུ་ལ་མཚན་དཔེའི་ཡོན་ཏན་ཐམས་ཅད་ཡོངས་སུ་རྫོགས་པ་དང་། ནག་ཕྱོགས་བདུད་རིགས་ཀྱི་གཡུལ་ལས་རྣམ་པར་རྒྱལ་བའི་རྟེན་འབྲེལ་མཚོན་པའོ། །