གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༦༧] བྱམས་པ་ཆོས་གྲགས། [ བྱང་ཆོས་དང་། དགའ་ལྡན་ཁྲིར་ཕེབས། ]
མདོ་སྔགས་ལེགས་བཤད་འོད་ཟེར་འཕྲོ་བའི་ངག །དབང་བཞིའི་ངེས་དོན་མཁྱེན་ཡངས་འདོད་རྒུའི་སྤྱོད། །
བཟོད་པ་བརྟན་པའི་ཆ་ཤས་ཡོངས་སུ་རྫོགས། །རྒྱལ་བསྟན་པདྨོའི་གཉེན་ལ་གསོལ་བ་འདེབས། །
ཞེས་འབྱུང་བ་ལྟར། འདི་ནི་ཁྲི་ཟུར་བྱམས་པ་ཆོས་གྲགས་ཀྱི་བརྒྱུད་འདེབས་ཡིན་ངེས་ཏེ། སྐུ་ཕྲེང་བཅུ་གསུམ་པའི་མཛད་རྣམ་ཁ་པ་ཤོག་གྲངས་ ༡༣༥ ནང་དུ་ཚེ་གླིང་བསྟན་པའི་རྒྱལ་མཚན་ཁྲི་འཕོས་ཚབ་ཀྱི་གསར་པ་བྱང་རྩེ་ཆོས་རྗེ་མཁྱེན་རབ་ཡོན་ཏན་རྒྱ་མཚོ་དང་བྱང་རྩེ་ཆོས་རྗེ་གསར་པ་བྱམས་པ་ཆོས་གྲགས་གཉིས་དགའ་ལྡན་དུ་ཆེ་བ་འདོན་ཞེས་འཁོད་པས་གོ་རིམ་ངེས་པས་སོ་སྙམ།
དམ་པ་འདི་ནི་ཕྱི་ལོ་ ༡༨༥༠ ལོར་ཁམས་བྲག་འགོར་སྐུ་འཁྲུངས། ཕུར་ལྕོག་བྱམས་མགོན་གྱི་དྲུང་ནས་བསྙེན་པར་རྫོགས་པའི་དགེ་སློང་གི་སྡོམ་པ་ཞུས། འབྲས་བློ་གླིང་དུ་གསན་སྦྱོང་མཛད། རེ་ཞིག་ཁམས་ཕྱོགས་སུ་བཏེག་ནས་བྲག་འགོ་དགོན་པའི་མཁན་པོ་མཛད་ནས་དབུས་སུ་བྱོན། ལོ་དེའི་ལྷ་ལྡན་རབ་འབྱམས་པའི་མཚན་གནས་དང་པོ་བཞེས། དེ་ནས་དམ་པ་གོང་མའི་ཕྱག་རྒྱུན་དང༌། ཁྱད་པར་དུ་ཐུན་མིན་རྒྱུད་སྡེ་བཞིར་ཉམས་ལེན་གནང་རྒྱུར་ཐུགས་དམ་གྱི་མཐིལ་དུ་བཟུང་ནས་དཔལ་ལྡན་སྨད་རྒྱུད་གྲྭ་ཚང་དུ་ཆོས་ཞུགས་གནང་སྟེ། གསང་ཆེན་རྒྱུད་སྡེ་བཞི་དང་ཡང་གསང་སྔགས་བླ་མེད་ཀྱི་རྒྱུད་བཅས་པར་གསན་བསམ་མཐར་ཕྱིན་གནང་ནས་སྔགས་རམས་པའི་དམ་བཅའ་བཞག་རྗེས་༧གོང་ས་བཅུ་གསུམ་པས་རྒྱུད་སྨད་པའི་བླ་མ་དང་མཁན་པོའི་ཕྱག་རྟགས་ཕེབས།
སྒྲིག་ཁྲིམས་ལ་དམ་དྲག་ཆེ་བས་ཉིད་ཀྱི་ལས་སྣེའི་རིང་རྒྱུད་གྲྭ་སུམ་ཅུ་སྐོར་གནས་དབྱུང་བཏང་བའི་ལོ་རྒྱུས་སྣང་། ཁོང་སྐུ་ཚེ་རིང་བ་འདི་རྒྱུད་པའི་སྒྲིག་ལམ་དག་ཐེར་བྱས་པ་འདིའི་དྲིན་ཡིན་ཞེས་ཞལ་པོ་ཡང་གསུངས་སྣང་། རབ་བྱུང་བཅོ་ལྔ་པའི་ལྕགས་བྱ་སྟེ་ཕྱི་ལོ་ ༡༩༢༡ ལོར་གསེར་ཁྲིར་ཕེབས་ནས་མཐར་དགུང་ལོ་༨༨ པར་དགོངས་པ་ཞི་བར་གཤེགས་སོ། །
༦༨] བློ་བཟང་མཁས་གྲུབ། [ བྱང་ཆོས་ལ་ཕེབས། ]
བློ་གྲོས་བཟང་པོས་བསྟན་པའི་མཛོད་འཛིན་པ། །མཁས་ཤིང་གྲུབ་པའི་དབང་ཕྱུག་ཆོས་ཀྱི་རྗེ། །
འཕྲིན་ལས་འོད་ཀྱིས་འགྲོ་བ་འདྲེན་པའི་དཔལ། །དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་བློ་བཟང་མཁས་གྲུབ་སྨད་རྒྱུད་པའི་ཁྲི་ལ་བྱོན་པར་སྣང་སྟེ། མཚན་སྒྲ་ལས་ཐོན་ཅིང་། སྐུ་ཕྲེང་བཅུ་གསུམ་པའི་མཛད་རྣམ་ཁ་པའི་ཤོག་གྲངས ༢༠༦ ལས་དགའ་ལྡན་ཁྲི་འཛིན་བྱམས་པ་ཆོས་གྲགས་དང་། བྱང་རྩེ་ཆོས་རྗེ་བློ་བཟང་མཁས་གྲུབ་གཉིས་གསར་འཇལ། ཞེས་གསུངས། འོན་ཀྱང་དམ་པ་འདི་འཁྲུངས་ཡུལ་དང་། གྲྭ་ས་གང་ཡིན་སོགས་མ་རྙེད་དོ། །
ཐུབ་བསྟན་དཔག་བསམ་ལྗོན་པའི་གྲིབ་བསིལ་གྱིས། །འགྲོ་ཀུན་སྒྲིབ་གཉིས་ཚ་གདུང་སྐྱོབ་པ་ལ། །
མཁས་མཆོག་ཀུན་གྱི་དབུས་ན་ཉི་ཟླ་ལྟར། །ཡོངས་སུ་གྲགས་པའི་ཞབས་ལ་གསོལ་བ་འདེབས། །
ཞེས་པ་ལས། དེ་ནས་སེ་ར་སྦ་ཏི་ཐུབ་བསྟན་མཁས་མཆོག་དམ་པ་སྨད་རྒྱུད་པའི་མཁན་ཁྲིར་ཕེབས་པར་སྣང་ཡང་། མཐར་བྱང་རྩེ་དང་ཁྲིར་ཕེབས་པ་སོགས་མི་གསལ་ལོ།།
༧༠] གཙང་པ་ཐུབ་བསྟན་ཉིན་འབྱེད། [ བྱང་ཆོས་དང་། དགའ་ལྡན་ཁྲིར་ཕེབས། ]
རྒྱལ་ཀུན་མཁྱེན་པའི་གཏེར་གྱུར་འཇམ་དཔལ་དབྱངས། །བཤེས་གཉེན་གར་རོལ་འཇམ་མགོན་བླ་མ་ཡི། །
རིང་ལུགས་དྲི་མེད་སྤེལ་ལ་ཟླ་མེད་པ། །ཐུབ་བསྟན་ཉིན་འབྱེད་དབང་པོར་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་འབྲས་གཙང་པ་ཐུབ་བསྟན་ཉིན་འབྱེད་མཆོག་སྨད་རྒྱུད་པའི་མཁན་ཁྲིར་ཕེབས། དམ་པ་འདི་ནི་འཁྲུངས་ཡུལ་གཙང་དང་། བློ་གླིང་གྲྭ་ཚང་དུ་ཐུགས་གཉེར་མཛད། དགེ་བཤེས་ཐོན་ནས་སྨད་རྒྱུད་གྲྭ་ཚང་དུ་ཕེབས་ཏེ་སྔགས་ཕྱོགས་སྐོར་ལ་གསན་སྦྱོང་ལེགས་པར་མཛད།
རྒྱུད་པའི་བླ་མ་དང་མཁན་ཁྲིར་བྱོན་ནས་འཆད་ཉན་ལོ་དུས་ཚང་བར་མཛད་དེ་བྱང་རྩེ་བརྒྱུད་དེ་ཕྱི་ལོ་ ༡༩༣༣ ལོར་དགའ་ལྡན་གསེར་ཁྲིར་ཕེབས་ཀྱང་། ཁྲི་བའི་མཛད་འཁུར་ཟླ་བ་གཉིས་ལས་མ་སོང་བར་དགོངས་པ་གཞན་དུ་གཤེགས། ད་ལྟ་རབ་གནས་ཟིན་བྲིས་འདི་འདིས་དབུ་མཛད་ནས་བསྒྲིགས་པ་ཡིན། དམ་པ་འདི་ཡི་སྐུ་སྐྱེ་བྱེས་སུ་འཁྲུངས་ཀྱང་ཀ་ཊར་སྐུ་གཤེགས། འདིའི་རྣམ་ཐར་རྒྱས་པ་དགའ་ལྡན་ཁྲི་རབས་རིམ་བྱུང་གི་རྣམ་ཐར་ཛམྦུའི་གསེར་གྱི་ཕྲེང་བར་གསལ་བས་དེར་གཟིགས་འཚལ།
༧༡] རྗེ་ལྷུན་གྲུབ་བརྩོན་འགྲུས། [ བྱང་ཆོས་དང་། དགའ་ལྡན་ཁྲིར་ཕེབས། ]
ངག་གི་དབང་ཕྱུག་བློ་བཟང་རྒྱལ་བ་ཡི། །མདོ་སྔགས་ལེགས་བཤད་དྲི་མེད་པདྨོའི་ཚལ། །
གསལ་བར་མཛད་ལ་སྔོན་མེད་ཉི་ཟླ་ལྟར། །ཟླ་མེད་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། གོང་གི་བརྒྱུད་འདེབས་ཀྱི་མཚན་སྒྲ་ནས་གསལ་བར་མེད་སྣང་ཡང་། གོང་འོག་གི་བབ་དང་། རྒྱུད་རྒན་ཚོའི་མཁན་པོའི་གོ་རིམ་བཤད་ཚུལ་ལས་དཔགས་ན་རྗེ་ལྷུན་གྲུབ་བརྩོན་འགྲུས་པ་ཡིན་ངེས་ཏེ། དམ་པ་འདི་ནི་འཁྲུངས་ཡུལ་གཙང་དང་། ཤངས་དགའ་ལྡན་ཆོས་འཁོར་དུ་ཆོས་ཞུགས་ཀྱི་རབ་ཏུ་བྱུང་། རིམ་བཞིན་གདན་ས་སེ་ར་བྱེས་གྲྭ་ཚང་དུ་ཞུགས་ཏེ་གཞུང་ཆེན་ཁག་ལ་ཐུགས་གཉེར་མཛད།
དེ་ནས་དཔལ་ལྡན་སྨད་རྒྱུད་གྲྭ་ཚང་དུ་ཕེབས་ནས་སྔགས་ཀྱི་གཞུང་ཆེན་ཁག་ལ་གསན་བསམ་མཛད་ནས་རྒྱུད་པའི་བླ་མ་དབུ་མཛད་གནང་རྗེས་མཁན་ཁྲིར་བྱོན་ཏེ་སྔར་སྲོལ་གྱི་འཆད་ཉན་རྣམས་མཛད། བྱང་རྩེ་ཆོས་རྗེ་བརྒྱུད་དེ་རབ་བྱུང་བཅུ་དྲུག་པའི་ལྕགས་འབྲུག་སྟེ་ཕྱི་ལོ་ ༡༩༤༠ ལོར་དགའ་ལྡན་གསེར་ཁྲིར་ཕེབས་ཏེ་ཆོས་འཁོར་བསྐོར་ཞིང་ཁྲི་ལོ་བདུན་བར་བསྐྱངས། དམ་པ་ཉིད་ཀྱི་དགུང་གྲངས་རེ་བཞིའི་ལོར་དགོངས་པ་ཆོས་དབྱིངས་སུ་ཐིམ།
༧༢] རྒྱལ་རོང་བྱམས་པ་སྐལ་བཟང། [ བྱང་ཆོས་ལ་ཕེབས། ]
བྱམས་པས་འགྲོ་སྐྱོང་ཐར་འདོད་མགོན་གྱི་མཆོག །ལྷག་བསམ་རབ་དཀར་སྐལ་བཟང་སྐྱབས་ཀྱི་ཕུལ། །
མདོ་སྔགས་གཞུང་བརྒྱའི་གཞུང་དོན་འཆད་མཁས་པའི། །སྐྱབས་མཆོག་མཚན་མོའི་མགོན་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སེར་སྨད་རྒྱལ་རོང་བྱམས་པ་སྐལ་བཟང་དང་། སེར་བྱེས་སོག་པོ་མགོན་དཀར་སྐྱབས་གཉིས་རིམ་བཞིན་མཁན་ཁྲིར་བྱོན་པ་ཡིན་ཏེ། སྔ་མ་སེར་སྨད་རྒྱལ་རོང་བྱམས་པ་སྐལ་བཟང་དམ་པ་འདིས་རྒྱུད་ཀྱི་འཆད་ཉན་ཟིན་ནས་བྱང་རྩེ་ཆོས་རྗེའི་ཁྲིར་ཕེབས་ཤིང་། དགའ་ལྡན་གསེར་ཁྲིར་བྱོན་ལ་ཉེ་བར་དགོངས་པ་གཞན་དོན་དུ་གཤེགས།
དེ་ནས་སེར་བྱེས་སོག་པོ་མགོན་དཀར་སྐྱབས་མཁན་ཁྲིར་བྱོན་པ་ཡིན་ཏེ། དམ་པ་འདི་སེར་བྱེས་གྲྭ་ཚང་དུ་གཞུང་ཆེན་ཁག་ལ་ཐུགས་གཉེར་མཛད་རྗེས། དཔལ་ལྡན་སྨད་རྒྱུད་གྲྭ་ཚང་དུ་ཞུགས་ཏེ་རྒྱུད་སྡེ་བཞི་ལ་ཐུགས་གཉེར་མཛད་ནས་རྒྱུད་པའི་མཁན་ཁྲིར་ཕེབས། རིག་གནས་ལ་མཁས་སྙན་ཡོད་པ་ཞིག་དང་། འདིས་མཛད་པའི་འདུལ་བའི་སྡོམ་རྒྱས་པ་ཞིག་ཀྱང་ཡོད་སྣང་།
མགོན་དཀར་སྐྱབས་མཁན་ཁྲིར་བཞུགས་རིང་གྲྭ་ཚང་འཛིན་སྐྱོང་ཐོག་འཕོ་འགྱུར་བྱུང་སྟེ། སྔ་སོར་མཁན་ཁྲི་སོ་སོ་ནས་གྲྭ་ཚང་བཟུང་ནས་གཏོང་སྒོ་སོགས་བླ་བྲང་སོ་སོ་ནས་གཏོང་སྲོལ་ཡོད་ཅིང་། བླ་བྲང་རྣམས་ལོ་དུས་ཐུང་ངུ་ཞིག་ནང་འཕོ་ལེན་བྱ་དགོས་པ་བརྟེན། གཞིས་ཀ་མ་ལག་ཡོང་བབ་ཐོན་བསྐྱེད་རྣམས་བདག་སྤྲོད་རྩིས་ལེན་ལེགས་པོ་མ་ཐུབ་པའི་རྐྱེན་གྱིས་བར་མ་དོར་ཆུད་ཟོས་སུ་སོང་ནས་དགེ་འདུན་མང་ལ་གཏོང་སྒོ་ཉག་ཕྲ་བར་གྱུར་པ་དང་། ལྷག་པར་སྐབས་ཤིག་ཚོགས་ཁྲོ་ཡང་རྒུད་ཟད་ཀྱིས་མཐིལ་བརྡོལ་ནས་ཉིན་གཅིག་ཚོགས་སུ་གསོལ་ཇ་གཏང་མ་ཐུབ་པ་སོགས་ཀྱི་གནས་ཚུལ་ཆགས་ཏེ། སྲིད་སྐྱོང་ར་སྒྲེང་རིན་པོ་ཆེར་གྲྭ་ཚང་བླ་བྲང་གི་འཛིན་སྐྱོང་བྱེད་ན་ཚགས་ཚུད་མེད་ལུགས་སྙན་སེང་ཞུས་པས། སྲིད་སྐྱོང་མཆོག་ནས་གདན་ས་ཁག་ལས་མཁན་པོའི་སྐུ་སྐལ་ཆེ་ཤོས་སེར་སྨད་མཁན་པོར་དཔེར་བླངས་ནས་མཁན་པོར་སྐུ་སྐལ་བཅུ་དྲུག་རེ་དང་། ཉིན་རེར་འབྲུ་ཁལ་རེ་སྟེ་ལོ་གཅིག་ལ་འབྲུ་ཁལ་ ༣༦༠ རེ་འབུལ་རྒྱུ་དང་། གྲྭ་ཚང་འཛིན་སྐྱོང་ཚོགས་པ་ཁང་ཚན་རེ་ནས་ཕྱག་མཛོད་རེ་གསར་དུ་འཛུགས་རྒྱུའི་བཅད་མཚམས་གནང་བར་བརྟེན། དེ་ནས་བཟུང་དགེ་འདུན་རྣམས་ཇ་ཚུལ་གསོལ་ཕོགས་ལོངས་སྤྱོད་འར་འུར་ཆེ་བ་དང་། གྲྭ་ཚང་གི་ཆོས་སྲིད་གཉིས་ཐད་ནས་ཡར་རྒྱས་སུ་བསྐྱོད་སྣང་། [ མཆན། སེར་སྨད་རྒྱལ་རོང་བྱམས་པ་སྐལ་བཟང་དང་སེར་བྱེས་སོག་་པོ་མགོན་དཀར་སྐྱབས་གཉིས་ཀྱི་རྒྱུད་འདེབས་ཤོ་ལོ་ཀ་གཅིག་ཏུ་བཀོད་གནང་འདུག་གོ །]
༧༤] ཧར་གདོང་ཐུབ་བསྟན་ཀུན་དགའ། [ བྱང་ཆོས་དང་། དགའ་ལྡན་ཁྲིར་ཕེབས། ]
ཐུབ་པའི་དགོངས་ཟབ་མདོ་སྔགས་བསྟན་པའི་གནས། །ཇི་བཞིན་གཟིགས་གང་བརྩེ་བས་འདོམས་མཛད་པ། །
སྐལ་བཟང་ཡིད་ལ་ཀུན་དགའི་དཔལ་སྟེར་བ། །རྗེ་བཙུན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སེར་བྱེས་ཧར་གདོང་ཐུབ་བསྟན་ཀུན་དགའ་མཆོག་སྨད་རྒྱུད་པའི་ཁྲིར་བྱོན་པ་ཡིན་ཏེ། དམ་པ་འདི་ནི་འཁྲུངས་ཡུལ་གཙང་ཡིན་ཞིང་། སེར་བྱེས་གྲྭ་ཚང་དུ་ཆོས་ཞུགས་གནང་སྟེ་གཞུང་ཆེན་ཁག་ལ་ཐོས་བསམ་མཐར་ཕྱིན་པར་མཛད་རྗེས། དཔལ་ལྡན་སྨད་རྒྱུད་གྲྭ་ཚང་དུ་ཕེབས་ནས་སྔགས་ཕྱོགས་ལའང་ཐུགས་གཉེར་ཆེན་པོ་གནང་སྟེང་ནས་རྒྱུད་པའི་བླ་མ་དབུ་མཛད་གནང་རྗེས་མཁན་ཁྲིར་ཕེབས།
འཆད་ཉན་ལེགས་པར་མཛད་དེ་བྱང་རྩེ་ཆོས་རྗེའི་ཁྲིར་ཕེབས། ཕྱི་ལོ་ ༡༩༥༤ ལོར་དགའ་ལྡན་གསེར་ཁྲིར་ཕེབས་ནས་ལོ་ཤས་རིང་སྨོན་ལམ་ཆེན་མོའི་གྲལ་དབུར་ཕེབས་ནས་ཆོས་ཀྱི་འཁོར་ལོ་བསྐོར་ཀྱང་། རྒྱ་དམར་གྱིས་གདུག་རྩུབ་བོད་ལ་བྱུང་བའི་དུས་བདོ་བའི་དབང་གིས་མཛད་པ་མཐར་མ་ཕྱིན་པར་ཕྱི་ལོ་ ༡༩༦༤ ལོར་ལྷ་སར་ཞི་བར་གཤེགས།
༧༥] ཕ་ར་སྤྱི་སོ་ཚང་དགེ་བཤེས་གྲགས་པ་དོན་གྲུབ།
སངས་རྒྱས་མདོ་རྒྱུད་ཀུན་གྱི་པདྨོའི་ཚལ། །སྤེལ་ནས་རྒྱས་མཛད་རྣམ་དཔྱོད་ཉིན་མོའི་མགོན། །
གྲགས་པའི་དམ་ཆོས་མ་ལུས་འཆང་བ་ཡི། །ཡེ་ཤེས་མགོན་པོ་དཔལ་ལ་གསོལ་བ་འདེབས། །
ཞེས་པ་ལྟར། དེ་ནས་འབྲས་ཕ་ར་སྤྱི་སོ་ཚང་དགེ་བཤེས་གྲགས་པ་དོན་གྲུབ་མཆོག་མཁན་ཁྲིར་ཕེབས་པ་སྟེ། དམ་པ་འདི་ནི་འཁྲུངས་ཡུལ་འབའ་བ། དབུས་སུ་བྱོན་ནས་བློ་གླིང་གྲྭ་ཚང་དུ་གཞུང་ཆེན་རྣམས་ལ་གསན་སྦྱོང་མཐིལ་ཕྱིན་པར་མཛད་དེ་ལྷ་རམས་པའི་མཚན་རྟགས་བཞེས།
རྒྱུད་ལ་ཕེབས་ནས་སྔགས་ཀྱི་གཞུང་ཆེན་རྣམས་ལའང་དེ་བཞིན་དུ་སྦྱངས་པར་མཛད་ནས་སྔགས་ཀྱི་དམ་བཅའ་དང་རྩོད་རྒྱུགས་ཀྱང་གྲུབ། དེའི་རྗེས་རིམ་བཞིན་བླ་མ་དབུ་མཛད་དང་མཁན་ཁྲིར་ཕེབས་ཤིང་འཆད་ཉན་ལོ་གསུམ་ལེགས་པར་མཛད། མཁན་པོ་ཟུར་ནས་མི་རིང་བར་གཤེགས་སོ། །འདིའི་མཚན་དངོས་ནི་གྲགས་པ་དོན་གྲུབ་ཡིན་ཡང་བརྒྱུད་འདེབས་བསྡུས་པར་གྲགས་པ་ཐུབ་བསྟན་ཞེས་འཁོད་པ་ཡིག་ནོར་ཤོར་སྙམ།
དེའི་རྗེས་སུ་འབྲས་ཧར་གདོང་སྦྱིན་པ་ཐུབ་བསྟན་མཆོག་མཁན་ཁྲིར་བྱོན་ཀྱང་། ར་སྒྲེང་ཚང་དབུ་ཉེས་བྱུང་སྐབས་ཁོང་ཡང་གཞུང་གི་ལས་དོན་ཞིག་ཐོག་བཀའ་ཉེས་ཕོག་སྟེ་ཁྲི་བཤོལ་དགོས་བྱུང་། སྤྱི་སྒྲོས་ལྟར་བརྒྱུད་འདེབས་སུ་འགོད་པའི་ཕྱག་སྲོལ་མེད་པས་བརྒྱུད་འདེབས་མ་བྱུང་ངོ་། །
༧༧] ལྡན་མ་ལྷ་རམས་པ་དགེ་ངག་ལྡན་ནམ་མཚན་གཞན་ཟླ་བའི་སྙིང་པོ།
དེའི་རྗེས་སུ་འབྲས་བློ་གླིང་ལྡན་མ་ལྷ་རམས་པ་དགེ་ངག་ལྡན་ནམ་མཚན་གཞན་ཟླ་བའི་སྙིང་པོ་སྟེ་ལི་ཐང་ཤོག་དྲུག་སྐྱབས་མགོན་གྱི་ཡོངས་འཛིན་ཡིན་པ་དེ་ཉིད་སྨད་རྒྱུད་པའི་མཁན་ཁྲིར་བྱོན་སྣང་ཡང་སྐུ་ཚེ་མ་ཟིན་འདུག །