གསང་ཆེན་དཔལ་ལྡན་སྨད་རྒྱུད་གྲྭ་ཚང་འདི་ཉིད་དུ། འཇུག་པ་པོ་རྟེན་གྱི་གང་ཟག་དེ་ལ་དགེ་བཤེས་དང༌། བསྐྱེད་རིམ་པ་གཉིས་སུ་འདུས་པ་ལས། དགེ་བཤེས་ནི། གདན་ས་གསུམ་སོགས་སུ་མདོ་ཕྱོགས་ཀྱི་གཞུང་ཆེན་བཀའ་པོད་ལྔ་ལ་སློབ་གཉེར་མཐར་ཕྱིན་གནང་ཏེ་དགེ་བཤེས་ཀྱི་མཚན་རྟགས་བཞེས་རྗེས། རྒྱུད་གྲྭ་སྟོད་སྨད་གང་རུང་དུ་འཛུལ་ཞུགས་གནང་སྟེ་ལོ་གཅིག་གི་ཆོས་ཐོག་འཁོར་དགོས་པ་ཡིན་ལ།

དེ་ཡང་སློབ་གཉེར་དང་སློབ་ཚན་སོགས་ཀྱི་སྐོར་ལ་སྲོལ་བཟང་རྒྱུན་འཛིན་གྱི་སྟེང་དུ་དུས་རབས་ཀྱི་འགྱུར་འགྲོས་དང་བསྟུན་ཏེ་ཁ་སྣོན་དང་བཅོས་བསྒྱུར་སོགས་བྱེད་དགོས་པ་ནི་མེད་དུ་མི་རུང་བ་ཞིག་ཡིན་པ་ལྟར། བོད་ཀྱི་དགོན་སྡེ་ཁག་ཏུའང་སྔར་སྲོལ་རྒྱུན་འཛིན་དང་། ལོ་རེའི་སློབ་ཚན་གཏན་འབེབས། རྒྱུགས་སྤྲོད་གསར་སྣོན། དེང་དུས་ཀྱི་ཤེས་ཡོན་སློབ་ཚན་དུ་ལེན་པ་སོགས་དང་།

དེ་ཡང་མདོ་སྔགས་གཉིས་ཀྱི་སློབ་ཚན་རྣམས་གཙོ་བོ་སྟེ། བསྡུས་གྲྭའི་གཞུང་ནི་ཕུར་ལྕོག་བྱམས་པ་རིན་པོ་ཆེས་མཛད་པའི་རིགས་ལམ་འཕྲུལ་གྱི་ལྡེ་མིག་དང་དེ་བསྡུས་གྲྭ་འཛིན་གྲྭ་གསུམ་གྱི་སློབ་ཚན་དང་། རྗེ་བདག་ཉིད་ཆེན་པོའི་དྲང་ངེས་ལེགས་བཤད་སྙིང་པོ། གྲུབ་མཐའ། རྒྱལ་མཆོག་ལྔ་པ་ཆེན་པོའི་ཕར་ཕྱིན་གྱི་གཞུང་། སྔགས་ཀྱི་ས་ལམ། དབུ་མ། རྒྱུད་ཀྱི་ཊཱིཀྐ། སྔགས་རིམ་ཆེན་མོ་སོགས་སློབ་ཚན་དུ་ཡོད་ཅིང་།

མཁན་བླ་སོ་སོའི་སྐབས་སུ་གྲྭ་ཚང་གི་ཆོས་སྲིད་ཀྱི་འགྱུར་བ་རླབས་ཆེན་གང་སོང་གི་རྒྱུ་རྐྱེན་གཅིག་ནི་སྐབས་སོ་སོའི་གྲྭ་ཚང་གི་ཕྱག་མཛོད་སོགས་ལས་ཀྱི་སྣེ་མོ་བ་རྣམས་ཀྱི་རྒྱབ་སྐྱོར་དང་དངོས་སུ་ཕྱག་བསྟར་ཏེ་ལས་དོན་བསྒྲུབས་པ་ལས་བྱུང་བ་དང་བལྟོས་བཅས་ཡིན་པ་ནི་བཤད་མ་དགོས་པ་ཡིན་ལ། གྲྭ་ཚང་དབུས་མ་ཕྱག་མཛོད་ཁང་འདི་བཞིན་སྤྱི་ཁྱབ་སྡེ་ཚན་གལ་ཆེན་ཞིག་ཡིན་ཞིང་།