གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༨༦] ཆོས་རྗེ་བློ་བཟང་ཉི་མ། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་གཏེར་འཇམ་དགོན་ལུགས་བཟང་མཁའ་དབྱིངས་སུ། །རྣམ་དཔྱོད་ཉི་གཞོན་འོད་སྣང་འབར་བའི་གཟིས། །
སྐལ་བཟང་ཡིད་ཀྱི་མུན་པ་མ་ལུས་པ། །གསལ་མཛད་བཤེས་གཉེན་མཆོག་ལ་གསོལ་བ་འདེབས། །
[ འདི་ཡང་ཡོངས་འཛིན་ཁྲི་བྱང་རིན་པོ་ཆེས་གསུངས། ] ཞེས་གསུངས་པ་ལྟར་དེའི་རྗེས་སུ་ཆོས་འབྱུང་འདི་ཐོག་མར་མཛད་པ་པོ་དགའ་ལྡན་ཁྲི་ཐོག་བརྒྱ་པ་ཆོས་རྗེ་བློ་བཟང་ཉི་མ་མཆོག་མཁན་ཁྲིར་ཕེབས། དམ་པོ་འདི་ཁམས་ཚ་སྨད་ཀྱི་རུ་སྐོར་བཅུ་གཉིས་ཀྱི་ནང་ཚན་གྱང་དམར་གྲོང་དུ་ ༡༩༢༩ ལོར་འཁྲུངས། དགུང་ལོ་བཅུ་གཉིས་པར་ཁམས་ཚ་བ་བྲག་ཡུལ་དགོན་དུ་ཆོས་སྒོར་ཞུགས་ནས་གསང་བདེ་འཇིགས་གསུམ་གྱི་ཆོ་ག་དང་ཆོས་སྤྱོད་ཆོ་ག་ཁག་ཐུགས་འཛིན་དང༌། ཞོར་དུ་སུམ་རྟགས་དག་གསུམ། གར་ཐིག་དབྱངས་གསུམ། འབུད་རྡུང་དཀྲོལ་གསུམ་སོགས་ཀྱང་སྦྱངས་པར་གནང་།
གང་་ཉིད་དགུང་ལོ་བཅུ་བདུན་དང་ཕྱི་ལོ་ ༡༩༤༥ ལོར་དབུས་སུ་ཕེབས་ཏེ་འབྲས་བློ་གླིང་གི་ཚ་བ་ཁང་ཚན་ཁོངས་སུ་སྒྲིག་ཞུགས་གནང༌། ཕ་ར་མཁན་ཆེན་པདྨ་རྒྱལ་མཚན། ཤག་སྐོར་མཁན་རིན་པོ་ཆེ་་ཉི་མ་རྒྱལ་མཚན་སོགས་བསྟེན་ནས་གཞུང་ཆེན་ཁག་ལ་གསན་བསམ་རྒྱ་ཆེར་མཛད། དུས་ལོག་སྐབས་འབྲུག་ཡུལ་བརྒྱུད་འཕགས་ཡུལ་དུ་ཞབས་སོར་འཁོད་ནས་སྦག་སར་ཆོས་སྒར་དུ་མི་ལོ་དགུ་རིང་སློབ་གཉེར་འཕྲོ་སྐྱོང་གནང༌། ཞོར་དུ་ཐ་སྙད་རིག་གནས་སྐོར་ལའང་སྦྱོང་བརྩོན་གནང༌། མེ་རྟ་ ༡༩༦༦ ལོར་ཝཱར་ཎ་བོད་ཀྱི་མཐོ་སློབ་ཏུ་ཞུགས་ནས་ཨ་ཙཱ་ཡའི་མཚན་གནས་བཞེས། དེ་རྗེས་གདན་ས་སོ་སོར་དགེ་བཤེས་གྲྭ་སྐོར་དམ་འཇོག་ཕེབས་ནས་བཀའ་པོད་ལྔའི་དམ་བཅའ་བཞག རྒྱུད་གྲྭ་སྨད་སྟོད་དུ་ཕེབས་ནས་ཀྱང་དམ་འཇོག་མཛད། རྡ་སར་ཕེབས་ནས་སྨོན་ལམ་ཆེན་མོའི་ནང་དམ་བཅའ་བཞག་པས་ལྷ་རམས་ཨང་རིམ་དང་པོའི་མཚན་གནས་བཞེས། རྒྱུད་གྲྭར་སྔགས་ཀྱི་དམ་འཇོག་རྩེ་སོན་བྱུང༌། ༧རྒྱལ་བའི་དབང་པོ་བསྟན་འཛིན་རྒྱ་མཚོ་སོགས་ཀྱི་དྲུང་ནས་མདོ་སྔགས་ཀྱི་དབང་ལུང་མན་ངག་རྒྱ་ཆེར་ཞུས།
དཔལ་ལྡན་སྨད་རྒྱུད་དུ་ཕེབས་ཏེ་གསང་ཆེན་རྒྱུད་སྡེ་བཞི་ལ་གསན་སྦྱོང་ཚུལ་བཞིན་མཛད་དེ་ལེགས་པར་ཐུགས་ལ་དགོངས། ཊཱིཀྐ་ཐུགས་འཛིན་གྱིས་ཊཱིཀྐ་ལེའུ་དང་པོའི་སྐྱོར་དཔོན་གནང༌། རྒྱུད་གྲྭའི་དགེ་བསྐོས་གནང་ནས་སྒྲིག་འཛུགས་ཚུལ་བཞིན་གནོན་སྡོམ་གནང་བའི་མུར་ཕྱི་ལོ་ ༡༩༧༡ ༧གོང་ས་མཆོག་གིས་རྒྱུད་པའི་བླ་མ་དབུ་མཛད་ཀྱི་ཕྱག་རྟགས་ཕེབས་ཏེ། བླ་མ་དབུ་མཛད་ཀྱི་ཁྲིར་འཁོད། ལོ་དེར་གྲྭ་ཚང་གཞིས་ཆགས་སུ་ཕེབས་ལོ་དེ་རང་ལ་ཡིན། བླ་མའི་བྱེད་སྒོ་ཆ་ཚང་ཉམས་འོག་ཏུ་ཚུད་ནས་ཕྱག་བསྟར་གནང༌། ཤིང་སྟག ༡༩༧༤ ལོར་རྒྱུད་པའི་མཁན་ཁྲིར་ཕེབས་ནས་མཁན་པོ་ལོ་གསུམ་གནང་རིང་གཙོ་བོར་རྒྱུད་པའི་འཆད་ཉན་མཛད་སྒོ་ཡོངས་རྫོགས་ཕྱག་བསྟར་ཚུལ་བཞིན་གནང༌།
མེ་འབྲུག་ ༡༩༧༦ ལོར་མཁན་ཁྲི་ལས་ཟུར་པ་དང༌། ༧ གོང་ས་མཆོག་གི་བཀའ་དགོངས་བཞིན་རྩེ་རྣམ་རྒྱལ་གྲྭ་ཚང་གི་མཁན་ཁྲིར་ཕེབས་ཏེ་དགོན་དེའི་གསང་བདེ་འཇིགས་གསུམ། དུས་འཁོར། ཕུར་པ་བཅས་པའི་སྒྲུབ་མཆོད་ཁག མགོན་ཆོས། ལྷ་མོ་བཅས་ཀྱི་གཏོར་རྒྱག་ཁག་གི་རྡོར་སློབ་གནང༌། གྲྭ་གསར་ཚོར་མདོ་སྔགས་ཀྱི་ལམ་རིམ་དང༌། ལྕང་སྐྱ་གྲུབ་མཐའ། བསྡུས་གྲྭ་སོགས་ལོ་འཁོར་རྒྱུགས་སྤྲོད་ཀྱི་སྒྲིག་གཞི་གསར་བཏོད་གནང༌།
ཆུ་ཕག་ ༡༩༨༣ ལོར་རྣམ་གྲྭ་མཁན་པོ་མཛད་བཞིན་པའི་མུར་བྱང་རྩེ་ཆོས་རྗེའི་ཁྲིར་ཕེབས་ཏེ་དམིགས་བསལ་དགེ་བཤེས་རྩོད་རྒྱུགས་བཞེས་པ་སོགས་བསྟན་པའི་བྱ་བའི་མཛད་འགན་རྒྱ་ཆེར་བཞེས། སྔ་ཕྱི་མི་ལོ་བཅུ་གཅིག་ཙམ་མཁན་ཁྲིར་བཞུགས་ནས་ཁྲི་ལས་ཟུར། རབ་བྱུང་བཅུ་བདུན་པའི་ཤིང་ཕག་ ༡༩༩༥ ལོར་འཇམ་མགོན་རྒྱལ་བ་གཉིས་པའི་གསེར་ཁྲིར་ཞབས་ཟུང་འཁོར་ལོའི་རེ་ཁ་མངོན་པར་བཀོད་དེ་མདོ་སྔགས་ཀྱི་བཀའ་ཆོས་རྒྱ་ཆེར་གནང༌། སྔ་ཕྱིར་ནུབ་གླིང་ཨ་རིའི་རྒྱལ་ཁབ་དང༌། དེ་བཞིན་ཐེ་ཝན། སིང་ག་པུར། བལ་ཡུལ། འབྲུག་ཡུལ་སོགས་ཡུལ་གྲུ་དུ་མར་ཞབས་སོར་འཁོད་དེ་ཆོས་གསུངས།
ལྕགས་སྦྲུལ་ཕྱི་ལོ་ ༢༠༠༡ ལོར་ཝཱར་ཎ་མཐོ་སློབ་ཁང་ནས་རྗེ་འདི་ཉིད་དང་རྒྱ་གར་མཁས་པ་གྲགས་ཅན་གཉིས་ལ་ཆེས་སྙན་གྲགས་ཆེ་བའི་འཕགས་བོད་ཤན་སྦྱར་གྱི་ཕུལ་བྱུང་མཁས་པའི་གཟེངས་རྟགས་ཕུལ། ཕྱི་ལོ་ ༢༠༠༡ གཞན་ཡང་དགའ་འབྲས་གཉིས་སུ་སྔ་ཕྱིར་དགེ་ཚུལ་སློང་སྟོང་ཕྲག་ལྷག་བསྒྲུབས་པ་དང༌། གསུང་གི་ལེགས་བཤད་ཀྱང༌། རྒྱུད་སྨད་ཆོས་འབྱུང་དང༌། རྒྱུད་སྨད་ཀྱི་བླ་རྒྱུད་གསོལ་འདེབས་བསྡུས་པ། བླ་སྤྲུལ་ཁག་དུ་མའི་ཞབས་བརྟན་གསོལ་འདེབས་འདྲ་མིན། རིག་བྱེད་མའི་བསྟོད་པ་དང༌། གཡང་འགུགས་སྲིད་གསུམ་དབང་དུ་འགུགས་པའི་ལྕགས་ཀྱུ། བྱམས་པའི་བསྟོད་ཆེན། བདེ་བ་ཅན་དུ་སྐྱེ་བའི་སྨོན་ལམ་སོགས་ཆོས་ཚན་མང་པོ་ཞིག་མཛད།
ཕྱི་ལོ་ ༢༠༠༢ ལོར་ཁྲི་ལས་ཟུར་ནས་ཀྱང་ལྷ་སྔགས་ཏིང་འཛིན་གྱི་རྣལ་འབྱོར་ལ་བརྩོན་ཞོར་དོན་གཉེར་ཅན་གྱི་སློབ་ཚོགས་ཤིན་ཏུ་མང་པོར་མདོ་སྔགས་ཀྱི་དཔེ་ཁྲིད་དང༌། དབང་ལུང་མན་ངག་གི་བཀའ་ཆོས་གསུང་བཞིན་དགེ་ལྡན་བསྟན་པའི་རྒྱལ་མཚན་བླ་ནས་བླར་བཏེག །མཐར་དམ་པ་རང་ཉིད་དགུང་ལོ་ ༧༩ ཕེབས་པར་རབ་བྱུང་བཅུ་བདུན་པའི་ས་བྱི་སྤྱི་ལོ་ ༢༠༠༨ ལོར་སྐུ་ཞི་བར་གཤེགས། ཐུགས་དམ་ལ་ཟླ་བ་གཅིག་མ་ཟིན་ཙམ་བཞུགས་ཏེ་དམིགས་བསལ་གྱི་མཚན་སྙན་བྱུང་། གདུང་རྟེན་དངུལ་གྱི་མཆོད་སྡོང་བྱིན་རླབས་ཀྱི་མཚན་ཁ་འབར་བཞིན་པར་འབྲས་བློ་གླིང་གྲྭ་ཚང་དང་ཚ་བ་ཁང་ཚན་གཉིས་སུ་བཞུགས། [ མཆན། ཁྲི་ཟུར་བློ་བཟང་ཉི་མ་དམ་པ་འདི་ཆོས་འབྱུང་འདི་མཛད་པ་པོ་ཡིན་པས་དམ་པ་རང་ཉིད་ཀྱི་རྣམ་ཐར་ཧ་ཅང་བསྡུས་པ་ཞིག་ལས་གསུངས་མི་འདུག་པས་། ཕྱིས་དགའ་ལྡན་ཁྲི་རབས་ཀྱི་རྣམ་ཐར་ནས་བཏུས་བསྒྲིགས་ཞུས་ཏེ་ཅུང་རྒྱས་སུ་བཏང་། ]
དེའི་རྗེས་སུ། དགེ་བའི་བཤེས་གཉེན་ཆེན་པོ་དགེ་ཨུ་རྒྱན་ཚེ་བརྟན་མཆོག་ཕེབས་པ་ཡིན། སྐྱེས་ཆེན་འདི་ཡབ་དམ་པ་བསོད་ནམས་ལྷ་རྒྱལ་དང་། ཡུམ་ལྷུན་གྲུབ་སྒྲོལ་མ་གཉིས་ཀྱི་སྲས་སུ་ཤིང་མོ་ཡོས་ལོ་སྤྱི་ལོ་ ༡༩༢༥ ལོར་ཁམས་བྲག་གཡབ་དང་དེའི་གྲོང་སྡེ་ཡུལ་གཤིག་ཅེས་པའི་ས་ཁུལ་ཕུ་ལོ་ཚང་ཞེས་པའི་ཁྱིམ་ཚང་དུ་སྐུ་འཁྲུངས། ཆུང་གཞོན་ནུའི་དུས་ནས་སྔོན་གྱི་གོམས་འདྲིས་སམ་བག་ཆགས་བཟང་པོའི་རྟགས་མཚན་མངོན་པར་གསལ་བ་ཀུན་གྱི་མཐུན་སྣང་དུ་གྲུབ། ལྷག་པར་འཁོར་བའི་རང་མདངས་ཆེས་ཆེར་གཟིགས་ཤིང་ཐར་པའི་ཕན་ཡོན་ཐུགས་ལ་འཁྲུངས་ནས་རྒྱུ་རྐྱེན་བཟང་པོ་བཅས་དབུས་གྱུར་ཆོས་ཀྱི་ཞིང་དུ་ཕེབས་ཏེ། རྒྱལ་བའི་བསྟན་པ་ལ་རབ་ཏུ་བྱུང་།
སེར་བྱེས་མཁས་སྙན་གྲྭ་ཚང་དུ་ཞུགས་ཏེ་གཞུང་ལུགས་རབ་འབྱམས་ལ་ཐུགས་བརྩོན་ཆེན་པོས་སྦྱངས་ཏེ་སྤྱི་ལོ་ ༡༩༥༨ དགེ་བཤེས་ལྷ་རམས་པའི་མཚན་རྟགས་བཞེས། ལོ་དེ་ཉིད་དུ་སྐྱབས་རྗེ་ཁྲི་བྱང་རྡོ་རྗེ་འཆང་གིས་བཀའ་ཡིས་སྐུལ་བ་ལྟར་བོད་ལྗོངས་ལྷ་སར་དཔལ་ལྡན་སྨད་རྒྱུད་གྲྭ་ཚང་དུ་རྒྱུད་ལ་ཞུགས་ཏེ་གསང་ཆེན་རྒྱུད་སྡེ་བཞི་ལ་གསན་བསམ་གནང་འགོ་ཚུགས། སྐབས་དེར་རྒྱ་དམར་གུང་བྲན་རིང་ལུགས་པས་བོད་བཙན་བཟུང་བྱེད་པའི་སྐབས་ཡིན་དུས། སྨད་རྒྱུད་པ་ཞོགས་དང་པོའི་ཆོས་ཐོག་ནས་རྒྱ་གར་དུ་བཙན་བྱོལ་དུ་ཕེབས། སླར་ཡང་དགུང་ལོ་ ༤༨ པ་ཆུ་སྟག་སྤྱི་ལོ་ ༡༩༦༢ ལོར་རྒྱ་གར་བྱང་ཕྱོགས་ཌལ་ཧོར་དུ་དཔལ་ལྡན་སྨད་རྒྱུད་གྲྭ་ཚང་དུ་ཞུགས་ཏེ་གསང་ཆེན་རྒྱུད་སྡེ་བཞི་ལ་གསན་སྦྱོང་མུ་མཐུད་མཛད།
དགུང་ལོ་ ༥༣ སྤྱི་ལོ་ ༡༩༦༧ ཙམ་ལ་༧གོང་ས་ཆེན་པོའི་བཀའ་དགོངས་ལྟར་ཕྱི་རྒྱལ་སུད་སི་རི་ཀོང་དགོན་པའི་དབུ་བླ་མཛད་དེ་ཁུལ་དེ་དང་ཡུ་རོབ་ཁུལ་ལ་བསྟན་འགྲོའི་བྱ་བ་རྒྱ་ཆེར་མཛད། སྤྱི་ལོ་ ༡༩༧༤ ལོར་༧གོང་ས་སྐྱབས་མགོན་ཆེན་པོའི་ཞལ་སྔ་ནས་དཔལ་ལྡན་སྨད་རྒྱུད་གྲྭ་ཚང་གི་བླ་མ་དབུ་མཛད་བསྐོ་བཞག་གི་ཕྱག་རྟགས་རིན་པོ་ཆེ་སྤྱི་ཕེབས་བྱུང་སྟེ་རྒྱ་གར་དུ་ཕེབས་ནས་གྲྭ་ཚང་སྒྲིག་སྲོལ་ལྟར་བླ་མ་དབུ་མཛད་ཀྱི་མཛད་ཁུར་ཇི་ཡོད་ཉམས་ཆག་མེད་པར་མཛད། དེ་ནས་ ༡༩༧༧ ལོར་སྨད་རྒྱུད་པའི་མཁན་ཁྲིར་ཕེབས་ཏེ། འཆད་ཉན་སོགས་མཁན་པོའི་མཛད་ཁུར་བཞེས་ཡོད་ཀྱང་། ལོ་དུས་ལོ་གསུམ་མ་ཚང་གོང་དགོས་དབང་གིས་ཕྱི་རྒྱལ་ལ་ཕེབས་དགོས་བྱུང་སྟབས། དེའི་གོང་གི་མཁན་ཟུར་ཡིན་པ་ཕ་ར་འཇམ་དཔལ་གཞན་ཕན་མཆོག་ནས་མཁན་ཚབ་མཛད་དགོས་པ་བྱུང་ཞིང་། [ ལོ་དུས་མ་ཚང་བར་ཁྱུར་དགོས་བྱུང་བས་སྤྱིའི་ཕྱག་སྲོལ་ལྟར་མཁན་རྒྱུན་གསོལ་འདེབས་མ་བྱུང་ངོ་། ། ][ མཁན་ཆེན་འདིའི་རྣམ་ཐར་རྒྱས་པ་སེར་བྱེས་ཏྲེ་ཧོར་རྫ་ཐུབ་བསྟན་སྤྲུལ་སྐུས་བརྩམས་པའི་ཟབ་ཡངས་ཆུ་གཏེར་མཛེས་པའི་རླབས་ཕྲེང་དུ་གཟིགས་འཚལ། ]
༨༨] ལ་དྭགས་རི་རྫོང་སྲས་རིན་པོ་ཆེ་རྗེ་བཙུན་ཐུབ་བསྟན་ཉི་མ། [ བྱང་ཆོས་དང་། དགའ་ལྡན་ཁྲིར་ཕེབས། ]
ཐུབ་དབང་རྣམ་འདྲེན་བཞི་པའི་ལུང་རྟོགས་ཀྱི། །བསྟན་པའི་པད་ཚལ་རབ་ཏུ་བཞད་པའི་ཕྱིར། །
བཤད་དང་སྒྲུབ་པའི་འོད་ཟེར་འབུམ་གྱེས་པའི། །ཟླ་བྲལ་ཆོས་ཀྱི་ཉི་མར་གསོལ་བ་འདེབས། ། [ ༡༩༢༧-༢༠༢༢ ]
ཞེས་པ་ལྟར་ལ་དྭགས་རི་རྫོང་སྲས་རིན་པོ་ཆེ་རྗེ་བཙུན་ཐུབ་བསྟན་ཉི་མ་དཔལ་བཟང་པོ་མཆོག་མཁན་ཁྲིར་ཕེབས། དམ་པ་འདི་ ༡༩༢༧ ། ལོར་མང་སྤྲོ་ཞེས་པའི་མཁར་དུ་མེས་དབོན་བཙན་པོའི་གདུང་རྒྱུད་སྐྱབས་རྗེ་རྒྱལ་སྲས་བ་ཀུ་ལ་རིན་པོ་ཆེའི་སྐུ་མཆེད་དུ་ཡབ་རྒྱལ་པོ་ཕུན་ཚོགས་རྣམ་རྒྱལ་དང༌། ཡུམ་ཚེ་རིང་ལྷ་སྒྲོན་གཉིས་ཀྱི་སྲས་སུ་སྐུ་འཁྲུངས། ༧གོང་ས་བཅུ་གསུམ་པ་ཆེན་པོས་ཡང་སྲིད་འཁྲུལ་བྲལ་ངོས་འཛིན་གནང་སྟེ་ལ་དྭགས་རི་རྫོང་དགོན་གྱི་སྲས་གྲུབ་པའི་དབང་ཕྱུག་གི་སྐུ་ཕྲེང་གསུམ་པ་འདི་ཡིན།
དགུང་ལོ་བཞི་ཙམ་ནས་རི་རྫོང་དགོན་དུ་བཞུགས། སྐུ་གོང་མའི་སློབ་མ་དགེ་རྒན་ཚུལ་ཁྲིམས་ཆོས་བཟང་མཆོག་གིས་བྱམས་བརྩེས་བསྐྱངས་ཏེ་ཀློག་སློབ་པ་ནས་བཟུང་དགོན་པའི་འདོན་ཆོས་སྤྱོད་ཕལ་ཆེར་ཐུགས་འཛིན་གནང་། རྒྱལ་སྲས་བ་ཀུ་ལ་རིན་པོ་ཆེ་ལས་རབ་དུ་བྱུང་སྟེ་མཚན་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་གསོལ། དགེ་ཚུལ་གྱི་བླང་འདས་དང༌། སྡོམ་གསུམ་གྱི་དཔེ་ཁྲིད་གནང་། ལམ་རིམ་ཆེན་མོའི་ས་བཅད་དང་རྒྱན་འཇུག་སོགས་བློ་འཛིན་གནང་། དགེ་བའི་བཤེས་གཉེན་ཀའུ་བརྩོན་འགྲུས་མཆོག་གི་དྲུང་ནས་བསྡུས་གྲྭ་དཔེ་ཁྲིད་་ཞུས་ཏེ་རིགས་ལམ་ཆགས་ཐུབ་པ་བྱུང༌། དགུང་ལོ་བཅུ་བཞི་དང་བཅོ་ལྔ་ལ་དཔེ་ཐུབ་དགོན་གྱི་དགེ་བའི་བཤེས་གཉེན་དཀའ་ཆེན་ཡེ་ཤེས་དོན་གྲུབ་མཆོག་གི་དྲུང་ནས་སྙན་སུམ་སོགས་ཐུན་མོང་བའི་རིག་གནས་ཀྱང་གང་འཚམས་སྦྱངས།
༡༩༤༥ ལོར་དཀའ་ཆེན་ཡེ་ཤེས་དོན་གྲུབ་དང་ལྷན་དུ་བོད་དུ་བསྐྱོད་དེ་དགའ་ལྡན་ཁྲི་ཆེན་གོ་བཞི་པ་ཆེན་པོ་རྗེ་བཙུན་ལྷུན་གྲུབ་བརྩོན་འགྲུས་མཆོག་གི་དྲུང་ནས་ལམ་རིམ་ཆེན་མོ་མཆན་བཞི་སྦྲགས་ཀྱི་དཔེ་ཁྲིད་དང་། འདུལ་བ། རྣམ་འགྲེལ་སོགས་གཞུང་ཆེན་ཁག་ལ་དཔེ་ཁྲིད་ཞུས་ཞིང༌། སྤྱོད་འཇུག་ཆེན་མོ་རྒྱལ་ཚབ་རྗེའི་རྣམ་བཤད་སྟེང་ནས་བཀྲིན་བསྩལ་བ་སོགས་ལོ་གསུམ་ལྷག་ཙམ་རིང་ཐུགས་བརྩེ་ཆེན་པོས་བསྐྱངས་ཤིང༌། དགུང་ལོ་ཉི་ཤུ་ ༡༩༤༦ ལོར་བསྙེན་པར་རྫོགས་པ་དགེ་སློང་གི་སྡོམ་པ་མནོས་ཏེ་ཚུལ་ཁྲིམས་ཕྲ་རགས་རྣམས་མིག་འབྲས་བཞིན་བསྲུངས། དངུལ་ཆུ་སྤྲུལ་པའི་སྐུ་ལས་རྗེ་ཡབ་སྲས་གསུམ་གྱི་གསུང་འབུམ་སོགས་ཀྱི་བཀའ་ལུང་གསན། བློ་གསལ་གླིང་གྲྭ་ཚང་དུ་ཆོས་ཞུགས་མཛད་ནས། རྒྱས་པ་མཁན་ཟུར་བློ་བཟང་འབྱུང་གནས་དཔལ་བཟང་པོ་མཆོག་རྩ་བའི་ཡོངས་འཛིན་ཏུ་བསྟེན་ནས། བསྡུས་གྲྭ་ནས་བཟུང་ཕར་ཕྱིན་ཆ་ཚང་དཔེ་ཁྲིད་གསན། དམ་པ་གང་ཉིད་དགོངས་པ་རྫོགས་རྗེས་ཏྲེ་ཧོར་དགེ་བཤེས་བསོད་ནམས་མགོན་པོ་མཆོག་དང༌། ཤག་སྐོར་མཁན་རིན་པོ་ཆེ་ཉི་མ་རྒྱལ་མཚན་མཆོག རྒྱས་པ་མཁན་པོ་སྟོད་མཚམས་བླ་མ་རིན་པོ་ཆེ་འཇམ་དཔལ་འཕྲིན་ལས་ཡོན་ཏན་རྒྱ་མཚོ་མཆོག་དང༌། བློ་གླིང་མཁན་རིན་པོ་ཆེ་རྗེ་བཙུན་པདྨ་རྒྱལ་མཚན་མཆོག །ཁུ་ནུ་དགེ་བཤེས་རིག་འཛིན་བསྟན་པ་མཆོག རྒྱལ་རོང་མཁན་ཟུར་རིན་པོ་ཆེ་རྗེ་བཙུན་འཇམ་དཔལ་བསམ་འཕེལ་སོགས་བསྟེན་ནས་འདུལ་མཛོད་གཙོ་བོར་གྱུར་པའི་མདོ་སྔགས་ཀྱི་ཆོས་མང་དུ་གསན། འདུལ་བ་ལོ་གཅིག་ལྷག་ཙམ་རིང་གཟིགས་པས་མཚོན། བག་ཡོད་ཞི་དུལ་གྱི་སྒོ་ནས་ཚོགས་ཆོས་ར་ཆད་མེད་ངང་གསན་བསམ་ཚུལ་བཞིན་མཛད། ༥༩ རྒྱ་གར་ཌལ་ཧོར་དུ་ལོ་གཅིག་ལྷག་ཙམ་རིང་འདུལ་མཛོད་ཀྱི་བརྒལ་རྩོད་གནང་།
༡༩༧༢ ལོར་ས་གནས་དེར་དགེ་བཤེས་ལྷ་རམས་འཕར་མའི་མཚན་རྟགས་བཞེས། དེ་འཕྲལ་ཧུན་སུར་གཞིས་ཆགས་སུ་དཔལ་ལྡན་སྨད་རྒྱུད་དུ་སྒྲིག་ཞུགས་མཛད་ནས་འགྲེལ་བ་བཞི་སྦྲགས་སོགས་སྔགས་ཀྱི་འཆད་ཉན་ལེགས་གྲུབ་ཐོག་ལོ་གཉིས་རིང་རྒྱུད་པའི་ཆོས་ཐོག་ཆ་ཚང་ཚུལ་བཞིན་སྐོར་བར་མཛད་པ་མ་ཟད་རྡུལ་ཚོན་གྱི་དཀྱིལ་འཁོར་བཞེངས་རྒྱུར་སྦྱོང་བརྡར་གནང་སྟེ་དངོས་སུ་དཀྱིལ་འཁོར་བཞེངས། ༡༩༧༤ ལོར་རྒྱུད་པའི་དགེ་སྐོས་བཞེངས། ༡༩༧༨ ལོར་སྨད་རྒྱུད་གྲྭ་ཚང་གི་བླ་མ་དབུ་མཛད་ཀྱི་ཕྱག་རྟགས་ཕེབས་ཏེ་ལོ་གཅིག་རིང་བླ་མ་དབུ་མཛད་གནང༌སྟེ་སྒྲིག་ལམ་སྣོན་སྡོམ་དང་ཕྱག་སྲོལ་བཟང་པོ་རྣམས་མི་ཉམས་གོང་འཕེལ་ལ་ཐུགས་ཁུར་ཆེན་པོ་བཞེས། དེའི་རྗེས་ལོ་གསུམ་རིང་མཁན་པོ་གནང་སྐབས་གྲྭ་ཚང་གི་སྒྲིག་ལམ་ཀུན་སྤྱོད་ཆོས་འཆད་ཉན་སོགས་སྔོན་བྱོན་གོང་མའི་མཛད་བཟང་ལྟར་བསྟན་པའི་མིག་རྒྱན་དུ་འགྲོ་བར་མཛད། ཕྱི་ལོ ༡༩༧༩ ལོར་གཙོ་བོར་༧རྒྱལ་བའི་བཀའ་དགོངས་ལྟར་དཔལ་ལྡན་སྨད་རྒྱུད་པའི་གསར་བུ་བ་རྣམས་ཀྱི་ཆེད་ཡུལ་དུས་གནས་སྐབས་དང་བསྟུན། དེང་དུས་ཕྱི་ནང་གི་སློབ་སྦྱོང་ཡར་རྒྱས་ཀྱི་སླད་སློབ་གྲྭ་གསར་འཛུགས་ཀྱི་འགོ་ཚུགས།
རྒྱུད་སྨད་མཁན་པོ་ཟིན་རྗེས། ༡༩༨༤ ལོར་སླར་ཡང་༧གོང་ས་མཆོག་གིས་བློ་གླིང་མཁན་པོར་ཕྱག་རྟགས་བསྩལ་ཏེ་ལོ་དྲུག་ལྷག་ཙམ་བློ་གླིང་མཁན་པོ་གནང་སྟེ་ཕྱག་ལས་ཁུར་ཆེན་བཞེས་ཏེ་གྲྭ་ཚང་གི་སྒྲིག་ལམ་དང་རྒྱུགས་སྤྲོད་སོགས་དམ་དྲག་གནང་སྟེ་སློབ་གཉེར་ལ་ཤུགས་སྣོན་ཆེན་པོ་བྱུང་། དེའི་རྗེས་ལ་དྭགས་བསམ་གཏན་གླིང་དགོན་དུ་ལོ་གསུམ་ལྷག་ཙམ་རིང་འཇིགས་བྱེད་དཔའ་གཅིག་གི་བསྙེན་ཆེན་བཞུགས། དེའི་རྗེས་སུ་ ༡༩༩༥ ཕྱི་ཟླ་ ༩ ཚེས་ ༡ ཉིན་འཇམ་མགོན་བསྟན་པའི་གསལ་བྱེད་དགའ་ལྡན་བྱང་རྩེ་ཆོས་རྗེའི་ཁྲིར་ཕེབས། རབ་བྱུང་བཅུ་བདུན་པའི་ ༡༩༩༩ ལོར་འབྲས་སྤུངས་དཔེ་ཐུབ་ཁམས་ཚན་དུ་དགེ་འདུན་བརྒྱ་ཕྲག་དུ་མར་བྱང་ཆུབ་ལམ་རིམ་ཆེན་མོའི་བཀའ་ཆོས་གནང༌། རབ་བྱུང་བཅུ་བདུན་པའི་ ༢༠༠༠ ལོར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཆོས་ཞུ་བ་དད་ལྡན་སྟོང་ཕྲག་དུ་མར་རྒྱལ་བའི་བཀའ་འགྱུར་རིན་པོ་ཆེ་འགྱུར་རོ་ཅོག་གི་ལྗགས་ལུང་གནང༌། སྔ་ཕྱིར་སློབ་གཉེར་བ་མང་དག་ཅིག་ལ་རབ་བྱུང་དང་དགེ་ཚུལ་གྱི་བསླབ་སྡོམ་གནང༌།
སྤྱི་ལོ་ ༢༠༠༩ ཟླ་ ༡༠ པའི་ནང་དགའ་ལྡན་གསེར་ཁྲི་ལ་ཕེབས་ཏེ་བསྟན་འགྲོའི་བྱ་བ་རྒྱ་ཆེར་མཛད་དེ་སྐུ་ཚེ་མཛད་འཕྲིན་མཐར་ཕྱིན་ཏེ་ཕྱི་ལོ་ ༢༠༢༢ ཕྱི་ཟླ་ ༡༢ ཟླ་དཀྱིལ་ལ་གདུལ་བྱ་རྟག་འཛིན་ཅན་རྣམས་ཆོས་ལ་སྐུལ་ཕྱིར་རེ་ཞིག་དགོངས་པ་ཆོས་དབྱིངས་སུ་ཐིམ་ཚུལ་པ་དང་། ཤུལ་ལུས་གདུལ་བྱ་རྣམས་སེམས་གདུང་མྱ་ངན་གྱི་གནས་སུ་ལྷུང་ཞིང་། སླར་ཡང་བསྟན་འགྲོའི་མགོན་དུ་ཡང་སྲིད་ཟླ་གཞོན་གསར་པ་མྱུར་བྱོན་གྱི་གསོལ་འདེབས་སྨོན་ལམ་དང་དགོངས་རྫོགས་ཀྱི་མཆོད་སྤྲིན་རྒྱ་ཆེར་སྤྲོས་སོ། །མཆན། རྣམ་ཐར་རྒྱས་པ་ཁྲི་རབས་དང་གང་གི་སློབ་མ་ཚོས་བརྩམས་པ། རི་བོའི་ཁྲོད་ཀྱི་འོད་སྣང་། སོགས་ལས་མཁྱེན་པར་འཚལ།
བློ་གྲོས་ཆ་ཤས་རེ་ཡང་དེ་ཉིད་ཆོས། །བཟང་པོའི་འཕྲིན་ལས་འདུས་སྡེའི་དཔལ་དུ་ཤར། །
གྲགས་པའི་འོད་ཟེར་འཛམ་གླིང་ཕྱོགས་བཅུར་འཕྲོས། །དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེ་ནས་དགའ་བྱང་ཕ་ར་བློ་བཟང་འཕྲིན་ལས་མཆོག་སྨད་རྒྱུད་པའི་ཁྲིར་ཕེབས་པ་ཡིན་ཏེ། དམ་པ་འདི་ནི་འཁྲུངས་ཡུལ་ཁམས་འབའ་ཡུལ། གཞོན་ནུ་ཉིད་ནས་རབ་ཏུ་བྱུང་། དབུས་སུ་བྱོན་ཏེ་དགའ་ལྡན་བྱང་རྩེ་གྲྭ་ཚང་དུ་ཆོས་ཞུགས་མཛད་དེ། དགའ་ལྡན་གཞིས་བྱེས་གཉིས་སུ་གཞུང་ཆེན་བཀའ་པོད་ལྔ་ལ་སློབ་གཉེར་ལ་འགྲུས་པར་མཛད་ཅིང་ལེགས་པར་ཐུགས་སུ་ཚུད། འཕགས་ཡུལ་ཝར་ཎཱ་མཐོ་སློབ་དུ་ཕེབས་ནས་སློབ་གཉེར་མུ་མཐུད་དེ་གནང་། དེ་རྗེས་གདན་ས་ཁག་ཏུ་ལྷ་རམས་པའི་གྲྭ་སྐོར་དམ་བཅའ་བཞག་སྟེ་ལྷ་རམས་ཨང་དང་པོའི་གྲས་ཀྱི་མཚན་གནས་བཞེས། དེ་ནས་ཕྱི་ལོ་ ༡༩༧༠ ལོར་དཔལ་ལྡན་སྨད་རྒྱུད་གྲྭ་ཚང་དུ་ཕེབས་ཏེ་སྔགས་པྱོགས་ཀྱི་སློབ་གཉེར་སྤྱི་དང་ལྷག་པར་དམ་ཆོས་འགྲེལ་པ་བཞི་སྦྲགས་དང་། རྒྱུད་ཀྱི་ཊཱིཀྐ་གཉིས་ལ་གསན་སྦྱོང་ཚུལ་བཞིན་མཛད། སྐབས་དེ་བསྟུན་གྱི་གནས་སྟངས་འོག་གཞིས་ཆགས་ཀྱི་ཞིང་ལས་སོགས་ལའང་ཕེབས་དགོས་བྱུང་།
༧གོང་ས་ཆེན་པོས་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་ཕེབས་ལྟར་དང་དུ་བླངས་ཏེ་བླ་དབུའི་མཛད་འགན་ལེགས་པར་མཛད། བློ་འཛིན་གྱི་ཐུགས་རིགས་དེ་ཙམ་མི་མངའ་ཡང་བརྩོན་པ་དྲག་པོས་རྒྱུད་ཀྱི་ཊཱིཀྐ་སོགས་ཐུགས་འཛིན་དགོས་པ་རྣམས་ཡོངས་སུ་རྫོགས་པར་ཐུགས་འཛིན་གནང་སྟེ་མཚན་སྙན་གྱིས་ཁྱབ། དེ་ནས་ཕྱི་ལོ་ ༡༩༨༡ ལོར་ཉིད་ཀྱི་དགུང་གྲངས་ ༥༧ ཐོག་སྨད་རྒྱུད་པའི་མཁན་ཁྲིར་ཕེབས། ལོ་གསུམ་འཆད་ཉན་ཚང་བར་མཛད། མཁན་པོ་ཟུར་ནས་མོན་གྷོར་རང་གི་གདན་ས་དགའ་ལྡན་བྱང་རྩེ་གྲྭ་ཚང་དུ་གྲྭ་རྒྱུན་གསར་བུ་གཙོ་བོར་གྱུར་པས་དོན་གཉེར་ཅན་རྣམས་ལ་དཔེ་ཁྲིད་ཀྱི་བྱ་བས་དུས་འདའ་བར་མཛད། མཐར་དགོངས་པ་ཆོས་དབྱིངས་སུ་ཐིམ་ཞིང་། སྐུ་ཡི་ཡང་སྲིད་འཁྲུལ་བྲས་ཡང་བྱོན་ཟིན་ཏེ་གདན་ས་དེ་ཉིད་དུ་སློབ་གཉེར་ལ་གཞོལ་བཞིན་པ་འདི་ལགས་སོ། །
༩༠] གཙང་པ་དགེ་བཤེས་བློ་བཟང་བསྟན་འཛིན། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་གྲོས་བཟང་པོས་མདོ་དང་རྒྱུད་སྡེ་ཡི། །ཟབ་མོའི་གནད་རྣམས་ཇི་བཞིན་རབ་བཀྲོལ་ཏེ། །
རྒྱལ་བསྟན་སྙིང་པོ་འཛིན་ལ་ཟླ་བྲལ་བ། །དཔལ་ལྡན་བླ་མའི་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེ་ནས་སེར་བྱེས་གཙང་པ་དགེ་བཤེས་བློ་བཟང་བསྟན་འཛིན་མཆོག་ཕེབས་པ་ཡིན་ཏེ། དམ་པ་འདི་ཕྱི་ལོ་ ༡༩༣༥ ལོར་གཙང་ལྷ་རྩེ་ཁུལ་དུ་སྐུ་འཁྲུངས། སྐུ་གཞོན་ནུ་ཉིད་ནས་མཁན་ཆེན་བསྟན་འཛིན་རྒྱལ་མཚན་གྱི་དྲུང་ནས་རྒྱལ་བའི་བསྟན་པ་ལ་རབ་ཏུ་བྱུང་སྟེ་༧གོང་ས་ལྔ་པ་ཆེན་པོས་ཕྱག་བཏབ་པའི་གཙང་ལྷ་རྩེ་དགོན་དུ་ཆོས་ཞུགས་གནང་། དགོན་པའི་སྒྲིག་སྲོལ་ལྟར་རྒྱན་འཇུག་གཉིས་དང་ཆོས་སྤྱོད་རབ་གསལ་སོགས་ཆོས་སྤྱོད་ཁག་ཐུགས་འཛིན་གནང་སྟེ་ཚོགས་རྒྱུགས་ལེགས་པར་ཕུལ། དེར་བསྡུས་གྲྭ་ནས་སློབ་གཉེར་དབུ་འཛུགས་གནང་། ལྷག་པར་༸རྒྱལ་དབང་ལྔ་པ་ཆེན་པོའི་དབུ་ཕར་འདུལ་མཛོད་བཅས་ཆོས་སྡེ་དེའི་ཡིག་ཆ་ཁག་ཐུགས་འཛིན་གནང་སྟེ་དགེ་འདུན་པའི་དབུས་སུ་ཚོགས་རྒྱུགས་ཕུལ།
དགུང་ལོ་ ༡༦ ཐོག་དབུས་སུ་ཕེབས་ཏེ་སེར་བྱེས་གྲྭ་ཚང་དུ་སྒྲིག་ཞུགས་གནང་སྟེ་བྱེས་གཙང་དུ་བཞུགས། སེར་བྱེས་མཁན་ཟུར་ལྷུན་གྲུབ་ཐབས་མཁས་མཆོག་དང་། དགེ་རིག་གསལ་མཆོག ལྷག་པར་དགེ་བཤེས་ངག་དབང་དགེ་འདུན་སོགས་བསམ་སྦྱོར་གཉིས་ཀྱིས་ཚུལ་བཞིན་བསྟེན་ཏེ་གཞུང་ཆེན་ཁག་ལ་སློབ་གཉེར་འགྲུས་པར་གནང་། གཞུང་གསར་འཛིན་གྲྭའི་སྐབས་རིགས་ཆུང་ཚོགས་ལངས་བཞེངས་སྐབས་ནས་ཕྱག་དཔེ་བཟང་བའི་སྙན་པ་བྱུང་། དགུང་ལོ་ཉེར་གསུམ་ཐོག་༧སྐྱབས་རྗེ་ཁྲི་བྱང་རིན་པོ་ཆེའི་ཞལ་སྔ་ནས་བསྙེན་རྫོགས་བསྒྲུབས་ཏེ་བཙུན་པའི་བརྟུལ་ཞུགས་བཟུང་། དགུང་ལོ་ཉེར་ལྔ་དང་ཕྱི་ལོ་ ༡༩༥༩ ལོར་བོད་དུས་འགྱུར་སྐབས་སྤྱི་མཚུངས་རྒྱ་གར་དུ་བཙན་བྱོལ་ཕེབས། དུས་ཡུན་གང་འཚམས་ལམ་བཟོར་ཡང་ཕེབས་དགོས་བྱུང་། དེའི་རྗེས་སྦག་ས་ཆོས་སྒར་དུ་ཕེབས་ཏེ་སེར་བྱེས་མཁན་ཟུར་རིན་པོ་ཆེ་བློ་བཟང་དབང་ཕྱུག་སོགས་བླ་མར་བསྟེན་ནས་འདུལ་མཛོད་ཀྱི་སློབ་གཉེར་གནང་། སྐབས་དེ་ཙམ་ནས་གྲྭ་རྒྱུན་གསར་པར་དཔེ་ཁྲིད་དགེ་རྒན་ཡང་མཛད། དེ་ནས་ཕྱི་ལོ་ ༡༩༧༠ ལོར་སེ་ར་ཐེག་ཆེན་གླིང་རྒྱ་གར་ལྷོ་ཕྱོགས་སུ་གནས་སྤོས་དང་། ཤིང་ནགས་གཅོད་བྲེགས་སོགས་གཞིས་ཆགས་ཀྱི་ཕྱག་ལས་ལོ་མང་གནང་དགོས་བྱུང་། ཞོར་དུ་སློབ་གཉེར་མཇུག་སྐྱོང་གནང་ཞིང་། དོན་གཉེར་ཅན་མང་པོར་དཔེ་ཁྲིད་ཀྱི་བྱ་བ་ཡང་མུ་མཐུད་དེ་ལེགས་པར་མཛད། དགེ་ལུགས་ཀྱི་རྒྱུགས་སྤྲོད་རིམ་པས་ཕུལ་ཐོག །
ཕྱི་ལོ་ ༡༩༧༨ ལོར་དགེ་བཤེས་ལྷ་རམས་པའི་མཚན་རྟགས་བཞེས། ༧གོང་ས་ཆེན་པོ་སེ་རར་ཆིབས་སྒྱུར་ཞིག་གི་སྐབས་རྩོད་རྒྱུགས་བཞེས་དུས་ཕྱག་དཔེ་འགྲན་ཟླ་བྲལ་བ་ཡོད་པས་ཐུགས་དགྱེས་མཉེན་ཆེན་པོ་བྱུང་སྟེ་ཟུར་མཇལ་ཡང་གནང་། ༧གོང་ས་སྐྱབས་མགོན་ཆེན་པོ་གཟིམ་ཆུང་མཇལ་ཁ་ཞིག་གི་སྐབས་རྒྱུད་པར་ཞུགས་དགོས་པའི་བཀའ་སློབ་སྤྱི་ཕེབས་ལྟར་དང་ལེན་ཞུས་ཏེ་དཔལ་ལྡན་སྨད་རྒྱུད་གྲྭ་ཚང་དུ་ཞུགས། སྐབས་དེའི་མཁན་པོ་རི་རྗོང་རིན་པོ་ཆེའི་དྲུང་ནས་དམ་ཆོས་འགྲེལ་པ་བཞི་སྦྲགས་ཀྱིས་གཙོས་བདེ་གསང་འཇིགས་གསུམ་གྱི་བསྐྱེད་རྫོགས་གཞུང་ཆེན་ཁག་ལ་གསན་བསམ་ཐུགས་གཉེར་ཚུལ་བཞིན་མཛད་དེ་ལེགས་པར་དགོངས། སྔོན་ནས་ཆོ་ག་ཐུགས་འཛིན་མང་དུ་མངའ་བའི་སྟེང་གསང་འདུས་རྩ་རྒྱུད་ཐུགས་འཛིན་དང་རྒྱུད་པའི་ཆོ་ག་ཕྱག་ལེན་དང་ཐིག་རྡུལ་ཚོན་ལ་ཐུགས་གཉེར་མཛད། ཕྱག་སྲོལ་ལྟར་རྒྱུད་ཀྱི་ཊཱིཀྐ་ལེའུ་གཉིས་པ་ནས་བརྒྱད་པའི་མཚམས་སྦྱར་བར་ཐུགས་འཛིན་གནང་སྟེ་ཕྱི་ལོ་ ༡༩༧༩ ལོར་ཊཱིཀྐ་སྐྱོར་དཔོན་གནང་།
ཕྱི་ལོ་ ༡༩༨༡ ལོར་༧གོང་ས་ཆེན་པོས་སྨད་རྒྱུད་པའི་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་ཕེབས་ཏེ་བླ་མའི་ཁྲིར་ཕེབས་ཤིང་། དགོན་སྡེ་འདིའི་གསང་སྔགས་ཀྱི་སྔར་སྲོལ་བཟང་པོ་མི་ཉམས་གོང་འཕེལ་དང་སྒྲིག་ཁྲིམས་སྲ་བརྟན་ཆེད་ཐུགས་འགན་ཆེ་བསྐྱེད་མཛད། གྲྭ་རྒྱུན་གསར་བུ་བ་རྣམས་ལ་སྔོན་གྱི་ཕྱག་སྲོལ་བཟང་པོའི་སྟེང་མཚན་ཉིད་ཀྱི་གཞུང་ཆེན་སློབ་གཉེར་དང་ཕྱི་ནང་གི་སྐད་ཡིག་སོགས་དེང་རབས་ཀྱི་ཤེས་ཡོན་བཅས་ཀྱི་སློབ་གྲྭ་དེ་སྔ་མཁན་པོ་གོང་མའི་སྐབས་ནས་ཡོད་པ་དེ་དག་རྒྱ་བསྐྱེད་དང་རྣམ་གྲངས་མང་དུ་བཏང་བའི་ཐུགས་འགན་བཞེས་ཏེ་ཡར་རྒྱས་གོང་འཕེལ་དང་གཞི་རྩ་བརྟན་པོ་ཚུགས་པར་མཛད།
དེ་ལྟར་བླ་མ་ལོ་གསུམ་གཙང་རྗེས་ཕྱི་ལོ་ ༡༩༨༤ ལོར་དཔལ་ལྡན་སྨད་རྒྱུད་པའི་མཁན་ཁྲིར་ཕེབས། དམ་ཆོས་འགྲེལ་པ་བཞི་སྦྲགས་ཀྱིས་དབུས་རྗེ་བཙུན་ཤེས་རབ་སེངྒེའི་རྒྱུད་ཀྱི་ཊཱིཀྐ་དང་བདེ་གསང་འཇིགས་གསུམ་གྱི་བསྐྱེད་རྫོགས་དང་བཀའ་རྒྱ་མ་ཁྲི་ཁང་བརྩི་བཞག་དང་རྫོགས་རིམ་རིམ་ལྔའི་ཁྲི་ཆེན་བརྒྱད་སོགས་ཐུགས་ཐོག་དང་དཔེ་ཐོག་གཉིས་ཀའི་འཆད་ཉན་མང་དུ་གནང་དགོས་པའི་ཕྱག་སྲོལ་ཁྱད་པར་ཅན་ཡོད་པ་རྣམས་གཅིག་ཀྱང་མ་ལུས་པར་ཐུགས་བརྩོན་ཆེན་པོས་འཆན་ཉན་བསྟན་པའི་མིག་རྒྱན་དུ་ཆེ་བར་མཛད། སྐུ་ཚེ་སྟོད་སྨད་བར་གསུམ་དུ་༧གོང་ས་སྐྱབས་མགོན་༧རྒྱལ་དབང་ཡབ་སྲས་ཀྱིས་དབུས་མཁས་གྲུབ་དུ་མའི་དྲུང་ནས་མདོ་སྔགས་ཀྱི་དབང་ལུང་མན་ངག་ཁྲིད་རྒྱུན་མང་དུ་གསན། ཕྱི་ལོ་ ༢༠༡༠ ལོར་བྱང་རྩེ་ཆོས་རྗེའི་ཁྲི་ལ་འཁོད་། སྐབས་དེ་ཙམ་ན་༧གོང་ས་སྐྱབས་མགོན་ཆེན་པོས་རྡོར་གདན་དུ་སེར་སྐྱ་འདུ་འཛོམས་ཆེ་བའི་གསུང་ཆོས་ཀྱི་སར་ཐུགས་དགྱེས་མཉེས་ཆེན་པོས་ཆོས་རྗེ་འདིའི་ཆེ་བ་དང་བསྔགས་པ་མཛད། འདིའི་མཚམས་གང་ཉིད་དགུང་གྲངས་ ༨༣ ཕེབས་ཀྱང་རྒྱུན་དུ་ཕྱི་ནང་གི་དོན་གཉེར་ཅན་དུ་མ་དང་། གདན་སའི་བུ་སློབ་རྣམས་ལ་དབང་ལུང་ཁྲིད་རྒྱུན་སོགས་འདོད་ཆོས་མང་དུ་བསྩལ་ཅིང་སྐལ་བ་དང་ལྡན་པའི་གསར་བུ་བ་བརྒྱ་ཕྲག་དུ་མར་དགེ་ཚུལ་གྱི་སྡོམ་པ་ཡང་མང་དུ་གནང་།
ཕྱི་ལོ་ ༢༠༡༧ ཟླ་བ་ ༠༨ ཚེས་ ༠༤ དགེ་བར་འཇམ་མགོན་རྒྱལ་བ་གཉིས་པའི་རྒྱལ་ཚབ་ཏུ་དགའ་ལྡན་གསེར་ཀྱི་ཁྲི་འཕང་མཐོན་པོར་མངོན་པར་འཁོད། ཁྲི་ལ་འཁོད་ཟིན་ནས་ཀྱང་གདན་ས་ཆེ་ཕྲ་དང་ཕྱི་ནང་གི་དོན་གཉེར་ཅན་དུ་མར་མདོ་སྔགས་ཀྱི་བཀའ་ཆོས་མང་དུ་སྩོལ་ཞིང་། དགའ་ལྡན་ཁྲི་ཐོག་ཁང་གི་དབུ་བཞུགས་ཐོག་རི་བོ་དགེ་ལྡན་པའི་ཁྲིམས་སྒྲིག་སོགས་ལ་ཐུགས་ཞིབ་དང་གཟིགས་རྟོག་དམ་ཟབ་མཛད་ཅིང་བཞུགས་མུར། ཁྲི་ལོ་བདུན་ཧྲིལ་པོར་བདུན་ལེགས་པར་བསྐྱངས་ཏེ་བོད་རྒྱལ་ལོ་ ༢༠༥༡ བོད་ཟླ་ ༠༩ ཚེས་ ༠༢ སྟེ་རྒྱལ་བ་ལྷ་ལས་བབས་པའི་དུས་བཟང་ཉིན་ཁྲི་གཞུག་གི་མཛད་སྒོ་ལེགས་པར་གནང་སྟེ་དགའ་ལྡན་ཁྲི་ཟུར་གྱི་མཚན་གནས་བཞེས་བཞིན་པར་ཆོས་ཀྱི་འཁོར་ལོ་རྒྱ་ཆེར་བསྐོར་ཏོ། །རྣམ་ཐར་རྒྱས་པ་གཞན་དུ་བཞུགས་པས་དེར་གཟིགས་འཚལ།