གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༧༨] གཞུང་པ་ཐུབ་བསྟན་མཁས་བཙུན། [ དུས་ལོག་སྐབས་བྱང་རྩེ་ཆོས་རྗེ། ]
ཐུབ་བསྟན་པད་ཚལ་མདོ་རྒྱུད་མ་ལུས་པ། །སྙན་པའི་དབྱངས་ཀྱིས་མན་ངག་འཆད་ལ་མཁས། །
བསླབ་གསུམ་རྣམ་དག་བརྩོན་པ་ཀུན་གྱི་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། །
ཞེས་པ་ལས། དེ་ནས་སེར་སྨད་གཞུང་པ་ཐུབ་བསྟན་མཁས་བཙུན་མཆོག་རྒྱུད་ཀྱི་ཁྲིར་ཕེབས་པ་ཡིན་ཏེ། འདི་ནི་ཆུང་ངུ་ནས་རབ་ཏུ་བྱུང་། སེར་སྨད་ཐོས་བསམ་ནོར་བུའི་གླིང་དུ་གཞུང་ཆེན་རྣམས་ལ་སྦྱངས་པ་ཆེན་པོ་མཛད། མཚན་རྟགས་བཞེས་ཏེ་རྒྱུད་སྨད་དུ་བྱོན་ནས་སྔགས་ཀྱི་གཞུང་ལུགས་ཆེན་པོ་རྣམས་ལའང་གསན་བསམ་མཐིལ་ཕྱིན་མཛད་སྟེང་ནས་མཁན་ཁྲིར་ཕེབས།
འཆད་ཉན་ཡང་ལོ་དུས་རྫོགས་ཀྱི་བར་དུ་མཛད་ནས་བྱང་རྩེར་བྱོན་ནས་ཡོད་ཀྱང་། དུས་ལོག་སྐབས་བཙན་གནོན་འོག་ཡུན་རིང་པོའི་བར་བཞུགས་ནས་གཤེགས་སྣང་། འདིའི་ཡང་སྲིད་ད་ལྟ་སེར་སྨད་གྲྭ་ཚང་དུ་ཆོས་ཞུགས་གནང་ཡོད་པར་ཐོས་སོ། །
རྒྱུ་འབྲས་ཐེག་པའི་དོན་གཉིས་འགྲུབ་པའི་ཚུལ། །ཇི་བཞིན་གཟིགས་ནས་བསོད་ནམས་ཡེ་ཤེས་སོགས། །
གོམས་པ་མཐར་ཕྱིན་བྱང་ཆུབ་མཆོག་བརྙེས་པ། །མཁའ་ཁྱབ་བསྟན་འགྲོའི་མགོན་ལ་གསོསལ་བ་འདེབས། །
ཞེས་གསུངས་པ་བཞིན། འདིའི་བར་ན་སོག་པོ་མཁན་ཟུར་ཞུ་བ་ཞིག་ཕེབས་ཡོད། དམ་པ་འདི་འབྲས་བསམ་བློ་སོག་པོ་ཡེ་ཤེས་བྱང་ཆུབ་མཆོག་རྒྱུད་ཀྱི་ཁྲིར་བྱོན་པ་སྟེ། དམ་པ་འདི་ནི་སོག་ཡུལ་ནས་བོད་དབུས་སུ་ཕེབས་ནས་འབྲས་སྒོ་མང་གྲྭ་ཚང་དུ་ཆོས་ཞུགས་མཛད་དེ་གཞུང་ཆེན་རྣམས་ལ་གསན་བསམ་སློབ་གཉེར་མཐིལ་ཕྱིན་པར་མཛད་ནས། དགེ་བཤེས་ལྷ་རམས་ཨང་དང་པོའི་མཚན་རྟགས་བཞེས།
དེ་ནས་དཔལ་ལྡན་སྨད་རྒྱུད་གྲྭ་ཚང་དུ་ཕེབས་ནས་སྔགས་ཀྱི་གཞུང་རྒྱུད་སྡེ་བཞི་ལ་གསན་བསམ་ཚུལ་བཞིན་མཛད་པས། རིམ་བཞིན་བླ་མ་དབུ་མཛད་ནས་ཉིད་ཀྱི་དགུང་གྲངས་དོན་ལྔའི་ཐོག་མཁན་པོའི་ཁྲིར་ཕེབས། འཆད་ཉན་ཡང་ལོ་དུས་ཚང་བར་ལེགས་པར་མཛད། མཁན་པོ་ཟུར་ནས་རིང་མིན་དགོངས་པ་གཤེགས་སྣང་ངོ་། །མཆན། སོག་པོ་མཁན་ཟུར་ཞིག་བྱུང་བར་རྒན་རབས་པས་གསུངས་ཏེ་འདི་ཉིད་ཡིན་ངེས་ཤིང་། ཡོངས་གྲགས་སོག་པོ་བླ་མ་དབུ་མཛད་ནི་འོག་ཏུ་འབྱུང་ངོ་། །
༨༠] ཧར་གདོང་ལྷ་རམས་པ་ངག་དབང་ལེགས་ལྡན།
ངག་དབང་བློ་གཏེར་བློ་བཟང་རྒྱལ་བའི་བསྟན། །དྲི་མེད་ལེགས་འཛིན་ལེགས་པར་སྨྲ་བའི་གཙོ། །
གནས་ལྔ་རིག་མཁས་རིག་པའི་དབང་ཕྱུག་ཆེ། །དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་འབྲས་ཧར་གདོང་ལྷ་རམས་པ་ངག་དབང་ལེགས་ལྡན་མཆོག་སྨད་རྒྱུད་པའི་ཁྲིར་ཕེབས་པ་སྟེ། ཕྱི་ལོ་ ༡༩༥༩ ལོར་བོད་ལྗོངས་དུས་འགྱུར་སྐབས་ཡིན། དམ་པ་འདི་ནི་གཙང་ཤངས་སུ་སྐུ་འཁྲུངས། དབུས་སུ་བཏེག་ནས་སྒོ་མང་གྲྭ་ཚང་དུ་གཞུང་ཆེན་རྣམས་ཐུགས་གཉེར་མཛད་ནས་དགེ་བཤེས་ལྷ་རམས་པའི་མཚན་གནས་བཞེས། ཐུན་མོང་བའི་རིག་གནས་ལའང་མཁས་པའི་གྲགས་པ་ཆེ།
དཔལ་ལྡན་སྨད་རྒྱུད་གྲྭ་ཚང་དུ་ཕེབས་ཏེ་གསང་ཆེན་རྒྱུད་སྡེ་བཞི་ལ་གསན་སྦྱོང་ལེགས་པར་གནང་། བླ་མ་དབུ་མཛད་གནང་རྗེས་མཁན་ཁྲིར་ཕེབས། འཆད་ཉན་རྣམས་ལེགས་པར་མཛད་དེ་མཁན་པོ་ཟུར་ནས་ཕྱི་ལོ་ ༡༩༥༩ ལོའི་དུས་ཟིང་སྐབས་རྒྱ་གར་དུ་ཕེབས་ནས་རྒྱ་གར་ཌལ་ཧོར་དུ་རྒྱུད་པའི་མཁན་ཚབ་ལོ་གཅིག་གནང་། དེ་ནས་ཨ་རི་ནིའུ་ཡོག་ཏུ་སློབ་གྲྭ་ཞིག་གི་སློབ་སྟོན་པ་གནང་སྟེ་ལོ་ཤས་བཞུགས་རྗེས་དགོངས་པ་ཞི་བར་གཤེགས་སོ། །
༨༡] བསམ་གཏན་ཆོས་འཕེལ་ལམ་བློ་བཟང་དོན་གྲུབ།
བློ་གཏེར་རྒྱལ་བའི་གཞུང་བཟང་སྟོང་གི་བཅུད། །མྱང་པས་མདོ་སྔགས་ཟབ་དོན་འཆད་ལ་མཁས། །
གྲུབ་གཉིས་འདོད་རྒུའི་དཔལ་མངའ་རྡོ་རྗེ་འཛིན། །རྗེ་བཙུན་བླ་མའི་ཞབས་ལ་གསོལ་བ་འདེབས། །
[ འདི་ཡོངས་འཛིན་ཁྲི་བྱང་རྡོ་རྗེ་འཆང་གི་གསུང་ཡིན། ] ཞེས་འབྱུང་བ་ལྟར། དེའི་རྗེས་སུ་དགའ་བྱང་ཕ་ར་དགེ་བཤེས་ལྷ་རམས་པ་བསམ་གཏན་ཆོས་འཕེལ་ལམ་བློ་བཟང་དོན་གྲུབ་མཆོག་སྨད་རྒྱུད་པའི་ཁྲིར་ཕེབས་པ་ཡིན་ཏེ། དམ་པ་འདི་འཁྲུངས་ཡུལ་འབའ་བ། སྐུ་ཆུང་ངུའི་དུས་ནས་འབའ་ཆོས་སྡེ་རུ་རབ་ཏུ་བྱུང་། རིང་མིན་དབུས་སུ་བྱོན་ཏེ་དགའ་ལྡན་བྱང་རྩེ་ཕ་ར་ཁམས་ཚན་དུ་ཞུགས་ནས་གཞུང་ཆེན་རྣམས་གསན་སྦྱོང་མཐར་ཕྱིན་པ་མཛད་དེ་དགེ་བཤེས་ལྷ་རམས་ཨང་གཉིས་པའི་མཚན་གནས་བཞེས། འདིའི་སྐབས་རྒྱུད་སྟོད་མཁན་ཟུར་མི་ཉག་ཚེ་བརྟན་ཨང་དང་པོ་ཡིན། འཕྲོས་དོན་ཙམ་མོ། །
དེ་ནས་སྨད་རྒྱུད་དུ་བཞུགས་ནས་སྔགས་ཕྱོགས་ཀྱི་གསན་བསམ་ཕུལ་ཕྱིན་པར་མཛད་དེ་མཁས་པའི་གྲགས་པ་བརྡོལ། སྨད་རྒྱུད་པའི་བླ་མ་དབུ་མཛད་དང་མཁན་ཁྲིར་རིམ་གྱིས་ཕེབས། ཕྱི་ལོ་ ༡༩༥༩ དུས་ལོག་སྐབས་འདིའི་མཁན་པོ་ཕེབས་ལོ་ཡིན། ལྷ་ལྡན་དུ་ཟིང་འཁྲུགས་ལངས་རྐྱེན་འཕན་པོ་ཞོགས་ཆོས་ཐོག་འཁེལ་བས་རྒྱུད་གྲྭ་ཆོས་འགྲིམ་པ་དང་ལྷན་ཅིག་རྒྱ་གར་དུ་བཙན་བྱོལ་དུ་བྱོན།
ཌལ་ཧོར་དུ་མཁན་པོ་མུ་མཐུད་ལོ་ཤས་བཞུགས་ནས་གྲྭ་ཚང་གི་ཕྱག་སྲོལ་བཟང་པོ་མི་ཉམས་གོང་འཕེལ་དང་སྒྲིག་ཁྲིམས་ལ་བརྗིད་གནོན་ཆེན་པོ་མཛད། ཕྱི་ལོ་ ༡༩༦༤ ལོར་རྡ་སར་རྣམ་རྒྱལ་གྲྭ་ཚང་གི་མཁན་པོར་བསྐོ་བཞག་གནང་སྟེ་༧གོང་ས་ཆེན་པོའི་བཀའ་འོག་ཞབས་ཞུ་བསྒྲུབས། ཕྱི་ལོ་ ༡༩༧༧ ལོའི་ཟླ་བ་བཞི་པའི་ནང་དགོངས་པ་ཞི་བར་གཤེགས། །
༨༢] སྐལ་བཟང་རྣམ་རྒྱལ་ལམ་སྐལ་བློ་མཆོག །
འདིའི་རྗེས་སུ་སེ་བྱེས་ཏྲེ་ཧོར་ལྷ་རམས་པ་སྐལ་བཟང་རྣམ་རྒྱལ་ལམ་སྐལ་བློ་མཆོག་མཁན་ཁྲིར་ཕེབས་པ་སྟེ། དམ་པ་འདི་འཁྲུངས་ཡུལ་ཏྲེ་ཧོར་དཀར་མཛེས་ཡིན་ལ། སེར་བྱེས་གྲྭ་ཚང་དུ་གཞུང་ཆེན་རྣམས་ལ་ཕུལ་དུ་བྱུང་བར་སྦྱངས། རྡོ་རྗེ་གདན་དུ་ལྷ་རམས་དམ་འཇོག་གནང་སྟེ་ཨང་གསུམ་པའི་མཚན་གནས་བཞེས། དེ་ནས་རྒྱུད་པའི་མཁན་ཁྲིར་ཕེབས་ཀྱང་ཌལ་ཧོར་དུ་སྐུ་ཚེ་མ་ཟིན་འདུག སྤྱི་སྲོལ་ལྟར་བརྒྱུད་འདེབས་མེད།
༨༣] གཞུང་པ་ལྷ་རམས་པ་འཇམ་དབྱངས་ཡེ་ཤེས།
འཇམ་དབྱངས་ཐུགས་ཀྱི་ཆུ་མཚོ་ལས་འོངས་པའི། །ཡེ་ཤེས་རྡོ་རྗེའི་སྒྱུ་མའི་རོལ་གར་གྱིས། །
འགྲོ་ལ་ཐབས་མཁས་ལམ་བཟང་བསྐྲུན་མཛད་པ། །བཀྲིན་ཟླ་མེད་ཆེན་པོར་གསོལ་བ་འདེབས། །
ཞེས་གསལ་བ་ལྟར། དེའི་རྗེས་སུ་འབྲས་གཞུང་པ་ལྷ་རམས་པ་འཇམ་དབྱངས་ཡེ་ཤེས་མཆོག་རྒྱུད་ཀྱི་འཆད་ཉན་ལ་ཕེབས་པ་ཡིན་ཏེ། དམ་པ་འདི་ནི་འཁྲུངས་ཡུལ་ཨ་མདོ། དབུས་སུ་བྱོན་ནས་འབྲས་སྒོ་མང་གྲྭ་ཚང་དུ་གཞུང་ཆེན་རྣམས་ལ་ཐུགས་སྦྱོང་ལེགས་པར་མཛད་ནས་ལྷ་རམས་ཨང་གསུམ་པའི་མཚན་གནས་བཞེས། རྒྱུད་སྨད་དུ་ལོ་འཁོར་ཆོས་ཐོག་འཁོར་བའི་ཆོས་འགྲིམས་ཕེབས་ནས་རྒྱུད་སྡེ་ལ་ལེགས་པར་སྦྱངས། སྤྱིར་ན་དགེ་བཤེས་ལྷ་རམས་པ་ཨང་ཡོད་རྣམས་དམ་བཅའ་གྲུབ་འཕྲལ་རྒྱུད་ལ་ངེས་ཅན་ཕེབས་དགོས་པ་ལས་གཞུང་ནས་བཀའ་ཁྲོལ་མེད་པར་ཕ་ཡུལ་སོགས་རང་འདོད་ལྟར་ཕེབས་མི་ཆོག་པའི་སྲོལ་ཡོད་པ་འཕྲོས་དོན་ཙམ་མོ།། དེ་ནས་དམ་པ་འདིས་འཆད་ཉན་ལོ་དུས་རྫོགས་པར་མཛད་ནས་མཐར་སྒོ་མང་གྲྭ་ཚང་དུ་དཔེ་ཁྲིད་སློབ་སྟོན་སོགས་ཡུན་རིང་གནང་ནས་ཕྱི་ལོ་ ༡༩༧༥ ཡས་མས་ཤིག་ལ་སྐུ་གཤེགས་པར་སྣང་།
༨༤] ཏྲེ་ཧོར་ལྷ་རམས་པ་དགེ་བློ་བཟང་སྐལ་ལྡན།
བློ་བཟང་རྒྱལ་བའི་ཐུགས་བཅུད་རྒྱུད་རྒྱལ་གྱི། །མཐའ་དྲུག་ཚུལ་བཞིའི་རྒྱ་རྣམས་ལེགས་བཀྲོལ་ཏེ། །
སྐལ་ལྡན་འགྲོ་ལ་གྲུབ་གཉིས་དགེ་མཚན་འཆར། །འབེབས་མཁས་རྗེ་བཙུན་བླ་མར་གསོལ་བ་འདེབས། །
ཞེས་འབྱུང་བ་བཞིན། དེ་ནས་རྒྱུད་ཀྱི་ཁྲིར་འབྲས་ཏྲེ་ཧོར་ལྷ་རམས་པ་དགེ་བློ་བཟང་སྐལ་ལྡན་མཆོག་ཕེབས་པ་ཡིན་ཏེ། དམ་པ་འདིའི་འཁྲུངས་ཡུལ་ཏྲེ་ཧོར་ཅོག་རོ། གཞོན་ནུ་ཉིད་ནས་རབ་ཏུ་བྱུང་སྟེ་མི་རིང་བར་དབུས་སུ་ཕེབས། འབྲས་བློ་གླིང་གྲྭ་ཚང་དུ་ཆོས་ར་འགྲིམས་ནས་གཞུང་ཆེན་རྣམས་ལ་བརྩོན་པ་ཆེན་པོས་སྦྱངས། དགེ་བཤེས་ལྷ་རམས་པའི་དམ་འཇོག་གནང་སྟེ་ཨང་བཞི་པའི་མཚན་གནས་བཞེས། རྒྱུད་དུ་ཕེབས་ནས་སྔགས་ལའང་སྦྱངས་པ་མཛད།
ཕྱི་ལོ་ ༡༩༥༩ ལོར་དུས་ལོག་སྐབས་ཁོང་རྒྱུད་པའི་དགེ་སྐོས་སྐབས་ཡིན། ཞོག་དང་པོའི་ཆོས་ཐོག་ནས་གྲྭ་མང་དང་མཉམ་དུ་ཞོགས་ནས་རྒྱ་གར་དུ་བཙན་བྱོལ་བ་སྤྱི་མཚུངས་ལྟར་བྲོས་བྱོལ་དུ་ཕེབས། རྒྱ་གར་ཌལ་ཧོར་དུ་རྒྱུད་པའི་བླ་མ་དབུ་མཛད་དུ་བསྐོ་བཞག་གནང་། དེ་ནས་མཁན་ཁྲིར་ཕེབས། འཆད་ཉན་ལོ་དུས་གཙང་བར་མཛད།
མཁན་པོ་ཟིན་ནས་ཕྱི་ལོ་ ༡༩༧༡ ལོར་འདུས་མང་རྒྱ་གར་ལྷོ་ཕྱོགས་ཧུན་སུར་རབ་གླིང་གཞིས་ཆགས་སུ་གནས་སྤོ་སྐབས་དམ་པ་འདི་ཡང་ལྷན་དུ་ཕེབས། ཕྱི་ལོ་ ༡༩༨༠ ལོར་རྒྱ་གར་ལྷོ་ཕྱོགས་མོན་གྷོ་གཞིས་ཆགས་སུ་རང་གི་གདན་ས་བློ་གླིང་དུ་ཕེབས། དེའི་སྐབས་གློ་བུར་དུ་དགོངས་པ་གཤེགས། དམ་པ་འདིའི་གདུང་རྟེན་འབྲས་བློ་གླིང་ཏྲེ་ཧོར་ཁམས་ཚན་དུ་བཞུགས་སུ་གསོལ་ལོ། ། མཆན། མཁན་ཟུར་རིན་པོ་ཆེ་འདི་ནས་རྒྱ་གར་ལྷོ་ཕྱོགས་ཧུན་སུར་རབ་རྒྱས་གླིང་གཞིས་ཆགས་སུ་ཕེབས་པ་ཤ་སྟག་ཡིན།
༨༥] ཕ་ར་དགེ་བཤེས་ལྷ་རམས་པ་འཇམ་དཔལ་གཞན་ཕན། [ བྱང་ཆོས་དང་། དགའ་ལྡན་ཁྲིར་ཕེབས། ]
འཇམ་དཔལ་རྡོ་རྗེའི་དཀྱིལ་འཁོར་གཙོ་བོ་ཡི། །ཞལ་སྒོ་ལས་འོངས་མཐའ་དྲུག་ཚུལ་བཞིའི་རྒྱ། །
གཞན་ཕན་བརྩེ་བའི་སོར་རྩེེས་ལེགས་བཀྲོལ་ཏེ། །སྟོན་མཛད་རྗེ་བཙུན་བླ་མར་གསོལ་བ་འདེབས། །
ཞེས་གསུངས་པ་ལྟར། དེ་ནས་དགའ་བྱང་ཕ་ར་དགེ་བཤེས་ལྷ་རམས་པ་འཇམ་དཔལ་གཞན་ཕན་མཆོག་སྨད་རྒྱུད་པའི་མཁན་ཁྲིར་ཕེབས་པ་ཡིན་ཏེ། དམ་པོ་འདི་ཁམས་འབའ་ཐང་དུ་དྲོད་ཐུམ་བྱས་ཏེ་འཁྲུངས། དགུང་གྲངས་བཅུ་གཉིས་སོན་པ་ན་འབའ་ཆོས་སྡེ་དགོན་དུ་སྒྲིག་ཞུགས་ཀྱིས་ཡི་གེ་འབྲི་ཀློག་སྦྱངས། དེ་ནས་བཟུང་ཉིན་རེ་ལྟུང་བཤགས་ཚར་བདུན་རེ་དང་ལོ་བཅུ་གསུམ་ནས་འཇམ་དཔལ་མཚན་བརྗོད་ཚར་རེ་བཅས་འཆར་ཅན་བཏོན།
སྐུ་གཞོན་ནུའི་ཉིད་ནས་རྒྱལ་བའི་བསྟན་པ་ལ་རབ་ཏུ་བྱུང་ནས། དབུས་སུ་ཕེབས་ཏེ་དགའ་ལྡན་བྱང་རྩེ་གྲྭ་ཚང་དུ་ཆོས་ཞུགས་མཛད་དེ་ཁམས་ཚན་ཕ་ར་ཡིན། གདན་ས་དེར་གཞུང་ཆེན་ཁག་ལ་སློབ་གཉེར་མཐིལ་ཕྱིན་པར་མཛད། ཚོགས་ཆེན་ཆབ་རིལ་བཞེངས་པས་རྒན་ཆབ་རིལ་ཞེས་གྲགས། ལྷ་རམས་དམ་བཅའ་བཞག་ནས་ཨང་གསུམ་པའི་མཚན་གནས་བཞེས། དེ་ནས་དཔལ་སྨད་རྒྱུད་གྲྭ་ཚང་དུ་རྒྱུད་ལ་ཞུགས་ཏེ་ཆོས་འགྲིམས་རིང་སྔགས་ལ་སྦྱང་བརྩོན་ཆེ་བར་མཛད།
ཕྱི་ལོ་ ༡༩༥༩ ལོར་དུས་འགྱུར་སྐབས་རྒྱ་གར་དུ་ཕེབས། ཕྱི་ལོ་ ༡༩༦༧ བར་སློབ་དགེ་དང་། གཙུག་ལག་སློབ་གཉེར་ཁང་སོགས་སུ་ཕེབས། དེ་ནས་བླ་མ་དབུ་མཛད་ཀྱི་ཕྱག་རྟགས་ཕེབས་དོན་བཞིན་བླ་མ་མཛད། དེ་ནས་མཁན་ཁྲིར་ཕེབས་ཏེ་འཆད་ཉན་མཛད་བཞིན་ཕྱི་ལོ་ ༡༩༧༤ ནས་ཟུར་བཞུགས་མཛད། འཇིགས་བྱེད་བསྙེན་ཆེན་ཡང་བཞུགས། དགུང་གྲངས་ང་དྲུག་ལ་བཀའ་འབྲེལ་སླར་ཡང་མཁན་ཚབ་ལོ་གཅིག་གནང་དགོས་བྱུང་སྟེ་འཆད་ཉན་ལོ་གཅིག་བྱས། དེ་ནས་ཕྱི་ལོ་ ༡༩༨༣ ལོར་བྱང་རྩེ་ཆོས་རྗེར་འཁྱུག་ཙམ་བཞུགས་ནས་ཕྱི་ལོ་ ༡༩༨༤ ལོར་དགའ་ལྡན་གསེར་གྱི་ཁྲི་ལ་མངའ་གསོལ།
ཕྱི་རྒྱལ་ཡུལ་གྲུ་མང་པོར་ཕེབས་ནས་ཆོས་སྤེལ་བར་མཛད། གནས་མཆོག་རྡོ་རྗེ་གདན་དུ་སྨོན་ལམ་ཆེན་མོའི་གྲལ་དབུར་ཕེབས་ནས་ཆོས་གསུངས། ཕྱི་རྒྱལ་ཡུལ་གྲུ་མང་པོར་ཡང་གདན་ཞུས་ལྟར་ཕྱག་བཏེགས་ནས་ཆོས་བསྐོར་རྒྱ་ཆེར་བསྐོར། ཁྲི་ལོ་ལྔ་ཙམ་སོང་དུས་བྱད་གཏད་ལྟ་བུའི་ཞལ་བསྲང་པོ་རང་མེད་པའི་སྙུང་གཞི་བཞེས་ནས་དེ་མུར་བཞུགས་ཏེ་མཐར་དགོངས་པ་མྱ་ངན་ལས་འདས་སོ། །