གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༩༡] སྒོ་སོག་སྤྲུལ་སྐུ་ངག་དབང་གསུང་རབ་བསྟན་འཛིན་དགེ་ལེགས་རྒྱ་མཚོ། [ བྱང་ཆོས་ལ་ཕེབས། ]
ངག་དབང་འཇམ་དཔལ་སྙིང་པོའི་མདོ་སྔགས་ཀྱི། །གསུང་རབ་པད་ཚལ་མ་ལུས་བཞད་པའི་གཉེན། །
རྣམ་དཔྱོད་ཚ་ཟེར་སྐལ་བཟང་བུང་བའི་ཚོགས། །སྨིན་མཛད་སྨྲ་བའི་ཉིེ་མར་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སེར་སྨད་སྒོ་སོག་སྤྲུལ་སྐུ་ངག་དབང་གསུང་རབ་བསྟན་འཛིན་དགེ་ལེགས་རྒྱ་མཚོ་མཆོག་མཁན་ཁྲིར་བྱོན་པ་ཡིན་ཏེ། དམ་པ་འདི་ལྷ་བླའི་བཀའ་ལུང་ལྟར་ཁམས་ལི་ཐང་མོ་ལ་དགེ་ལུང་གྲོང་དུ་ཡབ་བདེ་སྐྱིད་དོན་གྲུབ་དང་། ཡུམ་ནོར་འཛིན་སྒྲོལ་མ་གཉིས་ཀྱི་སྲས་སུ་ཕྱི་ལོ་ ༡༩༤༨ དང་བོད་ས་བྱི་ཟླ་བ་ ༦ ཚེས་ ༤ སྟེ་དྲུག་པ་ཚེས་བཞིའི་དུས་བཟང་ཉིན་ངོ་མཚར་བའི་ལྟས་དང་བཅས་སྐུ་འཁྲུངས།
དགུང་ལོ་ ༤ཐོག་རྗེ་བཙུན་བློ་བཟང་འཇམ་དཔལ་སྙིང་པོ་དཔལ་བཟང་པོའི་ཡང་སྲིད་འཁྲུལ་བྲལ་དུ་ངོས་འཛིན་བྱུང་། དགུང་ལོ་ ༥ ཐོག་ལི་ཐང་དགོན་ཆེན་གྱི་སྒོ་སོག་རིག་འཛིན་ཕོ་བྲང་དུ་ཁྲི་སྟོན་དང་དགོན་ཆེན་དེར་ཆོས་ཞུགས་མཛད། དགུང་ལོ་ ༧ ཐོག་བསྟན་པའི་གསལ་བྱེད་དགེ་ལེགས་རིན་པོ་ཆེའི་ཞལ་སྔ་ནས་རྒྱལ་བའི་བསྟན་པ་ལ་རབ་ཏུ་བྱུང་སྟེ་མཚན་ལ་ངག་དབང་གསུང་རབ་བསྟན་འཛིན་དགེ་ལེགས་རྒྱ་མཚོ་ཞེས་གསོལ། དགུང་ལོ་ ༡༠ ལ་དབུས་འགྱུར་ཆོས་ཀྱི་ཞིང་སར་བྱོན་ནས་གདན་ས་ཆེན་མོ་སེར་སྨད་གྲྭ་ཚང་དུ་ཆོས་ཞུགས་མཛད། དགེ་བའི་བཤེས་གཉེན་ཕུན་ཚོགས་ངག་དབང་མཆོག་གཙོ་བོར་བསྟེན་ནས་གཞུང་ཆེན་བཀའ་པོད་ལྔ་ལ་ཐོས་བསམ་སློབ་གཉེར་ལ་རབ་ཏུ་གཞོལ་བར་མཛད།
༥༩ ལོར་བོད་དུས་འགྱུར་རྗེས་རྒྱ་གར་དུ་ཕེབས་ཏེ་༧གོང་ས་སྐྱབས་མགོན་ཆེན་པོ་མཆོག་དང་ཡོངས་འཛིན་རྣམ་གཉིས་ཀྱི་དྲུང་ནས་དབང་ལུང་མན་ངག་རྒྱ་ཆེར་གསན། སྐབས་དེ་ཙམ་ན་ཡི་དམ་ཁག་གི་ལྗགས་བསྙེན་ཡང་དུ་མ་བཞུགས། དགུང་ལོ་ ༢༠ ཐོག་༧གོང་ས་སྐྱབས་མགོན་རྒྱལ་དབང་མཆོག་གི་ཞལ་སྔ་ནས་བསྙེན་པར་རྫོགས་པ་དགེ་སློང་གི་དངོས་པོ་བཞེས་ཏེ་འདུལ་བ་འཛིན་པའི་སྐྱེས་བུར་གྱུར།
༡༩༦༩ ལོར་གདན་ས་ཆེན་པོ་སེ་ར་ཐེན་ཆེན་གླིང་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་གནས་སྤོ་མཛད་སྐབས་ལྷན་དུ་ཕེབས། དེའི་ཚེ་ན་སློབ་གཉེར་བ་གསར་བུ་བ་དོན་གཉེར་རྣམས་ལ་དཔེ་ཁྲིད་གནང་བ་སོགས་བསྟན་པའི་བྱ་བ་རྒྱ་ཆེར་མཛད་ཅིང་། གང་ཉིད་ཀྱི་གཞུང་ཆེན་སློབ་གཉེར་ཡང་མཇུག་སྐྱོང་ལེགས་པར་མཛད། མཐར་དགེ་ལུགས་རྒྱུགས་སྤྲོད་ཕུལ་ཞིང་། ཆོ་འཕྲུལ་སྨོན་ལམ་ཆེན་མོར་གྲྭ་སྐོར་དམ་བཅའ་བཞག་སྟེ་ལྷ་རམས་ཨང་དང་པོའི་མཚན་གནས་བཞེས། གསང་སྔགས་རྡོ་རྗེ་ཐེག་པའི་གཞུང་ལུགས་ལ་བརྩོན་ཕྱིར་དཔལ་ལྡན་སྨད་རྒྱུད་གྲྭ་ཚང་དུ་ཞུགས་། དམ་ཆོས་འགྲེལ་པ་བཞི་སྦྲགས་ཀྱིས་མཚོན་གསང་ཆེན་རྒྱུད་སྡེ་བཞིའི་གཞུང་ལུགས་ཆོ་ག་ཕྱག་ལེན་བསིལ་སྦུབ་དཀྲོལ་བརྡུང་ཚུན་ཆད་ནས་ཐུགས་བརྩོན་གནང་། སྨད་རྒྱུད་པའི་ཕྱག་སྲོལ་ལྟར་ཊཱིཀྐ་སྐྱོར་དཔོན་གནང་ཞིང་སྔགས་ཀྱི་དམ་བཅའ་བཞག་པ་དང་དགེ་སྐོས་བཅས་ཚུལ་བཞིན་བཞེངས།
ཕྱི་ལོ ༡༩༨༤ ལོར་༧རྒྱལ་བའི་བཀའ་དགོངས་དང་ཕ་ཡུལ་གྱི་ཡུལ་དགོན་ཁག་ནས་མཇལ་འདོད་སྐོམ་པ་ཆུ་འདོད་ལྟར་ཡོད་སྟབས། གདན་ཞུ་ཕུལ་དོན་བཞིན་བོད་དུ་ཕེབས་ཏེ་སྐབས་འབྲེལ་ཁམས་ལི་ཐང་། འབའ་བ། ཉག་ཆུ། ཆ་ཕྲེང་། མདའ་པ་སྟེ་རྫོང་ཁག་ལྔ་ལ་ཕེབས་ཏེ་གང་ལ་གང་འདུལ་གྱིས་ཆོས་ཀྱི་འཁོར་ལོ་བསྐོར་ཏེ་མ་རྟོགས་པ་དང་ལོག་པར་རྟོག་པའིི་གནས་ལས་གྲོལ་བའི་མཛད་པ་བསྐྱངས། དགོན་སྡེ་ཁག་ལ་གཞི་གསུམ་གྱི་ཕྱག་ལེན་བཙུགས་པ། ལྷག་པར་དགེ་ཚུལ་དང་དགེ་སློང་ ༤༠༠༠། བཞི་སྟོང་སྐོར་བསྒྲུབས་ཏེ་བསྟན་པའི་གཞི་མ་ཚུལ་ཁྲིམས་གྱི་བསླབ་པ་དར་རྒྱས་སུ་མཛད།
ཕྱི་ལོ་ ༡༩༨༥ ལོར་༧གོང་ས་མཆོག་ནས་སྨད་རྒྱུད་པའི་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་ཕེབས་བྱུང་སྟབས་དེ་འཕྲལ་རྒྱ་གར་དུ་ཕྱིར་ཕེབས་གནང་སྟེ། རྒྱུད་པའི་རྡོར་སློབ་དང་སྒྲིག་ཁྲིམས་གནོན་སྡོམ་སོགས་ལོ་གསུམ་རིང་ཐུགས་འགན་ཚུལ་བཞིན་བཞེས་བཞིན་པར་ ༡༩༨༨ ལོར་སྨད་རྒྱུད་པའི་མཁན་ཁྲིར་ཕེབས་ཏེ་དམ་ཆོས་འགྲེལ་པ་བཞི་སྦྲགས་དང་བདེ་གསང་འཇིགས་གསུམ་གྱི་བསྐྱེད་རྫོགས་ཀྱི་གཞུང་ཆེན་འཆད་ཉན་རྣམས་རྒྱུད་པའི་ཕྱག་སྲོལ་ལྟར་ཆ་ཚང་གནང་། གྲྭ་རྒྱུན་གསར་ཞུགས་རྣམས་ལ་ཕྱི་ནང་་ཤེས་ཡོན་གྱི་སློབ་གྲྭ་ཟུར་ཡོད་ལ་ཤུགས་སྣོན་གང་ཆེ་བསྐྱངས། མཁན་ཆེན་འདིའི་སྐབས་སྨད་རྒྱུད་པའི་འདུ་ཁང་ཆེན་མོ་དང་། མཚམས་ཁང་། མགྲོན་ཁང་སོགས་ཕྱིའི་སྣོད་ཀྱི་བཀོད་པ་དང་མཐུན་རྐྱེན་མང་དག་ཅིག་གསར་བསྐྲུན་ཐུབ་པ་བྱུང་། དེ་ལྟར་མཁན་དུས་ལོ་གསུམ་གཙང་བར་མཛད་དེ་ཟུར་ནས་ཕྱི་ལོ་ ༡༩༩༡ ལོར་༧གོང་ས་མཆོག་ནས་སེར་སྨད་གྲྭ་ཚང་གི་མཁན་པོར་བསྐོ་བཞག་བྱུང་བ་ལྟར་གདན་ས་དེའི་བསླབ་པ་སློབ་གཉེར་དང་སྒྲིག་ཁྲིམས་རྣམས་མི་ཉམས་གོང་འཕེལ་དང་ཉམས་པ་སོར་ཆུད་པའི་མཛད་བཟང་བདག་གིར་བཞེས་ཐོག་དགེ་འདུན་གྱི་གྲངས་འབོར་སྟོང་ཚོ་བརྒལ་བ་ཐབས་ཤེས་མཛད། སློབ་གཉེར་གྱི་མཐུན་རྐྱེན་དཔེ་མཛོད་གསར་རྒྱག་གིས་སློབ་གཉེར་བའི་ཕྱག་དཔེ་དཀོན་རིགས་ཀྱི་དཀའ་ངལ་བསལ་བར་མཛད།
སྤྱིའི་མཐུན་རྐྱེན་འདུ་འགོད་སླད་ཆོག་གྲྭ་དང་བཅས་ཕྱི་རྒྱལ་ཨི་ཊ་ལི་སོགས་ཡུ་རོབ་ཁུལ་ཐེངས་གཉིས་ཙམ་སྐོར་བསྐྱོད་གནང་ཞིང་། སེེར་སྨད་གྲྭ་ཚང་གི་ཆོས་ར་དང་དཔེ་མཛོད་བཅས་གསར་སྐྲུན་ཐུབ་པ་དང་བལ་ཡུལ་དུ་བཟོ་གྲྭ་བཙུགས་པ་བཅས་བྱུང་སྟེ་ཕྱི་ལོ་ ༡༩༩༦ བར་ལོ་དྲུག་རིང་མཁན་པོ་མཛད། མཁན་པོ་ཟུར་ནས་ཐཡི་ཝན་སོགས་ཕྱི་རྒྱལ་ཡུལ་གྲུ་དུ་མར་བྱོན་ཏེ་དད་ལྡན་དོན་གཉེར་ཅན་གྱི་སྐྱེ་བོ་བརྒྱ་ཕྲག་མང་པོ་དམ་པའི་ཆོས་ཀྱིས་ཚིམ་པར་མཛད། སློབ་མ་དགེ་ཕྲུག་ཀྱང་བརྒྱ་ཕྲག་མང་པོར་ཆོས་དང་ཟང་ཟིང་གཉིས་ཀས་འཚོ་སྐྱོང་གི་བཀྲིན་བསྐྱངས། ཕྱི་ལོ་ ༢༠༡༧ གྱི་ལོ་མཇུག་ཏུ་བྱང་རྩེ་ཆོས་རྗེའི་ཁྲི་འཕང་མཐོན་པོར་མངའ་གསོལ་བ་མཛད་ཅིང་དེ་དང་དེ་དག་གི་བསྟན་པའི་བྱ་བ་མཛད་དོ། ། མཆན། རྣམ་ཐར་རྒྱས་པ་གཞན་དུ་བཞུགས་པ་ལས་མཁྱེན་འཚལ།
༩༢] དགེ་བཤེས་རྡོ་རྗེ་བཀྲ་ཤིས་སམ་མཚན་གཞན་བློ་བཟང་བྱམས་པ།
བློ་གྲོས་བཟང་པོས་མདོ་དང་རྒྱུད་སྡེའི་གཞུང་། །ཇི་བཞིན་འབྱེད་ལ་བཀྲིས་འཕགས་གཉིས་པ། །
འགྲོ་ཀུན་བྱམས་པས་སྐྱོང་བའི་ཐབས་མཁས་ཅན། །རྡོ་རྗེ་འཛིན་པའི་དཔལ་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སེར་བྱེས་དགེ་བཤེས་རྡོ་རྗེ་བཀྲིས་སམ་མཚན་གཞན་བློ་བཟང་བྱམས་པ་དཔལ་བཟང་པོ་མཆོག་ཕེབས་པ་ཡིན་ཏེ། དམ་པ་འདི་བོད་རྒྱལ་ལོ་ ༢༠༥༧ རབ་བྱུང་ ༡༦ པའི་ས་མོ་སྦྲུལ། ཕྱི་ལོ་ ༡༩༢༩ ལོར་མདོ་ཁམས་ཊེ་ཧོར་དཀར་མཛེས་ཉེ་འདབས་བཟང་གྲོང་ཞེས་བྱ་བར་ཡབ་རྒྱ་མཚོ་ཆོས་འཕེལ་དང་ཡུམ་རིགས་ཀྲུག་གཉིས་ཀྱི་སྲས་དུ་སྐུ་འཁྲུངས། དགུང་ལོ་ ༧ ནས་དཀར་མཛེས་དགོན་དུ་ཆོས་སྒོར་ཞུགས་ནས་ཡི་གེ་འབྲི་ཀློག་བསླབས། དགུང་གྲངས་ ༡༣ ཐོག་འཁྲུངས་གསར་རིན་པོ་ཆེའི་ཞལ་སྔ་ནས་དགེ་ཚུལ་བསྒྲུབས། ༡༩༤༧ ལོར་དབུས་སུ་བྱོན་ཏེ་གདན་ས་ཆེན་པོ་སེར་བྱེས་གྲྭ་ཚང་དུ་ཆོས་ཞུགས་གནང་། མཁས་པའི་དབང་པོ་ཊེ་ཧོར་མཁན་ཟུར་རིན་པོ་ཆེ་བློ་བཟང་དབང་ཕྱུག་གིས་དབུས་དགེ་བའི་བཤེས་གཉེན་ཚུལ་བཞིན་བསྟེན་ནས་གཞུང་ཆེན་བཀའ་པོད་ལྔ་ལ་ཐུགས་གཉེར་འགྲུས་པར་མཛད། ལྷག་པར་འདུལ་མཛོད་ཀྱི་སྐབས་མཚོ་ཊཱིཀ་དང་མཆིམས་མཛོད་ཆ་ཚང་ཐུགས་གཉེར་ཤིན་ཏུ་ཆེ་བར་མཛད།
དགུང་ལོ་ ༢༥ ཐོག་བྲག་རི་རྡོ་རྗེ་འཆང་ལུང་རིགས་རྣམ་རྒྱལ་འཕྲིལ་ལས་དཔལ་བཟང་པོའི་དྲུང་ནས་བསྙེན་པར་རྫོགས་པ་དགེ་སློང་གི་སྡོམ་པ་བླངས་ཏེ་བཅས་མཚམས་ཚུལ་བཞིན་བསྲུངས། གཞན་ཡང་༧གོང་ས་༧རྒྱལ་དབང་ཡབ་སྲས་གསུམ་གྱི་དྲུང་ནས་མདོ་སྔགས་ཀྱི་འདོད་ཆོས་དུ་མ་ཞུས། ཕྱི་ལོ་ ༡༩༥༩ ལོར་བོད་དུས་འགྱུར་རྗེས་སྦག་ས་ཆོས་སྒར་སེར་བྱེས་གྲྭ་ཚང་དུ་གཞུང་ཆེན་བཀའ་པོད་ལྔ་ལ་སློབ་གཉེར་མཛད། སྦེལ་ཀོབ་གཞིས་ཆགས་སེ་ར་ཆོས་སྒར་དུ་ཕེབས་ཏེ་སློབ་གཉེར་མཐའ་འཁྱོངས་མཛད། དམ་པ་གང་ཉིད་ཟུར་རྙིང་འཛིན་གྲྭའི་སྐབས་ནས་གསར་བུ་རྣམས་ལ་བསྡུས་གྲྭ་ནས་བརྩམས་ཏེ་དབུ་ཕར་སོགས་ཀྱི་དཔེ་ཁྲིད་གནང་བའི་བཀྲིན་བསྐྱངས། མཐར་གླེང་བསྲེལ་དགེ་བཤེས་ཀྱི་མཚན་གནས་བཞེས། དེ་ནས་ ༡༩༧༠ བར་ལོ་གསུམ་རིར་ཝར་ཎཱ་མཐོ་སློབ་ཏུ་ཞུགས་ཏེ་ཨཱ་ཙཱར་ཡའི་དགེ་བཤེས་ཨང་རིམ་དང་པོའི་གྲས་ཀྱི་ཕྱག་ཁྱེར་བཞེས།
༡༩༨༠ བོད་ཟླ་ ༦ པའི་ནང་ཕྱི་མིག་ལུང་ཆོས་ཐོག་སྐབས་དཔལ་ལྡན་སྨད་རྒྱུད་གྲྭ་ཚང་དུ་ཞུགས་ཏེ་དམ་ཆོས་འགྲེལ་པ་བཞི་སྦྲགས་ཀྱིས་གཙོས་གསང་ཆེན་རྒྱུད་སྡེ་བཞི་ལ་གསན་བསམ་ཚུལ་བཞིན་མཛད། ཕྱི་ལོ་ ༡༩༨༣ ལོར་ཊཱིཀྐ་སྐྱོར་དཔོན་སྐབས་རྒྱུད་ཊཱིཀ་ལེའུ་གཉིས་པ་ནས་བརྒྱད་པའི་མཚམས་སྦྱར་བར་ཐུགས་འཛིན་གནང་སྟེ་ཚོགས་དབུས་སུ་གསུངས། ལོ་དེར་རྒྱུད་པའི་སྟོན་ཁའི་དགེ་སྐོས་བཞེངས་པ་དང་། དེའི་ལོ་མཇུག་ཏུ་༧གོང་ས་མཆོག་གི་ཕྱག་རྟགས་སྤྱི་ཕེབས་དགོངས་དོན་ལྟར་སེར་བྱེས་གྲྭ་ཚང་གི་དགེ་སྐོས་ལོ་གཉིས་བཞེངས་ཏེ་སྒྲིག་ལམ་སོགས་ལ་གཟིགས་རྟོག་དམ་པར་མཛད། ༨༥ ལོར་ཕ་ཡུལ་དུ་ཕེབས་ཏེ་དོན་གཉེར་ཅན་རྣམས་དགེ་འདུན་ཉི་ཤུ་སོགས་ཀྱི་དཔེ་ཁྲིད་མཛད་པ་སོགས་དེར་བསྟན་པའི་བྱ་བ་གང་ནུས་མཛད་དེ་སླར་རྒྱ་གར་དུ་ཕྱིར་ཕེབས།
༡༩༨༧ ལོར་༧གོང་ས་མཆོག་གི་དཔལ་ལྡན་སྨད་རྒྱུད་པའི་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་ཕེབས་ལྟར་ལོ་དེའི་ཕྱི་ཟླ་ ༡ ཚེས་ ༦ དགེ་བར་རྒྱུད་པའི་བླ་མ་དབུ་མཛད་ཀྱི་ཁྲི་སྟོན་མཛད། ༧རྒྱལ་བའི་བཀའ་དགོངས་ལྟར་རྒྱུད་ཞུགས་དགེ་བཤེས་རྣམས་ལ་སྔགས་ཀྱི་སློབ་གཉེར་གཤའ་མ་ཡོང་སླད་དཔེ་ཁྲིད་དང་རྩོད་རྒྱུགས་དམ་བཅའ་འཚོག་རྒྱུའི་སྒྲིག་སྲོལ་གསར་གཏོད་གནང་། དེ་བཞིན་བསྐྱེད་རིམ་པ་གསར་བུ་རྣམས་ལ་མཚན་ཉིད་ཀྱི་སློབ་གཉེར་ལ་ཤུགས་སྣོན་མཛད་དེ་ཡར་རྒྱས་སུ་ཕྱིན།
༡༩༩༠ ལོའི་བོད་ཟླ་ ༦ ཚེས་ ༧ སྟེ་གཟའ་སྐར་འཕྲོད་སྦྱོར་དགེ་བའི་ཉིན་སྨད་རྒྱུད་པའི་མཁན་པོའི་ཁྲི་འཕང་མཐོན་པོར་ཕེབས། མཁན་པོ་གསར་མཇལ་སྐབས་༧གོང་ས་མཆོག་གི་ཞལ་སྔ་ནས་གཟིམ་ཆུང་རང་དུ། རྒྱུད་པའི་ཐུན་མོང་མ་ཡིན་པའི་ཁྲིད་ཆེན་བརྒྱད་དང་། ཁྲིད་ཁང་བརྩི་བཞག་གི་བཤད་ལུང་བཅས་བཀྲིན་སྩོལ་སྐབས་དམ་པ་གང་ཉིད་སྤྱན་ཆབ་དང་བཅས་དགའ་སྐྱོ་ཟུང་འབྲེལ་གྱི་ཐུགས་ཚོར་ཤུགས་ཆེ་བྱུང་སྣང་། ལོ་དེའི་དབྱར་གནས་ཀྱི་སྐབས་ཁྲིད་ཁང་གི་སྒྲིག་འཛུགས་མི་ཉམས་གོང་འཕེལ་མཛད་། ཁྲིད་ཆེན་བརྒྱད། ཁྲིད་ཁང་བརྩི་བཞག་གནང་རྒྱུ། སྔར་སྲོལ་ཁྲིད་ཁང་གི་འདུན་པ་ལེན་རྒྱུ་སོགས་འདུལ་བའི་ཕྱག་སྲོལ་མི་ཉམས་གོང་འཕེལ་མཛད།
མཁན་པོའི་མཛད་ཁུར་རིང་དམ་ཆོས་འགྲེལ་པ་བཞི་སྦྲགས་ཀྱིས་གཙོས་དཔེ་ཐོག་དང་ཐུགས་ཐོག་ནས་གནང་དགོས་པའི་འཆད་ཉན་མང་དུ་ཡོད་པ་རྣམས་ཆད་ལུས་མེད་པར་གནང་། དམ་པ་འདི་ཉིད་ཀྱིས་ཐུགས་ཁུར་དང་སྐབས་དེའི་སྤྱི་རྒན་བཅས་ནས་༧གོང་ས་སྐྱབས་མགོན་ཆེན་པོ་གདན་ཞུས་ཀྱིས་མང་ཚོགས་ལ་དམ་ཆོས་འགྲེལ་པ་བཞི་སྦྲགས་ཀྱི་བཤད་ཁྲིད་ཐོབ་པའི་སྐལ་བཟང་བྱུང་། སྨད་རྒྱུད་པའི་མཁན་པོའི་མཛད་ཁུར་ལས་ཟུར་ནས། སེར་བྱེས་ལྷོ་བ་ཆོས་ལྡན་རིན་པོ་ཆེར་ཇི་ལྟར་གསོལ་བ་བཏབ་དོན་བཞིན། ༡༩༩༤ ལོར་སེར་བྱེས་འདུས་ཚོགས་སུ་རྗེ་བཙུན་པའི་ཟུར་བཀོལ་བཞི་དང་། ཕར་ཕྱིན་སྐབས་བརྒྱད་པའི་མཐའ་གཅོད་ཆ་ཚང་དང་། དབུ་མའི་སྤྱི་དོན། བསྡུས་གྲྭ་ཆ་ཚང་བཅས་ཀྱི་བཤད་ལུང་བཀྲིན་སྩལ། བསྟན་འགྲོའི་དོན་ཆེན་མཛད་བཞིན་པའི་མུར་མཐར་དགོངས་པ་ཞི་དབྱིངས་སུ་ཐིམ་ནས་ཡང་སྲིད་ཀྱང་ཕེབས་ཡོད་་པ་བཅས་སོ། །
༩༣] དགེ་བཤེས་བསོད་ནམས་རྒྱལ་མཚན།
བསོད་ནམས་ཞིང་གི་མཆོག་གྱུར་འདུས་སྡེ་རུ།། མདོ་སྔགས་བསྟན་པ་རིན་ཆེན་བཤད་སྒྲུབ་ཀྱིས། །
ལེགས་སྤེལ་བསླབ་གསུམ་རྒྱལ་མཚན་འཛིན་པ་ལ། །ཟླ་མེད་བླ་མ་མཆོག་ལ་གསོལ་བ་འདེབས། །
ཞེས་འབྱུང་བ་ལྟར་དེའི་རྗེས་སུ་སྨད་རྒྱུད་པའི་མཁན་པོར་དགའ་བྱང་དགེ་བཤེས་བསོད་ནམས་རྒྱལ་མཚན་མཆོག་ཕེབས་པ་ཡིན་ཏེ། དམ་པ་འདི་གྲྭ་ས་དགའ་ལྡན་བྱང་རྩེ་གྲྭ་ཚང་ཡིན་ལ། གདན་ས་དེར་གཞུང་ཆེན་བཀའ་པོད་ལྔ་ལ་སློབ་གཉེར་ཚུལ་བཞིན་མཛད། མེ་རྟ་ ༡༩༦༦ ལོར་ཝཱར་ཎ་བོད་ཀྱི་མཐོ་སློབ་ཏུ་ཞུགས་ནས་ཨ་ཙཱ་ཡའི་མཚན་གནས་བཞེས། དེའི་སྐབས་༧རྒྱལ་བའི་བཀའ་དགོངས་ལྟར་སྨད་རྒྱུད་གྲྭ་ཚང་དགེ་བཤེས་སྤྱི་མཚུངས་ལྟར་རྒྱུད་ལ་ཞུགས་ཏེ་གསང་ཆེན་རྒྱུད་སྡེ་བཞི་ལ་གསན་སྦྱོང་ལེགས་པར་མཛད།
སྤྱི་ལོ་ ༡༩༩༤ ལོར་སྨད་རྒྱུད་པའི་བླ་མ་དབུ་མཛད་དུ་བསྐོ་བཞག་གནང་སྟེ་བླ་མའི་མཛད་ཁུར་སྤྱི་དང་བྱེ་བྲག་དགེ་འདུན་ནགཞོན་རྣམས་ཀྱི་མདོ་སྔགས་ཀྱི་གཞུང་ཆེན་སློབ་གཉེར་ལ་དམིགས་གསལ་གཟིགས་པ་ཆེན་པོ་མཛད་ཅིང་སྔགས་རམས་ཐོན་པ་རྣམས་ལ་དགེ་བཤེས་སྔགས་རམས་པ་ཞེས་མཚན་གྱིས་གཟེངས་བསྟོད་པ་སོགས་རྒྱུད་པའི་སློབ་གཉེར་ལ་ཐུགས་ཁུར་རྒྱ་ཆེར་བཞེས། བླ་མ་ལོ་གསུམ་རྗེས་དཔལ་ལྡན་སྨད་རྒྱུད་པའི་མཁན་ཁྲིར་ཕེབས། དམ་ཆོས་འགྲེལ་པ་བཞི་སྦྲགས་ཀྱིས་མཚོན་བདེ་གསང་འཇིགས་གསུམ་གྱི་བསྐྱེད་རྫོགས་སོགས་འཆད་ཉན་ལོ་གསུམ་ཚང་བར་མཛད་ཅིང་། ཟུར་ནས་ཕྱི་རྒྱལ་ཁག་ཏུ་ཟུར་བཞུགས་མཛད་དེ་མི་རིང་བར་དགོངས་པ་ཞི་བར་གཤེགས་སོ། །
༩༤] དགེ་བཤེས་འཕྲིན་ལས་སྟོབས་རྒྱས་སམ་མཚན་གཞན་བློ་བཟང་བྱམས་པ།
བློ་བཟང་རྒྱལ་བའི་མདོ་སྔགས་འཆད་ལ་མཁས། །བྱམས་པ་ཆེན་པོས་ཐུགས་རྒྱུད་ཕྱུག་ཅིང་བཙུན། །
མོས་ལྡན་གདུལ་བྱའི་རེ་བ་སྐོང་བས་བཟང་། །ཐར་འདོད་འགྲོ་བའི་གཉེན་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སེར་སྨད་དགེ་བཤེས་འཕྲིན་ལས་སྟོབས་རྒྱས་སམ་མཚན་གཞན་བློ་བཟང་བྱམས་པ་མཆོག་སྨད་རྒྱུད་པའི་མཁན་ཁྲིར་ཕེབས་པ་ཡིན་ཏེ། དམ་པ་འདི་ཕྱི་ལོ་ ༡༩༣༧ དང་བོད་རྒྱལ་ལོ་ ༡༠༦༤ ལོར་ལྷ་སའི་ཉེ་འདབས་ཉན་བྲན་བསེ་ཁང་ཞེས་པའི་ཁྱིམ་དུ་ཡབ་བསོད་ནམས་དང་ཡུམ་བཀྲིས་ཀྱི་རིགས་མྱུག་ཏུ་སྐུ་འཁྲུངས། ཆུང་བྱིས་པའི་དུས་ནས་ཀུན་སྤྱོད་བཟང་བས་ཕྱི་ལོ་ ༡༩༤༧ རང་ཉིད་དགུང་གྲངས་བཅུར་སོན་སྐབས་སེར་སྨད་མཁན་པོ་བློ་བཟང་བསྟན་འཛིན་གྱི་དྲུང་ནས་བར་མ་རབ་བྱུང་གི་སྡོམ་པ་བཞེས་ཏེ་མཚན་ལ་བློ་བཟང་བྱམས་པ་ཞེས་བཏགས། དེ་མ་ཐག་སེར་སྨད་ཐོས་བསམ་ནོར་གླིང་གྲྭ་ཚང་དུ་ཆོས་སྒོར་ཞུགས། ཞང་པོ་སྐལ་བཟང་གིས་གཙོ་བོར་གཟིགས་སྐྱོང་འོག་ཐེ་བོ་དགེ་བཤེས་ངག་དབང་ལགས་ནས་ཡི་གི་འབྲི་ཀློག་དང་ཆོས་སྤྱོད་བློ་འཛིན་ལ་ཐུགས་བརྩོན་གནང་།
ཕྱི་ལོ་ ༡༩༥༡ རང་ཉིད་དགུང་གྲངས་བཅུ་བཞིར་སོན་སྐབས་ཐེ་བོ་རྒན་བློ་བཟང་རིན་ཆེན་དང་། མཁས་པའི་དབང་པོ་དགེ་བཤེས་ཡེ་ཤེས་དབང་པྱུག་མཆོག་བླ་མར་གཙོ་བོར་བསྟེན་ནས་བསྡུས་གྲྭ་ནས་བཟུང་གཞུང་ཆེན་བཀའ་པོད་ལྔ་ལ་ཐོས་བསམ་སློབ་གཉེར་དབུ་འཛུགས་གནང་སྟེ་འགྲུས་པར་མཛད། ཕྱི་ལོ་ ༡༩༥༢ ལོར་དགའ་ལྡན་ཁྲི་ཐོག་གོ་ལྔ་པ་མི་ཉག་བཀྲིས་སྟོང་འདུས་རིན་པོ་ཆེའི་ཞལ་སྔ་ནས་དགེ་ཚུལ་གྱི་སྡོམ་པ་ལེགས་པར་མནོས་ཏེ་བཙུན་པར་མཛད། ཕྱི་ལོ་ ༡༩༥༩ ལོར་བོད་དུས་ཟིང་སྐབས་ཞང་པོ་སྐལ་བཟང་གིས་གཟིགས་སྐྱོང་འོག་རྒྱ་གར་དུ་བཙན་བྱོལ་དུ་སྤྱི་མཚུངས་ཕེབས།
ཕྱི་ལོ་ ༡༩༥༩ ལོའི་ཟླ་བ་ ༡༢ ས་ཕག་ལོར་དགའ་ལྡན་ཁྲི་ཆེན་ཡོངས་འཛིན་གླིང་སྤྲུལ་རྡོ་རྗེ་འཆང་གི་ཞལ་སྔ་ནས་བསྙེན་པར་རྫོགས་པ་དགེ་སློང་གི་སྡོམ་པ་ཞུས་ཏེ་བསླབ་བྱ་རྣམས་ཚུལ་བཞིན་བསྲུངས་ཤིང་ཞི་ཞིང་དུལ་བའི་བརྟུལ་ཞུགས་བཟུང་། ༡༩༦༡ ལོར་སྦག་ས་ཆོས་སྒར་དུ་དགེ་བའི་བཤེས་གཉེན་སེར་སྨད་བློ་བཟང་ཚུལ་ཁྲིམས་དང་། སེར་བྱེས་མཁན་ཟུར་རིན་པོ་ཆེ་བློ་བཟང་དབང་ཕྱུག །སེར་སྨད་མཁན་ཟུར་ངག་དབང་ཐེག་མཆོག་རྣམས་བསྟེན་ནས་ཟུར་བཀོལ་བར་སློབ་གཉེར་ལ་ཐུགས་བརྩོན་མཛད། ཕྱི་ལོ་ ༡༩༧༠ ལོར་དགེ་འདུན་སྤྱི་ལྟར་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་གནས་སྤོས་སྐབས་ལྷན་དུ་ཕེབས་ཤིང་། ལྷོ་ཕྱོགས་སེར་སྨད་གདན་སར་སྔར་གྱི་སློབ་གཉེར་གནང་འཕྲོ་ནས་མུ་མཐུད་དབུ་མ་དང་། འདུལ་བ། མཛོད་བཅས་ལ་ཐོས་བསམ་སློབ་གཉེར་མཛད་པའི་མུར་དོན་གཉེར་ཅན་གསར་བུ་བ་རྣམས་ལ་གཞན་ཕན་ཐུགས་བརྩེ་འབའ་ཞིག་གིས་དཔེ་ཁྲིད་ངལ་ཁུར་དང་ལེན་གནང་།
ཕྱི་ལོ་ ༡༩༧༧ ནས་ལོ་ངོ་བདུན་རིང་དགེ་ལྡན་རྒྱུགས་སྤྲོད་ནང་ཞུགས་ཏེ་གཞུང་ཆེན་ལྔ་དང་རིག་གནས་དང་བཅས་རྒྱུགས་སྤྲོད་ལམ་ནས་བཀའ་རམས་སློབ་དཔོན་ལྷ་རམས་བཅས་ཀྱི་ཨང་དང་པོའི་པྱག་ཁྱེར་སོན། ཕྱི་ལོ་༡༩༧༨ ས་ཕོ་རྟ་ལོར་རིགས་ཆུང་ཚོགས་ལངས་ཀྱི་སྐབས་ཨང་དང་པོའི་གནས་རིམ་སོན། སྐབས་འདི་དག་ཏུ་མཛད་སྒོ་ཆེ་རིགས་དང་འཇང་དགུན་ཆོས་སྐབས་དགེ་འདུན་འདུས་པ་རྒྱ་མཚོའི་དབུས་སུ་དམིགས་བསལ་གྱི་ལུང་རིགས་བརྒལ་བརྟག་ཆེན་མོ་ཚུགས་སྐབས་དམ་བཅའ་བ་མཛད་དེ་ཕྱག་དཔེ་ཡག་གྲས་ཀྱི་མཚན་སྙན་བྱུང་། ཕྱི་ལོ་ ༡༩༨༥ ཤིང་གླང་ལོར་གནས་མཆོག་རྡོ་རྗེ་གདན་དུ་སྨོན་ལམ་ཆེན་མོའི་སྐབས་ལྷ་རམས་གྲྭ་སྐོར་འཕར་མའི་དམ་འཇོག་གནང་། ཕྱི་ལོ་ ༡༩༨༦ དངོས་གཞི་གདན་ས་གསུམ་ལ་གྲྭ་སྐོར་དམ་བཅའ་བཞག །
ཕྱི་ལོ་ ༡༩༨༧ ལོར་དཔལ་ལྡན་སྨད་རྒྱུད་གྲྭ་ཚང་དུ་རྒྱུད་ལ་ཞུགས་ཏེ་ཕྱི་མིག་ལུང་ཆོས་ཐོག་སྐབས་གདན་རྒྱག་གནང་། དམ་ཆོས་འགྲེལ་པ་བཞི་སྦྲགས་ཀྱི་གཙོས་གསང་ཆེན་རྒྱུད་སྡེ་བཞི་ལ་གསན་སྦྱོང་ཚུལ་བཞིན་མཛད། ཕྱི་ལོ་ ༡༩༩༠ ལོར་སྔགས་ཀྱི་རྩོད་རྒྱུགས་ཕུལ་ཏེ་ཨང་དང་པོའི་གྲས་གྱི་ཕྱག་ཁྱེར་སོན། ཕྱི་ལོ་ ༡༩༨༩ ལོར་སེར་སྨད་གྲྭ་ཚང་གི་དགེ་སྐོས་དང་ཕྱི་ལོ་ ༡༩༩༣ ལོར་དཔལ་སྨད་རྒྱུད་པའི་དགེ་སྐོས་བཞེངས་ཏེ་འདུས་སྡེའི་སྒྲིག་ཁྲིམས་གནོན་སྡོམ་སོགས་ཀྱི་མཛད་འགན་ལེགས་པར་བཞེས།
སྐབས་འདི་ཙམ་ན་རྡོར་གདན་དུ་སྐུ་ཕྱག་འབུལ་བ་སོགས་གསག་སྦྱང་ལ་ཕེབས་པའི་སྐབས་ཏེ་ཕྱི་ལོ་ ༡༩༩༤ ལོར་༧གོང་ས་སྐྱབས་མགོན་ཆེན་པོས་གང་ཉིད་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་ཕེབས་བྱུང་བ་ལྟར་ལོ་དེའི་ཟླ་བ་ ༢ ཚེས་ ༡༢ དགེ་བར་བླ་མའི་ཁྲིར་ཕེབས་ཏེ་ལོ་གསུམ་རིང་གྲྭ་ཚང་གི་ཆོས་སྲིད་ཀྱི་མཛད་འགན་སྤྱི་དང་བྱེ་བྲག་ཆོག་གྲྭ་བརྒྱད་དང་བཅས་ཕྱི་རྒྱལ་ཡུལ་གྲུ་ཁག་ལ་གཙོ་བོར་གྲྭ་ཚང་སློབ་གཉེར་ཁང་རྒྱ་བསྐྱེད་སླད་དཔལ་འབྱོར་འདུ་འགོད་སླད་ཕེབས་ཏེ་དོན་སྨིན་བྱུང་།
ཕྱི་ལོ་ ༡༩༩༦ ཟླ་བ་ ༡༢ ཚེས་ ༡༡ ཉིན་དཔལ་ལྡན་སྨད་རྒྱུད་པའི་མཁན་ཁྲིར་ཕེབས་ཏེ་དམ་ཆོས་འགྲེལ་པ་བཞི་སྦྲགས་ཀྱིས་གཙོས་འཆད་ཉན་མང་དུ་གནང་དགོས་པའི་རིགས་ཆད་ལུས་མེད་པར་གནང་སྟེ་ལོ་གསུམ་ཚང་བར་མཛད། དེ་ལྟར་དམ་པ་འདི་ཉིད་མཁན་བཙུན་བཟང་གསུམ་གྱི་ཡོན་ཏན་དང་ལྡན་ཞིང་ཁྱད་པར་རྒྱལ་བསྟན་རིན་པོ་ཆེ་བཤད་སྒྲུབ་གཉིས་ཀྱིས་འཛིན་དགོས་པ་ཐུགས་ལ་བརྣག་ཏེ་བསྟན་པ་ལ་ཞུགས་པའི་གྲྭ་རྒྱུན་གསར་བུ་རྣམས་ལ་ཐུགས་ངལ་བར་འཛེམས་མེད་ཀྱིས་དཔེ་ཁྲིད་རྒྱ་ཆེར་མཛད་པ་སོགས་བསྟན་པའི་བྱ་བ་ཁོ་ནས་དུས་འདའ་བར་མཛད་དོ། །
༩༥] ཕ་ར་དགེ་བཤེས་བློ་བཟང་ངག་དབང་ [ རྒན་སྐྱོར་དཔོན། ]
རབ་འབྱམས་གཞུང་དོན་འབྱེད་ལ་བློ་གྲོས་ཟབ། །གཞན་ཕན་ལྷག་བསམ་བཟང་པོའི་ཐུགས་རྒྱུད་གཏམས། །
མདོ་རྒྱུད་གནད་བཀྲོལ་ངག་ལ་དབང་འབྱོར་བའི། །གསུམ་ལྡན་རྡོ་རྗེ་འཛིན་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་དགའ་བྱང་ཕ་ར་དགེ་བཤེས་བློ་བཟང་ངག་དབང་ [ རྒན་སྐྱོར་དཔོན་ ] མཆོག་སྨད་རྒྱུད་པའི་མཁན་ཁྲིར་ཕེབས་པ་ཡིན་ཏེ། དམ་པ་འདི་བོད་ཤར་ཕྱོགས་ཀོང་པོ་རྒྱ་མདའ་རྗོང་གི་མང་འོག་ཉང་པོ་གཞི་ནང་ཞེས་པའི་ཁུལ་དུ་ཕྱི་ལོ་ ༡༩༣༧ ལོར་སྐུ་འཁྲུངས། ཕྱི་ལོ་ ༡༩༥༢ དང་རང་ལོ་ ༡༥ ཐོག་གདན་ས་ཆེན་པོ་དགའ་ལྡན་བྱང་རྩེ་ཕ་ར་ཁང་ཚན་དུ་དམ་པའི་ཆོས་ཀྱི་སྒོར་ཞུགས། དང་ཐོག་དགེ་བཤེས་བློ་བཟང་བསྟན་པ་མཆོག་འདོན་ཆོག་དགེ་རྒན་དུ་བསྟེན་ནས་འདོན་ཆོག་ཐུགས་འཛིན་མང་དུ་གནང་། ཕྱི་ལོ་ ༡༩༥༦ རང་ཉིད་ཀྱི་དགུང་ལོ་ ༢༠ སོན་སྐབས་འཛིན་གྲྭའི་སྐྱོར་དཔོན་གནང་བས་བཏགས་པའི་མཚན་ལ་རྒན་སྐྱོར་དཔོན་ཞེས་གྲགས། བཀྲིན་ཟླ་མེད་ཕ་ར་དགེ་བཤེས་བློ་བཟང་འཕྲིན་ལས་མཆོག་བསམ་སྦྱོར་གཉིས་ཀྱིས་ཚུལ་བཞིན་བསྟེན་ནས་གཞུང་ཆེན་བཀའ་པོད་ལྔ་ལ་བརྩོན་པ་ཆུ་བོའི་རྒྱུན་བཞིན་འགྲུས་པར་སྦྱངས།
ཕྱི་ལོ་ ༡༩༥༨ ལོར་དགའ་ལྡན་ཡངས་པ་ཅན་དུ་ཤར་བྱང་གི་འདུས་པ་རྒྱ་མཚོའི་དབུས་སུ་ཚད་མ་རྣམ་འགྲེལ་གྱི་དམ་བཅའ་བ་གནང་ཞིང་སྐབས་དེར་༧གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་ཀྱང་དམ་བཅར་ཚོགས་ཕེབས་མཛད་ཡོད་པས་སྐལ་བཟང་གི་གོ་སྐབས་སོན། ༡༩༥༩ དང་ཉིད་ཀྱི་དགུང་ལོ་ ༢༣ སྐབས་བཙན་བྱོལ་དུ་སྤྱི་མཚུངས་ཕེབས་ཏེ་ཐོག་མར་སྦག་ས་ཆོས་སྒར་དུ་དཀའ་ཚེགས་ཤིན་ཏུ་ཆེ་བའི་དུས་སྐབས་ཤིག་ཡིན་ནའང་སློབ་གཉེར་ལ་བརྩོན་པ་མ་བཏང་བར་ལོ་ངོ་བཅུའི་རིང་སློབ་གཉེར་མུ་མཐུད་གནང་། ཕྱི་ལོ་ ༡༩༦༤ ལོར་ཕར་ཕྱིན་གྱི་དམ་བཅའ་བཞག་རྗེས་རྒྱ་གར་ལྷོ་ཕྱོགས་མོན་གྷོ་གཞིས་ཆགས་སུ་ཕེབས་ནས་སློབ་གཉེར་འཕྲོ་སྐྱོང་གནང་།
ཕྱི་ལོ་ ༡༩༧༨ རང་ཉིད་དགུང་ལོ་ ༤༢ པར་དབུ་མ་དགོངས་པ་རབ་གསལ་གྱི་བཤད་ཆེན་དང་འབྲེལ་བའི་མདོ་རམས་པའི་དམ་བཅའ་བཞག ཕྱི་ལོ་ ༡༩༨༠ ནས་ ༡༩༨༦ བར་ལོ་བདུན་རིང་དགེ་ལུགས་རྒྱུགས་སྤྲོད་ལ་ཞུགས་ཏེ་གཞུང་ཆེན་བཀའ་པོད་ལྔའི་རྒྱུགས་སྤྲོད་ལེགས་པར་ཕུལ། བཀའ་རམས་དང་། ལྷ་རམས། སློབ་དཔོན་འཛིན་གྲྭ་སོ་སོར་གནས་རིམ་དང་པོར་སོན་པས། ༧གོང་ས་མཆོག་ནས་བསྐྱེད་རྫོགས་ཀྱི་ཕྱག་དཔེ་དང་། སྐྱབས་རྗེ་ཡོངས་འཛིན་གླིང་རྡོ་རྗེ་འཆང་ནས་འགྲེལ་པ་བཞི་སྦྲགས་ཀྱི་ཕྱག་དཔེ་གསོལ་བསྩལ་གནང་། དེ་དག་ནི་ཕྱིས་རྒྱུད་པའི་འཆད་ཉན་གནང་རྒྱུའི་རྟེན་འབྲེལ་དུ་བཞེད་སྣང་ངོ་། ཕྱི་ལོ་ ༡༩༨༥ དང་རང་ལོ་ ༤༩ སོན་སྐབས་གནས་མཆོག་རྡོ་རྗེ་གདན་དུ་༧གོང་ས་ཆེན་པོས་དཔལ་དུས་ཀྱི་འཁོར་ལོའི་དབང་ཆེན་སྐབས་དགེ་འདུན་འདུས་པ་རྒྱ་མཚོའི་དབུས་སུ་དགེ་བཤེས་ལྷ་རམས་པའི་དམ་བཅའ་བཞག སླར་ཡང་དེ་ལོར་དགའ་འབྲས་གཉིས་སུ་སྨོན་ལམ་ཆེན་མོ་དང་སེ་རར་སྨོན་ལམ་བཅས་ལ་དགེ་བཤེས་ལྷ་རམས་པའི་དམ་བཅའ་བཞག་ཡོད།
ཕྱི་ལོ་ ༡༩༨༩ ལོར་༧གོང་ས་༧སྐྱབས་མགོན་ཆེན་པོའི་བཀའ་དགོངས་ལྟར་དཔལ་ལྡན་སྨད་རྒྱུད་གྲྭ་ཚང་དུ་རྒྱུད་ལ་ཞུགས་ཏེ་སྐབས་དེའི་མཁན་རིན་པོ་ཆེ་སྒོ་སོག་གསུང་རབ་རིན་པོ་ཆེའི་ཞལ་སྔ་ནས་དམ་ཆོས་འགྲེལ་པ་བཞི་སྦྲགས་གྱི་དབུས་རྒྱུད་པའི་ལོ་འཁོར་གཅིག་གི་འཆད་ཉན་རྣམས་ཆ་ཚང་ཞུས། དེ་ལོར་སེ་ར་ཆོས་སྒར་དུ་༧གོང་ས་མཆོག་དབུ་བཞུགས་ཐོག་རྒྱུད་སྨད་དགེ་བཤེས་ལྷ་རམས་པ་རྣམས་ལ་སྔགས་ཀྱི་རྩོད་རྒྱུགས་ཁོངས་ཞུགས་ཏེ་ཨང་དང་པོའི་གྲས་ཀྱི་ཕྱག་ཁྱེར་སོན། ཕྱི་ལོ་ ༡༩༩༤ ལོར་ཊཱིཀྐ་སྐྱོར་དཔོན་དང་དགེ་སྐོས་མཉམ་དུ་འཁེལ་ཞིང་ཊཱིཀྐ་ལེའུ་གཉིས་པ་ནས་བརྒྱད་པའི་མཚམས་སྦྱར་བར་ཆད་ལུས་མེད་པར་གསུངས། འཇིགས་བྱེད་ཆོས་ཐོག་ཉིན་གསུམ་རིང་སྔགས་ཀྱི་དམ་བཅའ་བཞག སྟེ་གསུང་ལན་ཐོགས་པ་མེད་པར་གནང་། ཕྱི་ལོ་ ༡༩༩༥ ལོར་རྒྱུད་པའི་ཁྲིད་ཁང་སྐྱོར་དཔོན་ཁེལ་ཏེ་རྫོགས་རིམ་དམར་ཁྲིད་ཆ་ཚང་ཁྲིད་ཁང་པའི་དབུས་སུ་གསུངས། སློབ་གཉེར་བ་རྣམས་ལ་དཔེ་ཁྲིད་ཀྱང་ཡང་ཡང་གནང་།
ཕྱི་ལོ་ ༡༩༩༦ ལོར་༧གོང་ས་མཆོག་ནས་སྨད་རྒྱུད་པའི་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་ཕེབས་ལྟར་ལོ་གསུམ་རིང་བླ་མའི་ཐུགས་འགན་བདག་གིར་བཞེས་ནས་ཆོས་སྲིད་ཀྱི་ཕྱག་ལས་འཐུས་གཙང་མཛད། ཕྱི་ལོ་ ༡༩༩༩ ལོར་ཕྱི་ཟླ་ ༩ ཚེས་ ༡༤ ཉིན་སྨད་རྒྱུད་པའི་མཁན་ཁྲིར་ཕེབས། དེ་ནས་བཟུང་ཕྱི་ལོ་ ༢༠༠༢ ཟླ་བ་ ༡༠ སྟེ་ཁྲི་མཇུག་གི་བར་ལོ་ངོ་གསུམ་རིང་དམ་ཆོས་འགྲེལ་པ་བཞི་སྦྲགས་དང་བདེ་གསང་འཇིགས་གསུམ་གྱི་བསྐྱེད་རྫོགས་སོགས་ཐུགས་ཐོག་དང་དཔེ་ཐོག་ནས་འཆད་ཉན་གནང་དགོས་པ་རྣམས་ཆད་ལུས་མེད་པར་ལེགས་པར་གནང་། མདོར་ན་དམ་པ་འདི་ཆོས་སྒོར་ཞུགས་ནས་བཟུང་༧གོང་ས་སྐྱབས་མགོན་ཡབ་སྲས་ཀྱིས་དབུས་བླ་མ་བཅུ་ཕྲག་བརྒལ་བ་བསྟེན་ནས་མདོ་སྔགས་ཀྱི་ཟབ་ཆོས་དབང་ལུང་མན་ངག་མང་དུ་ཞུས་ཤིང་། དབང་དུས་སུ་ཁས་བླངས་པའི་བདེ་གསང་འཇིགས་གསུམ་སོགས་ཀྱི་ལས་རུང་བསྙེན་པ་ཡང་དུ་མ་བཞུགས། ཕྱི་ལོ་ ༡༩༧༨ ནས་བཟུང་ལོ་ངོ་ཉི་ཤུ་སྐོར་ལ་དགེ་ཕྲུག་སློབ་མ་བརྒྱ་ཕྲག་བརྒལ་བར་གཞུང་ཆེན་གྱི་དཔེ་ཁྲིད་རྒྱ་ཆེར་མཛད་དེ་སྐུ་ཚེ་མཛད་འཕྲིན་མཐའ་འཁྱོལ་བའི་རྣམ་ཐར་རོ། །