གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༢༩] བསམ་བློ་སྦྱིན་པ་རྒྱ་མཚོ། [ བྱང་ཆོས་དང་། དགའ་ལྡན་ཁྲིར་ཕེབས། ]
སྦྱིན་སོགས་ཕྱིན་དྲུག་སྤྱོད་པ་རྒྱ་མཚོ་ཆེར། །ཉེར་གོམས་བཤེས་གཉེན་དམ་པར་གསོལ་བཏབ་པས། །
ཚེ་མཐའ་ཡས་པའི་མགོན་པོ་ལྟར་བཞུགས་ནས། །ཆོས་འཁོར་རྒྱུད་ཆད་མེད་པར་ཡོངས་བསྐོར་ཤོག །
ཅེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་མཁན་ཁྲིར་ཁྱབ་བདག་བཀའ་འགྱུར་བ་འབྲས་བསམ་བློ་སྦྱིན་པ་རྒྱ་མཚོ་མཆོག་བྱོན་པ་ཡིན་ཏེ། དམ་པ་འདི་ནི་བྱང་ངོས་སུ་སྦྲུལ་ལོར་སྐུ་འཁྲུངས།
གཞོན་ནུའི་དུས་ནས་རབ་ཏུ་བྱུང་སྟེ་དབུས་སུ་བྱོན་ནས་འབྲས་སྤུངས་སྒོ་མང་དང་སྨད་རྒྱུད་གྲྭ་ཚང་བཅས་སུ་མདོ་སྔགས་ཀྱི་གཞུང་ཆེན་རྣམས་ལ་ཐུགས་གཉེར་གནང་སྟེ་གཞུང་ལུགས་རབ་འབྱམས་ལ་མཁས་པར་གྱུར། བཀའ་འགྱུར་གྱི་ལུང་སོགས་གནང་བར་གདུལ་བྱར་ཕན་ཐོགས་རྒྱ་ཆེར་བྱུང་བས་སྐབས་དེ་ཙམ་ན་གསན་རྒྱ་ཆེ་བའི་ཚད་དུ་བྱས། དེ་ནས་སྨད་རྒྱུད་ཀྱི་མཁན་ཁྲིར་ཕེབས་ཏེ་འཆད་ཉན་རྒྱུན་ཆད་མེད་པར་མཛད། དེ་ནས་བྱང་རྩེའི་ཁྲི་ལ་ཕེབས་རྗེས་འཇམ་མགོན་རྒྱལ་བའི་རྒྱལ་ཚབ་དགའ་ལྡན་གསེར་ཁྲིར་ཕེབས་ནས་ཁྲི་ལོ་གསུམ་བསྐྱངས་ནས། རབ་བྱུང་ ༡༢ པ་ཆུ་སྤྲེལ་ཕྱི་ལོ་ ༡༦༩༢ ལོར་གློ་བུར་དུ་དགོངས་པ་གཤེགས་གསུངས།
དཔལ་ལྡན་བློ་གྲོས་མཚུངས་མེད་མདོ་རྒྱུད་ལ། །དབང་འབྱོར་ཆོས་ཀྱི་རྒྱལ་མཚན་འཛིན་པའི་དཔལ། །
ཡུན་རིང་འཚོ་ཞིང་བཞེས་པར་གསོལ་བཏབ་པས། །བསྐལ་བརྒྱའི་བར་དུ་ཆོས་འཁོར་བསྐོར་དུ་གསོལ། །
ཞེས་འབྱུང་བ་ལྟར། དེའི་རྗེས་སུ་གོང་གི་མཁན་ཁྲི་འབྲས་བསམ་བློ་སྦྱིན་པ་རྒྱ་མཚོ་དང་། འོག་གི་མཁན་ཐོག་འབྲས་ཧར་གདོང་དོན་གྲུབ་རྒྱ་མཚོ་གཉིས་ཀྱི་བར་དུ། མཁན་ཐོག་གཅིག་བྱུང་བའི་གོང་འཁོད་ལྟར་བརྒྱུད་འདེབས་ཡོད་འདུག་ཀྱང་། མཚན་སྒྲ་མི་གསལ་བས་མཐའ་ཆོད་པར་བྲི་མ་ཤེས།
༣༡] ཧར་གདོང་དོན་གྲུབ་རྒྱ་མཚོ། [ བྱང་ཆོས་དང་། དགའ་ལྡན་ཁྲིར་ཕེབས། ]
དགེ་འདུན་མི་ཕྱེད་སྡེ་ཚོགས་རབ་དཔའ་བ། །འཇིགས་མེད་སེངྒེའི་ང་རོས་ལུང་གསུམ་ཀུན། །
ཉེར་དགོངས་དོན་གྲུབ་རྒྱ་མཚོ་མཁས་པའི་སྒྲས། །ས་གསུམ་ཀུན་ཏུ་ཁྱབ་ལ་ཕྱག་འཚལ་ལོ། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་མཁན་ཁྲིར་འབྲས་ཧར་གདོང་དོན་གྲུབ་རྒྱ་མཚོ་བྱོན་པ་ཡིན་ཏེ། འདི་ཀྲེ་ནག་ཚང་དུ་འཁྲུངས་ཏེ་འབྲས་སྤུངས་ཧར་གདོང་དང་རྒྱུད་སྨད་ལ་ཞུགས་ཏེ་མདོ་སྔགས་ལ་གསན་སྦྱོང་རྒྱ་ཆེར་མཛད། དེ་ནས་སྨད་རྒྱུད་པའི་མཁན་ཁྲིར་ཕེབས་ཏེ་འཆད་ཉན་རྣམས་ལེགས་པར་མཛད། དེའི་རྗེས་བྱང་རྩེའི་ཁྲིར་ལ་ཕེབས། རབ་བྱུང་ ༡༢ པ་ལྕགས་སྦྲུལ་ཕྱི་ལོ་ ༡༧༠༡ ལོར་དགའ་ལྡན་གསེར་ཁྲིར་ཕེབས།
རབ་བྱུར་ ༡༢ ལྕགས་སྦྲུལ་ལོར་ཁོང་དགུང་ལོ་ ༦༠ སྟེང་ནས་ལོ་དྲུག་ཁྲི་བ་བསྐྱངས་པར་བཤད། ཀྲེ་ནག་དོན་ཡོད་རྒྱ་མཚོ་ཞེས་འགའ་ཞིག་ལས་བཤད། འདི་ཁྲི་ཆེན་ཡོངས་འཛིན་གླིང་ཚང་གི་སྐུ་རབས་ལ་བགྲང་སྣང་།
༣༢] ཞྭ་ཁྲ་དགེ་འདུན་ཕུན་ཚོགས། [ བྱང་ཆོས་དང་། དགའ་ལྡན་ཁྲིར་ཕེབས། ]
འཇིགས་མཛད་བདེ་གསང་འཛིན་པའིདགེ་འདུན་གཙོ། །རྒྱུད་རྒྱལ་མཐའ་དྲུག་སྦྲང་རྩིའི་ཕུན་ཚོགས་ཀྱིས། །
ཚིམ་པའི་རིམ་གཉིས་དྲུག་ལྡན་བསྟོད་པའི་དབྱངས། །རྒྱ་མཚོའི་གོས་ཅན་ཁྱབ་མཛད་ཕྱག་འཚལ་ལོ། །
ཞེས་འབྱུང་བ་ལྟར། སྨད་རྒྱུད་པའི་ཁྲི་ལ་ཨ་མདོ་ཞྭ་ཁྲ་དགེ་འདུན་ཕུན་ཚོགས་ཕེབས་པ་ཡིན་ཏེ། དམ་པ་འདི་མདོ་སྨད་མངའ་ཁུལ་དུ་སྐུ་བལྟམས། གཞོན་ནུ་ཉིད་ནས་རབ་ཏུ་བྱུང་སྟེ་དབུས་སུ་བྱོན་ནས་འབྲས་སྤུངས་དང་རྒྱུད་སྨད་དུ་མདོ་སྔགས་རབ་འབྱམས་ལ་གསན་སྦྱོང་མཛད་དེ་སྨད་རྒྱུད་པའི་མཁན་ཁྲིར་ཕེབས། དམ་པ་འདི་སྨད་རྒྱུད་དུ་བདེ་མཆོག་གི་སྒྲུབ་དཀྱིལ་ཚོགས་འདོན་དུ་འཛུགས་རྒྱུའི་ཆ་རྐྱེན་རྒྱལ་པོ་ལྷ་བཟང་དང་སོག་པོ་ཇུན་གར་གང་རིགས་ལ་ཞུས་ནས་བདེ་ཆེན་གཞིས་ཀ་བདེ་མཆོག་གི་ཐེབས་རྩར་འཇོག་དགོས་པའི་ཞལ་ཏ་གནང་སྟེ། འདིའི་མཁན་ཐོག་གཅིག་གི་རྗེས་མཁན་ཆེན་ངག་དབང་མཆོག་ལྡན་སྐབས་དངོས་སུ་བཙུགས།
བྱང་རྩེའི་ཁྲི་ལ་ཕེབས་རྗེས་རབ་བྱུང་ ༡༢ ཆུ་འབྲུག་ཕྱི་ལོ་ ༡༧༡༢ ལ་དགའ་ལྡན་གསེར་ཁྲིར་འཁོད་ཅིང་། རྗེའི་དངུལ་གདུང་ཆེན་མོ་གསེར་གདུང་དུ་བསྒྱུར་བའི་ཞལ་ཏ་མཛད་ནས་བསྒྲུབས་ཤིང་འདས་ནས་སྐུ་གདུང་གི་ཆ་ལ་རྗེའི་སྐུ་དང་རྣམ་བཅུ་དབང་ལྡན་སོགས་བྱོན་ནོ་གསུངས། འདིའི་ཡང་སྲིད་གུང་ཐང་བསྟན་པའི་སྒྲོན་མེ་ཞེས་དགེ་ལྡན་བསྟན་པའི་སྲོག་ཤིང་ཆེན་པོ་འདི་བྱུང་། རབ་བྱུང་ ༡༢ ཤིང་རྟ་ལོར་ཁྲིར་ཕེབས་ནས་ལྕགས་བྱིའི་བར་ལོ་བདུན་རིང་ཁྲི་ལོ་བསྐྱངས་པར་བཤད།
༣༣] ཁྲི་ཆེན་དགེ་འདུན་ཕུན་ཚོགས། [ བྱང་ཆོས་དང་། དགའ་ལྡན་ཁྲིར་ཕེབས། ]
ངག་གི་དབང་ཕྱུག་བློ་བཟང་རྒྱལ་བའི་བསྟན། །འཛིན་པའི་འདུས་སྡེ་མགོན་གྱུར་ཚེ་ཡི་དཔལ། །
འགྱུར་མེད་བདེ་ཆེན་ཞིང་གི་མགོན་པོ་ལྟར། །ཡོངས་འཕེལ་བཤེས་གཉེན་དམ་པར་གསོལ་བ་འདེབས། །
ཞེས་འབྱུང་བ་ལྟར། ཁྲི་ཆེན་དགེ་འདུན་ཕུན་ཚོགས་ཀྱི་རྗེས་སུ་སྨད་རྒྱུད་པའི་ཁྲིར་དྭགས་པོ་ངག་དབང་ཚེ་འཕེལ་ཕེབས་པ་ཡིན་ཏེ། ང་གཉིས་པ་ངག་དབང་ཚེ་འཕེལ་མཆོག་ནི་དྭགས་པོ་ཕྱོགས་སུ་སྐུ་འཁྲུང་ས་ཤིང་དྭགས་པོ་བཤད་སྒྲུབ་གླིང་དུ་རབ་ཏུ་བྱུང་སྟེ་བཀའ་ཆེན་རྣམས་ལ་གསན་སྦྱོང་མཛད་རྗེས་སྐྱིད་ཤོད་དུ་བྱོན་ནས། སྨད་རྒྱུད་དུ་ཕེབས་ནས་སྔགས་གཞུང་ལ་གསན་སྦྱོང་ལེགས་པར་མཛད་པ་མ་ཟད། སྨད་རྒྱུད་པའི་མཁན་ཁྲིར་ཕེབས། དེ་ནས་བྱང་རྩེ་ཆོས་རྗེའི་གོ་སར་ཕེབས་རྗེས་རབ་བྱུང་ ༡༢ པའི་ཤིང་སྦྲུལ་དང་ཕྱི་ལོ་ ༡༧༢༥ ལོར་དགའ་ལྡན་གསེར་ཁྲིར་ཕེབས། རབ་བྱུང་ ༡༢ པའི་ས་སྤྲེལ་ནས་ལྕགས་ཕག་བར་ཁྲི་ལོ་ལོ་བཞི་བསྐྱངས་པར་བཤད།
༣༤] ཆོས་རྗེ་ངག་དབང་མཆོག་ལྡན། [ བྱང་ཆོས་དང་། དགའ་ལྡན་ཁྲིར་ཕེབས། ]
ངག་གི་དབང་ཕྱུག་རྒྱལ་བ་ཙོང་ཁ་པའི། །གསུང་རབ་དགོངས་དོན་འཆད་ལ་མཁས་པའི་མཆོག །
གསུམ་ལྡན་ངུར་སྨྲིག་གར་གྱི་རྣམ་པར་མཛེས། །ཐེག་མཆོག་དགེ་བའི་བཤེས་ལ་ཕྱག་འཚལ་ལོ། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་ཁྲིར་ཆོས་རྗེ་ངག་དབང་མཆོག་ལྡན་ཞེས་མཚན་སྙན་ཆེ་བའི་སྐྱེ་མཆོག་འདི་ཕེབས་པ་སྟེ། དམ་པ་འདི་ནི་རབ་བྱུང་ ༡༡ པ་མེ་སྦྲུལ་དང་ཕྱི་ལོ་ ༡༦༧༧ ལོར་ཨ་མདོ་བྱ་ཁྱུང་དགོན་གྱི་ལྷ་སྡེའི་ཁྲོད་དུ་སྐུ་འཁྲུངས། བྱ་ཁྱུང་དུ་རབ་ཏུ་བྱུང་ཞིང་སྦྱངས་པ་ཅུང་ཟད་མཛད་རྗེས་དབུས་སུ་བྱོན་ནས་སེ་རར་ཞུགས་ཏེ་བསམ་བློ་ཁང་ཚན་དུ་བཞུགས་ནས་མདོ་ཕྱོགས་ཀྱི་སློབ་གཉེར་ལེགས་པར་མཛད་ཅིང་། དེ་ནས་རྒྱུད་སྨད་དུ་ཞུགས་ནས་མདོ་སྔགས་གཉིས་ཀར་མཁས་པའི་གྲགས་པ་ཐོབ།
མངའ་རིས་གསེར་ཁྲིར་བྱོན། དེ་ནས་སླར་ཡང་དབུས་སུ་བྱོན་ནས་སྨད་རྒྱུད་ཀྱི་མཁན་ཁྲིར་ཕེབས། མེ་ཕག་ནས་མེ་སྤྲེལ་བར་ལོ་བཅུའི་རིང་སྨད་རྒྱུད་པའི་མཁན་པོ་མཛད། དམ་པ་འདིས་གྲྭ་ཚང་གི་ཆོས་ཐོག་ཕེབས་ཡུལ་ཕྱི་མིག་ལུང་གི་གནས་བདག་དམ་ཅན་རྡོ་རྗེ་ལེགས་པ་དམ་ལ་བཞག་ནས་གྲྭ་ཚང་འདིའི་སྲུང་མར་བཀའ་བསྒོས། རབ་གནས་ཀྱི་ཚེ་འཐོར་འབྲུ་དམ་ཅན་ལྡེབས་རིས་ཀྱི་དཔྲལ་བར་དངོས་སུ་ཟུག་པ་ཡོད་ཅེས་རྒྱུད་ཆེན་ཚོའི་གསུང་རྒྱུན་སྣང་། གཙང་སྲད་རྒྱུད་དུ་བདེ་མཆོག་སྒྲུབ་མཆོད་ཀྱི་ཕྱག་ལེན་སྦྱང་དུ་རྒྱུད་གྲྭ་མང་ཙམ་བཏང་ནས་འདིའི་སྐུ་རིང་ལ་གྲྭ་ཚང་དུ་བདེ་མཆོག་སྒྲུབ་མཆོད་གསར་དུ་བཙུགས་གནང་།
བྱུང་བ་འདི་ལས་ཨ་ཁུ་ཤེས་རབ་རྒྱ་མཚོའི་བདེ་མཆོག་བསྐྱེད་རིམ་གྲྭ་ཚང་གི་ཕྱག་དཔེ་པར་མ་ཤོག་གྲངས་ ༤༥ མདུན་ཕྲེང་ ༢ པར་དབུས་ཀྱི་སྨད་རྒྱུད་དུ་བདེ་མཆོག་ཕྱིས་སུ་ཚུགས་པས། འདིའི་རྒྱུད་པའི་འདོན་རྒྱུན་ལ་མཆོད་ཡུལ་དང་། ཞེས་སོགས་ཚོགས་ཞིང་མཇུག་ཏུ་ཡར་སྦྱར་ནས། རང་གི་སྤྱི་བོར་ཧེ་དཀར་པོ་ཞེས་དབུ་བསྐུལ་པ་ལྟར་ན་གོང་གི་མཆོད་པའི་འཁོར་གསུམ་པོ་མི་དམིགས་པར་རྒྱས་བཏབ་ནས་བཞག་པ་ལྟར་འགྱུར་ཡང་། དོན་ལ་མཆོད་པའི་འཁོར་གསུམ་གྱིས་མཚོན་པའི་ཆོས་ཐམས་ཅན་རྟོག་པས་ཕར་བཏགས་ཙམ་དུ་གྲུབ་པའི་རྟེན་འབྱུང་བསྒོམ་པ། འཇིགས་བྱེད་ཀྱི་ཆོ་གར་ཆོས་ཐམས་ཅད་བརྟེན་ནས་བཏགས་པ་ཡིན་པའི་ཕྱིར། ཞེས་སོགས་དང་འདྲ་བར་ཆོས་སྐུའི་ལམ་འཁྱེར་མར་སྦྱར་དགོས་པས་དབུ་བསྐུལ་མཚམས་ཀྱང་མཆོད་ཡུལ་དང་། ཞེས་སོགས་ནས་བྱས་ན་ལེགས་སོ། །ཞེས་པ་དང་། ཡང་ཤོག་གྲངས ༧༢ པའི་ཕྲེང་ ༤ པར་འདི་ལ་གསང་འདུས་ལྟར་ས་བཅད་མ་སྟོང་ཙམ་དུ་ཅུང་ཟད་སྡོད་དགོས་ཀྱང་བདེ་མཆོག་སྨད་རྒྱུད་པར་ཚུགས་ཡུན་རིང་བས་དེ་འདྲ་མི་འདུག་གོ །ཞེས་པའི་དོགས་གཅོད་ཀྱང་བཀོད་སྣང་ངོ་། །
དེ་ལྟར་འཕྲོས་དོན་ཙམ་བཀོད་ནས་དཀྱུས་ལ་འཇུག་པ་ནི། དེ་ནས་བྱང་རྩེའི་ཁྲི་ལ་ཕེབས་རྗེས་རབ་བྱུང་ ༡༢ ས་ལུག་ཕྱི་ལོ་ ༡༧༣༩ ལོར་དགའ་ལྡན་གསེར་ཁྲིར་འཁོད། ཟུར་ནས་༧རྒྱལ་དབང་བདུན་པ་ཆེན་པོ་བསྐལ་བཟང་རྒྱ་མཚོ་དང་ལྕང་སྐྱ་སྤྲུལ་སྐུ་བསྟན་པའི་སྒྲོན་མེ་སོགས་ཀྱི་དབུ་བླ་མཛད། སྔར་མངའ་རིས་སུ་བཞུགས་སྐབས་རྡོ་ལ་ཞབས་རྗེས་བཞག་པ་དང་ཕྱིས་སུ་དུག་དྲངས་པ་སྔགས་མཐུས་ཕབས་པ་སོགས་གྲུབ་རྟགས་མང་ངུ་བསྟན་ཅིང་། བྱ་ཁྱུང་དགོན་དུ་གསེར་གྱི་རྒྱ་ཕིབས་གནང་བ་སོགས་བསྟན་འགྲོའི་དོན་རྒྱ་ཆེན་མཛད་བཞིན་དུ་བྱང་རྭ་སྒྲེང་དུ་ཕེབས་ནས་ཐུགས་ཕབ་ནས་བཞུགས། སྐབས་དེར་ངའི་ཞབས་རིམ་པ་རྒྱུད་སྨད་པ་ནས་གདན་དྲང་དགོས་གསུངས་པས། དུས་ཕྱིས་ཀྱང་ལོ་རེ་བཞིན་དུ་སྨད་རྒྱུད་གྲྭ་ཚང་ནས་རྭ་སྒྲེང་ལ་ཞབས་རིམ་པ་ཕེབས་སྲོལ་ཆགས་འདུག །
རྗེ་འདི་འཁྲུངས་གཤེགས་ལ་ལོ་ཚིགས་མི་མཐུན་པ་འགའ་ཞིག་སྣང་སྟེ། སོག་པོ་ཆ་ཧར་དགེ་བཤེས་ཀྱི་རྒྱལ་མཆོག་བདུན་པ་ཆེན་པོའི་རྣམ་ཐར་ཆེན་མོ་དང་། ལྕང་སྐྱ་རོལ་པའི་རྡོ་རྗེའི་རྣམ་ཐར་ཁུངས་བྱས་ནས་ཁྲི་ཆེན་དགུང་ལོ་དོན་ལྔ་ལ་གཤེགས་པར་གསུངས། དེང་དུས་མཁས་བཙུན་བཟང་པོས་ནི་དགུང་ལོ་གྱ་ལྔ་པར་སྐུ་གཤེགས་པ་སྣང་ཞེས་བཤད། འདིའི་སྐུ་སྐྱེ་ཕྱི་མ་ཁྲི་ཆེན་བསྟན་པ་རབ་རྒྱས་སོགས་ཡོངས་གྲགས་རྭ་སྒྲེང་གྲྭ་ཚང་གི་སྐུ་རབས་རྣམས་ཡིན་ནོ། །
མདོ་རྒྱུད་པད་ཚལ་ལ་ཆགས་གེ་སར་འཛིན། །ལེགས་བཤད་དབྱངས་སྙན་སྒྲོག་པའི་གྲགས་པ་ཅན། །
ལྷུན་གྲུབ་འཕྲིན་ལས་རྒྱལ་བའི་དཔལ་དུ་ཤར། །འཇམ་མགོན་བསྟན་པའི་གཉེན་ལ་གསོལ་བ་འདེབས། །
ཞེས་འབྱུང་བ་ལས། བཤད་མ་ཐག་པའི་ཁྲི་ཆེན་ངག་དབང་མཆོག་ལྡན་དང་། དེ་མ་ཐག་འཆད་པར་འགྱུར་བའི་ཆོས་རྗེ་བློ་བཟང་དྲི་མེད་བར་ལ་མཁན་ཐོག་གཅིག་བྱུང་སྣང་ཡང་མཚན་སྒྲ་མི་གསལ་བས་མཚན་ཅི་ཡིན་དང་། གྲྭ་ས་གང་ཡིན་འཁྲུངས་གཤེགས་སོགས་མ་རྙེད།