༄༅། །ལྷོ་ཕྱོགས་གསང་ཆེན་རྒྱུད་སྨད་གྲྭ་ཚང་དུ་གདན་ས་ཁག་ནས་ཆེད་ཕེབས་ཀྱི་ཆོས་ཐོག་འཁོར་བཞིན་པའི་དགེ་བཤེས་རྣམས་དང་། གྲྭ་ཚང་གི་སློབ་གཉེར་བ་སོགས་མཉམ་ཞུགས་ཀྱིས་གཙོ་བོར་རྗེ་བཙུན་ཤེས་རབ་སེང་གེའི་གསུང་དཔལ་གསང་བ་འདུས་པའི་རྒྱུད་ཀྱི་ཊཱིཀྐ་ཆེན་མོའི་སློབ་གཉེར་གྱི་ཆེད་དུ། དཔལ་ལྡན་སྨད་རྒྱུད་གྲྭ་ཚང་མདོ་སྔགས་བཤད་སྒྲུབ་སློབ་གཉེར་ཁང་གི་རྒྱུད་ཀྱི་ཊཱིཀྐའི་དགུན་ཆོས་ཆེན་མོ་སྐབས་བཞི་པ་དེ་
བོད་རྒྱལ་ལོ་ ༢༡༥༡ ཟླ་༡༡ ཚེས་༠༡ དང་སྤྱི་ལོ་ ༢༠༢༤ ཟླ་ ༡༢ ཚེས་ ༣༡ ནས་དབུ་འཛུགས་གནང་། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༢།༣༡།ལ།
༄༅། །སྤྱི་ལོ་ ༢༠༢༤ ལོའི་ཟླ་ ༡༢ ཚེས་ ༡༤ ཉིན་ཏེ་རྒྱལ་བའི་ལྷག་དཀར་དགེ་བའི་ཉིན་གྱི་སྐལ་བཟང་གི་ཉིན་མོར་སྐྱབས་རྗེ་མཁན་རིན་པོ་ཆེ་དབུས་ལས་སྣེ་གོང་མ་གསུམ་གྱི་གཙོས་ལས་སྣེ་རྣམ་པ་དང་མཛའ་ཞིང་བརྩེ་བའི་སློབ་ཕྲུག་ཁག་ནས་ཤིང་སྣ་འདེབས་འཛུགས་གནང་། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༢།༡༤།ལ།
༄༅། །༢༠༢༤ ། ཟླ ༡༡ ཚེས་ ༢༧ ཉིན། དཔལ་ལྡན་རྒྱུད་སྨད་གྲྭ་ཚང་གི་སྐྱབས་རྗེ་མཁན་རིན་པོ་ཆེ་ངག་དབང་སངས་རྒྱས་མཆོག་དང་། ལ་དྭགས་གྲངས་ཉུང་མི་རིགས་ཀྱི་བློན་ཆེན་ལྕམ་སྐུ་རིན་ཆེན་ལྷ་མོ་རྣམ་གཉིས་དབུས་པའི་འབྲེལ་ཡོད་སྐུ་མགྲོན་རྣམ་པ་དང་། དེ་བཞིན་གྲྭ་ཚང་གི་སྐྱབས་གནས་དགེ་འདུན་འདུས་མང་ནས་བཀྲ་ཤིས་ཚིག་བཟང་གི་དགེ་སྨོན་དང་འབྲེལ་ཏེ་སྐོར་ལམ་ཞི་བདེའི་ལམ་བཟང་དབུ་འབྱེད་མཛད་སྒོ་བསྐྱངས། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༡།༢༧།ལ།
༄༅། །ས་སྟེང་༸རྒྱལ་བསྟན་ཡོངས་རྫོགས་ཀྱི་མངའ་བདག་༸སྤྱི་ནོར་༸གོང་ས་༸སྐྱབས་མགོན་ཆེན་པོའི་སྐུ་ཕྱྭ་དང་བོད་བསྟན་སྲིད་བདེ་ཐབས་སོགས་ཀྱི་ཞབས་རིམ་དུ་དམིགས་ནས། རྡོ་རྗེ་སློབ་དཔོན་བླ་མ་དབུ་མཛད་རྗེ་བཙུན་ཐུབ་བསྟན་རབ་རྒྱས་མཆོག་དབུ་བཞུགས་ཀྱིས་དཔལ་ལྡན་སྨད་རྒྱུད་གྲྭ་ཚང་ཚོགས་ཡོངས་རྒྱས་འཛོམས་ཀྱིས་བོད་ཟླ་ ༩ ཚེས་ ༡༧ ནས་ཉིན་གསུམ་རིང་ཆེས་བྱིན་མཐུའི་ཚན་ཁ་འབར་བའི་དྲག་པོ་མངོན་སྤྱོད་ཀྱི་ལས་ལྕགས་མཁར་ཆེན་མོ་འཚོགས་ཏེ། དེ་རིང་བོད་ཚེས་ ༡༩ ཉིན་ཤོག་ལིང་སྲེག་སྦྱོར་དང་གཏོར་རྒྱག་བཅས་སྔོན་གྱི་ཕྱག་བཞེས་ཇི་བཞིན་སྦྱོར་དངོས་རྗེས་གསུམ་བསྟན་པའི་མིག་རྒྱན་དུ་ཆེ་བར་མཛད་ཅིང། རབ་རྒྱས་གླིང་གཞིས་མི་དད་ལྡན་མང་ཚོགས་དུ་མ་ཚོགས་མཇལ་དུ་བཅར་ཡོད། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༡།༢༠།ལ།
༄༅། །གསང་ཆེན་དཔལ་ལྡན་སྨད་རྒྱུད་གྲྭ་ཚང་གི་ཐུན་མོང་མ་ཡིན་པ་རྡུལ་ཚོན་དཀྱིལ་འཁོར་དང་འབྲེལ་དཔལ་རྡོ་རྗེ་འཇིགས་བྱེད་ཆེན་མོའི་ཆོས་ཐོག་ཆེན་མོ་ཚོགས་པ་དང་བསྟུན། སྨད་རྒྱུད་པའི་དགེ་འདུན་བགྲེས་གྲས་ ༣༣ གི་བཞུགས་ཤག་ཐོག་བརྩེགས་གསུམ་ལྡན་འདི་བཞིན་སྨད་རྒྱུད་མཁན་རིན་པོ་ཆེ་རྗེ་བཙུན་ངག་དབང་སངས་རྒྱས་མཆོག་གིས་དགེ་སྐུལ་མཛད་འབྲས་དད་ལྡན་ཚོགས་གཙོ་སྐུ་ཞབས་ Sir Filippo Scianna ཡིས་དབུ་འཁྲིད་པའི་ཨེ་ཊ་ལི་ནང་པའི་མཐུན་ཚོགས་ UBI ནས་རྒྱུ་ཡོན་སྦྱར་ཏེ། སྔགས་རམས་པ་བློ་བཟང་ཕུར་བུ་ཅན་ཕྱག་མཛོད་སྐབས་ཉེར་གཅིག་པའི་དུས་ལེགས་གྲུབ་ཀྱིས་སྤྱི་ལོ་ ༢༠༢༤ ཟླ་བ་ ༡༡ཚེས་ ༡༠ ཉིན་འདུས་མང་གིས་རབ་གནས་མཛད་ཅིང་མཁན་རིན་པོ་ཆེ་རྗེ་བཙུན་ངག་དབང་སངས་རྒྱས་མཆོག་དང་ཚོགས་གཙོ། Sir Filippo Scianna ནས་དབུ་འབྱེད་བསྐྱངས་གནང་མཛད། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༡།༡༠།ལ།
༄༅། །དཔལ་ལྡན་སྨད་རྒྱུད་པའི་ཏྲེ་ཧོར་སྔགས་རམས་པ་བསོད་ནམས་དངོས་གྲུབ་དང་ཏྲེ་ཧོར་སྔགས་རམས་པ་བློ་བཟང་དབང་འདུས་གཉིས་ལོ་ན་ཆུང་དུས་ནས་གྲྭ་ཚང་དུ་དེང་རབས་ཀྱི་འགྲོས་ལྟར་འཛིན་གྲྭ་རིམ་གྱིས་འགྲིམས་ཏེ། དགེ་བཤེས་སྔགས་རམས་བཏང་ཟིན་པའི་སྟེང་། མདོ་ཕྱོགས་གཞུང་ཆེན་བཀའ་པོད་ལྔ་ལ་སླར་ཡང་ཞིབ་པར་ཐོས་བསམ་སློབ་གཉེར་མཐིལ་ཕྱིན་པར་བྱ་བའི་འདུན་པ་ཟློག་མེད་དུ་བརྟས་ཏེ། གདན་སར་ཞུགས་ནས་སློབ་གཉེར་གནང་འབྲས་དགེ་བཤེས་ལྷ་རམས་པའི་མཚན་གནས་ཐོབ་སྟེ། སླར་ཡང་སྨད་རྒྱུད་གྲྭ་ཚང་དུ་བཀའ་རམས་དགེ་བཤེས་ཁོངས་སུ་སྤྱི་ལོ་ ༢༠༢༤ ལོ་འདིར་ལོ་གཅིག་ཆོས་ཐོག་འགྲིམ་དུ་ཕེབས་ཏེ་སྔགས་ཕྱོགས་ཀྱི་ཐོས་བསམ་སློབ་གཉེར་ཞུ་སྒོ་མཐའ་དག་ལེགས་པར་གྲུབ་ལ་ཉེ་བ་དང་། ཚུལ་འདི་ལྟ་བུ་ནི་དེ་སྔ་ལོ་རྒྱུས་ནང་བྱུང་མ་མྱོང་བའི་བསྔགས་འོས་ཀྱི་གནས་བབ་ཅིག་ཡིན་པར་བརྟེན་གྲྭ་ཚང་ནས་སྤྱིར་སློབ་གཉེར་ལ་ཆེ་མཐོང་བརྩི་བཀུར་དང་། བྱེ་བྲག་ཁོང་གཉིས་ལ་རྗེས་སུ་ཡི་རང་དང་གཟེངས་བསྟོད་མཚོན་བྱེད་དུ་མཁན་རིན་པོ་ཆེ་རྗེ་བཙུན་ངག་དབང་སངས་རྒྱས་མཆོག་གི་ཕྱག་སོར་པདྨོ་ནས་དཔལ་གསང་བ་འདུས་པའི་ཞལ་ཐང་རེ་གསོལ་རས་སྩལ་གནང་མཛད་ཡོད། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༠།༢༨།ལ།
༄༅། །འདི་ག་དཔལ་ལྡན་སྨད་རྒྱུད་པའི་ཕྱག་མཛོད་སྔགས་རམས་པ་འཇམ་དབྱངས་ཆོས་འཕེལ་གྱིས་སྣེ་འཁྲིད་པའི་སྨད་རྒྱུད་དགེ་འདུན་ཚོགས་པ་ཞིག་ཉེ་ཆར་ཟླ་ངོ་གཉིས་ཙམ་གྱི་རིང་། སོག་ཡུལ་ཁུལ་གྱི་དད་ལྡན་དུ་མའི་འདོད་ཆོས་སྐོང་ཕྱིར་ཆོས་འབྲེལ་སྐོར་སྐྱོད་དུ་ཕེབས་ཤིང། ཁུལ་དེའི་འབྲེལ་ཡོད་མང་ཚོགས་ཀྱིས་རེ་སྐུལ་ལྟར། གཙོ་བོར་རྡུལ་ཚོན་གྱི་དཀྱིལ་འཁོར་བཞེངས་པ་དང། ཞི་རྒྱས་དབང་དྲག་གི་སྦྱིན་སྲེག་སོགས་བསྟན་སྲིད་མང་ཚོགས་བདེ་དོན་བཅས་པའི་ཆེད་ཞབས་རིམ་གང་ལ་དེ་འོས་ལེགས་པར་བསྒྲུབས་པས་མཚོན་རྣམ་དཀར་བགྱི་སྒོའི་མཛད་འཆར་ཁག་ལེགས་པར་གྲུབ་སྟེ། ཕྱི་ཟླ་ ༡༠ པའི་ཟླ་མཇུག་ནང་ཆོག་གྲྭ་རྣམས་གྲྭ་ཚང་དུ་ཕྱིར་བདེ་བར་འཁོར་ཟིན་པས། གོ་སྒྲིག་དང་རོགས་ཕན་གནང་མཁན་སོག་པོ་ཡོངས་ལ་གྲྭ་ཚང་ནས་ཐུགས་རྗེ་ཆེ་ཞུ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༠།༢༦།ལ།
༄༅། །ས་སྟེང་༸རྒྱལ་བསྟན་ཡོངས་རྫོགས་ཀྱི་མངའ་བདག་༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་ཐམས་ཅད་མཁྱེན་གཟིགས་ཆེན་པོ་མཆོག་ལ་སྒོ་གསུམ་མི་ཕྱེད་དད་དམ་མཆོག་ཏུ་ཡངས་པ་སྨད་རྒྱུད་བྱང་འདྲེན་རྒན་པ་ཏྲེ་ཧོར་སྔགས་རམས་པ་བློ་བཟང་ཆོས་གྲགས་ནས། གྲྭ་ཚང་བརྒྱུད་དེ་ཁོང་གིས་གསོལ་བ་འདེབས་དོན་དུ། མགོན་པོ་མཆོག་ནས་སྤྱི་ལོ་ ༢༠༠༩ ཕྱི་ཟླ་ ༠༣ ཚེས་ ༣༠ ཉིན་ཁོང་གྲྭ་ཚང་གི་བྱང་འདྲེན་གཞོན་པར་བསྐོ་བཞག་གི་བཀའ་ཡིག་སྦུག་དམ་སྦྱར་མ་སྤྱི་བོའི་རྒྱན་དུ་སྩལ་བ་དང། དེའི་རྗེས་སྤྱི་ལོ་ ༢༠༡༧ ཕྱི་ཟླ་ ༠༥ པའི་ནང་ཁོང་སྨད་རྒྱུད་པའི་བྱང་འདྲེན་རྒན་པར་བསྐོ་བཞག་གི་བཀའ་རྟགས་ཕྱག་རྒྱ་རིན་པོ་ཆེ་སྤྱི་ཕེབས་བྱུང་སྟེ། བྱང་འདྲེན་གཞོན་པ་ལོ་ ༠༩ དང་རྒན་པ་ལོ་ ༠༨ འགྲོ་བཞིན་པས་རྒན་གཞོན་གཉིས་བསྡོམས་ལོ་ངོ་ཧྲིལ་པོ་ ༡༧ འགྲོ་བ་དང་། བྱང་འདྲེན་མཆོག་ནས་ལོ་ངོ་བཅུ་དྲུག་རིང་གཙོ་བོར་མགོན་པོ་ཐུགས་རྗེའི་གཏེར་ཆེན་གང་ཉིད་ཀྱི་བཀའ་དགོངས་བསྒྲུབས་ཤིང་༸རྒྱལ་དབང་དགྱེས་པའི་མཆོད་སྤྲིན་དང། དཔལ་ལྡན་སྨད་རྒྱུད་པའི་བསྟན་པར་སྲི་ཞུའི་ཞབས་འདེགས་ཅི་ནུས་བསྒྲུབས་ལགས་ཤིང། མགོན་པོ་མཆོག་གིས་ཐུགས་རྗེའི་གཟིགས་པ་ཆེན་པོས་བྱང་འདྲེན་ནས་དགོངས་ཁྲོལ་སྐྱབས་འཇུག་ཅི་ནས་ཡོང་བ། ཞེས་ཞུ་འདུག་ན་དེ་དོན་ལྷ་དགོངས་སུ་མངའ་བ་ནས་དགོངས་ཁྲོལ་བཀའ་གསལ་སྤྱི་བོའི་རྒྱན་དུ་སྩལ་གནང་མཛད་ཡོད། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༠།༢༣།ལ།
༄༅། །གསང་ཆེན་དཔལ་ལྡན་སྨད་རྒྱུད་པའི་བཞེས་རྒྱུན་ཕྱག་ལེན་ཆོས་ཕྱོགས་ཀྱི་རིམ་པ་སྣེ་མང་ལས་དབྱར་ཆོས་བྱེད་སྒོ་གནས་མཆོག་ཕྱི་མིག་ལུང་གི་ཆོས་ཐོག་སྐབས་ལས་སྣེ་འབྲེལ་ཡོད་རྣམ་པས་དམ་ཅན་སྐུ་མཁར་གྱི་མཆོད་འགྲན་དང་། བསྐང་འཕྲིན་བསྟོད་སྐུལ་མཛད་རྗེས་སྔར་སྲོལ་དབྱངས་ར་ཆེན་མོ་ཉིན་ལྔ་དབུ་འཛུགས་ཞུས། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༠།༡༩།ལ།
