བྱམས་ཆེན་མེ་ཡིས་ཞེ་སྡང་བུད་ཤིང་བསྲེགས། །ཡེ་ཤེས་འོད་ཀྱིས་མ་རིག་མུན་པ་སེལ། །ཆོས་ཀྱི་རྒྱལ་ཚབ་འགྲོ་བ་འདྲེན་མཛད་པའི། །དགའ་ལྡན་བཞུགས་པ་དེ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝཱ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་ཨ་ཛི་ཏེ། ཨ་ཛི་ཏེ། ཨ་པ་རཱ་ཛི་ཏེ། ཨ་ཛི་ཏེན་ཛ་ཡ། ཧ་ར་ཧར། མཻ་ཏྲི་ཨ་ཝ་ལོ་ཀི་ཏེ། ཀ་ར་ཀ་ར། མ་ཧཱ་ས་མ་ཡ་སིདྡྷི། བྷ་ར་བྷ་ར། མ་ཧཱ་བོ་དྷི་མཎྜ་བཱི་ཛེ། སྨ་ར་སྨ་ར། ཨསྨ་ཀཾ་ས་མ་ཡ། བོ་དྷི་བོ་དྷི། མ་ཧཱ་བོ་དྷི་སྭཱ་ཧཱ། ཨོཾ་མོ་ཧི་མོ་ཧི་མ་ཧཱ་མོ་ཧི་སྭཱ་ཧཱ། ཨོཾ་མུ་ནི་མུ་ནི་སྨ་ར་སྭཱ་ཧཱ།
བྱམས་པས་དམ་བཅའ་བའི་གཟུངས་ཀྱི་སྔགས་དོན་ནི། ན་མོ་རཏྣ་ཏྲ་ཡ་ཡ་ནི། ཕྱག་འཚལ་ལོ་དཀོན་མཆོག་གསུམ་ལ། ན་མོ་ནི། ཕྱག་འཚལ་ལོ། །བྷ་ག་ཝ་ཏེ་ནི། བཅོམ་ལྡན་འདས། ཤཱཀྱ་མུ་ནེ་ཡེ་ནི། ཤཱཀྱ་ཐུབ་པ། ཏ་ཐཱ་གཱ་ཏ་ཡ་ནི། དེ་བཞིན་གཤེགས་པ། ཨརྷ་ཏེ་ནི། དགྲ་བཅོམ་པ། སམྱཀྶཾ་ནི། ཡང་དག་པར་རྫོགས་པ། བུདྡྷཱ་ཡ་ནི། སངས་རྒྱས་ལ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །ཏདྱ་ཐཱ་ནི། འདི་ལྟ་སྟེ། ཨོཾ་ནི། འགོ་འདྲེན། ཨ་ཛི་ཏེ་ཨ་ཛི་ཏེ་ནི། མི་ཕམ་པ་མི་ཕམ་པ། ཨ་པ་ར་ཛི་ཏེ་ནི། གཞན་གྱིས་མི་ཐུབ་པ། ཨ་ཛི་ནི། མི་ཕམ་པ། ཏན་ཛ་ཡ་ནི། རྒྱལ་བ། ཧ་ར་ཧ་ར་ནི། འཕྲོག་འཕྲོག །མཻ་ཏྲི་ནི། བྱམས་པ། ཨ་བ་ལོ་ཀི་ཏེ་ནི། ཀུན་ནས་གཟིགས་པ། ཀ་ར་ཀ་ར་ནི། མཛད་མཛད། མ་ཧཱ་ས་མ་ཡ་ནི། དམ་ཚིག་ཆེན་པོ། སིདྡྷི་ནི། དངོས་གྲུབ། བྷ་ར་བྷ་ར་ནི། རྒྱས་རྒྱས། མ་ཧཱ་བོ་དྷི་ནི། བྱང་ཆུབ་ཆེན་པོ། མཎྜ་ནི། སྙིང་པོ། བི་ཛེ་ནི། ས་བོན། སྨ་ར་སྨ་ར་ནི། དྲན་པ་དྲན་པ། ཨསྨ་ཀཾ་ནི། བདག་ཅག །ས་མ་ཡ་ནི། མཉམ་པའམ་དམ་ཚིག །བོ་དྷི་བོ་དྷི་ནི། བྱང་ཆུབ་བྱང་ཆུབ། མ་ཧཱ་བོ་དྷི་ནི། བྱང་ཆུབ་ཆེན་པོ། སྭཱ་ཧཱ་ནི། གཞི་ཚུགས་པའམ་ལེགས་པར་སྦྱིན། ཨོཾ་མོ་ཧི་མོ་ཧི་མ་ཧཱ་མོ་ཧི་སྭཱ་ཧཱ། ཅེས་སྙིང་པོ་དང་། ཨོཾ་མུ་ནི་མུ་ནི་སྨ་ར་སྭཱ་ཧཱ། མོ་ཧི་ནི། རྨོངས་པ། སྭཱ་ཧཱ་ནི། ཉེ་བར་ཞི་བ། རྨོངས་པ་ཆེན་པོ་ཉེ་བར་ཞི་བའོ། །
གཟུངས་འདིའི་ཕན་ཡོན་ནི། གཟུངས་འདིའི་ཚིག་ཉན་པ་དང་། ཀློག་པ་དང་། བྲིས་པ་དང་། ཁ་ཏོན་བྱེད་པ་དང་། དོན་ཡིད་ལ་སེམས་ཤིང་སྒོམ་པར་བྱེད་པ་དང་། ཐ་ན་བྱ་དང་རི་དྭགས་སོགས་དུད་འགྲོ་ཡན་ཆད་ཀྱི་རྣ་བར་ཐོས་པས་ངན་སོང་དུ་མི་སྐྱེ་བ་དང་། དགེ་བ་བཅུའི་ལས་ཀྱི་ལམ་དང་ལྡན་པ་དང་། ལོངས་སྤྱོད་ཕུན་སུམ་ཚོགས་པ་སོགས་མངོན་མཐོ་བཞི་དང་ལྡན་པ་དང་། ངེས་ལེགས་ཀྱི་ལམ་འཐོབ་པ་སོགས་དང་། ཁྱད་པར་དུ་བྱམས་མགོན་ཉིད་ཀྱིས་གནས་སྐབས་སུ་མི་རྒུད་པར་མཛད་ཅིང་། སངས་རྒྱས་ཀྱི་མཛད་པ་སྟོན་པའི་ཚེ་དེ་དག་དམྱལ་བ་ན་གནས་ཡོད་ནའང་ངེས་པར་བཙལ་ཏེ་བྱང་ཆུབ་མཆོག་ཏུ་ལུང་སྟོན་པར་གསུངས། རང་ཅག་རྣམས་རྣམ་འདྲེན་བཞི་པའི་བསྟན་པ་དང་མཇལ་བཞིན་པའི་སྐབས་འདིར་རྣམ་འདྲེན་ལྔ་པའི་བསྟན་པ་དང་མཇལ་ཐུབ་པའི་ཐབས་ཟབ་མོ་དེ་ལྟ་བུ་སོགས་ལ་འབད་ན། ནམ་ཞིག་མི་ལོ་དུང་ཕྱུར་ཞེ་ལྔ་ཙམ་གྱི་ཚེ་རྡོ་རྗེ་གདན་གྱི་རི་བོའི་སྤོར་བྱམས་མགོན་ཉིན་བྱེད་ཀྱི་ཆོས་ཀྱི་ཉི་མ་ཤར་པ་ན་དེའི་བསྟན་པ་ལ་ཞུགས་ནས་ཞུམ་པ་མེད་པར་སློབ་པའི་སྲས་ཀྱི་ཐུ་བོར་འགྱུར་པའི་རྟེན་འབྲེལ་བཟང་པོ་ཡིན་པ་གོར་མ་ཆག་གོ །སྐྱབས་སུ་མཆི། མི་ལོ་དུང་ཕྱུར་ཞེ་ལྔ་ཙམ་གྱི་མཇུག་ལ་བྱམས་མགོན་ཕེབས་པར་ཞྭ་དམར་ལམ་རིམ་ལས་གསུངས།
འབྲས་སྒོ་མང་མཁན་ཟུར་ངག་དབང་ཉི་མའི་གསུང་ལས་དྲངས།
རྒྱ་གར་སྐད་དུ། ཨཱརྱ་མཻ་ཏྲེ་པྲ་ཏི་ཛྙཱེ་ནཱ་མ་དྷཱ་ར་ཎི། བོད་སྐད་དུ། འཕགས་པ་བྱམས་པས་དམ་བཅས་པ་ཞེས་བྱ་བའི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །འཕགས་པ་བྱམས་པ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝཱ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་ཨ་ཛི་ཏེ། ཨ་ཛི་ཏེ། ཨ་པ་རཱ་ཛི་ཏེ། ཨ་ཛི་ཏེན་ཛ་ཡ། ཧ་ར་ཧར། མཻ་ཏྲི་ཨ་ཝ་ལོ་ཀི་ཏེ། ཀ་ར་ཀ་ར། མ་ཧཱ་ས་མ་ཡ་སིདྡྷི། བྷ་ར་བྷ་ར། མ་ཧཱ་བོ་དྷི་མཎྜ་བཱི་ཛེ། སྨ་ར་སྨ་ར། ཨསྨ་ཀཾ་ས་མ་ཡ། བོ་དྷི་བོ་དྷི། མ་ཧཱ་བོ་དྷི་སྭཱ་ཧཱ། རྩ་བའི་སྔགས་སོ། །ཨོཾ་མོ་ཧི་མོ་ཧི་མ་ཧཱ་མོ་ཧི་སྭཱ་ཧཱ། སྙིང་པོའོ། །ཨོཾ་མུ་ནི་མུ་ནི་སྨ་ར་སྭཱ་ཧཱ། ཉེ་བའི་སྙིང་པོའོ། །
གང་གཟུངས་འདི་ཉན་པ་དང་། ཀློག་པ་དང་། ཁ་ཏོན་བྱེད་པ་དང་། ཚུལ་བཞིན་དུ་ཡིད་ལ་བྱེད་པ་དང་། སྒོམ་པར་བྱེད་ན་གང་གི་ཚེ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་གྱུར་པ་ན། བདག་གིས་སེམས་ཅད་དེ་ངེས་པར་བཙལ་བར་བགྱིས་ཏེ་དམྱལ་བ་ན་གནས་ཀྱང་ངེས་པར་བཏོན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་བགྱིའོ། །ཐ་ན་དུད་འགྲོའི་སྐྱེ་གནས་སུ་གྱུར་པའི་རི་དྭགས་དང་བྱ་རྣམས་ཀྱི་རྣ་ལམ་དུ་སྒྲོག་པར་བྱེད་ན། དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་ཐོབ་བོ། །འདི་ཐོས་པ་ཙམ་གྱིས་ནམ་དུ་ཡང་ངན་སོང་དུ་སྐྱེ་བར་མི་འགྱུར་རོ། །ངན་སོང་གི་དྲི་མས་མི་གོས་སོ། །མའི་མངལ་དུ་ཡང་མི་སྐྱེའོ། །ལྷའི་བསྐལ་པ་སྟོང་དུ་འཁོར་ལོས་སྒྱུར་བའི་རྒྱལ་པོར་འགྱུར་རོ། །དགེ་བ་བཅུའི་ལས་ཀྱི་ལམ་དང་ལྡན་པར་འགྱུར་རོ། །ཇི་ལྟར་བསམ་ཞིང་དོན་དུ་གཉེར་བའི་ལོངས་སྤྱོད་ཐོབ་པར་འགྱུར་རོ། །བཅོམ་ལྡན་འདས་བདག་གིས་ནམ་དུ་ཡང་སེམས་ཅན་དེ་རྒུད་པར་མི་བགྱིད་ལགས་སོ། །ངེས་པར་བདག་བྱང་ཆུབ་ཀྱི་སྙིང་པོ་ལ་མཆིས་ནས། དེ་ཇི་ལྟར་གྱུར་ཀྱང་རུང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་བགྱིའོ། །འཕགས་པ་བྱམས་པས་དམ་བཅས་པ་ཞེས་བྱ་བའི་གཟུངས་རྫོགས་སོ། ། ། །