གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༡༧] ཆོས་རྗེ་སྟག་ལུང་བྲག་པ་བློ་གྲོས་རྒྱ་མཚོ། [ བྱང་ཆོས་དང་། དགའ་ལྡན་ཁྲིར་ཕེབས། ]
དཔལ་ལྡན་བློ་གྲོས་མཚུངས་མེད་བང་མཛོད་ནས། །མདོ་རྒྱུད་རྒྱ་མཚོའི་དགོངས་དོན་ཡིད་བཞིན་ནོར། །
ཐར་འདོད་ཡོངས་ལ་ཚུལ་བཞིན་འདོམས་མཛད་པའི། །སྨྲ་བ་ཟླ་མེད་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་ཁྲིར་ཆོས་རྗེ་སྟག་ལུང་བྲག་པ་བློ་གྲོས་རྒྱ་མཚོ་ཕེབས་པ་ཡིན་ཏེ། དམ་པ་འདི་ནི་ཕྱི་ལོ་ ༡༥༤༦ ལོར་སྟག་ལུང་བྲག་ཏུ་སྐུ་འཁྲུངས། སྐྱོར་མོ་ལུང་དུ་རབ་ཏུ་བྱུང་། སྒོ་མང་གུང་རུ་ཆོས་འབྱུང་ལས་གཞུང་བཀའ་ཆེན་རྣམས་གསན། མདོ་རྒྱུད་ལ་མཁས་པར་གྱུར། གསང་ཕུ་ར་བ་སྟོད་དང་སྨད་རྒྱུད་པའི་འཆད་ཉན་པ་མཛད། གཞན་ཡང་སྐྱོར་མོ་ལུང་དང་གསང་སྔགས་མཁར་བྱང་རྩེ་སོགས་ཀྱི་བླ་མར་ཕེབས། བྱང་རྩེ་གྲྭ་ཚང་གསར་དུ་བཙུགས་ཏེ་ཐོས་བསམ་གླིང་དུ་བཏགས། སྐྱོར་མོ་ལུང་གི་བཤད་གྲྭ་རྒྱུན་ཆད་པ་ཡང་རྗེ་འདིས་སྔར་རྒྱུན་ལྟར་སོར་ཆུད་པར་མཛད། བདུན་ཅུ་པ་ཤིང་ཡོས་ ༡༦༡༥ ལ་དགའ་ལྡན་གྱི་ཁྲིར་ཕེབས།
ཆོས་འཁོར་བསྐོར་ཞིང་རྗེ་བླ་མའི་ལམ་རིམ་ཆེ་ཆུང་སོགས་ཀྱི་བརྒྱུད་པར་བཞུགས་པ་གསན་ཡིག་གངྒའི་ཆུ་རྒྱུན་དུ་གསལ་བ་ལྟར་ཡིན། དོན་གསུམ་པ་ས་རྟ་ལ་གཤེགས་པའི་དངུལ་གྱི་མཆོད་རྟེན་བློས་བསླང་གི་གཡོན་ཕྱོགས་སུ་བཞུགས་ཤིང་དུས་མཆོད་ཀྱང་བཟང་ངོ་།། འདིས་གདན་རབས་སོགས་གསུང་རྩོམ་འགའ་ཞིག་ཡོད་འདུག
༡༨] སྤྱིལ་བུ་བ་ངག་དབང་ཆོས་གྲགས།
ངག་གི་དབང་ཕྱུག་སྨྲ་བའི་ཟླ་བ་གང་། །ལུང་རྟོགས་ཆོས་ཀྱི་འོད་དཀར་གྱིས་མཛེས་ཤིང་། །
སྙན་གྲགས་བཟང་པོས་གདུལ་བྱའི་དཔལ་གྱུར་པ། །བཤེས་གཉེན་དག་པའི་ཞབས་ལ་གསོལ་བ་འདེབས། །
ཞེས་གསུངས་པ་ལྟར། སྤྱིལ་བུ་བ་ངག་དབང་ཆོས་གྲགས་སྨད་རྒྱུད་ཀྱི་མཁན་ཁྲིར་ཕེབས། སྔར་སྲོལ་བཞིན་འཆད་ཉན་མཛད། བྱང་རྩེ་དང་ཁྲི་ལ་ཕེབས་པ་མི་གསལ། དེ་བཞིན་འཁྲུངས་ལོ་དང་གཤེགས་ལོ་ནི་མ་རྙེད་དོ།།
༡༩] གསལ་ཁང་ངག་དབང་ཆོས་ཀྱི་རྒྱལ་མཚན། [ བྱང་ཆོས་དང་། དགའ་ལྡན་ཁྲིར་ཕེབས། ]
དཔལ་ལྡན་ངག་གི་དབང་ཕྱུག་མདོ་རྒྱུད་ཀྱི། །བཤད་སྒྲུབ་ཆོས་ཀྱི་རྒྱལ་མཚན་འཛིན་པ་ལ། །
ལྷུན་གྲུབ་འཕྲིན་ལས་བཟང་པོའི་མཛད་པ་ཅན། །འདྲེན་མཆོག་དམ་པའི་ཞབས་ལ་གསོལ་བ་འདེབས། །
ཞེས་གསུངས་པ་ལྟར། གསལ་ཁང་ངག་དབང་ཆོས་ཀྱི་རྒྱལ་མཚན་མཆོག་སྨད་རྒྱུད་པའི་མཁན་ཁྲིར་བྱོན། དམ་པ་འདི་རབ་བྱུང་ ༡༠ ཤིང་ཕག་ཕྱི་ལོ་ ༡༥༧༥ ལོར་འཕན་ཡུལ་མདར་འཁྲུངས། ཁྲི་ལོ་ ༡༩ པ་ངག་དབང་ཆོས་གྲགས་ཀྱི་སྐྱེ་བ་རྗེས་སུ་དྲན་པས་གསལ་ཁང་སྐུ་སྐྱེ་རུ་གྲགས། སྨད་རྒྱུད་པའི་འཆད་ཉན་པ་མཛད་ཐོག་ནས་བྱར་རྩེར་ཕེབས། རྒྱུད་པ་སྦྲེལ་ཏེ་ཆོས་གསུངས། ང་གསུམ་པ་རབ་བྱུང་བཅུ་གཅིག་པའི་མེ་ཡོས་ཕྱི་ལོ་ ༡༦༢༧ ལོར་དགའ་ལྡན་གསེར་ཁྲིར་ཕེབས།
ལོ་ངོ་གསུམ་མཛད་ནས་པཎ་ཆེན་བློ་བཟང་ཆོས་རྒྱན་ལ་བྱང་རྩེ་ཕུལ་ཏེ། རྗེའི་དངུལ་གདུང་རིན་པོ་ཆེའི་གསེར་ཐོག་རྒྱ་བསྐྱེད་པར་གསོལ་བ་བཏབ་པས། ས་སྦྲུལ་ཕྱི་ལོོ་་༡༦༢༩ ལོར་པཎ་ཆེན་རིན་པོ་ཆེས་རྒྱ་ལུགས་ཀྱི་གསེར་ཐོག་ལེགས་པར་གྲུབ་ཅིང་ཆོས་སྦྱིན་ལན་གཅིག་གིས་ཀྱང་ཕན་ཡོན་དཔག་ཏུ་མེད་པ་མདོ་ལས་བཤད་པ་ལྟར་སླར་ཡང་རྗེ་ཉིད་ཀྱིས་འཆད་ཉན་དུ་བཞུགས་སོ། །
འདི་བཻ་སེར་དུ་ཁྲི་ ༡༩ པ་གཤེགས་ནས་འདི་འཁྲུངས་པའི་བར་ལ་ལོ་ ༢༥ སོང་བའི་བར་སྐུ་སྐྱེ་གཞན་བཞེས་སམ་ཞེས་སྡེ་སྲིད་ཀྱིས་དཔྱད་གསུངས། འདིས་པཎ་ཆེན་བློ་བཟང་ཆོས་རྒྱན་ལ་རེ་ཞིག་བྱང་རྩེའི་གོ་ས་ཕུལ་ཏེ་པཎ་ཆེན་གྱིས་ཡངས་པ་ཅན་གྱི་གསེར་གདུང་ཐོག་ཕུབ་པར་མཛད།
༢༠] བསྟན་འཛིན་ལེགས་བཤད། [ བྱང་ཆོས་དང་། དགའ་ལྡན་ཁྲིར་ཕེབས། ]
རྣམ་དཀར་དགེ་ཚོགས་རིང་ནས་གོམས་པའི་ཐུགས། །བསྟན་འཛིན་ཀུན་གྱི་དབུས་ན་མངོན་མཐོ་བ། །
ལེགས་པར་བཤད་པས་འགྲོ་ལ་མཆོག་སྩོལ་བ། །ཡོངས་འཛིན་དགེ་བའི་བཤེས་ལ་གསོལ་བ་འདེབས། །
ཞེས་གསུངས་པ་ལྟར། དེའི་རྗེས་སུ་སེར་སྨད་ཀོང་པོ་བསྟན་འཛིན་ལེགས་བཤད་སྨད་རྒྱུད་པའི་ཁྲིར་བྱོན། དམ་པ་འདི་ཤར་ཀོང་ཡུལ་དུ་སྐུ་འཁྲུངས་ཤིང་། དྭགས་པོ་གྲྭ་ཚང་དང་སེར་སྨད་དང་དཔལ་ལྡན་སྨད་རྒྱུད་སོགས་སུ་མདོ་སྔགས་ཀྱི་སློབ་གཉེར་གནང་། རྒྱུད་པ་དང་བྱང་རྩེ་རིམ་བཞིན་དགའ་ལྡན་ཁྲི་ཐོག་ལོ་བདུན་སོང་བའི་རྗེས་ཀོང་པོ་རྣམས་དགའ་ལྡན་དུ་གང་མོས་ལས། འདི་ཐོབ་ཅེས་ངེས་ཅན་མེད་པར་བརྟེན། ཁྲི་པ་འདི་ཤར་རྩེ་ཐུན་མོང་བ་ཡིན་པས་འདིའི་རྗེས་ཤར་པའི་ཁྲི་འཛིན་ངེས་ཅན་མི་དགོས་སོ། །
ཞེས་སྣ་ཚོགས་པར་དཔགས། ཤར་པ་རྣམས་ཀྱིས་དམག་ཆས་ཏེ་འཚངས་པའི་ཁྲི་བཙན་འཕྲོགས་པ་དང་། ཁྲི་པ་རང་ཡང་བྲོས་སྟབས་ཀྱིས་ཁམས་དཔལ་འབར་དུ་ཕེབས་ཏེ་རིང་པོར་མི་ཐོག་པར་དེར་གཤེགས། འདི་ཡན་རྩེ་ཤར་རེས་མོས་ལས་ལོ་གྲངས་སོགས་ངེས་ཅན་མེད་པར་འདི་ནས་གཙང་པས་ཁྲིམས་བཅད་པས་ཁྲི་ལོ་ངེས་ཅན་སྲོལ་ཚུགས་སོ། །
༢༡] དྭགས་པོ་བསྟན་པ་རྒྱལ་མཚན་ནམ་ཆོས་རྒྱལ་བཀྲ་ཤིས། [ བྱང་ཆོས་དང་། དགའ་ལྡན་ཁྲིར་ཕེབས།
རྒྱལ་བ་གཉིས་པའི་ལུང་རྟོགས་དམ་ཆོས་ཀྱིས། །བསྟན་པའི་རྒྱན་མཚན་འཛིན་ལ་ཟླ་བྲལ་བ། །
ས་གསུམ་འགྲོ་བའི་བླ་མ་ཆོས་ཀྱི་རྗེ། །གདུལ་བྱའི་བློ་མུན་སེལ་ལ་ཕྱག་འཚལ་ལོ། །
ཞེས་གསུངས་པ་ལྟར། དྭགས་པོ་བསྟན་པ་རྒྱལ་མཚན་ནམ་ཆོས་རྒྱལ་བཀྲིས་འདི་པ་སྨད་རྒྱུད་པའི་ཁྲིར་བྱོན། དམ་པ་འདི་དྭགས་ཡུལ་གྲོང་མདར་སྐུ་འཁྲུངས། དྭགས་པོ་གྲ་ཚང་དུ་མདོ་ཡི་གཞུང་ལུགས་དང་སྨད་རྒྱུད་དུ་ཞུགས་ཏེ་གསང་སྔགས་རྡོ་རྗེ་རྣལ་འབྱོར་ལ་བྱང་ཞིང་ཆུབ་པར་མཛད། དེ་ནས་བྱང་རྩེའི་ཁྲི་དང་། དེའི་རྗེས་སུ་དགའ་ལྡན་གསེར་ཁྲིར་ཕེབས། ཆོས་འཁོར་བསྐོར་ཅིང་ཁྲི་ཐོག་མཛད་མུས་སུ་གཤེགས་གསུངས།
འདི་རྒྱུད་པའི་བརྒྱུད་རིམ་དུ་དྭགས་པོ་ཆོས་རྒྱལ་བཀྲིས་འཁོད་འདུག །གོང་འོག་བསྒྲིགས་ནས་མཚན་མི་འདྲ་བ་གཉིས་ཡོད་པ་མིན་ནམ་སྙམ།
༢༢] མངའ་རིས་པ་དཔལ་ལྡན་རྒྱལ་མཚན། [ བྱང་ཆོས་དང་། དགའ་ལྡན་ཁྲིར་ཕེབས། ]
དཔལ་ལྡན་གསང་ཆེན་ཐེག་མཆོག་སུམ་རྩེན་དུ། །འགོས་ལུགས་འདུས་པའི་ལས་སློབ་རྒྱལ་མཚན་ཆེ། །
ལེགས་འཛིན་མར་ལོའི་ཟབ་དོན་རྫ་རྔ་ཆེ། །ཅིག་ཅར་སྒྲོག་མཁས་བཤེས་གཉེན་ཞབས་ལ་འདུད། །
ཅེས་འབྱུང་བ་ལྟར། དེའི་རྗེས་སུ་མངའ་རིས་པ་དཔལ་ལྡན་རྒྱལ་མཚན་སྨད་རྒྱུད་པའི་ཁྲིར་ཕེབས་ཏེ། དམ་པ་འདི་ནི་སྟོད་མངའ་རིས་སྤི་ཏི་གྲང་མཁར་དུ་སྐུ་འཁྲུངས། སྔོན་གྱི་བག་ཆགས་བཟང་པོས་བསྟན་པའི་འབྱུང་ཁུངས་དབུས་སུ་ཕེབས། ཆོས་འཁོར་རྒྱལ་གྱི་གྲྭ་ཚང་ལྔའི་ནང་ཚན་མཁས་མང་འདུ་བའི་མཚོ་ཆེན་མངའ་རིས་གྲྭ་ཚང་ དང་། སྨད་རྒྱུད་དུ་མདོ་སྔགས་ཀྱི་ཐུགས་གཉེར་མཛད། ནམ་ཞིག་ན་སྨད་རྒྱུད་ཀྱི་ཁྲིར་བྱོན་ནས་འཆད་ཉན་དང་བྱང་རྩེའི་ཁྲིར་ཕེབས།
དེའི་རྗེས་སུ་དགའ་ལྡན་གསེར་གྱི་ཁྲི་ལ་ཕེབས་ཏེ་ལོ་བདུན་རིང་ཆོས་ཀྱི་འཁོར་ལོ་བསྐོར་རྗེས། མངོན་དགར་ཟུར་བཞུགས་མཛད་ནས་རྭ་སྒྲེང་དང་། གསང་སྔགས་མཁར། གསལ་ཁང་ཞོག་དགུང་སྔོན་རྣམས་ཞལ་འཛིན་གནང་། མཐར་དགུང་ལོ་དོན་གསུམ་པར་སྐུ་ཞི་བར་གཤེགས། དངུལ་གྱི་མཆོད་རྟེན་བདེ་གཤེགས་ལྷ་ཁང་གི་བྱང་དུ་བཞུགས། འདི་ཡི་ཡང་སྲིད་ལ་མོ་ས་ཁུལ་དུ་བྱུང་བར་གྲགས་སོ། །
མདོ་རྒྱུད་དམ་པའི་ཆོས་ཚུལ་མ་ལུས་པ། །ཇི་བཞིན་རྟོགས་ནས་གཞན་ལ་འདོམས་པ་ལ། །
ཕྱོགས་ལས་རྣམ་པར་རྒྱལ་བའི་དཔལ་མངའ་བ། །འདྲེན་མཆོག་དམ་པའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་མཁན་ཁྲིར་འཕན་པོ་དམ་ཆོས་རྣམ་རྒྱལ་མཆོག་བྱོན་ནས་འཆད་ཉན་སྔར་སྲོལ་ལྟར་མཛད་ནས་མཐར་གཤེགས། བྱང་རྩེ་དང་གསེར་ཁྲིར་ཕེབས་པ་མི་གསལ།
༢༤] དེ་ནས་བརྒྱུད་འདེབས་ལས། [ བྱང་ཆོས་དང་། དགའ་ལྡན་ཁྲིར་ཕེབས། ]
རིན་ཆེན་ལྟ་བུའི་བློ་གསལ་གདུལ་བྱ་ལ། །ལམ་བཟང་རྡོ་རྗེ་ཐེག་པ་ལེགས་བསྟན་ནས། །
དལ་འབྱོར་དོན་ཡོད་སྒྲུབ་མཛད་དགེ་བའི་བཤེས། །དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་ཁྲིར་ཞོག་པ་བློ་བཟང་དོན་ཡོད་བྱོན་པ་ཡིན་ཏེ། དམ་པ་འདི་ནི་རབ་བྱུང་བཅུ་པའི་ཆུ་སྟག་ཕྱི་ལོ་ ༡༦༠༢ ལོར་འཕན་ཡུལ་ཞོག་གུམ་ཕུ་རུ་སྐུ་འཁྲུངས། སེར་བྱེས་དང་སྨད་རྒྱུད་དུ་མདོ་སྔགས་ཀྱི་ཐུགས་གཉེར་མཛད། སྨད་རྒྱུད་ཀྱི་ཁྲི་དང་བྱང་རྩེའི་ཁྲིར་ཕེབས། ཕྱི་ལོ་ ༡༦༦༨ ལོར་གསེར་ཁྲིའི་སྟེང་དུ་ཕེབས། ལོ་བདུན་གྱི་བར་ཆོས་འཁོར་བསྐོར། འདི་ཀློང་རྡོལ་ཁྲི་རབས་སུ་ཁྲི་རྣམ་དག་རྡོ་རྗེ་ཡང་གསུངས།
ར་སྒྲེང་དང་རིན་གླིང་སོགས་ཀྱི་གདན་ས་པ་མཛད། དགུང་ལོ་དོན་བདུན་པ་རབ་བྱུང་བཅུ་གཅིག་ས་ཕོ་རྟ་ཕྱི་ལོ་ ༡༦༧༨ ལོར་དག་ཞིང་དུ་གཤེགས་པའི་དངུལ་གདུང་བྱང་ཆུབ་མཆོད་རྟེན་བདེ་གཤེགས་ལྷ་ཁང་དུ་བཞུགས་གསུངས།
༢༥] མངའ་རིས་པ་བློ་བཟང་རྣམ་རྒྱལ།
དེའི་རྗེས་སུ། བཻ་སེར་དུ་གསལ་བ་ལྟར། མངའ་རིས་པ་བློ་བཟང་རྣམ་རྒྱལ་སྨད་རྒྱུད་པའི་གདན་རབས་སུ་བཀོད་སྣང་ཡང་། བརྒྱུད་འདེབས་སུ་མི་གསལ་བས་འཆད་ཉན་ཀྱི་ལོ་དུས་མ་ཚང་བར་གཤེགས་སམ་སྙམ། མཁན་པོའི་འཆད་ཉན་མཛད་ཁོམ་མ་བྱུང་བ་རྣམས་བརྒྱུད་འདེབས་ནང་བཅུག་སྲོལ་མི་འདུག་གོ །
མར་འགོས་གསུང་ངག་ཆད་མེད་བཤད་སྲོལ་རྒྱུན། །དབང་ཕྱུག་བརྒྱད་ལྡན་བློ་བཟང་གྲགས་པ་ཡི། །
བཞེད་གཞུང་ནོར་བུའི་བང་མཛོད་སྒོ་ཕྱེ་ནས། །གདུལ་བྱའི་རེ་བ་སྐོང་ལ་གསོལ་བ་འདེབས། །
ཞེས་པ་ལྟར། དེའི་རྗེས་སུ་སྨད་རྒྱུད་པའི་ཁྲིར་ཞོག་མདའ་པ་རྒྱུད་ཆེན་དཔོན་སློབ་ངག་དབང་ནོར་བུ་ཕེབས་པ་ཡིན་ཏེ། འདི་ཡང་རྒྱུད་འགྲེལ་གྱི་འཆད་ཉན་སྔར་སྲོལ་བཞིན་མཛད། མཐར་ཞི་བར་གཤེགས། བྱང་རྩེ་དང་གསེར་ཁྲིར་ཕེབས་པ་ མི་གསལ།
༢༧] གསང་ཡིབ་པ་ཤེས་རབ་རྒྱལ་མཚན་ནམ་ཀྲེ་བོ་ཤེས་རབ་རྒྱལ་མཚན།
བཻ་སེར་དང་འཇིགས་བྱེད་ཆོས་འབྱུང་གཉིས་སུ་སྨད་རྒྱུད་པའི་གདན་རབས་སུ་གསང་ཡིབ་པ་ཤེས་རབ་རྒྱལ་མཚན་ནམ་ཀྲེ་བོ་ཤེས་རབ་རྒྱལ་མཚན་ཞེས་བཀོད་སྣང་ཡང་བརྒྱུད་འདེབས་ནང་མི་གསལ་བས་འཆད་ཉན་ལོ་དུས་མ་རྫོགས་པ་ཞིག་བྱུང་བ་ཡིན་ནམ་དཔྱད།
༢༨] དེ་ནས་བརྒྱུད་འདེབས་ལས། [ བྱང་ཆོས་དང་། དགའ་ལྡན་ཁྲིར་ཕེབས། ]
ངག་གི་དབང་ཕྱུག་བློ་གྲོས་བྱེ་བའི་གཏེར། །བཤེས་གཉེན་དམ་པའི་ཞབས་ལ་གསོལ་བ་འདེབས། །
རྡོ་རྗེའི་ཁྲི་ལ་བསྐལ་པ་རྒྱ་མཚོ་རུ། །ལེགས་བཞུགས་གདུལ་བྱའི་རེ་བ་ཡོངས་སྐོང་ཤོག །
ཅེས་འབྱུང་བ་ལས། དེའི་རྗེས་སུ་སྨད་རྒྱུད་པའི་མཁན་ཁྲིར་ཆོས་རྗེ་བློ་གྲོས་རྒྱ་མཚོ་ཕེབས་པ་སྟེ། དམ་པ་འདི་ནི་སྐུ་འབུམ་གྱི་མཆོད་གཞི་ཁམས་མི་ཉག་ཏུ་རབ་བྱུང་བཅུ་གཅིག་ཤིང་ཕག ཕྱི་ལོ་ ༡༦༣༥ ལོར་སྐུ་འཁྲུངས། དབུས་སུ་བྱོན་ཏེ་སྒོ་མང་ཀླུ་འབུམ་དང་སྨད་རྒྱུད་དུ་རིམ་བཞིན་ཞུགས་ཏེ་མདོ་སྔགས་ཀྱི་ཐུགས་གཉེར་གནང་། སྒོ་མང་གྲྭ་ཚང་དང་སྨད་རྒྱུད་པའི་མཁན་ཁྲི་དག་ཏུ་ཕེབས། པཎ་ཆེན་ཆོས་རྒྱན་གྱི་དངོས་སློབ་ཡིན་པས་པཎ་ཆེན་གྱི་གསུང་བདེ་མཆོག་དང་འཇིགས་བྱེད་ཀྱི་བསྐྱེད་རིམ་གཉིས་བརྩི་བཞག་སྐྱོར་སྲོལ་འདི་ནས་བཙུགས། དེ་ནས་བྱང་རྩེའི་ཁྲི་ལ་ཕེབས་ཤིང་རྡོ་རྗེ་ཕྲེང་བའི་དབང་ཡང་བསྐུར།
རབ་བྱུང་བཅུ་གཅིག་ཆུ་ཁྱི་ཕྱི་ལོ་ ༡༦༨༢ ལོར་དགུང་གྲངས་ཞེ་བརྒྱད་ཐོག་གསེར་ཁྲིར་བྱོན། ཁྲི་རྒྱ་ནག་པ་བློ་གྲོས་རྒྱ་མཚོ་ཞེས་མཚན་སྙན་ཆེ་བའི་ཚད་དུ་བྱས། ལོ་བཞིའི་རིང་དགའ་ལྡན་འདུ་ཁང་ཆེན་པོའི་ཨར་རྒྱ་ཆེ་བ་སོགས་བྱ་བ་ལས་ཀྱི་འཁོར་ལོས་གདན་ས་ཆེན་པོའི་ཕན་བདེ་རྩ་ལག་དམ་པར་གྱུར། རྒྱ་སོག་གི་གཞུང་སྒྲིག་ཏུ་བསྐྱོད་པར་ཕྱིར་ལམ་དུ་གཤེགས་པའི་གདུང་རུས་སོགས་ནང་རྟེན་དུ་བཞུགས་པའི་དངུལ་གྱི་སྒོ་མང་མཆོད་རྟེན་བདེ་གཤེགས་ལྷ་ཁང་དུ་བཞུགས། དེའི་ཡང་སྲིད་མཚོ་ཁར་བྱུང་བར་གྲགས་ཞེས་གསུངས།