གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༤༧] ཆོས་རྗེ་བློ་བཟང་དགེ་ལེགས། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་བཟང་རྒྱལ་བའི་ཐུགས་བཅུད་འདུས་པའི་ལམ། ། སྔོན་གོམས་དགེ་བས་འགྲོ་ལ་རབ་སྤེལ་བ། །
མངོན་མཐོ་ངེས་ལེགས་དགའ་སྟོན་འགྱེད་མཁས་པ། ། དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་དཔལ་ལྡན་སྨད་རྒྱུད་པའི་མཁན་ཁྲིར་ཆོས་རྗེ་བློ་བཟང་དགེ་ལེགས་དམ་པ་བྱོན་པ་སྟེ། སྐྱེས་བུ་འདི་ནི་རབ་བྱུང་བཅུ་གསུམ་པ་ས་སྦྲུལ་ཕྱི་ལོ་ ༡༧༤༩ ལོར་འཕན་ཡུལ་དུ་སྐུ་འཁྲུངས། སྐུ་གཞོན་ནུའི་དུས་ནས་རབ་ཏུ་བྱུང་། སེར་སྨད་ཚ་བ་ཁང་ཚན་དུ་ཞུགས་ནས་གཞུང་ཆེན་བཀའ་པོད་རྣམས་ལ་སྦྱངས་བརྩོན་མཛད་པས་མཁས་སྙན་གྱིས་གྲགས། སྔགས་ཕྱོགས་ཀྱི་གསན་བསམ་མཛད་སླད་དཔལ་ལྡན་སྨད་རྒྱུད་གྲྭ་ཚང་དུ་ཕེབས།
གསང་བདེ་འཇིགས་གསུམ་གྱིས་མཚོན་རྒྱུད་སྡེ་རྣམས་ལ་སྦྱང་པ་ཕུལ་ཕྱིན་མཛད་དེ་རྒྱུད་པའི་མཁན་ཁྲིར་ཕེབས། རྒྱུད་འགྲེལ་ཆེན་མོ་སོགས་འཆད་ཉན་གྱི་རྒྱུན་ཇི་ཡོད་ལོ་རེ་བཞིན་བསྟར་ཆགས་སུ་མཛད་པའི་མུར། བྱང་རྩེའི་ཁྲི་ལ་ཕེབས་ཅིང་དེའི་ཚེ་རང་ཉིད་ཀྱི་དགུང་གྲངས་ ༥༨ ཐོག་རབ་བྱུང་བཅུ་བཞི་པའི་མེ་ཡོས་ཕྱི་ལོ་ ༡༨༠༧ ལོར་དགའ་ལྡན་གསེར་གྱི་ཁྲི་ལ་འཁོད་དེ་ལོ་གཅིག་རིང་ཆོས་འཁོར་བསྐོར་ནས་ས་འབྲུག་ལོར་ཞི་བར་གཤེགས་སྣང་།
༤༨] ཆོས་རྗེ་ངག་དབང་ཆོས་འཕེལ། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་བཟང་ངག་གི་དབང་ཕྱུག་འཇམ་མགོན་རྗེའི། ། ལུང་རྟོགས་དམ་པའི་ཆོས་ཀྱི་འདོད་རྒུའི་དཔལ། །
བསམ་འཕེལ་འགྲོ་བའི་རེ་སྐོང་ཡིད་བཞིན་ནོར། ། རྣམ་འདྲེན་རྗེ་བཙུན་བླ་མར་གསོལ་བ་འདེབས། །
ཞེས་འབྱུང་བ་ལས། དེའི་རྗེས་སུ་སྨད་རྒྱུད་པའི་མཁན་ཁྲིར་ཆོས་རྗེ་ངག་དབང་ཆོས་འཕེལ་མཆོག་ཕེབས་པ་ཡིན་ཏེ། དམ་པ་འདི་ནི་རབ་བྱུང་བཅུ་གསུམ་པའི་ཤིང་ཁྱི་ཕྱི་ལོ་ ༡༧༥༤ ལོར་བྱང་འདམ་ཁུལ་དུ་སྐུ་འཁྲུངས། སྐུ་གཞོན་ནུའི་དུས་ནས་རབ་ཏུ་བྱུང་། འབྲས་སྒོ་མང་གྲྭ་ཚང་དུ་གཞུང་ཆེན་བཀའ་པོད་ལྔ་ལ་ཐོས་བསམ་སློབ་གཉེར་ཚུལ་བཞིན་དུ་མཛད་པས་མཁས་གྲགས་ཀྱིས་ཁྱབ་པ་བྱུང་།
དཔལ་ལྡན་སྨད་རྒྱུད་གྲྭ་ཚང་དུ་ཕེབས་ཞུགས་ཀྱིས་གསང་ཆེན་རིག་པ་འཛིན་པའི་ཆོས་གྲྭ་རུ་སྔགས་ཀྱི་གཞུང་ཆེན་ཐོས་བསམ་སྒོམ་པ་ཕྱོགས་རིས་མེད་པར་མཛད་པས་མདོ་སྔགས་རབ་འབྱམས་ལ་ནང་བྱན་ཆུད་པའི་མཁས་པར་གྱུར་པས་༧རྒྱལ་དབང་ཚུལ་ཁྲིམས་རྒྱ་མཚོའི་ཡོངས་འཛིན་དུ་བསྐོས། རྒྱལ་བའི་བཀའ་འགྱུར་གྱི་ལུང་ཡང་གནང་།
རབ་བྱུང་བཅུ་བཞི་པའི་ཤིང་ཁྱི་ཕྱི་ལོ་ ༡༨༡༤ ལོར་ཉིད་ཀྱི་དགུང་གྲངས་དྲུག་ཅུ་ཐོག་བྱང་རྩེ་བརྒྱུད་ནས་དགའ་ལྡན་གསེར་གྱི་ཁྲི་ལ་འཁོད། རབ་བྱུང་དེ་གའི་མེ་ཡོས་བར་ལོ་ངོ་དྲུག་ཁྲི་ལོ་བསྐྱངས། འདིའི་སྐུ་རབས་སྲིད་སྐྱོང་ཡོངས་འཛིན་སྟག་ལུང་བྲག་པ་སོགས་ཡིན་ནོ། །
༤༩] ཆོས་རྗེ་འཇམ་དཔལ་ཚུལ་ཁྲིམས། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་བཟང་འཇམ་དཔལ་སྙིང་པོའི་རིང་ལུགས་མཆོག ། བཤད་དང་སྒྲུབ་པའི་འཛིན་སྐྱོང་སྤེལ་མཛད་ཅིང་། །
ཚུལ་ཁྲིམས་ནོར་བུའི་ཐུགས་རྒྱུད་ཡོངས་གང་བའི། ། དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་གསུངས་པ་ལྟར། དེའི་རྗེས་སུ་སྨད་རྒྱུད་པའི་མཁན་ཁྲིར་ཆོས་རྗེ་འཇམ་དཔལ་ཚུལ་ཁྲིམས་མཆོག་ཕེབས་པ་ཡིན་ཏེ། དམ་པ་འདི་ནི་གཙང་ཐོབ་རྒྱལ་དུ་སྐུ་འཁྲུངས། གཞོན་ནུའི་དུས་ནས་རབ་ཏུ་བྱུང་། སེར་བྱེས་གྲྭ་ཚང་དུ་ཞུགས་ནས་གཞུང་ཆེན་བཀའ་པོད་ལྔ་ལ་ཐུགས་གཉེར་མཛད་དེ་དགེ་བཤེས་ཐོན་ནས་སྔགས་ཕྱོགས་ལ་གསན་བསམ་མཛད་སླད་དཔལ་ལྡན་སྨད་རྒྱུད་གྲྭ་ཚང་དུ་ཕེབས་ཞུགས་ཀྱིས་ཆོས་འགྲིམས་མཛད་དེ་སྨད་རྒྱུད་པའི་བླ་མ་དབུ་མཛད་གནང་།
དེ་ནས་མཁན་ཁྲིར་ཕེབས་ཏེ་འཆད་ཉན་རྣམས་ལྷག་ལུས་མེད་པར་མཛད་མཐར་བྱང་རྩེ་ཆོས་རྗེའི་ཁྲི་ལ་ཕེབས། དམ་པ་རང་ཉིད་ཀྱི་དགུང་གྲངས་ ༦༢ པའི་ཐོག་དགའ་ལྡན་གསེར་གྱི་ཁྲི་ལ་འཁོད་དོ།།
བློ་ཆེན་མཁན་བཙུན་བཟང་པོའིི་མཐར་སོན་པའི། ། རྣམ་དག་ཚུལ་ཁྲིམས་གཙང་མའི་ཞིང་ས་ལས། །
ཏིང་འཛིན་ཤེས་རབ་མྱུ་གུའི་འབྲས་སྨིན་པ། ། བཤད་སྒྲུབ་བསྟན་འཛིན་མཆོག་ལ་གསོལ་བ་འདེབས། །
ངག་གི་དབང་ཕྱུག་བློ་བཟང་གྲགས་པ་ཡི། ། མདོ་སྔགས་བསྟན་པ་འཛིན་སྐྱོང་སྤེལ་བ་ལ། །
ཕྱོགས་ལས་རྣམ་རྒྱལ་བརྟུལ་ཞུགས་གྲུབ་པ་ཅན། ། དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར་འདིའི་བར་ན་སྨད་རྒྱུད་པའི་འཆད་ཉན་པ་མཁན་ཐོག་གཉིས་བྱུང་བ་བརྒྱུད་འདེབས་ལས་གསལ་མོད། འཁྲུངས་ཡུལ་དང་གྲྭ་ས་གང་ནས་ཡིན་ཚུལ་སོགས་མ་རྙེད་པས་སླད་རྙེད་ན་འདིར་བསྣན་དགོས་སོ། །
༥༢] ཆོས་རྗེ་བློ་བཟང་ལྷུན་གྲུབ། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་བཟང་གྲགས་བསྟན་འཛིན་སྨོན་རྩ་བ་བརྟན། ། ལྷུན་གྲུབ་འཕྲིན་ལས་ཡལ་འདབ་མེ་ཏོག་རྒྱས། །
དོན་གཉིས་འབྲས་བུར་འདོད་རྒུའི་མཆོག་སྦྱིན་མཁན། ། རྗེ་བཙུན་དཔག་བསམ་དབང་པོར་གསོལ་བ་འདེབས། །
ཞེས་གསུངས་པ་བཞིན། དེའི་རྗེས་སུ་སྨད་རྒྱུད་པའི་མཁན་ཁྲིར་ཆོས་རྗེ་བློ་བཟང་ལྷུན་གྲུབ་མཆོག་ཕེབས་པ་སྟེ། དམ་པ་འདི་ནི་རྒྱལ་མོ་རོང་ཚ་ཁོ་ལྕོག་རྩེ་ཟེར་བར་སྐུ་འཁྲུངས། ཆུང་གཞོན་ནུ་ཉིད་ནས་རབ་ཏུ་བྱུང་། དབུས་སུ་བཏེག་ནས་སེར་སྨད་རྒྱལ་རོང་ཁང་ཚན་དུ་ཞུགས་ནས་མདོ་ཕྱོགས་ཀྱི་བཀའ་ཆེན་རྣམས་ལ་ཐོས་བསམ་མཐར་ཕྱིན་པར་མཛད།
དཔལ་ལྡན་སྨད་རྒྱུད་དུ་སྔགས་ཕྱོགས་ཀྱི་གཞུང་ཆེན་རྣམས་ལ་གསན་བསམ་སྒོམ་གསུམ་བརྩོན་པ་དྲག་པོས་བསྐྱོད་པས་མདོ་སྔགས་རབ་འབྱམས་ལ་མཁས་པའི་སྙན་པ་ཆེ་བས་༧རྒྱལ་དབང་མཁས་གྲུབ་རྒྱ་མཚོའི་ཡོངས་འཛིན་མཛད།
རྒྱུད་སྨད་གྱི་བླ་མ་དབུ་མཛད་བརྒྱུད་ནས་མཁན་ཁྲིར་བྱོན་ནས་འཆད་ཉན་མཛད་བཞིན་པ་ནས། བྱང་རྩེའི་ཁྲི་བརྒྱུད་ནས་དགའ་ལྡན་གསེར་གྱི་ཁྲི་ལ་ཕེབས། ཆོས་འཁོར་རྒྱུན་མི་ཆད་དུ་བསྐོར་བ་སོགས་མཛད་པ་རྒྱ་ཆེ་བ་བྱུང་སྣང་། འདིས་མཛད་པའི་གསང་བདེ་འཇིགས་གསུམ་ཟིན་བྲིས་ཤིག་ཡོད་ལུགས་གསལ་ཡང་དཔེ་མ་མཐོང་།
༥༣] རྒྱལ་རོང་བློ་བཟང་མཁྱེན་རབ་དབང་ཕྱུག ། [ དགའ་ལྡན་ཁྲིར་ཕེབས། ]
བློ་བཟང་གྲགས་པའི་བཤད་སྒྲུབ་གདམས་པའི་མཛོད། ། རྣམ་དཔྱོད་བརྩོན་འགྲུས་དྲག་པོས་འཛིན་མཛད་ཅིང་། །
མཛད་འཕྲིན་རྒྱ་མཚོའི་གོས་ཅན་སྤྱི་ཁྱབ་ཅན། ། དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལས། མཚན་སྒྲ་ཇི་བཞིན་མི་གསལ་ཡང་གོང་འོག་གི་བབ་ལ་བསྟུན་ན་འབྲས་རྒྱལ་རོང་བློ་བཟང་མཁྱེན་རབ་དབང་ཕྱུག་ཡིན་ངེས། དམ་པ་འདི་འཁྲུངས་ཡུལ་རྒྱལ་རོང་། དབུས་སུ་བྱོན་ནས་འབྲས་རྒྱལ་རོང་ཁམས་ཚན་དུ་ཆོས་ཞུགས་གནང་།
སློབ་གཉེར་གནང་སྐབས་ཆས་ཀ་དཀོན་ཙམ་བྱུང་ཡང་རྗེས་སུ་མཛད་འཕྲིན་བླ་ལྷག་ཏུ་རྒྱས་པ་དང་། རྒྱུད་པའི་མཁན་པོའི་སྐབས་བླ་བྲང་ནས་ཚོགས་སུ་ཇ་ཐུག་སྔར་ལམ་བཞིན་གཏང་མ་ཐུབ་པས་དེ་དག་གི་ཚབ་མཚོན་དུ་བསྙེན་ཚབ་དང་ཐུག་ཚབ་ཅེས་ལག་བདེ་བས་ལག་རྐྱན་སྟོང་པ་རྒྱུགས་རྒྱུའི་སྲོལ་བྱུང་ཞེས་རྒན་རབས་ཚོའི་ངག་རྒྱུན་དུ་བྱུང་། རྗེས་སུ་དགའ་ལྡན་གསེར་ཁྲིར་ཕེབས།
དཔལ་དུས་ཀྱི་འཁོར་ལོའི་དབང་ཆེན་གནང་ཞིང་༧རྒྱལ་དབང་འཕྲིན་ལས་རྒྱ་མཚོའི་ཡོངས་འཛིན་མཛད་པ་དང་། བོད་ཀྱི་སྲིད་སྐྱོང་ཡང་གནང་། འདིའི་སྐབས་དགའ་ལྡན་དུ་དམག་དྲངས་པ་སོགས་མི་ཤིས་པ་ཡང་འགའ་བྱུང་སྣང་། ཕྱི་ལོ་ ༡༨༥༣ ནས་ཕྱི་ལོ་ ༡༨༥༩ བར་ཁྲི་ལོ་བདུན་བསྐྱངས་སོ། །འདིའི་སྐུ་སྐྱེས་ཕྱི་མ་རྣམས་སྡེ་དྲུག་གི་སྐྱེ་སྤྲུལ་རྣམས་ཡིན་ནོ། །
ཐུགས་རྒྱུད་རྒྱ་མཚོའི་ལུང་རྟོགས་ནོར་བུས་གཏམས། ། མཁས་བཙུན་བཟང་པོས་ཐུབ་བསྟན་འཛིན་པ་ཡི། །
ལང་ཚོ་དར་ལ་དྲག་པའི་དཔལ་ཡོན་ཅན། ། དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་འཆད་ཉན་ལོ་དུས་ཚང་བར་མཛད་པའི་མཁན་ཐོག་ཅིག་བྱུང་སྣང་ཡང་། འཁྲུངས་གཤེགས་སོགས་ལོ་རྒྱུས་ཞིབ་པར་མ་རྙེད་པས་སླད་རྙེད་ལ་འདིར་བསྣན་པར་བྱའོ། །
༥༥] ཆོས་རྗེ་འཇམ་དབྱངས་དམ་ཆོས། [ བྱང་ཆོས་དང་། དགའ་ལྡན་ཁྲིར་ཕེབས། ]
འཇམ་དཔལ་དབྱངས་དངོས་རྗེ་བཙུན་ཙོང་ཁ་པའི། ། མདོ་སྔགས་དམ་པའི་ཆོས་ཀུན་ལེགས་བཟུང་ནས། །
སྐལ་བཟང་གདུལ་བྱའི་ཚོགས་རྣམས་ཚིམས་མཛད་པ། ། དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་མཁན་ཁྲིར་ཆོས་རྗེ་འཇམ་དབྱངས་དམ་ཆོས་མཆོག་ཕེབས་པ་ཡིན་ཏེ། དམ་པ་འདི་ནི་འཁྲུངས་ཡུལ་རྒྱལ་རོང་། རབ་ཏུ་བྱུང་ནས་དབུས་སུ་བྱོན་ཏེ་སློབ་གཉེར་ལ་ཕེབས། གདན་ས་ཆེན་པོ་འབྲས་སྤུངས་རྒྱལ་རོང་ཁམས་ཚན་དུ་ཆོས་ཞུགས་མཛད་དེ་གྲྭ་སྐོར་དམ་བཅའ་བཞག །
དཔལ་ལྡན་སྨད་རྒྱུད་དུ་བྱོན་ནས་གསང་སྔགས་རྒྱུད་སྡེ་བཞི་ལ་སྦྱངས་བརྩོན་མཛད་པས་མདོ་སྔགས་ལ་མཁས་པའི་ཕུལ་ཕྱིན་དུ་གྱུར། རྒྱུད་སྨད་ཀྱི་བླ་མ་དབུ་མཛད་གནང་སྟེ་མཁན་པོའི་ཁྲིར་ཕེབས། སྔར་སྲོལ་གྱི་འཆད་ཉན་རྣམས་ཆག་མེད་གནང་སྟེ་བྱང་རྩེའི་ཁྲི་ལ་ཕེབས་ནས་ཁྲི་རིན་པོ་ཆེ་ཚུལ་ཁྲིམས་དར་རྒྱས་ཁྲི་བཤོལ་འཕྲལ་དམ་པ་འདི་དགའ་ལྡན་གསེར་ཁྲིར་ཕེབས།
ལོ་རེ་བཞིན་ཆོས་འཁོར་རྒྱུན་མི་ཆད་དུ་བསྐོར་ཞིང་ཁྲི་ལོ་བདུན་བསྐྱངས་པར་བཤད། འདིའི་སྐུ་སྐྱེ་ཕྱི་མ་ཚལ་གུང་ཐང་དུ་སྐུ་འཁྲུངས་ནས་ཁམས་སུ་བྱོན་ཏེ་ཐང་ལུང་ས་ཆར་ཡུན་རིང་བཞུགས་ནས་བླ་བྲང་གི་ཤུལ་ཁྲི་ཡེ་ཤེས་ཆོས་འཕེལ་ཚང་གིས་སྡུད་པར་ངག་རྒྱུན་འདུག །
༥༦] ཆོས་རྗེ་བསྟན་འཛིན་རབ་རྒྱས།
དཔལ་ལྡན་ཐུབ་པའི་བསྟན་ལ་དབང་འབྱོར་ཞིང་། ། བློ་བཟང་གྲགས་པའི་ལུང་རིགས་དྲི་མེད་འཛིན། །
སྐལ་ལྡན་གདུལ་བྱའི་པད་ཚལ་སྐྱོང་མཁས་པ། ། བཤེས་གཉེན་རྟ་བདུན་དབང་པོར་གསོལ་བ་འདེབས། །
ཞེས་འབྱུང་བ་ལས། བརྒྱུད་འདེབས་ཡོད་འདུག་ཀྱང་མཚན་སྒྲ་གསལ་བར་ངེས་དཀའ་མོད། ༧རྒྱལ་དབང་སྐུ་ཕྲེང་བཅུ་གཉིས་པའི་རྣམ་ཐར་ཤོག་གྲངས་ ༧༣ པའི་རྒྱབ་གཟིགས་སུ་བྱང་རྩེ་ཆོས་རྗེ་འཇམ་དབྱངས་དམ་ཆོས་དགའ་ལྡན་ཁྲི་བ་དང་། རྒྱུད་སྨད་མཁན་ཟུར་བསྟན་འཛིན་རབ་རྒྱས་ལ་བྱང་རྩེ་ཆོས་རྗེ་བཀའ་བསྒྱུར་མཇལ་དར་འབུལ་བཞེས་གནང་།
ཉི་འོད་དུ་སྐད་རྒྱུགས་འབུལ་བར་སྔར་ལམ་ལྟར་གསོལ་རས་བསྩལ་ཅེས་འབྱུང་བར་དཔག་ན་དེའི་རྗེས་སུ་ཆོས་རྗེ་བསྟན་འཛིན་རབ་རྒྱས་སྨད་རྒྱུད་པའི་མཁན་ཁྲིར་ཕེབས་པར་མངོན་ཏེ་བརྒྱུད་འདེབས་ལས་མཚན་ཟུར་ཙམ་གསལ་བ་དང་། རྒྱལ་བའི་རྣམ་ཐར་ནང་ཁོང་གཉིས་ཀྱི་གོ་རིམ་གསལ་བར་ཐོན་པའི་ཕྱིར་སྙམ་མོ། །
རྨད་བྱུང་བྱམས་བརྩེའི་དཀྱིལ་འཁོར་ཡོངས་རྫོགས་ཤིང་། ། རྣམ་དག་མཛད་བཟང་འོད་དཀར་ཆེས་འཕྲོས་ནས། །
ཕན་བདེའི་ཀུནྡ་མཆོག་ཏུ་བཞད་མཛད་པ། ། ཐོགས་མེད་མཚན་ཅན་ཞབས་ལ་གསོལ་བ་འདེབས། །
ཞེས་འབྱུང་བ་ལས། དེའི་རྗེས་སུ་ཆོས་རྗེ་བྱམས་པ་ཐོགས་མེད་སྨད་རྒྱུད་པའི་མཁན་ཁྲིར་ཕེབས་སྣང་ཡང་འཁྲུངས་ཡུལ་དང་གདན་ས་གང་ནས་ཡིན་པ་སོགས་ཀྱི་ལོ་རྒྱུས་ཞིབ་པར་མ་རྙེད་པས་སླད་རྙེད་ན་འདིར་བསྣན་པར་བྱའོ།