གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༡༠༠] གཞུང་པ་དགེ་བཤེས་བློ་བཟང་ཕན་བདེ།
བློ་བཟང་རིང་ལུགས་དྲི་མེད་ཡིད་བཞིན་དབང་། །བསྟན་དང་འགྲོ་བའི་ཕན་བདེའི་དཔལ་ཡོན་དུ། །
འདྲེན་པའི་ཐུགས་བསྐྱེད་ས་འཛིན་དཔལ་ལྟར་བརྗིད། །ཡོངས་ཀྱི་བཤེས་གཉེན་མཆོག་ལ་གསོལ་བ་འདེབས། །
ཞེས་འབྱུངབ་ལྟར་དེའི་རྗེས་སུ་སེར་སྨད་གཞུང་པ་དགེ་བཤེས་བློ་བཟང་ཕན་བདེ་མཆོག་མཁན་ཁྲིར་ཕེབས་པ་ཡིན། དམ་པ་འདི་ཕྱི་ལོ་ ༡༩༤༡ ལོར་བོད་དབུས་ཀྱི་རྒྱལ་ས་ལྷ་སའི་ཉེ་འདབས་ཆུ་ཤུལ་རྫོང་ཁོངས་སྒེར་ལྷ་པ་ལྷ་ཀླུ་ཁྱིམ་ཚང་གི་ཡབ་ཚེ་རིང་རྒྱལ་མཚན་དང་། ཡུམ་ཡེ་ཤེས་གཉིས་ཀྱི་སྲས་སུ་སྐུ་འཁྲུངས། སྲས་སྲོས་བཅུ་བཞི་བྱུང་བ་ནས་བཞི་པ་དེ་ཡིན་ཞིང་། རྣམ་ཀུན་ཞི་དུལ་བག་ཕེབས་ཤིང་ཞལ་གསང་ལ་གཞན་དང་འབྲེལ་འདྲིས་བདེ་བ་ཡོད་ཅིང་། ཡབ་ཡུམ་གཉིས་ནས་ཆོས་སྒོར་འཇུག་རྒྱུའི་འདོད་མོས་ཆེན་པོ་ཡོད་པ་ལྟར། ཕྱི་ལོ་ ༡༩༤༩ དང་དམ་པ་འདིའི་དགུང་ལོ་ ༠༩ ལ་སོན་སྐབས་གདན་ས་ཆེན་པོ་སེར་སྨད་གྲྭ་ཚང་དུ་སྒྲིག་ཞུགས་ཀྱིས་མཁན་ཐོག་དོན་བརྒྱད་པ་རྒྱལ་རོང་མཁན་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གི་དྲུང་ནས་རབ་བྱུང་གཙུག་ཕུད་བཞེས།
གནས་ཀྱི་སློབ་དཔོན་དགེ་བའི་བཤེས་གཉེན་ཆེན་པོ་རྒན་བསྟན་འཛིན་ཆོས་གྲགས་བསྟེན་ནས་ཡི་གེ་འབྲི་ཀློག་ནས་བརྡ་སྤྲོད་རིག་གནས་སོགས་དང་། དགེ་བའི་བཤེས་གཉེན་ཆེན་པོ་རྟ་དབྱངས་དགེ་བཤེས་བྱམས་པ་ཐབས་མཁས་ཀྱི་དྲུང་ནས་ཆོས་སྤྱོད་བློ་འཛིན་སོགས་ལ་བྱང་ཆུབ་པར་མཛད་པས་གྲྭ་ཚང་གི་འདོན་བཟང་སྐད་གསང་གནང་། ཕྱི་ལོ་ ༡༩༥༠ དང་རང་ཉིད་དགུང་ལོ་བཅུ་ལ་སོན་པ་ན་སྐྱབས་རྗེ་ལྷ་བཙུན་རྡོ་རྗེ་འཆང་གི་དྲུང་ནས་དགེ་ཚུལ་གྱི་བསླབ་སྡོམ་ཞུས་ཏེ་མཚན་ཡང་བློ་བཟང་ཕན་བདེ་ཞེས་གསོལ། དགེ་བའི་བཤེས་གཉེན་ཆེན་པོ་གཞུང་པ་བྱང་རྩེ་ཆོས་རྗེ་ཐུབ་བསྟན་མཁས་བཙུན་རིན་པོ་ཆེ་དང་། དགེ་བའི་བཤེས་གཉེན་ཆེན་པོ་བློ་གྲོས་བཟང་པོ་མཆོག གྲུབ་པའི་དབང་ཕྱུག་དགེ་བཤེས་ཡེ་ཤེས་སྟོབས་ལྡན་མཆོག་དང་། དགེ་བའི་བཤེས་གཉེན་ཆེན་པོ་གཞུང་པ་རྒན་བློ་བཟང་བསྟན་འཛིན་སོགས་ཡོངས་འཛིན་དུ་བསམ་སྦྱོར་གཉིས་ཀྱིས་ཚུལ་བཞིན་བསྟེན་ཏེ་གཞུང་ཆེན་བཀའ་པོད་ལྔར་ཐོས་བསམ་སློབ་གཉེར་འགོ་འཛུགས་ཀྱིས་སྔོན་འགྲོའི་རིགས་ལམ་སྒོ་འབྱེད་བསྡུས་གྲྭ་ནས། བློ་རྟགས། གཞུང་གསར། གཞུང་སྙིང་། ཕར་ཕྱིན་སྐབས་གཉིས་པའི་བར་རང་ཡུལ་བོད་དུ་ཐོས་བསམ་སློབ་གཉེར་མཛད།
ཕྱི་ལོ་ ༡༩༥༩ དང་དགུང་ལོ་བཅོ་བརྒྱད་སྐབས་བོད་ས་ཡོངས་རྫོགས་རྒྱ་དམར་གྱིས་བཙན་བཟུང་སྐབས་བཙན་བྱོལ་དུ་ཕེབས་ཏེ་ཐོག་མར་རྒྱ་གར་ཨ་སམ་མེ་ས་མ་རི་ནས་སྦག་ས་ཆོས་སྒར་དུ་བསྟན་པའི་མེ་རོ་གསོ་བའི་སློབ་གཉེར་བ་འདེམས་སྒྲུག་ཁོངས་ནས་སློབ་གཉེར་འཕྲོ་སྐྱོང་ཞུ་རྒྱུའི་གོ་སྐབས་བྱུང་བ་ལྟར་དཀའ་སྤྱད་འབད་བཙོན་ལྷོད་མེད་མཛད། ཕྱི་ལོ་ ༡༩༦༥ ལོར་རྡ་ས་ཕོ་བྲང་རྙིང་པར་༧གོང་ས་སྐྱབས་མགོན་ཆེན་པོ་མཆོག་གི་དྲུང་ནས་བསྙེན་རྫོགས་ཀྱི་བསླབ་སྡོམ་ཞུས། ཕྱི་ལོ་ ༡༩༧༠ ལོར་༧གོང་ས་མཆོག་དང་རང་གཞུང་ནས་གྲྭ་རྒྱུན་དང་འཚོ་རྟེན་སོགས་འཕྲལ་ཕུགས་གཉིས་དགེའི་སླད་སྦག་ས་ཆོས་སྒར་ནས་གནས་སྤོས་གནང་སྟེ། ལྷོ་ཕྱོགས་སྦེལ་ཀོབ་སེ་ར་དགེ་འདུན་སྤྱིའི་ཕེབས་རྗེས་སུ་སྙེགས། དགེ་བའི་བཤེས་གཉེན་ཆེན་པོ་རྒྱལ་རོང་མཁན་ཟུར་ངག་དབང་ཐེག་མཆོག་མཆོག་དང་། དགེ་བའི་བཤེས་གཉེན་ཆེན་པོ་བློ་བཟང་ཚུལ་ཁྲིམས་མཆོག དགའ་ལྡན་ཁྲི་ཆེན་རྡོ་རྗེ་འཆང་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་ལ་སོགས་པ་བཤེས་གཉེན་དུ་མ་བསམ་འབྱོར་གཉིས་ཀྱིས་ཚུལ་བཞིན་དུ་བསྟེན་ནས་ཕར་ཕྱིན། དབུ་མ། རྣམ་འགྲེལ། འདུལ་མཛོད་བཅས་ལ་ཐོས་བསམ་སློབ་གཉེར་བརྩོན་པ་ཆེན་པོས་འཕྲོ་སྐྱོང་གནང་། ཆོས་སྒར་གསར་རྒྱག་གི་ལས་གཞི་ཤིང་ནགས་གཅོད་འབྲེག ཨར་ལས། ཞིང་ལས་སོགས་གཞོན་ཁྲལ་རིགས་ལ་ལབ་གླེང་ཀ་ཀོར་མེད་པར་སྤྱི་མཚུངས་སྒྲིག་འཁུར་ལྷག་བསམ་འཁུར་ལེན་ཞུས་པ་དང་། ༧གོང་ས་སྐྱབས་མགོན་ཆེན་པོ་མཆོག་གིས་དབུས་སྐུའི་ཡོངས་འཛིན་སྐྱབས་རྗེ་ཡོངས་འཛིན་རྣམ་གཉིས་ཀྱི་གསུང་ཆོས་སྐབས་གང་ཡིན་དང་། སྐྱབས་རྗེ་ཟོང་རིན་པོ་ཆེ་མཆོག་དང་། བསྟན་པའི་གསལ་བྱེད་དག་པ་ཁྲི་སྤྲུལ་རིན་པོ་ཆེ་མཆོག གཞན་ཡང་དབང་ལུང་མན་ངག་གིས་ཕྱུག་པའི་རིས་མེད་སྐྱེས་ཆེན་དུ་མའི་དྲུང་ནས་དབང་ལུང་མན་ངག་ཁྲིད་རྒྱུན་གསན་བསམ་ཉམས་བཞེས་ལ་དཀའ་སྤྱད་ལྷོད་མེད་མཛད།
ཕྱི་ལོ་ ༡༩༧༧ ལོ་ནས་དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་རྒྱུགས་སྤྲོད་ཀྱི་རིམ་པ་ལོ་བདུན་བསྟུད་མར་གཞུང་ཆེན་བཀའ་པོད་ལྔས་མཚོན་བརྡ་སྤྲོད་ཆོས་འབྱུང་རྒྱལ་རབས་བཅས་པར་དཀའ་རམས་དང་། སློབ་དཔོན་ལྷ་རམས་བཅས་སོ་སོར་ཨང་རིམ་དང་པོའི་བསླབ་པ་མཐར་སོན་གྱི་ཚད་འཛིན་ཕྱག་ཁྱེར་བཞེས། ཕྱི་ལོ་ ༡༩༧༩ ལོར་རིགས་ཆུང་ཚོགས་ལངས་བཞེངས་ཏེ་ཞལ་གཏད་འཛིན་གྲོགས་རྒྱུད་སྟོད་མཁན་ཟུར་དགེ་བཤེས་བསྟན་འཛིན་ཤེས་རབ་མཆོག་དང་ལྷན་དུ་རྩོད་གཞུང་ཆོས་འཁོར་ལས་བརྩམས་ཏེ་དཀའ་གནད་ཁག་ལ་བརྒལ་བརྟག་བགྲོ་གླེང་གཟེངས་སུ་ཐོན་པར་མཛད། ཕྱི་ལོ་ ༡༩༨༤ ཤིང་བྱི་ལོར་སེ་ར་ཐེག་ཆེན་གླིང་དུ་འཇང་དགུན་ཆོས་འཚོག་སྐབས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དང་། དགའ་ལྡན་ཁྲི་རིན་པོ་ཆེ་མཆོག ཤར་བྱང་གི་ཆོས་རྗེ་རྣམ་གཉིས་དབུ་བཞུགས་ཐོག་གདན་ས་ཆེན་པོ་བཞིའི་མཁས་པ་གདན་འཛོམས་པའི་དབུས་སུ་རྣམ་འགྲེལ་ལེའུ་གཉིས་པའི་དམ་འཇོག་གནང་སྟེ་གཞུང་ལུགས་ཇི་བཞིན་གསུང་ལན་ལེགས་པར་གནང་བས། རྒྱལ་བ་དགྱེས་པའི་མཆོད་སྤྲིན་དང་མཁས་རྣམས་མགུ་བས་བསྔགས་བརྗོད་ཀྱི་མེ་ཏོག་གཏོར། ཕྱི་ལོ་ ༡༩༨༥ ལོར་རྡོ་རྗེ་གདན་དུ་གདན་གསུམ་ཆོ་འཕྲུལ་སྨོན་ལམ་ཆེན་མོ་འཕར་མ་ཚུགས་སྐབས་གཞུང་ཆེན་བཀའ་པོད་ལྔ་ལ་གསན་སྦྱོང་སློབ་གཉེར་མཐར་སོན་པའི་ལྷ་རམས་གྲྭ་སྐོར་དམ་བཅའ་འཇོག་གནང་མཛད་པ་དང་། ཕྱི་ལོ་ ༡༩༨༦ ལོར་མཁས་མང་རྒྱ་མཚོའི་དབུས་སུ་གཞུང་ཆེན་བཀའ་པོད་ལྔ་ལ་གསན་སྦྱོང་སློབ་གཉེར་མཐར་སོན་པའི་འབྲས་རྟགས་སུ་གདན་གསུམ་སོ་སོར་སྨོན་ཚོགས་སྐབས་དངོས་གཞི་དགེ་བཤེས་ལྷ་རམས་པའི་གྲྭ་སྐོར་དམ་བཅའ་མཛད།
ཕྱི་ལོ་ ༡༩༨༦ ལོར་གསང་ཆེན་རིག་པ་འཛིན་པ་དཔལ་ལྡན་སྨད་རྒྱུད་གྲྭ་ཚང་དུ་ཕྱི་མིག་ལུང་ཆོས་ཐོག་སྐབས་སྒྲིག་ཞུགས་ཀྱིས། སྐབས་དེའི་མཁན་ཆེན་རྡོ་རྗེ་འཆང་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གི་ཞལ་སྔ་ནས་དམ་ཆོས་འགྲེལ་པ་བཞི་སྦྲགས་གྱིས་གཙོས་གསང་བདེ་འཇིགས་གསུམ་གྱི་བསྐྱེད་རྫོགས་སོགས་གྲྭ་ཚང་གི་འཆད་ཉན་ཆ་ཚང་ཆད་ལུས་མེད་པར་གསན་བཞེས་མཛད། ཆོས་ཐོག་སྐབས་སོ་སོའི་སྒྲིག་སྲོལ་རྣམས་ཆ་ཕྲ་མོ་ཙམ་ཡང་འགལ་མེད་ཀྱིས་ལོ་གཅིག་ཧྲིལ་པོར་ཆོས་འགྲིམས་མཛད།
ཕྱི་ལོ་ ༡༩༨༨ ནས ༡༩༩༠ བར་ལོ་ངོ་གསུམ་རིང་སེར་སྨད་གྲྭ་ཚང་གི་ཕྱག་མཛོད་དུ་བསྐོ་བཞག་གནང་དོན་བཞིན་ལོ་གསུམ་རིང་སྲི་ཞུར་སྨན་པའི་ལས་དོན་ལྷག་བསམ་འཁུར་བཞེས་ཐོག་གཙོ་ཆེ་དགེ་འདུན་གྱི་འཚོ་བའི་གནས་སྟངས་རྐང་ཚུགས་པར་མཛད། ཕྱི་ལོ་ ༡༩༩༠ ལོ་མཇུག་ཏུ་སེ་ར་ཐེག་ཆེན་གླིང་དུ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དབུ་བཞུགས་ཐོག་མཁས་མང་འདུས་པའི་དབུས་སུ་སྔགས་ཀྱི་རྩོད་རྒྱུགས་འབུལ་བཞེས་གནང་འབྲས་སྔགས་ཀྱི་རབས་འབྱམས་པའི་ཚད་འཛིན་ཕྱག་ཁྱེར་བཞེས། ཕྱི་ལོ་ ༡༩༩༢ ལོར་དཔལ་སྨད་རྒྱུད་གྲྭ་ཚང་གི་དགེ་སྐོས་བཞེངས་ཏེ་སྒྲིག་ལམ་གནོན་སྡོམ་གྱི་མཛད་འགན་ལེགས་པར་བཞེས། ཕྱི་ལོ་ ༡༩༩༤ ལོར་སེར་སྨད་གྲྭ་ཚང་གི་དགེ་སྐོས་བཞེངས་ཏེ་སློབ་གཉེར་དང་སྒྲིག་ལམ་ཀུན་སྤྱོད་ཐོག་དམ་དྲག་ཆེན་པོ་མཛད་པ་དང་། ལྷག་པར་སེ་ར་དགོན་པའི་ནང་ཁང་ཚན། བླ་བྲང་གང་དུ་ཡང་རྔ་རྡུང་སྦུག་དཀྲོལ་མི་ཆོག་པ་དང་། སྒེར་སོ་སོས་སྦག་སྦག སྣུམ་འཁོར་སོགས་སྤུས་ཉོས་ཀྱིས་བདག་ཉར་ཡེ་ནས་མི་ཆོག་པའི་སྒྲིག་སྲོལ་གཏོད་པ་མ་ཟད་སླད་ཕྱིན་ཆད་ཀྱང་ལག་བསྟར་སྲ་བརྟན་ཡོང་ཆེད་སྒྲིག་གཞི་གཏན་འབེབས་ཀྱིས་ཁྲིམས་སུ་བཅས་པས་བསྟན་པ་ལ་ཕྱག་རྗེས་འཇོག་གནང་ལ་དགེ་འདུན་མང་པོས་ཡིད་རངས་བསྔགས་བརྗོད་ཞུས། ཕྱི་ལོ་ ༡༩༩༦ ལོར་སྨད་རྒྱུད་གྲྭ་ཚང་གི་ཕྱི་མིག་ལུང་ཆོས་ཐོག་སྐབས་ཁྲིད་ཁང་སྐྱོར་དཔོན་ཞུས་ཏེ། དཔལ་གསང་བ་འདུས་པའི་བསྙེན་པ་དང་འབྲེལ་བའི་སྒོ་ནས་གསང་བ་འདུས་པའི་ལམ་རིམ་པ་ལྔ་སྟན་ཐོག་གཅིག་ལ་ཉམས་སུ་ལེན་ཚུལ་དམར་ཁྲིད་ཐུགས་ཐོག་ནས་ཕྱག་སྲོལ་ལྟར་བརྩི་བཞག་གནང་།
ཕྱི་ལོ་ ༢༠༠༠ ལོར་ཡུ་རོབ་ཨིཌི་ལི་ཨུ་དྷི་ནི་ས་གནས་བྱང་ཆུབ་ཆོས་གླིང་ཆོས་ཚོགས་ནས་གདན་ཞུས་ལྟར་ཕེབས་ཏེ། དེར་ལོ་ངོ་བཅུ་གཉིས་ལ་ཉེ་བར་བཞུགས་ནས་གཙོ་བོ་བློ་སྦྱོང་ལམ་རིམ་སྐོར་ལ་སློབ་ཁྲིད་དང་། བོད་ཀྱི་ཁོར་ཡུག་སྐོར་དང་། སྨྲ་བརྗོད་རང་དབང་། འགྲོ་བ་མིའི་ཐོབ་ཐང་སྐོར་སོགས་ལ་དངོས་ཤུགས་བརྒྱུད་གསུམ་ནས་བོད་ཀྱི་བསྟན་སྲིད་ལ་སྨན་པའི་ཞབས་འདེགས་ལོ་བསྟར་ཆགས་སུ་མཛད། ཕྱི་ལོ་ ༢༠༠༧ ཟླ་བ་ ༡༢ ཚེས་ ༩ ནས་ ༡༢ བར་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨུ་དྷི་ནི་རྒྱལ་སར་ཆོས་ཚོགས་སུ་གདན་ཞུས་ལྟར་ཆིབས་སྒྱུར་བཀྲིན་ཆེ་སྟེ་ཆོས་འབྲེལ་ལྟ་ཁྲིད་དྲན་པ་བཞི་ལྡན་དང་། ཨུ་དྷི་ནི་མཐོ་རིམ་གཙུག་ལག་སློབ་གྲྭར་སློབ་ཕྲུག་སུམ་སྟོང་བརྒལ་བར་མི་ཚེ་བཟང་སྤྱོད་ལ་འཇུག་པའི་ལམ་སྟོན་བཀའ་སློབ་ཟབ་མོ་གནང་། སྐབས་དེར་མ་བསྒྲིགས་ལྷུན་གྲུབ་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ཞི་བདེའི་གཟེངས་རྟགས་འབུལ་བཞེས་མཛད་པའི་དུས་དྲན་འཁེལ་བ་ལྟར་མཛད་སྒོ་གོ་སྒྲིག་ཞུས་ཏེ་མང་ཚོགས་སུ་༧གོང་ས་༧སྐྱབས་མགོན་ཆེན་པོ་མཆོག་གི་འཛམ་གླིང་ཀུན་ཁྱབ་ཐུགས་འགན་དང་། དེ་བཞིན་བོད་དོན་སྐོར་འབོད་སྐུལ་གསལ་བསྒྲགས་གང་ལེགས་མཛད།
ཕྱི་ལོ་ ༢༠༠༦ ཟླ་བ་ ༠༨ ཚེས་ ༠༨ ཉིན་རྒྱ་ནག་རྒྱལ་ས་པེ་ཅིང་དུ་འཛམ་གླིང་རྒྱལ་ཡོངས་རྩེད་འགྲན་ཆེན་མོ་ཨོ་ལེམ་ཕིག་སྐོང་ཚོགས་སྐབས་བོད་དོན་དྲིལ་བསྒྲགས་ཆེད། སན་ཕི་རན་ཆིས་ཀ་ཞེས་པའི་ས་གནས་སུ་བོད་དོན་རྒྱབ་སྐྱོར་ཚོགས་ཁག་དང་མཉམ་རུབ་ཀྱིས་གོ་སྒྲིག་ཞུས་ཏེ་གཞུང་འབྲེལ་གནད་ཡོད་མི་སྣ་མང་པོ་འདུས་འཛོམས་ཐོག་བོད་དོན་གཏམ་བཤད་གནང་། ཕྱི་ལོ་ ༢༠༡༡ ཟླ་བ་ ༡༠ ནང་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཨུ་དྷི་ནི་རྒྱལ་སར་གདན་ཞུས་ཀྱི་ཆོས་འབྲེལ་དང་། ཇིའུ་དང་། ཡི་ཤུ། ཁ་ཆེས་མཚོན་ཆོས་ལུགས་འདྲ་མིན་གྱི་བླ་ཆེན་གདན་ཞུས་ཐོག་ཆོས་ལུགས་མཐུན་སྒྲིལ་ཚོགས་འདུ་དང་། ཚན་རིག་ཀྱི་བགྲོ་གླེང་ཚོགས་འདུ་སྐོང་ཚོགས། དེ་བཞིན་༧གོང་ས་སྐྱབས་མགོན་ཆེན་པོ་མཆོག་ལ་ཨུ་དྷི་ནི་རྫོང་གིས་མི་སེར་ཕྱག་ཁྱེར་གཟེངས་བསྟོད་གསེར་གྱི་ལྡེ་མིག་འབུལ་བཞེས་གནང་བ་སོགས་ཀྱི་མཛད་རིམ་གོ་སྒྲིག་ཞུས།
ཕྱི་ལོ་ ༢༠༡༡ ཟླ་བ་ ༡༠ ཚེས་ ༢༧ ཉིན་༧གོང་ས་༧སྐྱབས་མགོན་ཆེན་པོ་མཆོག་ནས་སྨད་རྒྱུད་གྲྭ་ཚང་གི་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་ཕེབས་བཞིན། ལོ་དེའི་ཟླ་བ་ ༡༡ ཚེས་ ༢༨ སྟེ་གཟའ་སྐར་འཕྲོད་སྦྱོར་དགེ་བའི་ཉིན་སྔར་སྲོལ་ཁྲི་སྟོན་རྟེན་འབྲེལ་མཛད་སྒོ་སརྒ་མ་འཆོལ་བར་མཛད། ཕྱི་ལོ་ ༢༠༡༢། ལོར་༧གོང་ས་༧སྐྱབས་མགོན་ཆེནཔོ་མཆོག་སྨད་རྒྱུད་གྲྭ་ཚང་དུ་ཆིབས་སྒྱུར་དང་བསྟུན་གསར་མཇལ་དང་འབྲེལ་ལམ་སྟོན་བཀའ་སློབ་ཞུས་རྗེས་གཟིམ་ཆུང་ནས་ཐོན་ཁར་མགོན་པོ་མཆོག་ནས་ཁྱེད་རང་གྲོད་ཁོག་ཆེན་པོ་ཞིག་འཁྱེར་ནས་གང་སར་བོད་དོན་སྐད་ཅོར་རྒྱག་གི་འདུག སྙིང་རྗེ་བོད་པའི་ལ་རྒྱ་ཞེད་དྲག་ཡོད་མཁན་ཞིག་ཡིན་ཞེས་གསུངས་སོང་བས། སྒྲུབ་པའི་མཆོད་པ་ཅུང་ཟད་བགྱིས་པའི་ཚོར་སྣང་དང་དགའ་བདེ་ཟད་མི་ཤེས་པ་བྱུང་ཞེས་མཁན་ཆེན་འདིའི་ཞལ་ནས་གསུངས། ཕྱི་ལོ་ ༢༠༡༢ ཟླ་བ་ ༠༦ པའི་ནང་ཨིཌི་ལི་ཨུ་དྷི་ནི་རྒྱལ་སའི་རྗོང་དཔོན་ནམ་དེ་གའི་གཙུག་ལག་སློབ་གཉེར་ཁང་གི་ངེས་སྟོན་པ་འབུམ་རམས་པ་ཕི་རོ་ལགས་སྨད་རྒྱུད་གྲྭ་ཚང་དུ་གདན་ཞུས་ཀྱིས་གྲྭ་ཚང་དང་སེར་སྨད་གྲྭ་ཚང་གཉིས་ཀྱི་ཚན་རིག་དགེ་རྒན་གཉིས་རེ་ཨུ་དྷི་ནི་གཙུག་ལག་སློབ་གཉེར་ཁང་ནས་གཏོང་རྒྱུའི་ལས་འཆར་བཟོས་ཏེ་དེའི་འཆར་ལོ་ནས་དངོས་སུ་གཏོང་གནང་འགོ་འཛུགས་བྱས་ཏེ་ལོ་ཤས་སློབ་ཚན་འཁྲིད།
ཕྱི་ལོ་ ༢༠༡༤ ཟླ་བ ༠༦ ཚེས་ ༠༤ ཉིན་ཆོས་རིག་ལྷན་ཁང་བརྒྱུད་མཁན་པོའི་ཕྱག་རྟགས་རིན་པོ་ཆེ་སྤྱི་ཕེབས་དགོངས་དོན་བཞིན། ཟླ་བ་ ༡༠ ཚེས་ ༢༧ ཉིན་མཁན་པོའི་ཁྲི་སྟོན་རྟེན་འབྲེལ་མཛད་སྒོ་རྒྱུད་པའི་སྔར་སྲོལ་བཟང་པོའི་ཕྱག་བཞེས་ཇི་བཞིན་རྟེན་འབྲེལ་ལེགས་པར་བསྒྲིགས། དེ་ནས་བཟུང་ལོ་ངོ་གསུམ་གྱི་རིང་འཆད་ཉན་དམ་ཆོས་འགྲེལ་པ་བཞི་སྦྲགས་དང་རྒྱུད་ཀྱི་ཊཱིཀྐ། གསང་བདེ་འཇིག་གསུམ་གྱི་བསྐྱེད་རྫོགས་སོགས་ཁྲིད་རྒྱུན་དང་ལུང་རྒྱུན་ཐུགས་ཐོག་ནས་གནང་དགོས་པའི་རིགས་དང་དཔེ་ཐོག་ནས་གནང་དགོས་པའི་རིགས་མང་དུ་ཡོད་པ་རྣམས་སླ་བཅོས་སུ་མ་སོང་བར་སྒྲ་དག་གསལ་གསུམ་གྱི་སྒོ་ནས་ཆད་ལུས་མེད་པར་ལོ་གསུམ་གཙང་བར་འཆད་ཉན་ཆ་ཚང་གནང་། དེ་བཞིན་མཁན་ཐོག་རིམ་པའི་འཆད་ཉན་གྱི་ཁོངས་སུ་༧རྗེ་བཙུན་ཤེས་རབ་སེང་གེས་མཛད་པའི་རྒྱུད་ཀྱི་་ཊཱིཀྐའི་ལུང་རྒྱུན་གནང་དགོས་པའི་སྲོལ་བཟང་གསར་བཙུགས་མཛད།
༧སྤྱི་ནོར་གོང་ས་སྐྱབས་མགོན་ཆེན་པོ་མཆོག་གིས་ཐུགས་རེ་ལམ་སྟོན་བཀའ་སློབ་སྔ་ཕྱིར་ཕེབས་པ་ལྟར། གྲྭ་ཚང་ཕྱག་མཛོད་རྣམ་པ་དང་གྲོས་བསྡུར་གྱིས་བསྐྱེད་རིམ་པ་སྔགས་རམས་ཐོན་རིམ་བཞིན་ལོ་ལྟར་ཕྱི་མིག་ལུང་ཆོས་ཐོག་རིང་། ལམ་རིམ་བསྐྱེད་རྫོགས་སོགས་ཀྱི་སྒོམ་སྒྲུབ་ཀྱི་མཚམས་ལ་བཞུགས་དགོས་པའི་སྤྱི་མོས་སྒྲིག་གཞི་གཏན་འབེབས་ཞུས། ཕྱི་ལོ་ ༢༠༡༥ ལོར་འཇམ་མགོན་བསྟན་པའི་སྲོག་ཤིང་དགའ་ལྡན་ཁྲི་ཟུར་རྡོ་རྗེ་འཆང་སྐྱབས་རྗེ་རི་རྫོང་རིན་པོ་ཆེ་མཆོག་གྲྭ་ཚང་དུ་གདན་ཞུས་ཀྱིས་འཇིགས་བྱེད་ལྷ་བཅུ་གསུམ་མའི་བཀའ་དབང་ཞུས་པ་དང་འབྲེལ་བརྟན་བཞུགས་བསྟར་འབུལ་ཞུས།
བླ་མའི་ལས་ཁུར་སྐབས་ནས་སྦྱིན་བདག་རང་ངོས་ནས་ཞུས་པའི་ཐོག་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྟོན་འཁོར་སྨད་རྒྱུད་གྲྭ་ཚང་དུ་ཞབས་འཁོད་བཀྲིན་ཆེ་སྟེ་དཔལ་གསང་དབང་འདུས་པའི་དབང་ཆེན། སྨད་རྒྱུད་ཁྲིད་ཆེན་བརྒྱད་ཀྱི་བཤད་ལུང་སྩོལ་གནང་ཡོང་བའི་གདན་ཞུའི་གསོལ་བ་སྔོན་ནས་བཏབ་འབྲས་ཕྱི་ལོ་ ༢༠༡༥ ཟླ་བ་ ༠༩ ཚེས་ ༡༢ ཉིན་ཞབས་ཀྱི་པདྨོ་མངོན་པར་བཀོད་དེ་སྐལ་བཟང་གི་དགའ་སྟོན་བསོད་ནམས་དཔྱིད་དུ་སྨིན་ཏེ། སྔོན་འགྲོའི་གསུང་ཆོས་རྗེའི་རྟེན་འབྲེལ་བསྟོད་པ་དང་། རྟོགས་བརྗོད་མདུན་ལེགས་མ། ཅོ་ནེ་བླ་མའི་སྤེལ་མར་བསྟོད་པ། ༧རྒྱལ་དབང་བསྐལ་བཟང་རྒྱ་མཚོའི་ལྟ་ཁྲིད་དྲན་པ་བཞི་ལྡན་བཅས་བཀྲིན་སྩལ་ཏེ། དངོས་གཞི་དཔལ་གསང་བ་འདུས་པའི་རྡུལ་ཚོན་དཀྱིལ་འཁོར་དང་འབྲེལ་བའི་བཀའ་དབང་དང་། སྨད་རྒྱུད་ཁྲིད་ཆེན་བརྒྱད་ཀྱི་བཤད་ལུང་བཅས་ཀྱི་ཆོས་འབྲེལ་ཐོག མགོན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་པའི་བརྟན་བཞུགས་རྒྱས་པ་ཞིག་བསྟར་འབུལ་ཞུས་པ་དང་། མ་བསྒྲིགས་ལྷུན་གྲུབ་ཀྱིས་མགོན་པོ་མཆོག་ལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༢༧ འཁོར་བའི་དུས་དྲན་སྟབས་འཁེལ་གྱིས་དུས་དེར་སྲུང་བརྩི་གཟབ་རྒྱས་དང་བཅས་སེར་སྐྱ་མང་ཚོགས་བསམ་ཡུལ་ལས་འདས་པའི་དགའ་བདེ་ལོངས་སྤྱོད་ཟད་མི་ཤེས་པའི་སྐལ་བཟང་ཐོབ། བཀའ་ཆོས་ཀྱི་ཕྱག་དཔེ་པར་སྐྲུན་གྱིས་མཚོན་འགྲོ་གྲོན་རྣམས་གྲྭ་ཚང་ལ་དངུལ་རྩིས་ཆད་ལུས་མེད་པར་ཞུས།
ཕྱི་ལོ་ ༢༠༡༦ ལོར་དགའ་ལྡན་ཁྲི་རིན་པོ་ཆེ་རྗེ་བཙུན་བློ་བཟང་བསྟན་འཛིན་མཆོག་ལ་བདེ་མཆོག་གི་བཀའ་དབང་སོགས་ཀྱི་དབང་ལུང་ཁྲིད་རྒྱུན་དཀོན་རིགས་སྩོལ་གནང་ཡོང་བའི་གསོལ་འདེབས་ཇི་ཞུས་ལྟར་ཞལ་བཞེས་བཟང་ཐོབ་བྱུང་སྟེ་རྒྱུད་ཀྱི་ཊཱིཀྐའི་བཤད་ལུང་བཀྲིན་སྩལ་ཅིང་། ཁྲི་ཆེན་མཆོག་སྐུ་ཚེ་ཞབས་པད་ཡུན་བརྟན་གྱི་བརྟན་བཞུགས་བསྟར་འབུལ་ཞུས་པ་བཅས། མདོར་ན་བླ་མ་རྡོ་རྗེ་འཆང་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་དགོངས་གཙོ་བཟུང་དང་། གསང་ཆེན་སྨད་རྒྱུད་གྲྭ་ཚང་གི་ཆོས་སྲིད་ཀྱི་ཞུ་སྒོ་མཐའ་དག་ཆ་ཕྲ་མོ་ཙམ་ཡང་འགལ་མེད་ཐོག་ལྷག་བསམ་དང་བས་འཁུར་ལེན་ཞུས་ཅིང་། མཁན་ཐོག་གི་འཆད་ཉན་དམ་ཆོས་འགྲེལ་པ་བཞི་སྦྲགས་ཀྱིས་གཙོས་འཆད་ཉན་རྣམས་འཚེམས་ལུས་མེད་པར་སྦྱོར་དངོས་མཇུག་གཙང་ལེགས་པར་གནང་། རྣམ་ཀུན་ཨིཊ་ལི་ཨུ་དྷི་ནི་གྲོང་ཁྱེར་དུ་མཁྱེན་བརྩེ་ཆོས་འཁོར་གླིང་དུ་ཕྱི་ནང་སློབ་གཉེར་བ་རྣམས་ལ་ནང་ཆོས་སོགས་ཀྱི་སློབ་ཁྲིད་དང་། བོད་དོན་བདེན་པའི་རྒྱབ་སྐྱོར་ཡོང་སླད་ཞེན་སྐུལ་ཡང་ཡང་མཛད་པའོ། །
༡༠༡] བྲ་ཏི་ལྷུན་གྲུབ་མཁས་བཙུན་དཔལ་བཟང་པོ་ [ སེར་བྱེས་དགེ་བཤེས་དབང་འདུས། ]
རབ་འབྱམས་རྒྱུད་སྡེ་རྒྱ་མཚོའི་དཀའ་བའི་གནད། །འབྱེད་ལ་ཞུམ་པ་མེད་པའི་རྣམ་དཔྱོད་ཀྱིས། །
དོན་གཉིས་ལྷུན་གྲུབ་མཁས་བཙུན་བཟང་གསུམ་གྱི། །བློ་གྲོས་མུན་པ་སེལ་མཛད་གསོལ་བ་འདེབས། །
དེའི་རྗེས་སུ་སེར་བྱེས་བྲ་ཏི་ལྷུན་གྲུབ་མཁས་བཙུན་དཔལ་བཟང་པོ་ [ སེར་བྱེས་དགེ་བཤེས་དབང་འདུས་ ] མཆོག་མཁན་ཁྲིར་ཕེབས་པ་ཡིན། དམ་པ་འདི་ཕྱི་ལོ་ ༡༩༥༩ ལོ་བོད་ལྗོངས་གཙང་གི་ཕྱོགས་ཕག་རི་རུ་བདེ་བར་སྐུ་འཁྲུངས། ༥༩ ལོ་དེར་བོད་ས་ཡོངས་རྫོགས་རྒྱ་དམར་གཞུང་ནས་བཙན་བཟུང་བྱས་པའི་རྐྱེན་གྱིས་ཡབ་ཡུམ་སྐུ་མཆེད་ཕུ་ནུ་དང་བཅས་པ་༧གོང་ས་སྐྱབས་མགོན་ཆེན་པོའི་ཕེབས་རྗེས་སུ་བསྙེགས་ཏེ་རྒྱ་གར་ལ་བྲོས་བྱོལ་དུ་ཕེབས་དགོས་བྱུང་། དེ་ཡང་ཕ་ཡུལ་ཕག་རི་དང་ཉེ་རྒྱུད་འབྲུག་ཡུལ་བརྒྱུད་དེ་རྒྱ་གར་ལྷོ་ཕྱོགས་སྦེལ་ཀོབ་ལུགས་ཟུང་བསམ་གྲུབ་གླིང་གཞིས་ཆགས་སུ་ཕེབས་འབྱོར་གནང་།
དགུང་ལོ་ལྔ་ནས་གཞིས་ཆགས་སློབ་གྲྭར་འཛིན་རིམ་དྲུག་པའི་བར་ཐུན་མོང་བའི་རྨང་གཞིིའི་སློབ་སྦྱོང་རྣམས་གནང་། དགུང་ན་ ༠༧ ལ་གཞིས་གྲོང་གཉིས་པར་ཐེག་ཆེན་གླིང་དགོན་པར་སྐྱབས་རྗེ་བྲག་རྒྱབ་རིན་པོ་ཆེའི་སྐུ་མདུན་དུ་དབུ་སྐྲ་གཙུག་ཕུད་ཕུལ་ཏེ་རབ་ཏུ་བྱུང་། སློབ་གྲྭར་འགྲོ་མུས་ངང་དགུང་ལོ་ ༠༩ ལ་སྐྱབས་རྗེ་བྲག་རྒྱབ་རིན་པོ་ཆེའི་སྐུ་མདུན་ནས་ཚིགས་སྔ་མ་དགེ་ཚུལ་སྡོམ་པ་ཞུས་ཏེ་ཆོས་མིང་ལ་ལྷུན་གྲུབ་མཁས་བཙུན་ཞེས་གནང་། དགུང་ལོ་ ༡༡ ལ་དགེ་བའི་བཤེས་གཉེན་ཆེན་པོ་སེར་བྱེས་དགེ་བཤེས་བློ་བཟང་ཤེས་རབ་དཔལ་བཟང་པོ་མཆོག་མཇལ་ཏེ་སེ་ར་ཐེག་པ་ཆེན་པོའི་གླིང་གི་ཡ་གྱལ་སེར་བྱེས་མཁས་སྙན་གྲྭ་ཚང་དུ་ཆོས་ཞུགས་ཆེད་སྐྱབས་རྗེ་མཁན་རིན་པོ་ཆེ་དོན་གྲུབ་སྟོབས་རྒྱལ་དཔལ་བཟང་པོ་མཆོག་གསར་མཇལ་ཞུས་ཏེ་སེར་བྱེས་མཁས་སྙན་གྲྭ་ཚང་དུ་སྒྲིག་ཞུགས་གནང་།
བྲ་ཏི་ཁང་ཚན་དུ་ཞུགས་ནས་ཁང་ཚན་དེར་བཞུགས་པ་དགེ་བའི་བཤེས་གཉེན་ཆེན་པོ་དགེ་བཤེས་བློ་བཟང་ཤེས་རབ་ [ དགེ་དགེ་སློང་ ] དཔལ་བཟང་པོ་མཆོག་དང་། དགེ་བའི་བཤེས་གཉེན་ཆེན་པོ་ཧར་གདོང་དགེ་བཤེས་བྱམས་པ་བསོད་ནམས་དཔལ་བཟང་པོ་རྣམ་གཉིས་ཀྱི་དྲུང་ནས་རིམ་བཞིན་ཆོས་སྤྱོད་རབ་གསལ། རྒྱན་འཇུག་གཉིས་དང་མཛོད་རྩ། སྤྱོད་འཇུག་ཆེན་མོ། མདོ་སྡེ་རྒྱན། འགྲེལ་བ་དོན་གསལ། དྲང་ངེས་ལེགས་བཤད་སྙིང་པོ་སོགས་དཔེ་ཁྲིད་ཞུས་ཤིང་། སེར་བྱེས་མཁན་ཟུར་རིན་པོ་ཆེ་མཁས་པའི་དབང་པོ་རྗེ་བཙུན་བློ་བཟང་དབང་ཕྱུག་དཔལ་བཟང་པོ་མཆོག་གི་བཀའ་སློབ་ལམ་སྟོན་འོག་རྗེ་བཙུན་གྱི་སྐབས་དང་པོའི་སྤྱི་དོན་ཆ་ཚང་དུས་ཐོག་བློ་འཛིན་གྱིས་རྒྱུགས་འབུལ་ཞུས། དགུང་ལོ་ ༡༤ ལ་སྐྱབས་རྗེ་མཁན་ཟུར་རིན་པོ་ཆེ་རྗེ་བཙུན་བློ་བཟང་དབང་ཕྱུག་དཔལ་བཟང་པོ་མཆོག་དང་། སྐྱབས་རྗེ་དགའ་ལྡན་ཁྲི་ཆེན་རྡོ་རྗེ་འཆང་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག དགེ་བའི་བཤེས་གཉེན་ཆེན་པོ་བྱ་བྲལ་དགེ་བཤེས་བཀྲིས་འབུམ་སོགས་ཀྱི་དྲུང་ནས་བསྡུས་གྲྭ་ནས་བཟུང་མཚན་ཉིད་གཞུང་ཆེན་ཁག་ལ་དཔེ་ཁྲིད་ཞུས། ལྷག་པར་སྐྱབས་རྗེ་དགའ་ལྡན་ཁྲི་ཆེན་རྡོ་རྗེ་འཆང་རྗེ་བཙུན་བློ་བཟང་བསྟན་འཛིན་དཔལ་བཟང་པོའི་དྲུང་ནས་བསྡུས་གྲྭ་ནས་འདུལ་མཛོད་བར་དཔེ་ཁྲིད་ཞུས་ཏེ་གཞུང་ཆེན་བཀའ་པོད་ལྔར་རིམ་བཞིན་ཐོས་བསམ་སློབ་གཉེར་མཛད་དེ་དགེ་ལྡན་ལུགས་བཟང་གཙུག་ལག་སློབ་གཉེར་ཁང་ཆེན་པོའི་རྒྱུགས་སྤྲོད་དུ་བཀའ་རམས་ལོ་རིམ་དང་པོ་ནས་ལྷ་རམས་ལོ་རིམ་གཉིས་པའི་བར་རྒྱུགས་སྤྲོད་དུ་ཞུགས། གཙོ་ཆེན་དགེ་བའི་བཤེས་གཉེན་རྣམས་ཀྱི་བཀའ་དྲིན་དང་ཁྱད་པར་སྐྱོར་དཔོན་དགེ་བཤེས་འཇམ་དཔལ་སེང་གེའི་གཙོས་འཛིན་གྲོགས་རྣམས་ཀྱི་བཟང་པོའི་རོགས་རྐྱེན་ལ་བརྟེན་ནས་སློབ་གཉེར་དང་དགེ་ལུགས་རྒྱུགས་སྤྲོད་མཐར་ཕྱིན་པར་བྱེད་རྒྱུའི་སྐལ་བཟང་གི་གོ་སྐབས་བྱུང་།
མཐར་ ༡༩༩༢ ལོའི་སྨོན་ལམ་ཆེན་མོའི་དབུས་སུ་གྲྭ་སྐོར་དམ་འཇོག་མཛད་ནས་ལོ་དེ་ཉིད་དུ་དཔལ་ལྡན་སྨད་རྒྱུད་གྲྭ་ཚང་དུ་རྒྱུད་ལ་ཞུགས། རྒྱུད་པར་དགེ་བའི་བཤེས་གཉེན་ཆེན་པོ་བྱང་ཟུར་སྔགས་རམས་པ་དགེ་འཕྲིན་ལས་བསྟན་འཛིན་དཔལ་བཟང་པོ་མཆོག་ནས་ཁག་ཐེག་རྒན་གྱི་ཐུགས་འགན་བཞེས་ཤིང་ཁོང་གི་ལམ་སྟོན་དང་བཀྲིན་འོག་ལོ་གཅིག་རིང་ཆོས་ཐོག་ཚུལ་བཞིན་འགྲིམས་པར་མཛད། ཆོས་འགྲིམ་སྐབས་མཁན་ཆེན་རྡོ་རྗེ་འཆང་སེར་བྱེས་ཏྲེ་ཧོར་རྗེ་བཙུན་རྡོ་རྗེ་བཀྲ་ཤིས་དྲུང་ནས་དམ་ཆོས་འགྲེལ་པ་བཞི་སོགས་གསང་སྔགས་ཀྱི་གཞུང་ཆེན་རྣམས་ཀྱི་བཤད་ཁྲིད་ཟབ་མོ་ལེགས་པར་ཐོབ་ཅིང་། བདེ་གསང་འཇིགས་གསུམ་གྱི་བསྐྱེད་རིམ་ཐུགས་ཐོག་ནས་བརྩི་བཞག་ཐོག་གནང་བའང་ལེགས་པར་ཐོབ། ཁྱད་པར་ལོ་དེར་དགེ་བའི་བཤེས་གཉེན་ཆེན་པོ་དགེ་བྱམས་པ་ཆོས་གྲགས་དཔལ་བཟང་པོའི་དྲུང་ནས་སྔགས་ཀྱི་ས་ལམ་དང་། ༧རྗེ་བཙུན་ཤེས་རབ་སེང་གེ་དཔལ་བཟང་པོའི་གསུང་ཊཱིཀྐ་ལེའུ་དང་པོའི་དབུ་ནས་དཔེ་ཁྲིད་ཞུ་རྒྱུའི་སྐལ་བཟང་གི་གོ་སྐབས་ཐོབ།
ཆོས་ཐོག་འགྲིམས་རྗེས་སུ་གདན་སར་རང་ཤག་ཏུ་དགེ་ཕྲུག་རྣམས་ལ་གཞུང་ཆེན་དཔེ་ཁྲིད་མཛད་དེ་བསྟན་པའི་བྱ་བ་མུ་མཐུད་མཛད། ༡༩༩༤ ལོར་སེར་བྱེས་གྲྭ་ཚང་གི་འདུས་མང་ནས་སེར་བྱེས་སློབ་གཉེར་ཁང་གི་སློབ་གཉེར་དགེ་རྒན་དུ་མང་མོས་འོས་འདེམས་ཞུས་པ་ལྟར། ཕྱི་ལོ་ ༡༩༩༦ བར་ལོ་གསུམ་རིང་སློབ་གཉེར་དགེ་རྒན་གྱི་ཐུགས་འགན་བཞེས་ཏེ་སློབ་གཉེར་ཚགས་ཚུད་སླད་རྒྱུགས་སྤྲོད་ཀྱི་རིམ་པ་ཁག་གང་ལེགས་ཡོང་རྒྱུར་ཐུགས་བརྩོན་ཆེ་བསྐྱེད་མཛད། ལྷག་པར་སློབ་གཉེར་ཡར་རྒྱས་ལ་སྨན་པའི་ཆེད་མཁན་རིན་པོ་ཆེ་རྗེ་བཙུན་བྱམས་པ་ཐེག་མཆོག་ལ་དགོངས་སྐོར་བཀའ་སློབ་ཞུས་ཏེ་དབུ་མ་རབ་འབྱམས་པ་དང་ཕར་ཕྱིན་རབ་འབྱམས་པའི་ཕྱག་ཁྱེར་གནང་སྲོལ་གསར་དུ་བཟོ་ཐུབ་པ་བྱུང་ཡོད། ཕྱི་ལོ་ ༢༠༠༠ ལོར་དཔལ་ལྡན་སྨད་རྒྱུད་གྲྭ་ཚང་དུ་ཊཱིཀྐ་ལེའུ་དང་པོའི་སྐྱོར་དཔོན་དང་ཁྲིམས་བདག་དགེ་སྐོས་ཀྱི་མཛད་འགན་བཞེས་ཏེ་གྲྭ་ཚང་རིན་པོ་ཆེའི་བཅའ་ཡིག་དགོངས་དོན་ལས་མི་བརྒལ་བའི་ཁྲིམས་སྒྲིག་གནོན་སྡོམ་ཚུལ་བཞིན་མཛད། ཕྱི་ལོ ༢༠༠༡ ལོར་དཔལ་ལྡན་སྨད་རྒྱུད་གྲྭ་ཚང་དུ་ཁྲིད་ཁང་སྐྱོར་དཔོན་གནང་སྟེ་རྫོགས་རིམ་དམར་ཁྲིད་ཅེས་བྱ་བ་མཁན་པོའི་བརྩི་བཞག་གནང་བ་ལྟར་ཐུགས་ཐོག་ནས་གསུང་དགོས་པར་སྒྲ་དག་གསལ་གསུམ་ངང་ཐོགས་མེད་དུ་སྐྱོར་གནང་མཛད། ཕྱི་ལོ་ ༢༠༠༡ ལོའི་བོད་ཟླ་ ༡༠ ཚེས་ ༢༥ ནས་ལོ་གཅིག་གི་རིང་སེར་བྱེས་མཁན་སྙན་གྲྭ་ཚང་གི་ཁྲིམས་བདག་དགེ་སྐོས་ཀྱི་མཛད་འགན་བཞེས་ཏེ་སེར་བྱེས་གྲྭ་ཚང་གི་སློབ་གཉེར་དང་དེའི་གཞི་རྟེན་ཁྲིམས་ཀྱི་ཕྱག་སྲོལ་བཟང་པོ་རྣམས་མི་ཉམས་རྒྱུན་འཛིན་དང་ཉམས་པ་སླར་གསོའི་ཐོག་ཐུགས་ཁུར་འགྲན་ཟླ་བྲལ་བ་བཞེས།
༢༠༡༦ ལོར་ལྷར་བཅས་སྲིད་བཞིའི་གཙུག་རྒྱན་སྤྱི་ནོར་༧གོང་ས་༧སྐྱབས་མགོན་ཆེན་པོའི་ཞལ་སྔ་ནས་དཔལ་ལྡན་སྨད་རྒྱུད་གྲྭ་ཚང་གི་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་ཕེབས་ལྟར་ཕྱི་ལོ་ ༢༠༡༧ ལོའི་ཕྱི་ ༩ ཚེས་ ༡༧ བར་བླ་མའི་མཛད་འགན་ལོ་གཅིག་བཞེས་གནང་མཛད། [ བླ་མ་གོང་མ་ཀུན་གླིང་ཡོངས་འཛིན་མཆོག་དགོངས་པ་གཤེགས་པའི་རྐྱེན་གྱིས་ལོ་གཅིག་གནང་དགོས་པ་ཆགས་ ] དེ་ནས་༧གོང་ས་༧སྐྱབས་མགོན་ཆེན་པོས་མཁན་པོར་འཕོ་འཐུས་ཀྱི་བཀའ་ཁྲོལ་སྤྱི་ཕེབས་ལྟར་ཕྱི་ལོ་ ༢༠༡༧ བོད་ཟླ་ ༩ ཚེས ༣༠ སྟེ་གཟའ་སྐར་འཕྲོད་སྦྱོར་དགེ་བའི་ཉིན་དཔལ་ལྡན་སྨད་རྒྱུད་གྲྭ་ཚང་གི་མཁན་རབས་ ༡༠༡ པའི་ཁྲིར་ཕེབས་ཏེ་ཁྲི་སྟོན་གྱི་མཛད་སྒོ་རྣམས་ཕྱག་བཞེས་ལྟར་བསྐྱངས། དེ་ནས་བཟུང་སྔར་༧རྗེ་བཙུན་ཤེས་རབ་སེངྒེ་ནས་ཉེ་བར་བཟུང་མཁན་ཆེན་རིམ་བྱོན་གྱི་ཕྱག་བཞེས་ལྟར་དཔེ་ཐོག་ནས་གནང་དགོས་པ་རྒྱུད་ཀྱི་འཆད་ཉན་གཙོ་བོ་དམ་ཆོས་འགྲེལ་པ་བཞི་སྦྲགས་དང་། རྗེའི་གསུང་བདེ་མཆོག་སྦས་དོན་ཀུན་གསལ། མཁས་གྲུབ་རྗེའི་གསུང་བསྐྱེད་རིམ་དངོས་གྲུབ་རྒྱ་མཚོ། རྗེའི་གསུང་རྫོགས་རིམ་རིམ་ལྔ་གསལ་སྒྲོན། དབྱར་གནས་སྐབས་ཁྲིད་ཁང་ནང་རྫོགས་རིམ་མན་ངག་ཁྲིད་ཆེན་བརྒྱད་ཅེས་བྱ་བ་རྣམས་ཕྱག་བཞེས་ལྟར་ལེགས་པར་གནང་། ཐུགས་ཐོག་བརྩི་བཞག་ཐོག་གནང་དགོས་པ་བདེ་གསང་འཇིགས་གསུམ་གའི་བསྐྱེད་རིམ་དང་། ༧རྗེ་བཙུན་ཤེས་རབ་སེངྒའི་རྒྱུད་ཀྱི་ཊཱིཀྐ་དང་། གསོ་སྦྱོང་གི་མདོ་རྒྱས་པ། དབྱར་གནས་སྐབས་རྫོགས་རིམ་དམར་ཁྲིད་ཁྲིད་ཁང་བརྩི་བཞག་ཅེས་བྱ་རྣམས་ཀྱང་ཕྱག་བཞེས་ལྟར་མི་ཉམས་པར་གནང་། དེ་ཡང་ལོ་རེར་གོང་གི་འཆད་ཉན་ཆ་ཚང་རེ་འགྲོ་དགོས་པ་ལྟར་མཛད།
གཞན་ཡང་མཁན་ཆེན་འདིས་གྲྭ་ཚང་རིན་པོ་ཆེའི་ཆོས་འཆད་ཉན་དང་བསླབ་པ་སློབ་གཉེར་ཆོ་ག་ཕྱག་ལེན་དང་བཅས་པ་མི་ཉམས་རྒྱུན་འཛིན་ཡོང་བ་དང་དེའི་ཆོས་མཐུན་དཔལ་འབྱོར་གྱི་འགྲོ་ལུགས་ཐོག་ཐུགས་ཁུར་དང་བཀའ་སློབ་ལམ་སྟོན་ཟབ་མོ་གནང་ཞིང་། འདུས་སྡེ་འདིའི་འཆར་འཕར་གྱི་ཆོས་ཀྱི་མཛད་སྒོ་ཆེན་མོ་ཁག་དང་། ༧གོང་༧སྐྱབས་མགོན་ཆེན་པོ་མཆོག་གྲྭ་ཚང་དུ་གདན་ཞུའི་ལས་དོན་། དེ་མིན་གྱི་ལས་འཆར་ཁོངས་ཨར་ལས་འཛུགས་སྐྲུན་སོགས་ལས་དོན་ཆེ་ཕྲ་ཀུན་ལ་ཐུགས་ཁུར་འགྲན་ཟླ་བྲལ་བ་བཞེས་ཏེ་གྲྭ་ཚང་རིན་པོ་ཆེར་བཀྲིན་ལྷག་པར་ཆེ་བ་མཛད། མཁན་ཆེན་འདིའི་སྐབས་ཕྱི་ལོ་ ༢༠༡༩ ལོར་༧རྗེ་བཙུན་ཤེས་རབ་སེངྒེ་ཉིད་དགེ་ལྔན་གསང་སྔགས་བསྟན་པའི་བདག་པོར་མངའ་གསོལ་ཏེ་བགྲང་བྱ། ༦༠༠། འཁོར་བའི་དུས་སྟོན་གྱི་མཛད་སྒོ་ཆེན་པོ་ཉིན་གསུམ་དཔལ་ལྡན་སྨད་རྒྱུད་གྲྭ་ཚང་དུ་བསྐྱངས་ཤིང་། དྲུག་བརྒྱ་བཞེད་སྟོན་གྱི་མཛད་སྒོའི་སྐབས་མཁན་ཆེན་འདིས་དམིགས་བསལ་གྱི་ཐུགས་ཁུར་འགྲན་ཟླ་བྲལ་བ་བཞེས་ཏེ་ཕྱག་མཛོད་རྣམ་པ་གཙོས་འབྲེལ་ཡོད་ལས་བྱེད་རྣམས་ལ། མཛད་སྒོའི་རིམ་པ་བཀོད་སྒྲིག་དང་བྱེད་སྒོ་ལམ་སྟོན་རྣམས་འཐུས་གཙང་གནང་སྟེ་དྲུག་བརྒྱ་བཞད་སྟོན་གྱི་མཛད་སྒོ་ཆེན་པོ་དེ་སྦྱོར་དངོས་རྗེས་གསུམ་གྲ་རྒྱས་ཕུན་སུམ་ཚོགས་པ་བྱུང་བས་ཡོངས་སུ་གྲགས།
ཕྱི་ལོ་ ༢༠༢༠ ལོ་དེར་འཛམ་གླིང་ནང་ནད་ཡམས་དབང་གིས་དཀའ་ཚེགས་ཀྱི་འཕྲང་ལམ་དོག་པོ་ཞིག་ལ་འགྲོ་དགོས་ཆགས་པའི་སྐབས་མཁན་ཆེན་འདིའི་རྣམ་དཔྱོད་ཀྱི་རྩལ་ལས་ཐོན་པའི་ཐབས་ཤེས་ཀྱིས་དབུ་འཁྲིད་འོག་གྲྭ་ཚང་གི་ཆོས་འཆད་ཉན་དང་བསླབ་པ་སློབ་གཉེར་རྣམས་འཐུས་ཤོར་མེད་པར་ཕེབས་ཐུབ་པ་བྱུང་། དེ་ལྟར་མཁན་པོའི་མཛད་ཁུར་ལོ་གསུམ་ལྷག་ཙམ་གནང་སྟེ་མཐར་ ༢༠༢༠ ཕྱི་ཟླ་ ༡༡ ཚེས ༡༨ ཉིན་ཁྲི་ལས་ཟུར་ཏེ་་མཁན་ཟུར་དུ་འཕོས་གནང་ངོ་།། དེ་ནས་སླར་ཡང་སྤྱི་ནོར་༧གོང་ས་༧སྐྱབས་མགོན་ཆེན་པོའི་ཞལ་སྔ་ནས་ཕྱི་ལོ་ ༢༠༢༠ བོད་ཟླ་༡༠ ཚེས་ ༤ ཉིན་བཀའ་ཡིག་དང་ཕྱག་རྟགས་རིན་པོ་ཆེ་སྤྱི་ཕེབས་དགོངས་དོན་ལྟར་དཔལ་ལྡན་སྲད་རྒྱུད་གྲྭ་ཚང་གི་མཁན་པོར་བསྐོ་བཞག་གནང་སྟེ་སྲད་རྒྱུད་གྲྭ་ཚང་དུ་ཕེབས་ཏེ་དཔལ་ལྡན་སྲད་རྒྱུད་པའི་མཁན་པོའི་མཛད་ཁུར་བཞེས་ནས་འཆད་ཉན་སོགས་མཛད་དོ། །