གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༩] རྡོ་རྗེ་ཆོས་སྐྱོང་རྒྱ་མཚོ། [ བྱང་ཆོས་དང་། དགའ་ལྡན་ཁྲིར་ཕེབས། ]
རྒྱལ་བས་གསུངས་པའི་མདོ་རྒྱུད་མ་ལུས་པའི། །གནད་དོན་ཇི་བཞིན་རྟོགས་ནས་བརྩོན་པ་ཡིས། །
སྐལ་ལྡན་འགྲོ་ལ་བརྩེ་བས་འདོམས་མཛད་པ། །དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་གསུངས་པ་ལྟར། དེའེ་རྗེས་སུ་རྡོ་རྗེ་ཆོས་སྐྱོང་རྒྱ་མཚོ་མཆོག་རྒྱུད་སྨད་གྱི་ཁྲིར་ཕེབས་པ་ཡིན་ཏེ། དམ་པ་འདི་ནི་རྗེ་བདག་ཉིད་ཆེན་པོ་གཤེགས་ནས་ལོ་ང་བཞི་པ་རབ་བྱུང་བརྒྱད་པ་ཆུ་སྤྲུལ། ཕྱི་ལོ་ ༡༤༧༣ ལོར་དབུས་སྟོད་ཞོགས་མདའ་རྒྱ་རར་སྐུ་འཁྲུངས། ཆུ་ངུའི་དུས་སུ་ཀུན་མཁྱེན་ཀློང་ཆེན་རབ་འབྱམས་པའི་གསུང་རབ་རྣམས་གསན།
བྲག་བར་དུ་རབ་ཏུ་བྱུང་ནས་དབུ་མ་གསན་ཅིང་། བློ་གླིང་ཆོས་རྗེ་ལེགས་པ་ཆོས་འབྱོར་རམ་འཇམ་དབྱངས་དགའ་བློར་བསྟེན་ནས་བཀའ་ཆེན་རྣམས་ལ་སྦྱངས་པས་སྟོན་པ་བཟང་བ་དང་། མཁྱེན་རབ་ཆེ་བས་ལེགས་པར་མཁྱེན་པའི་མཁས་པའི་ཕུལ་དུ་གྱུར། སྨད་རྒྱུད་དུ་བྱོན་ནས་རྗེ་ཤེེར་བཟང་པའི་དྲུང་ནས་གསང་འདུས་རྩ་བཤད་ཀྱི་རྒྱུད་ཡོངས་རྫོགས་དང་། འགྲེལ་པ་རྣམས་དང་བདེ་མཆོག་གི་སྐོར་དང་། དུས་འཁོར་ལ་སོགས་པ་རྒྱུད་སྡེ་བཞི་གའི་སྐོར་དང་། ཁྱད་པར་དུ་རྡོ་རྗེ་འཇིགས་བྱེད་ཀྱི་རྒྱུད་རྩ་བཤད་རྒྱུད་འགྲེལ་མན་ངག་བསྐྱེད་རྫོགས་རྣམས་དང་། འཕྲུལ་འཁོར་དང་དྲུག་ཅུ་པའི་སྐོར་ཀུན་དང་། ཡེ་ཤེས་མགོན་པོའི་བསྙེན་སྒྲུབ་ཡན་ལག་བཞིའི་གདམས་ངག་མ་ལུས་པ་གསན་ཅིང་། དེ་བཞིན་དུ་རྒྱུད་པ་ཚུལ་ཁྲིམས་བཟང་པོ་ལས་མདོ་སྔགས་ཀྱི་སྐོར་མང་པོ་ཞིག་གསན་པས་བསྟན་པའི་བདག་པོ་མཛད།
རབ་བྱུང་དགུ་པའི་ལྕགས་འབྲུག ཕྱི་ལོ་ ༡༥༢༠ ལ་སྨད་རྒྱུད་པའི་མཁན་ཁྲིར་ཕེབས་ནས་ཆུ་སྦྲུལ་ལོའི་བར་ལོ་བཅུ་བཞིའི་སྐོར་འཆད་ཉན་མཛད། པཎ་ཆེན་ཆོས་འབྱུང་དུ་ལོ་བཅོ་ལྡ་སྐོར་གནང་བར་གསུངས། དེ་ཡང་གསང་འདུས་རྩ་བཤད་རྒྱུད་འགྲེལ་འགྲེལ་བཤད་ཡོངས་རྫོགས་དང་། བདེ་མཆོག་གིའང་དེ་བཞིན་དང་། རྡོ་རྗེ་འཇིགས་བྱེད་ཀྱི་རྩ་རྒྱུད་དང་འགྲེལ་པ་བཞིར་བསྐྱེད་རྫོགས་ཆེན་མོ་དང་སྦྱར་ནས་གསུངས་པ་དང་། སྐབས་དེ་ཙམ་ན་རྒྱུད་ཀྱི་རྩ་འགྲེལ་མན་ངག་མ་ལུས་པ་འཛིན་པའི་ངེས་དོན་གྱི་དགེ་བའི་བཤེས་གཉེན་ཆེན་པོ་རིག་པ་འཛིན་པས་བོད་ཁམས་མ་ལུས་པར་ཁྱབ་པར་གྱུར་ཏོ། །
རྒྱུད་ཆེན་བརྩོན་འགྲུས་འཕགས་པ་སོགས་ཀྱིས་རྗེ་འདི་ལས་གསན་ནས་ཁྲིད་ཆེན་བརྒྱད་སོགས་བཤད་རྒྱུན་གཙང་དུའང་དར་བ་ཀུན་མཁྱེན་འཇམ་དབྱངས་བཞད་པ་སོགས་ཀྱིས་ཐོབ་ཚུལ་བཤད་ལ། དེ་ལྟར་རྒྱུད་ཀྱི་འཆད་ཉན་གནང་བཞིན་པའི་ཐོག་ནས་བྱང་རྩེའི་ཁྲི་ལ་ཕེབས་ཏེ། མདོ་སྔགས་ཀྱི་ཆོས་འཁོར་རྒྱུན་མི་ཆད་དུ་བསྐོར་བས་སྔར་ལས་ཀྱང་འཕྲིན་ལས་རྒྱ་ཆེན་པོ་གོང་འཕེལ་དུ་གྱུར་ཏེ། གསང་བདེ་འཇིགས་གསུམ་གྱི་བསྐྱེད་རྫོགས་སྔ་ཕྱི་མང་པོར་མཛད་ཅིང་། གསང་འདུས་བསྐྱེད་རྫོགས་ལེགས་པ་ཆེ་ཆུང་གཉིས་ཡོད་པར་ཀུན་མཁྱེན་འཇམ་བཞད་པས་གཟིགས་ཚུལ་གསུངས།
དེ་བཞིན་དུ་ཕྱག་རྡོར་འཁོར་ལོ་ཆེན་པོའི་བསྙེན་སྒྲུབ་ལས་གསུམ་གྱི་བྱིན་རླབས་བཞི་ལྡན་ཀྱི་ཁྲིད་ཡིག་དང་། ཕྱག་རྡོར་གསང་བ་བསམ་གྱིས་མི་ཁྱབ་པའི་ཁྲིད་ཡིག ཆོས་དྲུག་གི་ཁྲིད་ཡིག་རྣམས་ཡོད་ཚུལ་གསུངས། ཆོས་སྐྱོང་རྒྱ་མཚོའི་ལྟ་ཁྲིད་ཅེས་ཤེས་རབ་རྒྱ་མཚོའི་གསུང་ཁྲོད་དུ་ཡོད་པ་དང་། ཁྲི་ཆེན་བརྒྱད་ཀྱི་ཟིན་བྲིས་གྲྭ་ཚང་གི་འཆད་ཉན་ནང་ཡོད་པ་དེ་ཡང་འདིས་མཛད། དེ་བཞིན་དུ་དུས་འཁོར་ཀྱི་སྐོར་ཡང་མང་པོ་གསུངས། དགུང་གྲངས་རེ་བཞི་པ་མེ་སྤྲེལ། ཕྱི་ལོ་ ༡༥༣༦ ལོར་རྒྱལ་བ་གཉིས་པའི་མི་འཇིགས་གདོང་ལྔས་བཏེག་པའི་དགའ་ལྡན་གསེར་ཁྲིར་ཕེབས་ཏེ། འཆད་རྩོད་རྩོམ་པའི་མི་འཇིགས་སེངྒེའི་སྒྲ་དབྱངས་ཕལ་རྒོལ་ལག་ལྡན་ཁྱུ་མཆོག་ཟིལ་གྱིས་མནན་ཅིང་། རྡོ་རྗེ་འཇིགས་བྱེད་གྱི་གསལ་སྣང་དང་ང་རྒྱལ་གྱིས་སྡང་མིག་སྤྱན་སྟོང་འབར་བས་ཕྱོགས་བཅུར་གཟིགས་པས། ནག་ཕྱོགས་བདུད་རིགས་དཔུང་ཚོགས་ཕྱི་མིག་ཙམ་ཡང་བལྟ་མི་བཟོད་པའི་གཟི་བརྗིད་ཉི་མ་འབུམ་ལས་ལྷག་པར་འཕྲོ་ཞིང་། མཐུ་སྟོབས་རྭ་རྩེ་རྣོན་པོ་འོག་མིན་གྱི་བར་དུ་བསྒྲེང་པར་མཛད་པས་ནག་ཕྱོགས་ལྷ་མིན་དཔུང་ཚོགས་གནོད་འཚེ་མཚོན་ཆ་མ་ལུས་ཅིག་ཅར་དུ་ས་ལ་ལྷུང་བར་མཛད་ཅིང་། དྲེགས་ལྡན་ཆེ་རྒུ་མཐའ་དག་ཅིག་ཅར་ཁ་སྦུག་ཏུ་ཞབས་འོག་ཏུ་གནོན་པར་མཛད།
ནག་ཕྱོགས་ཐམས་ཅད་མིང་གི་ལྷག་མར་བྱས་པས་རྒྱལ་བ་གཉིས་པའི་རིང་ལུགས་ས་གསུམ་མ་ལུས་པ་བདག་གིར་མཛད་དེ། ལེགས་བྱས་ཀྱི་སྒོ་འཕར་ཡངས་པོར་ཕྱེ་ ཞིང་། སྐྱེ་དགུ་མ་ལུས་པ་མངོན་མཐོ་དང་ངེས་ལེགས་ཀྱི་ལམ་ལ་ཞུགས་ཤིང་སྐྱིད་པའི་གླུ་གར་ཅི་ཡང་ལེན་པར་གྱུར་ཏོ།།
དེ་ལྟར་ལོ་བཞིའི་བར་དུ་ཟབ་རྒྱས་ཆོས་ཀྱི་འཁོར་ལོ་གཞན་དང་མི་མཉམ་པར་བསྐོར་བས་ན། རྗེ་དགེ་འདུན་རྒྱ་མཚོས་ཀྱང་། གཞན་ལས་ཕུལ་བྱུང་མ་ཞེས་ཚིག་དོན་བཟང་པོས་བསྟོད་པར་མཛད་དོ།། བཻ་སེར་དུ་དུས་དེར་འོད་སྣ་སོགས་དབུས་སྟོད་ཀྱི་ཆོས་སྡེ་ཕལ་ཆེར་འབྲི་ཁུངས་པས་བདག་བྱས་ཤིང་། ཤར་པ་དང་འབྲེལ་ཆགས་པས་གཏོར་མ་འཕང་རེས་མཛད་པ་ཡིན། ཞེས་ཀྱང་གསུངས།
ཕྱག་རྗེས་སུ་ཐུབ་དབང་གི་གོས་གུར་ཆེན་པོ་འདི་བཞེངས། དགའ་ལྡན་ཆོས་འབྱུང་བཻ་སེར་དང་། མཁར་ནག་ལོ་ཙཱ་བས་ཤིང་ལུག་ལ་ཁྲིར་ཕེབས་པར་འདོད་པ་ལྟར་ན་ལོ་ལྔར་ཁྲིར་མཛད་པ་དང་། མཁས་དབང་སྟག་ལུང་བྲག་པས་མེ་སྤྲེལ་གསུངས་པས་ཀུན་མཁྱེན་བླ་མས་དེ་ཁུངས་བཙན་པར་མཛད་སྣང་བས་དེ་ལྟར་ན་ལོ་བཞིར་ཁྲིར་ཕེབས་པར་མཛད་ནས། དགུང་གྲངས་རེ་བདུན་པ་རབ་བྱུང་དགུ་པའི་ས་ཕག །ཕྱི་ལོ་ ༡༥༣༤ ལོར་སྐུ་གཤེགས། གཤེགས་པའི་ཚེ་མེ་ཏོག་གི་ཆར་དང་འཇའ་འོད་ཁ་དོག་སྣ་ལྔ་ཟུག་པ་སོགས་ངོ་མཚར་བའི་ལྟས་མང་པོ་བྱུང་། དུས་མཆོད་ཀྱང་ཚ་བྲ་ཆེན་མོ་དཔོན་བརྒྱུད་ཀྱིས་རིང་པོའི་བར་འཛིན་སྣང་། གདུང་རྟེན་དངུལ་གདུང་རྒྱ་གུར་ནང་ན་མཁས་གྲུབ་རིན་པོ་ཆེའི་དངུལ་གདུང་གི་གཡོན་ཟུར་ན་བཞུགས་སོ། །
རྗེ་བདག་ཉིད་ཆེན་པོ་གཤེགས་ནས་ལོ་དྲུག་ཅུ་སྐོར་གཉིས་སོང་བའི་ས་ཕག་དེ་ཡིན། གསུང་ལས་སྐྱེས་པའི་སློབ་མ་མདོ་སྔགས་རབ་འབྱམས་ལ་མཁས་པའི་གཞན་དོན་མཐར་ཕྱིན་ནུས་པའི་རྡོ་རྗེ་འཛིན་པ་ཤིན་ཏུ་མང་བར་བྱོན་ཏེ། གྲགས་ཆེ་བ་འགའ་ཞིག་གི་མཚན་བརྗོད་ན། རྒྱུད་ཆེན་རྒྱལ་མཚན་བཟང་པོ་དང་། རྒྱུད་ཆེན་ཆོས་གྲགས་བཟང་པོ། རྒྱུད་ཆེན་བརྩོན་འགྲུས་འཕགས་པ། རྒྱུད་ཆེན་དྭགས་པོ་ནམ་མཁའ་གྲགས་དང་། མངོན་དགའ་བྱམས་པ་རྒྱ་མཚོ་ལ་སོགས་པ་མང་དུ་བྱོན་ཏོ། །
༡༠] རྒྱུད་ཆེན་རྒྱལ་མཚན་བཟང་པོ། [ བྱང་ཆོས་དང་། དགའ་ལྡན་ཁྲིར་ཕེབས། ]
ངུར་སྨྲིག་རྒྱལ་མཚན་མཆོག་གི་མཛེས་པའི་སྐུ། །ལེགས་བཤད་ཆོས་སྒྲ་བཟང་པོ་སྒྲོག་པའི་གསུང་། །
མཁྱེན་བརྩེ་ཕུལ་དུ་བྱུང་བའི་ཐུགས་མངའ་བ། །བསྟན་པ་གསལ་མཛད་ཁྱོད་ལ་གསོལ་བ་འདེབས། །
ཞེས་པ་ལྟར། དེའི་རྗེས་སུ་སྨད་རྒྱུད་པའི་ཁྲིར་རྒྱུད་ཆེན་རྒྱལ་མཚན་བཟང་པོ་ཕེབས་པ་ཡིན་ཏེ། རྗེ་འདི་རྗེ་རིན་པོ་ཆེ་གཤེགས་ནས་ལོ་ང་བཞི་རབ་བྱུང་བརྒྱད་པའི་ཆུ་སྦྲུལ། ཕྱི་ལོ་ ༡༤༧༣ ལ་ཆོས་སྐྱོང་རྒྱ་མཚོ་དང་དགུང་མཉམ་དུ་སྟག་རྩེ་དགེ་འདུན་སྒང་གི་ལྟག་སྐྱིད་གྲོང་དུ་སྐུ་འཁྲུངས། མི་རིང་བར་རབ་ཏུ་བྱུང་། བཤེས་གཉེན་དུ་མ་བསྟེན་ནས་བཀའ་ཆེན་རྣམས་ལ་སྦྱངས་པས་མཁས་པར་གྱུར། དཔལ་ལྡན་སྨད་རྒྱུད་དུ་ཕེབས་ནས། རྗེ་ཤེར་བཟང་དང་རྡོ་རྗེ་འཆང་ཆོས་སྐྱོང་རྒྱ་མཚོ་ལ་སོགས་པའི་དྲུང་ནས་གསང་བདེ་འཇིགས་གསུམ་ལ་སོགས་པའི་རྒྱུད་སྡེ་བཞིའི་སྐོར་རྣམས་ལ་ཡུན་རིང་པོའི་བར་དུ་སྦྱངས་པར་མཛད་པས་མདོ་སྔགས་ཀྱི་བསྟན་པའི་བདག་པོར་གྱུར།
དགུང་ལོ་རེ་གཅིག་པ་རབ་བྱུང་དགུ་པའི་ཆུ་སྦྲུལ། ཕྱི་ལོ་ ༡༥༣༣ ལ་སྨད་རྒྱུད་པའི་ཁྲིར་ཕེབས། སྨད་རྒྱུད་ཀྱི་འཆད་ཉན་ཡུན་རིང་པོའི་བར་དུ་མཛད་པས་འཆད་ཉན་ཤིན་ཏུ་དམར་བར་བྱུང་། རྒྱུད་ཀྱི་འཆད་ཉན་གནང་བཞིན་པ་ནས་བྱང་རྩེའི་ཁྲིར་ཕེབས། དེ་ནས་དགུང་གྲངས་དོན་གཅིག་པ་རབ་བྱུང་དགུ་པ་ཆུ་ཡོས། ཕྱི་ལོ་ ༡༥༤༣ ལོར་དགའ་ལྡན་ཕེབས་ཏེ། ལོ་གསུམ་གྱི་རིང་ཟབ་རྒྱས་ཀྱི་ཆོས་འཁོར་བསྟར་ཆགས་སུ་བསྐོར་ཅིང་། དོན་གསུམ་པ་ཤིང་སྦྲུལ་ཟླ་བ་ ༦ ཚེས་ ༢༦ ལ་མེ་ཏོག་གི་ཆར་དང་འཇའ་འོད་འཁྱིལ་བ་སོགས་ཀྱི་ངོ་མཚར་བའི་ལྟས་དང་བཅས་ཏེ་དག་ཞིང་ལ་གཤེགས་ཞེས་སྟག་ལུང་བྲག་པའི་གདན་རབས་ལས་བཤད་ཅེས་ཀུན་མཁྱེན་བླ་མས་གསུངས།
གདུང་ཞུགས་ལ་སྦྱངས་པས་ལྷ་སྐུ་ཡིག་འབྲུ་དང་རིང་བསྲེལ་གྱི་ཕུང་པོ་ཆེན་པོ་ཆགས་པར་གྱུར། དེ་ལ་ནང་རྟེན་བྱས་པའི་གསེར་གདུང་བྱས་ཏེ་རྒྱ་གུར་ནང་གི་རྗེའི་སྐུ་འདྲའི་གཡོན་དུ་བཞུགས་སོ།། འདིའི་འཁྲུངས་ལོ་དང་མཁན་ཕྲིར་ཕེབས་ལོ། གཤེགས་ལོ་སོགས་ལ་མི་མཐུན་པ་མང་སྟེ་འཇིགས་བྱེད་ཆོས་འབྱུང་དུ་དོན་གཅིག་པ་ཆུ་ཡོས་ལ་ཁྲིར་ཕེབས་པ་དང་། དོནགསུམ་པ་ཤིང་སྦྲུལ་ཟླ་བ་དྲུག་པའི་ཚེས་ཉི་ཤུ་དྲུག་ལ་གཤེགས་གསུངས་པ་དང་། དགའ་ལྡན་ཆོས་འབྱུང་བཻ་སེར་དུ་ལྔ་བཅུ་པ་མེ་རྟ་ལོར་ཁྲིར་ཕེབས་པ་དང་། ང་གཉིས་པ་ས་སྦྲུལ་ལ་གཤེགས་གསུངས།
དེང་དུས་བོད་རྒྱ་ཚིག་མཛོད་ཟེར་བ་ལས། རབ་བྱུང་བརྒྱད་པ་ཕྱི་ལོ་ ༡༤༩༧ མེ་སྦྲུལ་ལ་འཁྲུངས་པ་དང་རབ་བྱུང་དགུ་པ་ཕྱི་ལོ་༡༥༤༣ ཆུ་ཡོས་ལ་ཁྲིར་ཕེབས་ཅིང་རབ་བྱུང་དགུ་པ་ས་སྤྲེལ་ལ་གཤེགས་པར་བཀོད། པཎ་ཆེན་ཆོས་འབྱུང་དང་འཇིགས་བྱེད་ཆོས་འབྱུང་ཁུངས་བཙན་པར་བྱས། སུམ་པའི་ཆོས་འབྱུང་དུའང་འདི་དང་འོག་མ་ལོ་མཚམས་དཔྱད་དགོས་གསུངས་སོ།།
༡༡] དེ་ནས་བརྒྱུད་འདེབས་ལས། [ བྱང་ཆོས་དང་། དགའ་ལྡན་ཁྲིར་ཕེབས། ]
མདོ་རྒྱུད་ཆོས་ཀྱི་མཁའ་ལ་ཐོགས་མེད་རྒྱུ། །གྲགས་པའི་འོད་ཟེར་སྟོང་གི་དྲྭ་བ་ཅན། །
སྐལ་བཟང་གདུལ་བྱའི་པད་ཚལ་གཉེན་གཅིག་པུ། །རྨད་བྱུང་བཤེས་གཉེན་ཞབས་ལ་གསོལ་བ་འདེབས། །
ཞེས་གསུངས་པ་ལྟར། དེའི་རྗེས་སུ་སྨད་རྒྱུད་པའི་ཁྲིར་རྒྱུད་ཆེན་ཆོས་གྲགས་བཟང་པོ་ཕེབས་པ་ཡིན། འདི་ནི་རྗེ་ཙོང་ཁ་པ་གཤེགས་ནས་ལོ་གྱ་བརྒྱད་སོང་བའི་མཚམས་སུ་རབ་བྱུང་བརྒྱད་པའི་ལྕགས་གླང་། ཕྱི་ལོ་ ༡༤༨༡ ལོར་དབུས་སྟོད་སྟག་ཕུར་སྐུ་འཁྲུངས། སྟག་ཕུ་ཆོས་སྡེར་རབ་ཏུ་བྱུང་ནས་བཀའ་ཆེན་སོགས་ལ་སྦྱངས་པར་མཛད་པས་ལེགས་པར་མཁྱེན་པས་མཁས་པའི་སྙན་པ་ཐོབ།
རྒྱུད་སྨད་དུ་བྱོན་ནས་ཆོས་རྗེ་རྒྱ་ར་བ་དང་། རྗེ་རྒྱལ་མཚན་བཟང་པོ་སོགས་བསྟེན་ནས་སྔགས་ཕྱོགས་སྐོར་མ་ལུས་པ་གསན་ཏེ་མདོ་སྔགས་ལ་ནང་བྱན་ཚུད་པའི་མཁས་པར་གྱུར། སྔར་སྲོལ་ཇིི་བཞིན་དུ་རྒྱུད་ཀྱི་འཆད་ཉན་རྣམས་མཛད་བཞིན་པའི་སྟེང་ནས་བྱང་རྩེ་ཆོས་རྗེར་ཕེབས། དགུང་གྲངས་ང་བདུན་པ་རབ་བྱུང་དགུ་པ་ཆུ་མོ་བྱའི་ལོར་རྒྱལ་བ་གཉིས་པའི་གསེར་ཁྲིར་ཕེབས་ཏེ་ལོ་ངོ་བརྒྱད་ཀྱི་བར་དུ་མདོ་སྔགས་ཀྱི་ཆོས་ཀྱི་འཁོར་ལོ་རྒྱ་ཆེར་བསྐོར་ཏེ། སྐལ་ལྡན་གྲངས་མེད་པ་མངོན་མཐོ་དང་ངེས་ལེགས་ཀྱི་ལམ་ལ་བཀོད་པར་མཛད།
གནས་བཅུའི་གོས་གུར་ཆེན་པོ་བཞེངས་ཏེ་མངོན་དགར་ཟུར་བཞུགས་མཛད་ནས། དགུང་གྲངས་རེ་ལྔ་པ་ཤིང་སྦྲུལ་ཟླ་བ་དགུ་པའི་ཚེས་དགུ་ལ་གསང་སྔགས་མཁར་དུ་སྐུ་གཤེགས། རིང་བསྲེལ་དང་འཕེལ་གདུང་མང་དུ་འཕེལ་ནས་བྱོན་པའི་དངུལ་གདུང་ནི་རྒྱ་གུར་ནང་ན་གྲ་དགོན་ཀ་བཞིའི་གསེར་གདུང་གི་འཁྲིས་ན་བཞུགས། དུས་མཆོད་ཀྱང་ཚ་བྲ་དཔོན་བརྒྱུད་ཀྱིས་དུས་ཡུན་རིང་པོར་སྲུང་བརྩི་བྱས་སྣང་ངོ་། །
འདི་བཻ་སེར་དུ་དགུང་ལོ་དྲུག་ཅུ་པར་ཆུ་བྱིར་དགའ་ལྡན་ཁྲིར་ཕེབས། ས་ལུག་ལ་ཞི་བར་གཤེགས་པ་གསུངས་པ་དང་། དེང་དུས་ཀྱི་ཚིག་མཛོད་དུ་བཀོད་པའི་ལོ་ཚིགས་སོགས་མི་མཐུན་པ་མང་བས་མཐའ་དག་འདིར་འགོད་པའི་ངལ་བ་མ་བྱས་སོ།།
རྒྱ་ཆེན་ཤེས་བྱ་ནམ་མཁའ་ཡངས་པ་ལ། །ལུང་རིགས་དཀྱིལ་འཁོར་ཡོངས་སུ་རབ་རྒྱས་ཤིང་། །
སྙན་གྲགས་འོད་དཀར་ཕྱོགས་བཅུར་གཡོ་བ་ཡི། །བཤེས་གཉེན་ཀུནྡའི་གཉེན་ལ་གསོལ་བ་འདེབས། །
ཞེས་པ་ལྟར། དེའི་རྗེས་སུ་ཆོས་རྗེ་དྭགས་པོ་ནམ་མཁའ་གྲགས་སྨད་རྒྱུད་པའི་ཁྲིེར་ཕེབས་པ་ཡིན་ཏེ། དམ་པ་འདི་ནི་དྭགས་པོ་མངའ་རིས་སུ་སྐུ་འཁྲུངས། གཞོན་ནུའི་དུས་ནས་རབ་ཏུ་བྱུང་སྟེ། དྭགས་པོ་གྲྭ་ཚང་དུ་སློབ་དཔོན་བློ་གྲོས་འཕེལ་བ་ལ་ཕར་ཕྱིན་གསན་པས་བློ་བསྐྱེད་ཆེ་བ་བྱུང་། རི་སྒོར་བློ་གྲོས་འཕེལ་གྱི་ཕར་ཕྱིན་སྤྱི་དོན་ཉིན་ཞག་ཉི་ཤུ་ཐམ་པ་ལ་ཐུགས་འཛིན་མཛད་དེ་སེ་ར་བྱེས་སུ་ཕེབས།
སྐུ་ཆས་དཀོན་པོ་བྱུང་སྣང་ཡང་ཆོས་རྗེ་རྗེ་བཙུན་ཆོས་རྒྱན་གྱིས་ཆས་ཀ་ཕྲན་བུ་གནང་སྟེ། རྗེ་ཉིད་ཀྱི་དྲུང་ནས་བཀའ་ཆེན་རྣམས་ལ་གསན་སྦྱོང་རྡོ་རུས་ཐུག་པར་མཛད་པས་མཁས་པའི་ཕུལ་ཕྱིན་གྱུར་ཏེ་སྙན་གྲགས་ཀྱིས་བོད་ཁམས་ཁྱབ་པ་ཙམ་དུ་བྱུང་། རྒྱུད་སྨད་དུ་བྱོན་ནས་རྒྱུད་ཆེན་རྒྱལ་མཚན་བཟང་པོ་ལས་རྒྱུད་པའི་འཆད་ཉན་གྱི་སྲོལ་ཡོད་པ་ཐམས་ཅད་གསན། དགའ་ལྡན་དུ་རྗེ་ཆོས་སྐྱོང་རྒྱ་མཚོའི་དྲུང་ནས་ཀྱང་རྡོ་རྗེ་འཇིགས་བྱེད་ཀྱི་དབང་། རྒྱུད་འགྲེལ་གདམས་ངག་ཆ་ལག་དང་བཅས་པ། ཁྱད་པར་དུ་དུས་ཀྱི་འཁོར་ལོ་ལ་ཞིབ་ཏུ་སྦྱངས་པས་རྒྱུད་སྡེ་རྒྱ་མཚོ་ལ་དབང་བསྒྱུར་པའི་མ་དྲོས་གདེངས་ཅན་དབང་པོར་གྱུར།
དེ་ནས་སྨད་རྒྱུད་ཀྱི་ཁྲིར་ཕེབས། ཡུན་རིང་པོའི་བར་དུ་རྒྱུད་གསུམ་འགྲེལ་པ་འགྲེལ་བཤད་མན་ངག་བསྐྱེད་རྫོགས་བཞི་དང་། ཁྲི་ཆེན་བརྒྱད་སོགས་འཆད་ཉན་བསྟར་ཆགས་སུ་གནང་བས་མཁས་གྲགས་ཀྱི་སྙན་པ་ཡང་ཆེ། དུས་འཁོར་ཀྱི་སྐོར་ལ་བཤད་པ་རྒྱས་པ་ཞིག་མཛད་བཞེད་ཀྱང་མ་གྲུབ། ད་ལྟ་གྲྭ་ཚང་གི་མཁན་པོས་འཆད་ཉན་མཛད་བཞིན་པའི་གསང་འདུས་བསྐྱེད་རྫོགས་ [ དྭགས་པོའི་བསྐྱེད་རྫོགས་ ] གཉིས་པོ་ཡང་རྗེ་འདིས་མཛད།
གཞན་ཡང་གསུང་རྩོམ་གཞན་འགའ་ཞིག་ཡོད་སྣང་། གསུང་ལས་སྐྱེས་པའི་སློབ་མའི་ཚོགས་ཀྱང་མང་དུ་ཐོན། མཐར་ཀུན་སྤངས་མཛད་དེ། དགའ་ལྡན་དུ་བྱམས་པ་མགོན་པོའི་མདུན་སར་གཤེགས་པར་གྱུར།