གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༡༠༢] དགེ་བཤེས་བསྟན་འཛིན་བཟང་པོ།
རྩ་བཤད་ཕྱོགས་མཐུན་རྒྱུད་སྡེ་རྒྱ་མཚོའི་གནད། །མཐའ་དྲུག་ཚུལ་བཞིས་རྒྱས་བཏབ་ཟབ་མོའི་བསྟན། །
རྒྱལ་བའི་དགོངས་པ་ཇི་བཞིན་འཛིན་པ་ལ། །བཟང་པོའི་དཔལ་ལྡན་བླ་མར་གསོལ་བ་འདེབས། །
དེའི་རྗེས་སུ་དགའ་བྱང་དགེ་བཤེས་བསྟན་འཛིན་བཟང་པོ་མཆོག་མཁན་ཁྲིར་ཕེབས་པ་སྟེ། དམ་པ་འདི་རབ་བྱུང་ ༡༦ མེ་ལུག་ཕྱི་ལོ་ ༡༩༦༧ ཕྱི་ཟླ་ ༢ ཚེས་ ༡ ཉིན་འཕགས་ཡུལ་ཧི་མ་ཅཱལ་མངའ་ཁོངས་མ་ན་ལིར། སྟོད་གཞུང་རུ་བ་རུས་མིང་ཞབས་པད་ཡབ་དངོས་གྲུབ་དང་ཡུམ་རས་ལཱ་ཨར་ཅན་ཀརྨ་ཚེ་མཚོ་གཉིས་ཀྱི་སྲས་སུ་སྐུ་འཁྲུངས། ཕྱི་ལོ་༡༩༥༩ལོར་གང་གི་ཡབ་ཡུམ་གཉིས་ཀུ་ལུ་མ་ན་ལིའི་ཕྱོགས་སུ་ལམ་བཟོའི་ངལ་རྩོལ་ལ་བརྟེན་པའི་འཚོ་བའི་འཁོས་ཀ་ཞན་པའི་བརྒྱུད་རིམ་ཁྲོད་དགེ་བའི་བཤེས་གཉེན་མཆོག་ཕྱི་ལོ་ ༡༩༦༧ བོད་ཟླ་ ༡༡ ནང་ཡབ་ཡུམ་ལྷན་རྒྱས་དང་བཅས་མོན་གྷོ་གཞིས་ཆགས་སུ་ཕེབས་ཤིང་སྐུ་ན་རིམ་གྱིས་སོན། ཆུང་བྱིས་པའི་དུས་ནས་སྔོན་གྱི་བག་ཆགས་བཟང་པོ་དང་ལྡན་པ་ཞིག་འདུག་ཅེས་གླེང་། ལྷག་པར་དགེ་བཤེས་སངས་རྒྱས་ཆོས་འཕེལ་མཆོག་གིས་མཚམས་སྦྱོར་དང་འབྲེལ་༧རྒྱལ་བའི་བསྟན་པ་ལ་རབ་ཏུ་བྱུང་རྒྱུའི་ཐུགས་ཐག་བཅད།
ཕྱི་ལོ་ ༡༩༧༧ ལོར་༧འཇམ་མགོན་རྒྱལ་བའི་གདན་ས་འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་གི་ཡ་གྱལ་བྱང་རྩེ་ཐོས་བསམ་ནོར་གླིང་གྲྭ་ཚང་གི་ཆོས་སྒོར་ཞུགས་ཏེ་དགེ་བའི་བཤེས་གཉེན་ཆེན་པོ་སངས་རྒྱས་ཆོས་འཕེལ་མཆོག་གི་དྲུང་ནས་ཡི་གེ་འབྲི་ཀློག་དང་འདོན་རྟ་དབྱངས་སོགས་ལེགས་པར་སྦྱངས། ཕྱི་ལོ་ ༡༩༨༠ ནས་བཟུང་དགེ་བའི་བཤེས་གཉེན་ཆེན་པོ་རྒྱུད་སྨད་མཁན་ཟུར་རྗེ་བཙུན་བློ་བཟང་ངག་དབང་མཆོག་དང་དགེ་བའི་བཤེས་གཉེན་ཆེན་པོ་འདུལ་བ་འབུམ་སྡེའི་མངའ་བདག་མཁན་ཟུར་རིན་པོ་ཆེ་རྗེ་བཙུན་བསོད་ནམས་ཀུན་དགའ་མཆོག་རྣམ་པ་གཉིས་ཀྱིས་དབུས་པའི་དགེ་བའི་བཤེས་གཉེན་དུ་མའི་ཞབས་ལ་གཏུགས་ཏེ་བསྡུས་གྲྭ་ནས་དབུ་མའི་བར་གསན་བསམ་སློབ་གཉེར་མཐར་ཕྱིན་པ་མཛད་ཅིང་རྒྱུགས་སྤྲོད་ཨང་རིམ་དང་པོར་སོན། དེ་སྐབས་འདོན་རྟ་དབྱངས་ལ་སོགས་པ་ལེགས་པར་སྦྱངས་པས་གྲྭ་ཚང་གི་འདོན་བཟང་བ་གནང་ཞིང་ཚོགས་ཆོས་ར་དང་བསླབ་པ་སློབ་གཉེར་ལ་རྩེ་གཅིག་ཏུ་གཞོལ་བ་དང་ཆབས་ཅིག་དགེ་ཕྲུག་མང་དག་ཅིག་ལ་བུམ་པ་གང་བྱོའི་ཚུལ་དུ་ཕྱག་དཔེ་འཁྲིད་གནང་མཛད།
རིང་མོ་ཉིད་ནས་ཐུགས་འདུན་ཡོད་པ་ལྟར༧སྐྱབས་རྗེ་ཟོང་རིན་པོ་ཆེ་རྗེ་བཙུན་བློ་བཟང་བརྩོན་འགྲུས་ཐུབ་བསྟན་རྒྱལ་མཚན་མཆོག་གི་སྐུ་དྲུང་ནས་ཚིགས་སྔ་མ་དགེ་ཚུལ་གྱི་བསླབ་སྡོམ་ཞུས་པ་དང་། ཕྱི་ལོ་ ༡༩༨༦ ལོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བསྙེན་རྫོགས་ཀྱི་མཁན་པོ་བཀྲིན་སྐྱོང་གནང་མཛད་ཅིང་། དགའ་ལྡན་ཁྲི་ཐོག་དགུ་བཅུ་གོ་བརྒྱད་པ་རྗེ་བཙུན་འཇམ་དཔལ་གཞན་ཕན་མཆོག་གིས་བསྙེན་རྫོགས་ཀྱི་ལས་སློབ་དང་དགའ་ལྡན་ཁྲི་ཐོག་བརྒྱ་པ་རྗེ་བཙུན་བློ་བཟང་ཉི་མ་མཆོག་གིས་གསང་སྟོན་སློབ་དཔོན་གནང་བ་བཅས་དགེ་འདུན་གྲང་ཚང་བའི་དབུས་སུ་བསྙེན་པར་རྫོགས་ཏེ་དམ་ཆོས་འདུལ་བའི་བསླབ་ཁྲིམས་རྣམས་མིག་གི་འབྲས་བུ་བཞིན་དུ་སྲུང་བར་མཛད། མ་ཟད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། སྐྱབས་རྗེ་༧ཡོངས་འཛིན་གླིང་རིན་པོ་ཆེ། སྐྱབས་རྗེ་༧ཁྲི་བྱང་རིན་པོ་ཆེ། སྐྱབས་རྗེ་སེར་ཀོང་༧མཚན་ཞབས་རིན་པོ་ཆེ། སྐྱབས་རྗེ་ཟོང་རིན་པོ་ཆེ་ལ་སོགས་པའི་ཚད་ལྡན་གྱི་བླ་མ་དུ་མའི་དྲུང་ནས་དབང་ལུང་ཁྲིད་གསུམ་གྱི་མན་ངག་རྒྱ་ཆེར་གསན་བཞེས་གནང་། ཕྱི་ལོ་ ༡༩༩༡ ནས་བཟུང་ལོ་འཁོར་དྲུག་གི་རིང་ལ་གུས་སྦྱོར་དང་རྟག་སྦྱོར་གྱི་བརྩོན་པའི་སྐྱ་བ་ཟུང་གིས་གྲོགས་བྱས་ཤིང་། ཆོས་རབ་ཏུ་རྣམ་པར་འབྱེད་པའི་ཤེས་རབ་ཀྱི་གྲུར་ཞུགས་ཏེ་བཀའ་པོད་ལྔའི་གཞུང་ལུགས་རྒྱ་མཚོའི་ཕ་མཐར་སོན་པ་དང་། ཕྱི་ལོ་ ༡༩༩༦ ལོར་དགེ་ལུགས་རྒྱུགས་སྤྲོད་ཆེན་མོ་ལེགས་གྲུབ་ཀྱིས་གནས་རིམ་དང་པོར་སོན་པ་མ་ཟད་ལུང་རིགས་སྨྲ་བའི་རྩོད་པའི་ཁྱུ་མཆོག་གི་སྙན་པའི་གྲགས་པ་ཡོངས་སུ་ཁྱབ། ལོ་འདིར་རང་ཅག་བོད་འབངས་ཡོངས་ཀྱི་མགོན་སྐྱབས་མཚུངས་ཟླ་མ་མཆིས་པ་༧སྐྱབས་མགོན་༧རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་སེར་ཀོང་༧མཚན་ཞབས་མཆོག་སྤྲུལ་རིན་པོ་ཆེའི་ཡོངས་འཛིན་དུ་ཕྱག་རྟགས་གསོལ་བསྩལ་གནང་བས། སེར་ཀོང་༧མཚན་ཞབས་མཆོག་སྤྲུལ་རིན་པོ་ཆེའི་ཡོངས་འཛིན་གྱི་མཛད་འགན་བདག་གིར་བཞེས།
ཕྱི་ལོ་ ༡༩༩༧ ཕྱི་ལོ་ ༡༩༩༩ ལོར་སྔགས་ཀྱི་རྩོད་རྒྱུགས་ཕུལ་ཏེ་གནས་རིམ་དང་པོར་སོན། ཕྱི་ལོ་ ༢༠༠༩ ལོར་དཔལ་ལྡན་སྨད་རྒྱུད་གྲྭ་ཚང་དུ་ཊཱིཀྐའི་སྐྱོར་དཔོན་དང་། སྔགས་ཀྱི་དམ་འཇོག་གནང་། དགེ་སྐོས་གནང་བ་བཅས་སྔོན་གྱི་ཕྱག་སྲོལ་བཟང་པོ་རྣམས་ཕྱག་བསྟར་གནང་བའི་རྗེས་སུ་གདན་ས་ཆེན་པོ་དགའ་ལྡན་བྱང་རྩེ་གྲྭ་ཚང་གི་སློབ་གཉེར་བ་འཛིན་གྲྭ་ཁག་བདུན་ལ་དཔེ་འཁྲིད་བསྟར་ཆགས་སུ་བསྐྱངས་གནང་མཛད། ཕྱི་ལོ་ ༢༠༡༨ ཕྱི་ཟླ་ ༢ ཚེས་ ༥ ཉིན་སྤྱི་ནོར་༧གོང་ས་༧སྐྱབས་མགོན་༧རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ནས་གསང་ཆེན་དཔལ་ལྡན་སྨད་རྒྱུད་གྲྭ་ཚང་གི་བླ་མ་དབུ་མ་དབུ་མཛད་ཀྱི་ཕྱག་རྟགས་སྤྱི་ཕེབས་ཀྱིས་སྐལ་བཟང་མངོན་དུ་གྱུར་པར་བརྟེན་ཞལ་སློབ་རྣམས་དད་པའི་སྤུ་ལོང་གཡོ་ཞིང་དགའ་སྤྲོའི་རླབས་ཕྲེང་མཁའ་རུ་འཕྱོ་བ་མ་ཟད་དགེ་བའི་བཤེས་གཉེན་ཆེན་པོ་མཆོག་གི་གཉེན་སྤུན་བལ་ཡུལ་སྤོག་རྭ། རྒྱ་གར་མོན་གྷོ་གཞིས་ཆགས་དང་། ཨ་རིས་གཙོས་པའི་ཕྱི་རྒྱལ་ཡུལ་གྲུ་ཁག་ལ་ཡོད་པའི་གཞུང་རུ་བ་གཉེན་སྤུན་རྣམས་ཀྱང་གང་ཉིད་ཀྱི་གསང་གསུམ་ཡོན་ཏན་ལ་ཡི་རང་ཞིང་དགའ་དད་སྤྲོ་གསུམ་གྱིས་སྔ་ཕྱི་བར་གསུམ་གྱི་མཛད་འཆར་ལམ་ལྷོང་གེགས་མེད་ལེགས་འགྲུབ་ཡོང་བའི་སྨོན་འདུན་དང་། མཛད་འཆར་དང་འབྲེལ་བའི་ཉེ་བར་མཁོ་བའི་མཐུན་རྐྱེན་འབྱོར་སྒྲུབ་ཆེད་ཚང་མས་མ་བསྐུལ་དང་བླངས་ཀྱིས་རང་རང་སོ་སོའི་བློས་བཅད་གྱི་འབུལ་མཚོན་གྱ་ནོམ་པར་ཕུལ།
དེ་འབྲེལ་ཕྱི་ལོ་ ༢༠༡༨ ཕྱི་ཟླ་ ༣ ཚེས་ ༡༧ ཉིན་ཕ་ར་ཁང་ཚན་དུ་སློབ་མ་ཡོངས་ཀྱིས་གནས་བརྟན་ཕྱག་མཆོད་ཀྱི་ཆོ་གའི་སྒོ་ནས་དགེ་བའི་བཤེས་གཉེན་མཆོག་སྐུ་ཚེ་བརྟན་ཅིང་མཛད་འཕྲིན་རྒྱས་ཆེད་ཤིས་བརྗོད་བསྔོ་སྨོན་དང་སྐལ་བཟང་རྟེན་འབྲེལ་གྱི་མཛད་སྒོ་སྲུང་བརྩི་ཞུས་ཤིང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་གཟིམ་ཆུང་དུ་གསར་མཇལ་བཅར་ཞུས་ཏེ་ཕྱི་ལོ་ ༢༠༡༨ ཕྱི་ཟླ་ ༣ ཚེས་ ༢༩ ཉིན་གསང་ཆེན་དཔལ་ལྡན་སྨད་རྒྱུད་གྲྭ་ཚང་དུ་བླ་མ་དབུ་མཛད་ཀྱི་ཁྲི་་སྟོན་རྟེན་འབྲེལ་མཛད་སྒོ་གཟབ་རྒྱས་གྲུབ་པའི་རྗེས་སུ་གྲྭ་ཚང་རིན་པོ་ཆེའི་ཕྱག་སྲོལ་བཞིན་མདོ་སྔགས་ཀྱི་འཆད་ཉན་ལ་སོགས་པ་མི་ཉམས་རྒྱུན་འཛིན་གནང་སྟེ་ལོ་གསུམ་རིང་བླ་མ་དབུ་མཛད་ཀྱི་མཛད་འགན་འཐུས་ཚང་བཞེས།
དེའི་རྗེས་སུ་བོད་རྒྱལ་ལོ་ ༢༡༤༧ རབ་བྱུང་བཅུ་བདུན་བའི་ལྕགས་བྱི་ཟླ་བ་ ༩ ཚེས་ ༤ དང་ཕྱི་ལོ་ ༢༠༢༠ ཟླ་བ་ ༡༠ ཚེས་ ༢༠ ཉིན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནས་དཔལ་ལྡན་སྨད་རྒྱུད་གྲྭ་ཚང་གི་མཁན་ཐོག་བརྒྱ་དང་གཉིས་པར་བསྐོ་བཞག་གི་ཕྱག་རྟགས་རིན་པོ་ཆེ་བསྩལ་གནང་བ་དང་། སྨད་རྒྱུད་གྲྭ་ཚང་གི་མཁན་པོའི་ཁྲི་འདོན་གྱི་མཛད་སྒོ་སོགས་ལེགས་པར་གྲུབ་རྗེས་གྲྭ་ཚང་རིན་པོ་ཆེའི་ཕྱག་སྲོལ་བཟང་པོ་སྟེ་གསང་སྔགས་ཀྱི་འཆད་ཉན་མི་ཉམས་རྒྱུན་གནས་ཡོད་པ་བཞིན་འགྲེལ་པ་བཞི་སྦྲགས་དང་། སྔགས་རིམ་ཆེན་མོ། རིམ་ལྔ་གསལ་སྒྲོན་སོགས་བསྐྱེད་རྫོགས་ཀྱི་འཆད་ཉན་བསྐྱངསསཏེ་བསྟན་འགྲོའི་དོན་རླབས་པོ་ཆེ་མཛད་པ་དང་། གཞན་ཡང་མཁན་ཆེན་འདིས་༧གོང་ས་༧སྐྱབས་མགོན་ཆེན་པོར་བརྟན་བཞུགས་བསྟར་འབུལ་སྐབས་མཎྜལ་ལྗགས་བཤད་ཕུལ་ཡོད་པ་སྟེ། དེ་ཡང་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་དཔལ་ལྡན་རྒྱུད་གྲྭ་སྨད་སྟོད་གཉིས་གཙོས་གདུལ་བྱ་སྟོང་ཚོ་མང་པོར་དཔལ་འཁོར་ལོ་བདེ་མཆོག་གི་དབང་ཆེན་སོགས་ཆོས་འབྲེལ་རྗེས་འབྲེལ། བོད་རྒྱལ་ལོ་ ༢༡༤༩ རབ་གནས་ཆུ་སྟག་ལོ་དང་། ཕྱི་ལོ་ ༢༠༢༢ ཟླ་བ་ ༠༧ ཚེས་ ༡༠ དགེ་བར་གསང་ཆེན་རྒྱུད་གྲྭ་སྨད་སྟོད་ཟུང་ནས་ཇི་ལྟར་གསོལ་བ་བཏབ་པ་བཞིན། འཇིག་རྟེན་ཞི་བདེའི་དད་དཔོན་ཆེན་པོ། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་༧གོང་ས་༧སྐྱབས་མགོན་༧རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་བརྟན་བཞུགས་བསྟར་འབུལ་སྐབས། མཁན་ཆེན་འདིས་མཎྜལ་ལྗགས་བཤད་འབུལ་རྒྱུའི་སྐལ་བཟང་གི་གོ་སྐབས་བདག་གིར་བཞེས་དུས་ཕུན་སུམ་ཚོགས་པ་ལྔ་ལྡན་ཏེ། སྟོན་པ་ཕུན་སུམ་ཚོགས་པ་ས་སྟེང་༧རྒྱལ་བསྟན་ཡོངས་རྫོགས་ཀྱི་མངའ་བདག་༧གོང་ས་༧སྐྱབས་མགོན་༧རྒྱལ་དབང་མཆོག་དང་། གནས་ཕུན་སུམ་ཚོགས་པ་རྡ་ས་ཐེག་ཆེན་ཆོས་གླིང་གཙུག་ལག་ཁང་། ཆོས་སུམ་ཚོགས་པ་དཔལ་འཁོར་ལོ་བདེ་མཆོག་གི་དབང་ཆེན་སོགས། འཁོར་ཕུན་སུམ་ཚོགས་པ་སྡེ་སྣོད་འཛིན་པ་བརྒྱ་ཕྲག་དུ་མས་བསྐོར་བ། མཎྜལ་བཤད་པ་ཕུན་སུམ་ཚོགས་པ་རྗོད་བྱེད་ཚིག་བཟང་ཞིང་སྙན་ལ་བརྗོད་བྱ་༧རྒྱལ་དབང་མཆོག་སྐུ་བལྟམས་ནས་ད་ལྟའི་བར་བསམ་གྱིས་མི་ཁྱབ་པའི་མཛད་པ་འཕྲིན་ལས་ཀྱི་དོན་བསྡུས་ལ་སྙིང་པོ་ཚང་བ་ཕུལ་ཏེ་༧སྐྱབས་མགོན་༧རྒྱལ་དབང་མཆོག་ཐུགས་དགྱེས་ཤིང་བསྟན་འགྲོའི་མགོན་དུ་སྐུ་ཚེ་ཞབས་པད་རིང་དུ་བརྟན་རྒྱུའི་ཞལ་བཞེས་གསུང་གི་བདུད་རྩི་སྤྱི་ཕེབས་བྱུང་བ་ལགས་སོ། །དེ་ལྟར་ལོ་གསུམ་མཛད་ཁུར་ལེགས་པར་གཙང་ཏེ་ཁྲི་མཇུག་གི་ཞུ་བྱ་གྲྭ་ཚང་རང་གི་ཕྱག་བཞེས་ལྟར་བསྐྱངས་ཏེ་གདན་ས་དགའ་ལྡན་དུ་མཁན་ཟུར་གྱི་མཚན་གནས་ངང་དཔེ་ཁྲིད་སོགས་བསྟན་པའི་བྱ་བ་མཛད་དེ་བཞུགས་སོ། །
༡༠༣] དཔེ་ཐུབ་དགེ་བཤེས་ངག་དབང་སངས་རྒྱས།
དེའི་རྗེས་སུ་སེར་བྱེས་དཔེ་ཐུབ་དགེ་བཤེས་ངག་དབང་སངས་རྒྱས་མཆོག་མཁན་ཁྲིར་ཕེབས་པ་སྟེ། དམ་པ་འདི་ཕྱི་ལོ་ ༡༩༦༢ ལོར་ལ་དྭགས་ས་ཕུད་ཅེས་པའི་གྲོང་ཚོ་ཞིག་ཏུ་ཡབ་ཚེ་དབང་ནོར་འཕེལ་དང་། ཡུམ་ཚེ་རིང་དབང་མོ་གཉིས་ཀྱི་སྲས་སུ་སྐུ་འཁྲུངས། ཆུང་གཞོན་ནུའི་དུས་ནས་རྒྱལ་བའི་བསྟན་པ་ལ་རབ་ཏུ་བྱུང་ཆེད་ཕྱི་ལོ་ ༡༩༧༩ ལོར་གདན་ས་ཆེན་པོ་སེ་ར་ཐེག་ཆེན་གླིང་གི་ཡ་གྱལ་སེར་བྱེས་མཁས་སྙན་གྲྭ་ཚང་དུ་ཆོས་སྒོར་ཞུགས། བསྡུས་གྲྭ་ནས་བཟུང་སྟེ་ནང་དོན་རིག་པའི་གཞུང་ལ་སློབ་གཉེར་འགྲུས་པར་མཛད་དེ་འཛིན་གྲྭ་རིམ་པར་འཕོས།
ལྷག་པར་རང་ཅག་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། འཇམ་མགོན་རྒྱལ་བའི་རྒྱལ་ཚབ་དགའ་ལྡན་རིན་པོ་ཆེ་དང་། ཡོངས་ཀྱི་དགེ་བའི་བཤེས་གཉེན་ཆེན་པོ་སེར་བྱེས་མཁན་ཟུར་བློ་བཟང་ཚེ་རིང་། རྒྱུད་སྨད་མཁན་ཟུར་རིན་པོ་ཆེ་རྡོ་རྗེ་བཀྲ་ཤིས། སེར་བྱེས་མཁན་ཟུར་རིན་པོ་ཆེ་རྒན་བློ་བཟང་བདེ་ལེགས། དགེ་བའི་བཤེས་གཉེན་ཆེན་པོ་དགེ་ཀརྨ་བསོད་ནམས་མཆོག་ལ་སོགས་པའི་བཤེས་གཉེན་དུ་མ་བསམ་སྦྱོར་གཉིས་ཀྱིས་ཚུལ་བཞིན་བསྟེན་ནས་གཞུང་ཆེན་མོའི་སློབ་གཉེར་ཚུལ་བཞིན་མཛད་པ་མ་ཟད་གཞུང་རྙིང་སྐབས་སུ། ཕར་ཕྱིན་སྦྱོར་ལམ་གྱི་རིགས་ཀྱི་ཚོགས་ལངས་བཞེངས། དེ་ནས་མུ་མཐུད་མཚན་ལྡན་གྱི་བཤེས་གཉེན་རྣམས་ཀྱི་དྲུང་ནས་གཞུང་ཆེན་བཀའ་པོད་ལྔའི་བཤད་ཁྲིད་ཀྱི་གཙོས་དབང་ལུང་མན་ངག་གི་གདམས་པ་རྣམས་ལ་ཐུགས་བརྩོན་ཆེན་པོས་གསན་བསམ་གྱི་སྒོ་ནས་སྦྱངས་པ་མཐར་ཕྱིན་པར་མཛད།
ཕྱི་ལོ་ ༡༠༩༢ ནས་དམ་པ་གང་ཉིད་ཀྱིས་སློབ་གཉེར་གནང་བཞིན་པའི་སྐུ་ཞོར་དུ་གང་ཉིད་ཀྱི་ནུས་པ་ཅི་ལྕོགས་ཀྱིས་སློབ་གཉེར་བ་གཞན་ལ་དཔེ་ཁྲིད་དབུ་འཛུགས་བསྐྱངས་ཤིང་། དེ་ནས་བཟུང་སྐུའི་ངལ་བ་ཁྱད་དུ་སད་དེ་སྐུ་ངལ་འཛེམས་མེད་ཀྱིས་གཞུང་ཆེན་བཀའ་པོད་ལྔས་མཚོན་པའི་མདོ་སྔགས་ཀྱི་གཞུང་མང་པོ་ཉི་མ་རེ་ལ་ཆུ་ཚོད་བརྒྱད་ལྷག་ལ་ཆད་མེད་དུ་དཔེ་ཁྲིད་གནང་སྟེ་དཔེ་ཁྲིད་རྒན་ཞེས་མཚན་སྙན་ཆེས་ཆེར་འབར། ཁྱད་པར་མཛོད་འདུལ་གྱི་གཞུང་ཆེན་པོ་ཡོངས་རྫོགས་མགོ་མཇུག་ཚང་བར་ལན་མང་པོར་དཔེ་ཁྲིད་རྒྱ་ཆེར་མཛད་དེ་བསྟན་པ་ལ་བྱ་བ་རྔོ་ཐོགས་པར་གནང་། ཕྱི་ལོ་ ༡༩༩༥ ལོར་དགེ་ལུགས་རྒྱུགས་སྤྲོད་དུ་ཞུགས་ནས་ལོ་དྲུག་རིང་མཉམ་ཞུགས་གནང་སྟེ་མཐར་ཕྱི་ལོ་ ༢༠༠༠ ལོའི་སེ་ར་ཐེག་ཆེན་གླིང་དུ་འདུལ་བ་གཞི་སྨད་ཀྱི་རིགས་ཆེན་ཚོགས་ལངས་བཞེངས་ཏེ་སྐལ་བཟང་གི་གོ་སྐབས་བདག་གིར་བཞེས། ལོ་དེར་གདན་ས་གསུམ་གྱི་ལྷ་རམས་རྒྱུགས་སྤྲོད་ཀྱི་མཇུག་འབྲས་སུ་ལྷ་རམས་ཨང་གཉིས་བའི་མཚན་གནས་སོན། དགེ་བཤེས་བཏང་བའི་རྗེས་སུ་ཡང་སྔར་རྒྱུན་བཞིན་དཔེ་ཁྲིད་མུ་མཐུད་གནང་། ཕྱི་ལོ་ ༢༠༠༡ ལོར་དཔལ་ལྡན་སྨད་རྒྱུད་གྲྭ་ཚང་དུ་རྒྱུད་ལ་ཞུགས་ཏེ་ལོ་གཅིག་ཆོས་ཐོག་འགྲིམས་ནས་དམ་ཆོས་འགྲེལ་པ་བཞི་སྦྲགས་ཀྱིས་གཙོོས་གསང་ཆེན་རྒྱུད་སྡེ་བཞི་ལ་གསན་བསམ་རྒྱ་ཆེར་མཛད།
ལོ་དེའི་དགེ་བཤེས་རྣམས་ཀྱི་སྔགས་ཀྱི་རྩོད་རྒྱུགས་སྐབས་རྒྱུགས་འབྲས་ཨང་དང་པོའི་མཚན་གནས་སོན། སྐབས་ཤིག་རྫོང་དཀར་ཆོས་སྡེ་སོགས་ལའང་བདུན་ཕྲག་རེར་དཔེ་ཁྲིད་གནང་། ཕྱི་ལོ་ ༢༠༡༣ ལོར་ལོ་གཅིག་རིང་སེར་བྱེས་དགེ་སྐོས་ཀྱི་ཐུགས་འགན་བཞེས་ནས་༧རྒྱལ་བའི་བསྟན་པ་ཉིད་ཐུགས་ལ་བཅངས་ནས་དགེ་འདུན་གྱི་ནང་ཁྲིམས་དང་གྲྭ་ཚང་གི་བཅའ་ཁྲིམས་ཐོག་ལས་འབྲས་དཔང་པོར་བཞག་སྟེ་ལས་དོན་མཐའ་ཆོད་པར་མཛད། ཕྱི་ལོ་ ༢༠༡༧ ལོར་སྨད་རྒྱུད་གྲྭ་ཚང་གི་དགེ་བསྐོས་བཞེངས་ཏེ་གོང་བཞིན་སྒྲིག་ལམ་གནོན་སྡོམ་སོགས་ཐུགས་ཁུར་འགྲན་ཟླ་བྲལ་བ་བཞེས། དེ་ནས་བླ་བའི་ཕྱག་རྟགས་མ་ཕེབས་བར་སྔར་བཞིན་སློབ་མ་རྣམས་ལ་གཞུང་ཆེན་དཔེ་ཁྲིད་རྒྱུན་སྐྱོང་རྒྱ་ཆེར་མཛད་བཞིན་པའི་མུར། ཕྱི་ལོ་ ༢༠༢༡ ཕྱི་ཟླ་ ༠༢ ཚེས་ཤར་ལ་༧གོང་ས་༧སྐྱབས་མགོན་ཆེན་པོའི་ཞལ་སྔ་ནས་དམ་པ་འདི་ཉིད་ལ་དཔལ་ལྡན་སྨད་རྒྱུུད་པའི་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་སྤྱི་བོའི་རྒྱན་དུ་ཕེབས། དེ་ནས་རིང་པོར་མི་ཐོགས་པར་ཕྱི་ལོ་ ༢༠༢༡ ཕྱི་ཟླ་ ༠༣ ཚེས་ ༡༧ གཟའ་སྐར་འཕྲོད་སྦྱོར་རབ་ཏུ་དགེ་བའི་ཉིན་རྒྱུད་པའི་ཕྱག་སྲོལ་བཞིན་བླ་མ་དབུ་མཛད་ཀྱི་ཁྲི་སྟོན་མཛད། བླ་མ་དབུ་མཛད་ནི་གྲྭ་ཚང་འདིའི་ཆོས་སྲིད་གཉིས་ཀྱི་བདག་པོ་ཡིན་ཞེས་གསུང་སྲོལ་ཡོད་པ་ལྟར། ཆོས་ཕྱོགས་ནས་འདུས་ཚོགས་སུ་རྡོ་རྗེ་སློབ་དཔོན་མཛད་རྒྱུ་དང་བསླབ་པ་སློབ་གཉེར་དང་སྒྲིག་ལམ་གཟིགས་རྟོགས་མཛད་རྒྱུ།
ལྷག་པར་མཁན་ཆེན་འདིའི་ཟབ་ཡངས་དཀྱེལ་ཆེའི་དགོངས་གཞི་དང་འབྲེལ་ནས་བཀའ་སློབ་ལམ་སྟོན་གནང་དོན་བཞིན། ཊཱིཀྐའི་དགུན་ཆོས་ཆེན་མོ་ཞེས་ཞུ་བ་ཞིག་གསར་འཛུགས་བསྐྱངས་པ་སྟེ། དམིགས་བསལ་བཀའ་རམས་བསྐྱེད་རིམ་གཉིས་ཚོགས་ཀྱིས་ཊཱིཀྐའི་དགུན་ཆོས་ཆེན་མོ་ཞེས་ལོ་བསྟར་ཆགས་སུ་འཚོག་རྒྱུ་དང་། དེ་ནི་དཔལ་ལྡན་སྨད་རྒྱུད་པ་རང་གི་སྔགས་ཕྱོགས་ཡིག་ཆ་ཐུན་མོང་མ་ཡིན་པ་༧རྗེ་བཙུན་ཤེས་རབ་སེངྒེའི་ཊཱིཀྐ་ཆེན་པོ་ཡིན་པ་ལྟར། རྒྱུན་ལྡན་ཊཱིཀྐའི་འཆན་ཉན་དང་སློབ་གཉེར་ཡོད་བཞིན་པའི་སྟེང་། ཊཱིཀྐའི་དགུན་ཆོས་ཆེན་མོ་གསར་གཏོད་གནང་ཡོད། དེ་ཡང་ཕྱི་ལོ་ ༢༠༢༡ ལོར་འབྲེལ་ཡོད་སློབ་སྤྱིས་མཚོན་པས་གྲྭ་ཚང་འདིའི་ཤེས་ཡོན་ལྷན་ཚོགས་བསྐྱངས་ཏེ་ལྷན་ཚོགས་དེའི་ཐོག་ནས་གཏན་འབེབས་གནང་ཞིང་། ཕྱི་ལོ་ ༢༠༢༡ ལོ་དེ་ཉིད་དུ་དངོས་སུ་ལག་བསྟར་གནང་སྟེ་དགུན་ཆོས་ཐེངས་དང་པོའི་མཇུག་བསྡོམས་སུ་ཊཱིཀྐའི་མཚན་ཕུད་དམ་བཅའ་ཚོགས་པ་དང་དེའི་དབུ་བཞུགས་སུ་དགའ་ལྡན་ཁྲི་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གདན་ཞུ་གནང་ཡོད། མ་འོངས་པར་ཊཱིཀྐའི་དགུན་ཆོས་ཆེན་མོ་འདི་བཞིན་མུ་མཐུད་འཚོག་རྒྱུ་དང་། དེའི་མཐུན་རྐྱེན་སླད་སློབ་སྤྱི་རིམ་ཕེབས་སོ་སོའི་ངོས་ནས་ཐེབས་རྩ་འཇོག་དགོས་ཀྱི་གྲོས་ཆོད་ཀྱང་བཞག །
སྲིད་ཕྱོགས་ནས་ཕྱི་ནང་ལ་འབྲེལ་ལམ་དམ་ཟབ་གནང་སྟེ་དཔེར་ན་མཁན་ཆེན་འདི་བླ་མའི་ཁྲིར་མ་འཁོད་གོང་ནས་གྲྭ་ཚང་འདིར་ཐུགས་ཁུར་བཞེས་གནང་གིས་ཕྱི་རྒྱལ་ཨེ་ཊ་ལི་བ་ཕི་ལི་པོ་ཞུ་བ་གཏོང་ཕོད་འཇོན་ཐང་ཅན་ཞིག་ཡོད་པ་རྒྱུན་དུ་ཁོང་དང་ཐུགས་གཤིན་ཆེ་བ་ཡོད་པར་བརྟེན། ད་ལྟ་གྲྭ་ཚང་ལ་ལོ་གཅིག་ཆོས་ཐོག་འགྲིམ་མཁན་དགེ་བཤེས་བཞུགས་ཤག་མེད་པའི་སྐུ་ངལ་ཡོད་སྟབས། བཞུགས་ཤག་གསར་བཞེངས་ཆེད་སྐུ་ངལ་འཛེམས་མེད་ཀྱིས་ཐབས་འཚོལ་མཛད་འབྲས་སྐབས་དེའི་གྲྭ་ཚང་མཁན་རིན་པོ་ཆེ་དགེ་དབང་འདུས་བརྒྱུད་ཕྱག་མཛོད་དང་འབྲེལ་ལམ་གྱིས་དགེ་བཤེས་བཞུགས་ཤག་ཐོག་བརྩེགས་གསུམ་ལྡན་ནང་གི་འཛིན་ཆས་བཅས་ལེགས་པར་གསར་བཞེངས་ཐུབ་པ་བྱུང་ཡོད། རྗེས་སུ་ཡང་དམ་པ་འདི་མཁན་བླའི་སྐབས་སློབ་གཉེར་ཁང་གི་འཛིན་ཁང་དང་གྲྭ་ཤག་ཁང་ཆེན་ཁག་སྤུས་ལེགས་སུ་གསར་རྒྱག་ལེགས་གྲུབ་བྱུང་བ་དང་། ཁྱད་པར་གྲྭ་ཚང་ལ་དེ་སྔ་དཔེ་མཛོད་མཚན་ཉིད་ཚང་བ་མེད་སྟབས་མཁན་ཆེན་འདིས་བཀའ་སློབ་ལམ་སྟོན་དང་མཐུན་རྐྱེན་མཁོ་སྒྲུབ་སོགས་ལའང་ཐུགས་ཁུར་བཞེས་ཏེ་ད་ཆ་དཔེ་མཛོད་ཕྱིའི་སྣོད་དང་ནང་གི་ཕྱག་དཔེ་སོགས་ཡར་རྒྱས་གོ་འཕེལ་དུ་བཏང་གནང་ཡོད། ལྷག་པར་་མཁན་ཆེན་འདིས་གྲྭ་ཚང་གི་ཕྱི་ནང་ཁོར་ཡུག་གཙང་བཟོ་དང་། དགེ་འདུན་གཙོ་གྱུར་མང་ཚོགས་ཀྱི་འཕྲོད་བཞེས་སླད་རྒྱ་གར་མངའ་སྡེ་གཞུང་ལ་ཞུ་སྐུལ་སོགས་ཐབས་བྱུས་སྣ་ཚོགས་མཛད་དེ་གྲྭ་ཚང་གི་མཐའ་སྐོར་ལ་གླིང་སྐོར་ཕེབས་ཡུལ་ལམ་ཆེན་གསར་བསྐྲུན་མཛད་དེ་མང་ཚོགས་ཀྱི་འཕྲོད་བཞེས་ལ་ཕན་ཐོགས་ངེས་ཅན་བྱུང་བ་སོགས་བཀྲིན་ཆེ།
མཐར་བོད་རྒྱལ་ལོ་ ༢༡༥༠ ཟླ་བ་ ༠༨ ཚེས་ ༣༠། ཕྱི་ལོ་ ༢༠༢༣ ཕྱི་ཟླ་ ༡༠ ཚེས་ ༡༤ ཏེ་གཟའ་སྐར་འཕྲོད་འབྱོར་རབ་ཏུ་དགེ་བའི་ཉིན་དཔལ་ལྡན་སྨད་རྒྱུད་པའི་མཁན་རབས་ ༡༠༣ པའི་ཁྲི་འཕང་མཐོན་པོར་མངའ་གསོལ་ཏེ་༧རྒྱལ་བསྟན་སྤྱི་དང་བྱེ་བྲག་གྲྭ་ཚང་འདིའི་གསང་སྔགས་ཀྱི་འཆད་ཉན་དམ་ཆོས་འགྲེལ་པ་བཞི་སྦྲགས་དང་བདེ་གསང་འཇིགས་གསུམ་ཀྱི་བསྐྱེད་རྫོགས། རྗེ་བཙུན་ཤེས་རབ་སེངྒའི་རྒྱུད་ཀྱི་ཊཱིཀྐ་སོགས་འཆད་ཉན་རྣམས་ཆད་ལུས་མེད་པར་བསྟན་པའི་མིག་རྒྱན་དུ་འགྲོ་བར་མཛད་པའོ།། [མཆན། བརྒྱུད་འདེབས་ཚིགས་བཅད་རེ་རེ་བཞིན་མཁན་པོ་གོང་མ་འཕོས་མཚམས་སུ་འོག་མའི་བླ་མ་དབུ་མཛད་ནས་ཕུལ་ཏེ་བརྒྱུད་རིམ་ནང་བཅུག་དགོས་པ་ཡིན། འོན་ཀྱང་འཆད་ཉན་ལོ་དུས་ཚང་བར་མཛད་ཁོམ་མ་བྱུང་རྣམས་ཀྱི་བརྒྱུད་འདེབས་ནས་བཅུག་སྲོལ་མེད། ཕྱིས་ནས་མཁན་ཁྲིར་རིམ་བྱོན་གྱི་ལོ་རྒྱུས་རྣམ་ཐར་མཚམས་འདི་ནས་བསྣན་དགོས་སོ། །]